SE IXTLAMATKETL katli kitlachilia tlaj tlakiauis o amo, nochipa kitlachilijtok se tepostli kampa nesi tlen panos ipan se tonali. Kema kiita monechkauia se chikauak ajakatl uan miak atl, ya tlauel motekipachoua uan nimantsi kinmatiltia nochi maseualmej katli itstokej kampa panos nopa chikauak ajakatl, uan miakpa kiampa kichiua pampa kineki ma momanauikaj.

Jehová nojkia kiampa kichiua uan kinmatiltia nochi maseualmej monechkauia se tlamantli kejuak eliskia se “chikauak ajakatl” tlen nelia tlauel amo kuali. ¿Kenijkatsa kinmatiltia? ¿Kenke timotemachiaj kikaua ma pano tonali uan kiampa maseualmej ma kiitakaj kenijkatsa momanauisej? Tlaj tijnekij tijmatisej ni, achtoui ma tikitakaj kenijkatsa uejkajkia Jehová kinmatiltik itekipanojkauaj tlen panoskia.

Uejkajkia, Jehová miakpa kiniljuik kintlatsakuiltiskia nochi katli kiixpanoskiaj itlanauatiljuaj (Prov. 10:25; Jer. 30:23). Achtoui san kinmatiltiyaya uan amo nima kintlatsakuiltiyaya uan kiniljuiyaya tlake tlamantli monekiyaya kichiuasej uan kiampa kiyolpakiltiskiaj (2 Rey. 17:12-15; Neh. 9:29, 30). Kinekiyaya kinyololinis ma kichiuakaj tlen kuali, yeka kintitlaniliyaya itekipanojkauaj katli amo kitlauelkajtoyaj ma kinmatiltikaj nochi tlen kinpanoskia uan ma kiniljuikaj monekiyaya nimantsi kipatlasej nochi tlen kichiuayayaj (Amós 3:7).

Se tlen nopa tlakamej elki Noé. Ya amo majmajki uan miak xiuitl kinmatiltik nochi katli momekatiyayaj uan katli mosisiniyayaj nechka uetsiskia miak atl tlen kitemitiskia Tlaltipaktli (Gén. 6:9-13, 17). Uan nojkia kiniljuik ueliskiaj momanauisej. Noé kiixmatkej kej se tlakatl tlen itstoya “xitlauak iixtla toTeko” pampa tlauel tlajtolmoyajki (2 Ped. 2:5).

Maske Noé tlauel kichijki kampeka, maseualmej amo tlaneltokakej ipan toTeotsij uan amo kitlakakilijkej tlen kinmatiltijkej. Yeka, nochi mijkej kema “ualajki nopa tlauelatl uan kinuikak” (Mat. 24:39; Heb. 11:7). Amo aka ueliskia motechtis, pampa toTeotsij nochi kinmatiltik.

Uan maske kemantika Jehová amo tlauel uejkajki kinmatiltia kenijkatsa kintlatsakuiltiskia, kena kikajki ma pano tonali pampa kinekiyaya maseualmej ma moyolkuepakaj. Kiampa panok kema kititlanki matlaktli amo kuali tlamantli ipan Egipto. Ma tikilnamikikaj tlake panok kema nechka panoskia nopa chikompa amo kuali tlamantli, kema uetski uejueyi tesiuitl. Jehová kintitlanki Moisés uan Aarón ma kinmatiltikaj faraón uan itekipanojkauaj. Tlaj nopa uejueyi tesiuitl uetsiskia ualmostla, ¿kinaxiliskia tonali uan kiampa ueliskiaj momanauisej? Biblia kiijtoua: “Uan sekij itlapaleuijkauaj faraón kineltokakej tlen toTeko kiijtok uan moisiuiltijkej kintlalijkej kalijtik nochi inintlapialjuaj uan inintekipanojkauaj tlen kinkojtoyaj. Pero itstoyaj sekij tlen san kiauilmatkej itlajtol toTeko tlen Moisés kiniljuijtoya, uan kinkajkej ipan kuatitlamitl uan axkintsajkej kalijtik” (Éx. 9:18-21). Ni kinextia toTeotsij amo nimantsi kintlatsakuiltik uan kikajki maseualmej ma kiitakaj kenijkatsa momanauiskiaj, yeka katli kitlakakilijkej amo tleno kinpanok.

