1. ¿Tlake uelij tijnextiaj kema tiuikaj?

SE TLAKATL katli kiijkuiloua uikatl kiijtok: “Kema techkamanaljuiaj, timoyoliljuiaj ipan tlen techiljuiaj, kema tijkakij se tlatsotsonali, kuali tijyolmatij, uan kema tiuikaj, nochi tlen timoyoliljuiaj asi ipan toyolo”. Kema tiuikaj tijnextiliaj toTata Jehová nochi tlen “tijyolmatij” pampa tikiljuiaj tijnekij tijueyichiuasej uan tlauel tikikneliaj. Nochi toTeotsij itekipanojkauaj tijuikatiaj Jehová kema tiitstokej toselti o ika toikniuaj pampa tijmatij kiampa nojkia tijueyichiuaj.

2, 3. 1) ¿Tlake kiyolmatij sekij kema moneki chikauak uikasej? 2) ¿Tlake tlajtlanili tijnankilisej ipan ni tlamachtili?

² Uan tojuantij, ¿techpaktia chikauak tiuikasej ipan tlanechikoli, o tipinauaj? Ipan sekinok altepemej, tlakamej amo kinpaktia uikasej kampa itstokej miakej. Uan toikniuaj ipan tlanechikoli nojkia ueliskia kichiuasej nopa, tlaj ueuejtlakamej amo chikauak uikaskiaj o tlaj kichiuaskiaj sekinok tlamantli kema toikniuaj uikaj (Sal. 30:12).

³ Tlaj tikilnamiktosej Jehová tlauel kipatiita kema tijuikatiaj, uajka tijchiuasej kampeka nochipa tiuikasej ipan tlanechikoli. Ma timotlajtlanikaj: “¿Nechpaktia niuikas ipan tlanechikoli? Tlaj nijneki nijyolmatis nochi tlen moijtoua ipan nopa uikatl,  ¿tlake moneki nijchiuas? ¿Tlake nechpaleuis ma nijyolmati nochi tlen moijtoua ipan nopa uikatl?”.

4, 5. ¿Kenke tijmatij israeleuanij nochipa kiueyichiuayayaj Jehová ika uikatl?

⁴ Tlauel miak xiuitl toTeotsij itekipanojkauaj kitekiuijtokej uikatl kema kiueyichiuaj Jehová. Kema israeleuanij nojua kitekipanouayayaj toTeotsij, inijuantij tlauel kipatiitayayaj kiueyichiuasej ika uikatl. Kema tlanauatijketl David kintlapejpenik katli tlatekipanoskiaj ipan teokali, nojkia kintlapejpenik 4,000 levitas katli kiueyichiuaskiaj Jehová ika uikatl. Tlen nopa 4,000 tlakamej, 288 kuali “momachtijtoyaj [...] kejatsa uikasej para kiueyichiuasej toTeko” (1 Crón. 23:5; 25:7).

⁵ Kema tlankej kichijchiuaj nopa teokali nojkia tlatsotsonkej uan uikakej. Biblia kiijtoua: “Uan sentik pejkej kiueyichiuaj toTeko ika tlapitsali, ika uikatl, uan ika platillos uan nopa sekinok tlatsotsonali. Uan kitlaskamatilijkej toTeko [...,] uan ipan nopa tlalochtli kema inijuantij kiueyichiuayayaj, iteopa toTeko temik ika mixtli”. Tlen kichijkej, kinpaleuik israeleuanij kuali ma tlaneltokakaj (2 Crón. 5:13, 14; 7:6).

6. ¿Kenijkatsa motekiuiyaya tlatsotsonali uan uikatl kema Nehemías tekichiuayaya ipan Jerusalén?

