TLAMACHTILI 20
UIKATL 7 Jehová notlamanauijka
Xijtemo Jehová para ma mitsyoltlali
“Ma tijueyichiuakaj [...] toTata katli tetlasojtla ika nochi iyolo uan Dios katli nochipa teyoltlalia” (2 COR. 1:3).
TLEN MOIXTOMAS
¿Tlake techmachtia kema Jehová kinyolchikajki judíos katli kinuikakej Babilonia?
1. ¿Kenijkatsa itstoyaj judíos katli kinuikatoyaj Babilonia?
XIMOILJUI tlake kiyolmatiyayaj judíos katli kinuikatoyaj Babilonia. Inijuantij kiitakej kenijkatsa kitsontlamiltijkej ininaltepe Jerusalén. Uan por inintlajtlakoljuaj uan tlen kichijtoyaj ininuejkapantatauaj, kinuikakej ma tlatekipanotij sejkanok (2 Crón. 36:15, 16, 20, 21). Ipan Babilonia ueliyayaj kipiaj uan kichiuaj se keski tlamantli (Jer. 29:4-7). Pero kimatiyayaj ouij itstosej nopaya pampa inijuantij amo kitlapejpenijtoyaj yasej ipan nopa altepetl. Se judío katli mokuesouayaya, kiijtok: “Ipan tlali Babilonia timoseuiyayaj iteno atemitl, uan timochokiliyayaj, pampa tikilnamikiyayaj altepetl Jerusalén” (Sal. 137:1). Katli kinuikatoyaj Babilonia kinekiyayaj ma kinyolchikauakaj, pero ¿ajkia ueliskia kichiuas?
2, 3. 1) ¿Tlake kichijki Jehová pampa kinekiyaya kinpaleuis judíos katli kinuikakej Babilonia? 2) ¿Tlake tikitasej ipan ni tlamachtili?
2 Jehová eli “Dios katli nochipa teyoltlalia” (2 Cor. 1:3). Kiniknelia nochi katli kinekij mouampojchiuasej iuaya uan kineki kinyoltlalis. Ya kimatiyaya se keskij judíos katli kinuikatoyaj Babilonia, moyolkuepaskiaj uan sampa kiueyichiuaskiaj kej kinamiki (Is. 59:20). Yeka, kema poliuiyaya se 100 xiuitl para kinuikasej Babilonia, Jehová kichijki Isaías ma kiijkuilo se amochtli. ¿Kenke kiampa kichijki? Isaías kiijkuilok: “‘Xikinyolchikauakaj, kena, xikinyolchikauakaj notlakauaj’, keja nopa kiijtoua ininteko Dios” (Is. 40:1). Uajka, Jehová kitekiuik amochtli Isaías para kinyolchikauas judíos pampa nopaya kiijtoua se keski tlajtolpanextili.
3 Kemantika tojuantij nojkia tijnekij ma techyoltlalikaj. Ipan ni tlamachtili tikitasej eyi tlamantli tlen ika Jehová kinyoltlalik judíos: 1) kiniljuik kintlapojpoljuiskia katli moyolkuepaskiaj, 2) kinpaleuik itekipanojkauaj ma motemachikaj teipa kuali itstoskiaj uan 3) kinpaleuik amo ma majmauikaj. Tikitasej kenijkatsa ipan ni tonali Jehová nojkia techyoltlalia ika ni eyi tlamantli.
JEHOVÁ TECHTLASOJTLA UAN TECHTLAPOJPOLJUIA
4. ¿Kenijkatsa Jehová kinextik tetlasojtla? (Isaías 55:7).
4 Jehová eli “toTata katli tetlasojtla ika nochi iyolo” (2 Cor. 1:3). Uan kinextik tetlasojtla kema kiijtok kintlapojpoljuiskia judíos katli moyolkuepaskiaj (xijpoua Isaías 55:7). Ya kiijtok: “Niinmechtlasojtlas uan niinmechiknelis para nochipa” (Is. 54:8). ¿Kenijkatsa kinextik kintlasojtlayaya? Maske nochi judíos tlaijiyouiskiaj pampa tlaixpanotoyaj, Jehová kiniljuik amo nochipa mokauaskiaj ipan Babilonia uan sampa tlakuepiliskiaj ipan ininaltepe (Is. 40:2). Tlen Jehová kiniljuik tlauel kinyoltlalik judíos katli itstoyaj Babilonia.