ToTeotsij nojkia kinmatiltik faraón uan itekipanojkauaj tlake panoskia ika nopa matlaktli amo kuali tlamantli. Maske kinmatiltik, inijuantij mouiuichijkej uan amo tleno kichijkej (Éx. 4:22, 23). Yeka, mijkej ininachtouikoneuaj. ¡Tlauel amo kuali tlen kinpanok! (Éx. 11:4-10; 12:29). ¿Kinpanok nopa pampa amo kipixkej miak tonali? Amo. Ni tijmatij pampa Moisés nojkia kinmatiltik israeleuanij tlake panoskia ika nopa matlaktli amo kuali tlamantli uan kiniljuik kenijkatsa ueliskia kinmanauisej  ininchampoyouaj (Éx. 12:21-28). ¿Keskij kitlakakilijkej? Uelis momanauijkej uan kiskej tlen Egipto eyij millones uan “ininuaya yajkej miakej tlamantli tlakamej tlen axisraelitajmej”, uelis sekij eliyayaj egiptoeuanij (Éx. 12:38).

Tlen panok uejkajkia kinextia Jehová nochipa kikajki ma pano tonali tlen monekiyaya uan kiampa katli kitlakakiliskiaj ueliskiaj momanauisej (Deut. 32:4). ¿Kenke kiampa kichijki? Pampa kej apóstol Pedro kiijtok, Jehová “kineki nochi ma timoyolpatlakaj uan tijkauasej totlajtlakoljuaj. Axkineki niyon se ma poliui para nochipa” (2 Ped. 3:9). Nelia, Jehová amo kinekiyaya nopa maseualmej ma kinpano tlen amo kuali. Ya kintlajtolmakak pampa kinekiyaya ma moyolkuepakaj uan ma kipatlakaj ininnemilis, kiampa ueliskiaj momanauisej (Is. 48:17, 18; Rom. 2:4).

Ipan ni tonali maseualmej kitlakakiliaj se tlamantli tlen tlauel ipati tlen toTeotsij kinmatiltia. Kema Jesús itstoya ipan Tlaltipaktli, kiijtok katli kichiuaskiaj tlen amo kuali kintsontlamiltiskiaj ipan se “ueyi tlaijiyouilistli” (Mat. 24:21). Ipan se tlajtolpanextili, kiijtok tlake kiitaskiaj uan kinpanoskia itokilijkauaj kema monechkauijtiualas nopa tonali. Nojkia kiijtok ipan nochi Tlaltipaktli panoskia miak uejueyi tlamantli, uan nama tikitaj kenijkatsa panotok (Mat. 24:3-12; Luc. 21:10-13).

Ika nopa tlajtolpanextili, Jehová kiniljuia maseualmej ma kineltokakaj uan ma kitekipanokaj. Ya kineki ipan ni tonali nochi katli kineltokasej kuali ma itstokaj uan teipa uelis kiselisej miak tlateochiualistli kema itstosej ipan Xochimili (2 Ped. 3:13). Jehová kinmatiltia maseualmej nopa kuali tlamachtili tlen toTeotsij iTlanauatijkayo, pampa kiampa uelis tlaneltokasej uan momanauisej. Jesús kiijtok nopa kuali tlamachtili momoyauaskia “ipan nochi tlaltinij ipan ni Tlaltipaktli” (Mat. 24:14). ToTeotsij kinkualchijchijtok itekipanojkauaj pampa kineki ma tlajtolmoyauakaj ipan se 240 altepemej uan pilaltepetsitsij. Kineki miakej maseualmej ma kitlakakilikaj tlen kiniljuia uan kiampa momanauisej ipan nopa tonali kema tetlatsakuiltis (Sof. 1:14, 15; 2:2, 3).

Uajka, amo tlauel ipati timoiljuijtosej tlaj Jehová kikaua ma pano tonali kema nechka kintsontlamiltis maseualmej. Tlen panotok kinextia nochipa kiampa kichiua. Kinamiki timotlajtlanisej ni: ¿Kitlakakilisej tlen toTeotsij kiniljuia uan kiampa uelis momanauisej? Tojuantij, katli titematiltiaj tlen toTeotsij kichiuas, nojua ma tijchijtokaj kampeka tikinpaleuisej maseualmej ma momanauikaj ipan nopa tonali kema kintsontlamiltisej nochi katli amo kualmej.