⁶ Kema israeleuanij katli amo kitlauelkajtoyaj Jehová kikualchijchiuayayaj nopa tepamitl tlen Jerusalén, Nehemías katli tekichiuayaya ipan Jerusalén, kintlapejpenik se keskij levitas ma tlatsotsonakaj uan ma uikakaj. Kema tlankej kikualchijchiuaj nopa tepamitl, nojkia uikakej, yeka nochi israeleuanij tlauel yolpajkej. Kintlapejpenik ome pamitl tlen uikanij katli uikaskiaj. Tlejkokej ipan nopa tepamitl uan kiyaualojkej nopa altepetl, teipa monamikitoj nechka kampa teokali. Tlauel chikauak uikayayaj, yeka uejka mokakiyaya (Neh. 12:27, 28, 31, 38, 40, 43). ¡Jehová tlauel yolpajki kema kinkajki kiuikatiyayaj ika nochi ininyolo!

7. ¿Kenijkatsa Jesús kinextik monekiyaya tijueyichiuasej toTeotsij ika uikatl?

⁷ Kema Jesús itstoya ipan Tlaltipaktli, maseualmej nojkia kiueyichiuayayaj toTeotsij ika uikatl. Ipan nopa youali kema Jesús kinnauatik itokilijkauaj ma kichiuakaj toTeko iTlakualis, ya uan iapóstoles kiueyichijkej toTeotsij ika uikatl (xijpoua Mateo 26:30).

8. ¿Tlake techmachtijkej ma tijchiuakaj toikniuaj katli itstoyaj ipan achtoui siglo?

⁸ Toikniuaj katli itstoyaj ipan achtoui siglo kinextijkej tlauel moneki sansejko tijuikatisej toTeotsij. Inijuantij amo mosentiliyayaj ipan teokali, mosentiliyayaj techaj. Uan maske amo tlauexka kampa kiueyichiuayayaj toTeotsij, uikayayaj ika nochi ininyolo. Apóstol Pablo kintlajkuiljuilik toikniuaj: “Ximoyolchikauakaj se ika seyok ika iTlajtol toTeko uan ximomachtijtinemikaj. Xiuikakaj salmos, uan teouikatl, uan uikatl tlen kipaleuia inmotonaltsi para inkipakilismakasej toTeko. Kena, xiuikakaj uan xijtlaskamatikaj toTeko ika nochi inmoyolo” (Col. 3:16). Moneki kiampa tijchiuasej kema tiuikasej uikatl tlen eltok ipan amochtli tlen ika tiuikaj. Nopa “tlalnamijkatlatekipanojketl” nojkia techmachtia uan techyakana ika nopa uikatl (Mat. 24:45).

9. 1) ¿Kenke sekij majmauij chikauak uikasej ipan tlanechikoli uan ipan uejueyi tlanechikolistli? 2) ¿Kenijkatsa moneki tijuikatisej Jehová, uan ajkia inijuantij moneki tlayakanasej? (Xikita nopa achtoui tlaixkopinkayotl).

⁹ Uelis achi timajmauij tiuikasej pampa kampa timoskaltijkej o tochampoyouaj amo momajtokej uikaj. O uelis tipinauaj, o timoiljuiaj amo kuali tiuikasej pampa tijnekiskiaj  tiuikasej kej katli uikaj ipan radio o ipan televisión. Amo tleno ma techtsakuili tijuikatisej Jehová. Moneki tijtlananasej toamoch, totsonteko uan tijuikatisej Jehová ika nochi toyolo (Esd. 3:11; xijpoua Salmo 147:1). Ipan miak kali kampa timosentiliaj onka pantallas kampa nestia uikatl, nopa tlauel techpaleuis chikauak ma tiuikakaj. Uan nama kampa kinmachtiaj ueuejtlakamej ipan Escuela del Ministerio del Reino, nojkia kinmachtiaj kenijkatsa uikasej. Ni kinextia ueuejtlakamej moneki tlayakanasej kema tiuikasej ipan tlanechikoli.

10. ¿Tlake moneki tikilnamiktosej tlaj tipinauaj chikauak tiuikasej?

¹⁰ Sekinok toikniuaj yamaktsi uikaj pampa pinauaj ma kinkakikaj o pampa amo kinpaktia inintoskak. Ma timoiljuikaj ipan se tlamantli. Maske miakpa “timokuapolouaj” kema tikamanaltij, amo tikijtosej ayokmo tikamanaltisej (Sant. 3:2). Nojkia kiampa tijchiuasej kema tiuikasej. Nochipa tijuikatisej Jehová maske amo techpaktia kej tiuikaj.