5. ¿Kenke uelis más timotemachisej Jehová nelnelia tetlasojtla?
5 ¿Tlake techmachtia? Jehová kineki techtlapojpoljuis ika nochi iyolo. Judíos katli kinuikakej Babilonia kimatiyayaj ni tlamantli, pero tojuantij más timotemachiaj nelnelia kineki techtlapojpoljuis. ¿Kenke? Pampa tijmatij nochi tlen Jehová kichijtok. Isaías kiijtok toTata Jehová tetlapojpoljuia uan kema ya panotoya miak xiuitl, kinextik nelnelia kineki kintlapojpoljuis katli moyolkuepaj pampa kiualtitlanki iKone. Jesús imikilis kiixpoloua totlajtlakoljuaj (Hech 3:19; Is. 1:18; Efes. 1:7). ¡Jehová nelnelia tlauel tetlasojtla!
6. ¿Kenke moneki timoyoliljuisej kenijkatsa Jehová tetlasojtla? (Nojkia xikita tlaixkopinkayomej).
6 Tlen Jehová kiiljuik ma kiijkuilo Isaías ipan capítulo 55 versículo 7, tlauel techyolchikauas tlaj uejkajkia titlajtlakolchijkej uan nojua timoyolkokouaj maske ya timoyolkuepkej. Sekij tlauel moyolkokouaj pampa nojua tlaijiyouijtokej ika tlen kichijkej. Pero tlaj ya tikijtojkej totlajtlakol uan ayokmo tijchiuaj, uelis timotemachisej Jehová ya techtlapojpoljuik. Uan kema tetlapojpoljuia, ayokmo kiilnamiki tlen tijchijkej (nojkia xikita Jeremías 31:34). Tlaj Jehová ya kiilkajki tlen tijchijkej, tojuantij nojkia moneki tikilkauasej. Ya mosentlalia ipan tlen nama tijchiuaj uan amo ipan nopa tlajtlakoli tlen uejkajkia tijchijkej (Ezeq. 33:14-16). Uan ma tikilnamikikaj toTata katli tetlasojtla ika nochi iyolo, nechka kichiuas ayokmo ma titlaijiyouikaj ika tlen tijchijkej.
Jehová ayokmo kiilnamiki tlake tlajtlakoli tijchijkej uejkajkia, ya kiita tlen nama tijchiuaj. (Xikita párrafo 6).
7. ¿Tlake techpaleuis ma tikijtokaj tlen tijchijkej?
7 ¿Uan tlake moneki tijchiuasej tlaj tijchijkej se ueyi tlajtlakoli uan amo tikijtojtokej? Biblia kiijtoua moneki tikiniljuisej ueuejtlakamej ma techpaleuikaj (Sant. 5:14, 15). Maske uelis tijmatisej ouij tikiniljuisej tlen tijchijkej, ma tikilnamikikaj Jehová kintekimakatok para ma techpaleuikaj. Yeka, tlaj timoyolkuepaj uan tikilnamikij Jehová uan ueuejtlakamej techikneliaj uan techtlasojtlasej, techpaleuis ma tikijtokaj tlen tijchijkej. Ma tikitakaj kenijkatsa Jehová kitlasojtlak uan kiyoltlalik toikni Arthur, a katli tlauel moyolkokojtoya pampa tlajtlakolchijki. Ya kiijtoua: “Nechka se xiuitl nikitak pornografía. Pero se tonali, ipan tlanechikoli kiixtonkej kenijkatsa moneki eltos totlalnamikilis. Yeka, nikiljuik nosiua tlen nijchiuayaya uan nojkia ueuejtlakamej. Maske kejuak nimokixtilik se ueyi tlamamali, nojua nimoyolkokojtoya ika tlen nijchijtoya. Ueuejtlakamej nechiljuijkej ika miak tlaiknelili Jehová amo nechtlauelkajtoya, uan nechtlalnamiktiyaya pampa nechiknelia. Tlauel nechyolchikajki tlen nechiljuijkej uan nechpaleuik amo ma nimoiljui tlen amo kinamiki”. Ipan ni tonali, Arthur tlatekipanoua kej precursor regular uan kej tlapaleuijketl. ¡Tlauel techyolchikaua pampa tijmatij Jehová techtlapojpoljuis tlaj timoyolkuepaj!