11, 12. ¿Tlake uelis techpaleuis kuali ma tiuikakaj?

¹¹ Uelis nojkia timajmauij pampa amo tijmatij kenijkatsa tiuikasej. Ma tikitakaj se keski tlamantli tlen techpaleuis kuali ma tiuikakaj. *

¹² Tlaj tijmatis kenijkatsa titlaijiyotilanas, mitspaleuis chikauak xiuika. Kej tlauili kichiua ma kauanto se foco, kema kuali titlaijiyotilanaj techpaleuia chikauak ma tikamanaltikaj uan ma tiuikakaj. Kema tiuikaj, totoskak moneki kakistis kej kema tikamatij (xikita tlen kiijtoua amochtli Benefíciese de la Escuela del Ministerio Teocrático, ipan iamayo 181-184, ipan tlamachtili “Control del volumen de aire”). Ipan Biblia  Jehová kiniljuia itekipanojkauaj ma “tsajtsikaj ika pakilistli” kema kiuikatisej (Sal. 33:1-3).

13. Xikijto tlake techpaleuis chikauak ma tiuikakaj.

¹³ Kema timomachtisej ininuaya tochampoyouaj o kema toselti timomachtisej, ma tijchiuakaj ni: ma tijtlapejpenikaj se uikatl katli tlauel techpaktia uan amo ma tipinauakaj chikauak tijpouasej. Teipa, ma titlaijiyotilanakaj uan chikauak ma tikijtojtiuatsikaj se pamitl tlen nopa tlajkuiloli. Uan teipa, nojkia chikauak ma tiuikakaj (Is. 24:14). ¡Kiampa chikauak tiuikasej uan kuali mokakis! Amo ma timajmauikaj yon ma tipinauakaj.

14. 1) ¿Kenke moneki kuali tijtlaposej tokamak kema tiuikaj? (Xikita nopa recuadro “ ¿Tlake mitspaleuis kuali xiuika?”). 2) Xikijto se ome tlamantli tlen techpaleuis kuali ma kisa totoskak.

¹⁴ Kema tijnekij chikauak tikamanaltisej kuali tijtlapouaj tokamak. Yeka moneki kuali tijtlaposej tokamak kema tiuikasej uan amo san pilkentsi tijtlaposej kej kema tikamanaltij. ¿Uan tlake uelis tijchiuasej tlaj yamaktsi totoskak o tlauel chikauak? Uelis techpaleuis tlen kiijtoua amochtli Benefíciese de la Escuela del Ministerio Teocrático, ipan iamayo 184, ipan nopa recuadro “Cómo superar problemas específicos”.

15. 1) ¿Tlake moijtok ipan nopa tlanechikoli tlen kichijkej Jehová itlajtoltemakauaj ipan octubre 2016? 2) ¿Kenke kiyankuilijkej nopa amochtli tlen ika tiuikaj?

¹⁵ Ipan xiuitl 2016, ipan nopa tlanechikoli tlen Jehová itlajtoltemakauaj kichiuaj sejse xiuitl ipan octubre, toikni Stephen Lett, tlen toikniuaj Katli kinyakanaj Jehová itlajtoltemakauaj, kiijtok onkaskia se  yankuik amochtli tlen ika tiuikasej. Motokaxtiskia Ma tijuikatikaj Jehová “ika miak pakilistli”. Toikni Lett kiixtonki moyankuilik nopa amochtli pampa kiampa nochi uikatl eliskia sanse ika tlen kiijtoua nopa Traducción del Nuevo Mundo de las Santas Escrituras, tlen moyankuilik ipan 2013. Monejki kiixpolosej uan kipatlasej se keski tlajtoli tlen ayokmo nesi ipan nopa yankuik Biblia. Nojkia kitlalijkej uikatl tlen tlajtolmoyaualistli uan tlamakixtili. Uan pampa ika nopa uikatl tijueyichiuaj Jehová, toikniuaj Katli kinyakanaj Jehová itlajtoltemakauaj, kinejkej ma elto se amochtli tlen kipiaskia ipantsajka tenextik, sanse kej nopa yankuik Biblia.