JEHOVÁ KIIJTOJTOK TEIPA KUALI TIITSTOSEJ
8. 1) ¿Tlake tlamantli kintenkauilik Jehová katli kinuikatoyaj Babilonia? 2) Kej kiijtoua Isaías 40:29-31, ¿kenijkatsa kinpaleuiskia judíos tlaj motemachiskiaj ipan tlen Jehová kintenkauilijtoya?
8 Babilonia kinnauatiyaya miakej altepemej uan miakej kiixmatiyayaj pampa amo kema kinkauayaya ma yakaj katli kinuikatoyaj ma tlatekipanokaj nopaya. Yeka, sekinok ueliskiaj moiljuisej judíos amo kema tlakuepiliskiaj ininaltepe (Is. 14:17). Pero Jehová kinpaleuik itekipanojkauaj ma motemachikaj sampa tlakuepiliskiaj uan amo aka kitsakuiliskia ma mochiua tlen Jehová mosentlalijtoya (Is. 44:26; 55:12). Jehová kiitayaya Babilonia kejuak tlaltejpoktli (Is. 40:15). San kiilpitsaskia uan ayokmo tleno mokauaskia. Tlen Jehová kiijtok tlauel kinyoltlalik judíos katli kinuikakej Babilonia. Uan Isaías nojkia kiijkuilok: “Pero tlen motemachiaj ipan TOTEKO para kinpaleuis, mojmostla kipiasej fuerza” (xijpoua Isaías 40:29-31). Tlen motemachiyayaj kiselisej kinpaleuiskia ma kipiakaj chikaualistli sanse kej se “kuajtli” katli patlani uejkapa.
9. ¿Tlake kinpaleuik judíos ma motemachikaj ipan Jehová uan ipan tlen kintenkauilijtoya?
9 Judíos katli kinuikatoyaj Babilonia ueliskiaj motemachisej Jehová nelnelia kichiuaskia tlen kitenkajtoya. ¿Kenke? Inijuantij kiitstoyaj kenijkatsa moaxitijtoya miak tlajtolpanextili. Kiitakej kenijkatsa Asiria moaxkatik se keski pilaltepetsitsij tlen Israel, tlen mokauayaya ika norte, uan kinuikakej katli nopaya itstoyaj (Is. 8:4). Kiitakej kenijkatsa babiloniaeuanij kitsontlamiltijkej Jerusalén uan kinuikakej katli nopaya itstoyaj (Is. 39:5-7). Uan kimatiyayaj nopa tlanauatijketl tlen Babilonia kiixteyolkixtik tlanauatijketl Sedequías uan kiuikak Babilonia (Jer. 39:7; Ezeq. 12:12, 13). Moaxitijtoya nochi tlen Jehová kiijtojtoya (Is. 42:9; 46:10). Nochi nopa tlamantli kinpaleuik ma motemachikaj Jehová nelnelia kinmakixtiskia.
10. ¿Tlake techpaleuis nochipa ma tikilnamiktokaj tlen Jehová kichiuas teipa?
10 ¿Tlake techmachtia? Tlaj amo kuali tijyolmatij, ma timoyoliljuikaj ipan tlen Jehová techmakas teipa, pampa nopa techpaleuis ma tijpiakaj chikaualistli. Maske ipan ni tonali tlauel ouij kej tiitstokej uan tikinpiaj tokualankaitakauaj, amo kinamiki timokuesosej pampa Jehová kiijtojtok tiitstosej nochipa uan tlauel tiyolpakisej. Moneki nochipa tikilnamiktosej tlen Jehová techtenkauilijtok, pampa tlaj amo kiampa tijchiuaj eliskia kejuak tijnekiskiaj titlachiasej kampa tlayejyektsi ipan se ventana tlen sokiyo iteskayo. ¿Tlake techpaleuis nochipa ma tikilnamiktokaj tlen Jehová techmakas teipa? Ma tijkixtikaj tonali uan ma timoyoliljuikaj kenijkatsa tiitstosej ipan Xochimili. Ma tijpouakaj amatlajkuiloli, ma tikitakaj videos, ma tijkakikaj uikatl kampa kiijtoua tlen Jehová techmakas teipa uan ma tikiljuikaj Jehová tlake tlamantli tlauel techpaktiskia ma moaxiti.
11. ¿Tlake kipaleuia se tosiuaikni katli tlauel mokokoua?
11 Ma tikitakaj tlake kipaleuik tosiuaikni Joy, katli tlauel tlaijiyouia pampa nochipa mokokoua. Ya kiijtoua kenijkatsa tlauel kipaleuijtok tlen Jehová kiijtojtok kichiuas, kiijtok: “Kema nijmati ayokmo nikijiyouia tlen nechpano, nikiljuia Jehová nochi tlen nijyolmati uan nimotemachia nechkuamachilia. Uan ya nochipa nechpaleuia pampa nechmaka ‘nopa tetikayotl tlen amo aka ueli kipia’” (2 Cor. 4:7). Joy nojkia moyoliljuia kejuak ya itstok ipan yankuik Tlaltipaktli kampa ayokmo aka mokokos (Is. 33:24). Tlaj tojuantij nojkia tikiljuiaj Jehová nochi tlen tijyolmatij uan timosentlaliaj ipan tlen tijselisej, techpaleuis ma tijpiakaj chikaualistli.
12. ¿Kenke uelis timotemachisej ipan Jehová uan ipan tlen kitenkajtok? (Nojkia xikita tlaixkopinkayomej).
12 Sanse kej judíos katli kinuikakej Babilonia, tojuantij nojkia uelis timotemachisej ipan Jehová uan ipan tlen kitenkajtok kichiuas. Ma timoiljuikaj ipan nochi nopa tlajtolpanextili tlen moaxitia. Ipan ni tonali tijmatij onka se ueyi altepetl tlen tlauel pankisa, maske nesi kipia chikaualistli amo nochipa kiampa eli (Dan. 2:42, 43). Nojkia tijkakij kampa ueli mojmolinia tlali, uan titlajtolmoyauaj ipan “nochi altepemej” (Mat. 24:7, 14). Kema tikitaj kenijkatsa moaxitia nochi ni tlajtolpanextili, techyolchikaua uan techpaleuia ma timotemachikaj Jehová nelnelia kichiuas nochi tlen kitenkajtok.
Nopa tlajtolpanextili tlen moaxitia ipan ni tonali techpaleuia ma timotemachikaj Jehová kichiuas tlen kitenkajtok. (Xikita párrafo 12).
JEHOVÁ TECHPALEUIA AMO MA TIMAJMAUIKAJ
13. 1) ¿Tlake tlaouijkayotl kiixnamikiskiaj judíos kema nechka kinmakixtiskiaj? 2) Kej kiijtoua Isaías 41:10-13, ¿kenijkatsa kinyolchikajki Jehová nopa judíos katli kinuikatoyaj Babilonia?
13 Jehová kinyoltlalik judíos katli kinuikatoyaj Babilonia pampa kiniljuik teipa kuali itstoskiaj, pero nojkia kimatiyaya kema nechka kinmakixtiskia kiixnamikiskiaj miak tlaouijkayotl. Ya ipa kiijtojtoya se tlanauatijketl moaxkatiskia nopa altepemej tlen eltoya nechka Babilonia uan teipa nojkia moaxkatiskia Babilonia (Is. 41:2-5). ¿Kinamikiyaya majmauisej nopa judíos? Amo. Jehová ipa kiniljuijtoya: “Amo ximajmauikaj pampa na niitstok inmouaya. Amo ximokuesokaj pampa na niinmoTeko” (xijpoua Isaías 41:10-13). ¿Kenke kiniljuik “na niinmoTeko”? Amo kiniljuik san pampa kinekiyaya ma kiueyichiuakaj. Kiampa kiniljuik pampa kinekiyaya ma kiilnamiktokaj ya itstoskia ininuaya uan kinpaleuiskia (Sal. 118:6).
14. ¿Ika tlake seyok tlamantli Jehová kinpaleuik judíos amo ma majmauikaj?