16, 17. ¿Tlake tlamantli kipatlatokej ipan nopa yankuik amochtli tlen ika tiuikaj?

¹⁶ Nama, amo ouij se kitekiuis nopa amochtli tlen ika tiuikaj pampa nochi uikatl kintekpantokej ika pamitl. Se neskayotl, nopa achtoui 12 uikatl kamanaltij tlen Jehová, teipa, 8 uikatl kamanaltij tlen Jesús uan tlamakixtili, uan kiampa kitekpantokej nochi uikatl. Kampa peua, kiijtoua kenijkatsa itoka sejse pamitl. Nopa nojkia kinpaleuis toikniuaj katli kipanoltisej se tlamachtili ipan tlanechikoli pampa uelis nima kipantisej se uikatl.

¹⁷ Ipan ni yankuik amochtli kipatlatokej se keski uikatl, kiampa amo ouij tijkuamachilisej uan uelis tiuikasej ika nochi toyolo. Se neskayotl, nopa uikatl “Acción de gracias” nama itoka “Una oración para dar gracias a Dios”. Nojkia, ayokmo kipia tlajtoli katli amo tlauel tijtekiuiaj. Uan nopa uikatl “Protege tu corazón”, nojkia kipatilijkej itoka uan tlen kiijtouayaya, nama itoka “Cuidemos nuestro corazón”. Kiampa mochijki pampa kinekiyayaj nopa uikatl ma asi ipan ininyolo nochi toikniuaj, kej tosiuaikniuaj, telpokamej uan katli pejtokej mosentiliaj ipan tlanechikoli o ipan uejueyi tlanechikolistli. Achtouia kema uikayayaj ika ni uikatl, kejuak kiijtouayayaj tlake monekiyaya kichiuasej sekinok, uan uelis amo kuali kiyolmatiyayaj.

18. ¿Kenke moneki kuali tijtsontekontlalisej sejse uikatl? (Xikita nopa nota).

¹⁸ Miak uikatl tlen uala ipan amochtli Ma tijuikatikaj Jehová “ika miak pakilistli” ijkuilijtok kejuak eliskia se tlamaijtoli. Kiampa kejuak tikiljuiaj toTeotsij tlen tijyolmatij. Sekinok uikatl techyololinia ma tikinyolchikauakaj toikniuaj, ma tikinnextilikaj tikinikneliaj uan ma tikinpaleuikaj (Heb. 10:24). Yeka, moneki kuali ma tijtsontekontlalijtokaj nopa uikatl uan ma tikilnamiktokaj kenijkatsa eli nopa tlatsotsonali. Tlauel techpaleuis tlaj tijtlakakilisej nopa uikatl tlen eltok ipan jw.org, kampa tlatsotsonaj uan uikaj. Tlaj kuali tikompauisej nopa uikatl ipan tochaj, techpaleuis amo ma timajmauikaj uan ma tiuikakaj ika nochi toyolo. *

19. ¿Kenijkatsa nochi uelis tijueyichiuasej Jehová?

¹⁹ Moneki tikilnamikisej kema tiuikaj nojkia tijueyichiuaj Jehová. Uan kiampa tijnextiliaj tlauel tikikneliaj uan tijtlaskamatiliaj (xijpoua Isaías 12:5). Kema tiuikaj ika nochi toyolo uan ika miak pakilistli, tikinpaleuiaj sekinok nojkia kiampa ma kichiuakaj. Nochi uelis tijueyichiuasej Jehová ika uikatl; telpokamej, katli ya uejueyij uan katli namanok mosentiliaj touaya. Yeka nochipa ma tijuikatikaj Jehová ika nochi toyolo. Ma tijchiuakaj tlen kiijtok se katli kiijkuilok salmos: “Xiuikakaj para [Jehová]”. Yeka, ¡ma tijuikatikaj Jehová ika miak pakilistli! (Sal. 96:1).