14 Jehová kichijki seyok tlamantli tlen ika kinpaleuik judíos amo ma majmauikaj: kinilnamikilik ya nochi kimati uan kipia miak chikaualistli. Kiniljuik ma ajkotlachiakaj uan kiniljuik ya amo san kinchijchijki sitlalimej, nojkia kimati sejse inintoka (Is. 40:25-28). Yeka, timotemachiaj nojkia kimati inintoka sejse itekipanojkauaj. Tlaj Jehová kinchijchijki sitlalimej ika ichikaualis, uajka nojkia uelis kinpaleuis itekipanojkauaj. Judíos katli kinuikatoyaj Babilonia amo kinamikiyaya majmauisej.
15. ¿Kenijkatsa Jehová kinpaleuik judíos ma mokualchijchijtokaj?
15 Jehová nojkia kinpaleuik itekipanojkauaj ma kimatikaj tlake monekiyaya kichiuasej kema kiixnamikiskiaj tlaouijkayotl. Ipan Isaías 26:20, Jehová kiniljuik judíos: “Xiakaj inmochaj uan xijtsakuakaj inmopuertas kampa initstosej temachtli. Ximotlatikaj se tlalochtli hasta kema ya panotos ikualankayo TOTEKO”. Uelis tlen kiijtoua ni versículo moaxitik achtoui kema tlanauatijketl Ciro moaxkatik Babilonia. Nopa historiador griego Jenofonte kiijtok kema Ciro kalajki Babilonia kiniljuik isoldados “ma kinmiktikaj nochi katli nemiskiaj kalteno” (Ciropedia, traducción de Ana Vegas Sansalvador). Tlauel majmajkej babiloniaeuanij, pero uelis nopa judíos katli itstoyaj Babilonia momanauijkej pampa kichijkej tlen Jehová kinnauatik.
16. ¿Kenke amo kinamiki tijmakasisej nopa ueyi tlaijiyouilistli? (Nojkia xikita tlaixkopinkayotl).
16 ¿Tlake techmachtia? Nechka tikixnamikisej se ueyi tlaijiyouilistli. Kema peuas, maseualmej amo kimatisej tlake kichiuasej uan tlauel momajmatisej. Pero tojuantij amo timajmauisej pampa toDios eli Jehová. Ipan nopa tonali timotemachisej ya techmakixtis (Luc. 21:28). Uan nojua kiampa monekis tijchijtosej kema techteuisej nopa miakej altepemej katli mosentikapaleuisej. Jehová techpaleuis ika iángeles uan techiljuis kenijkatsa uelis timomanauisej. ¿Uan kenijkatsa tijmatisej tlake monekis tijchiuasej? Ayamo tijmatij, pero uelis techmatiltisej ipan totlanechikol. Uelis ni elis kejuak tochaj kampa timomanauisej. Tlaj tijnekij tijmatisej tlake tijchiuasej moneki tiitstosej ininuaya toikniuaj, tijneltokasej tlen technauatiaj ipan Jehová itlanechikol uan timotemachisej ya kiyakana (Heb. 10:24, 25; 13:17).
Tlaj tikilnamikij Jehová kipia chikaualistli uan uelis techmanauis, techpaleuis amo ma timajmauikaj ipan ueyi tlaijiyouilistli. (Xikita párrafo 16). b
17. ¿Kenijkatsa uelis tijkauas Jehová ma mitsyoltlali?
17 Maske tlauel ouij kej itstoyaj nopa judíos katli kinuikakej Babilonia, Jehová kinyoltlalik. Uan tojuantij nojkia kiampa techpaleuis. Yeka, maske amo tijmatij tlake panos teipa, nojua xijkaua Jehová ma mitsyoltlali. Xikilnamiki ya tetlasojtla ika nochi iyolo. Amo xikilkaua tlen mosentlalijtok techmakas teipa uan nochipa xikilnamiki ya eli moDios, yeka amo kinamiki timajmauis.
UIKATL 3 Jehová nochipa techpaleuis
a Mopatlatok se keski tokajyotl.
b TLEN NESI IPAN TLAIXKOPINKAYOTL: Se keskij toikniuaj monechikojtokej. Motemachiaj Jehová kipia chikaualistli uan uelis kinmanauis itekipanojkauaj maske kampa ueli itstokej.
