1, 2. 1) ¿Ipan tlake tlamantli amo tielij sanse kej ángeles? 2) ¿Tlake tlamantli kena uelij tijchiuaj sanse kej ángeles?

 KEMA Jehová mitspaleuik xijmati tlen melauak, mitstlanejki xiitsto ininuaya ichampoyouaj. Inijuantij tlauel teikneliaj uan amo sanse elij. Pero nopaya amo san itstokej toikniuaj katli kampa ueli euaj, nojkia itstokej miakej ángeles (Dan. 7:9, 10). Kema timoiljuiaj ipan ángeles, uelis nima timoiljuiaj amo tielij sanse kej inijuantij. Uelis kiampa timoiljuiaj pampa inijuantij kinchijchijkej kema ayamo tiitstoyaj (Job 38:4, 7). Ángeles kipiaj miak chikaualistli, elij tlatsejtseloltikej uan nochipa kichiuaj tlen xitlauak, uan tojuantij amo kiampa tielij pampa titlajtlakolejkej (Luc. 9:26).

² Maske amo tielij sanse kej ángeles, kena onka se keski tlamantli tlen uelis tijchiuasej kej inijuantij. Se neskayotl, tojuantij nojkia ueli tijnextiaj nopa kuajkuali tlamantli tlen Jehová kinextia, ueli tijtlapejpeniaj tlake tijchiuasej, tijpiaj totoka, amo sanse totlalnamikilis uan amo tijchiuaj sanse tekitl ipan Jehová itlanechikol. Uan sanse kej inijuantij, nojkia tijnekij tijueyichiuasej Jehová (1 Ped. 1:12).

3. ¿Tlake techmachtia tlen kichiuaj ángeles?

³ Kej ya tikitakej, kena ueli tijchiuaj se keski tlamantli sanse kej ángeles. Tlen kichiuaj techpaleuia uan techmachtia miak tlamantli. Ipan ni tlamachtili tikitasej kenijkatsa sanse kej inijuantij uelis amo timoueyimatisej, tikiniknelisej maseualmej, tikijiyouisej tlen techpanos uan titlapaleuisej amo ma mochiua tlen amo kuali ipan tlanechikoli.

 ÁNGELES AMO MOUEYIMATIJ

4. 1) ¿Kenijkatsa ángeles kinextiaj amo moueyimatij? 2) ¿Kenke ángeles amo moueyimatij? (Salmo 89:7).

⁴ Ángeles amo moueyimatij. Maske kimatij miak tlamantli, kipiaj miak chikaualistli uan tlalnamikij, nochipa kichiuaj tlen Jehová kinnauatia (Sal. 103:20). Maske kiampa kichiuaj, amo kiijtojtinemij tlen kichijkej yon kinextiaj kipiaj miak chikaualistli. Inijuantij tlauel yolpakij pampa kichiuaj tlen Jehová kinnauatia maske maseualmej amo kema kimatisej inintoka (Gén. 32:24, 29; 2 Rey. 19:35). a Nojkia, amo kinekij ma kinueyichiuakaj sanse kej Jehová. ¿Kenke amo moueyimatij? Pampa kiikneliaj Jehová uan tlauel kitlepanitaj (xijpoua Salmo 89:7).

5. ¿Kenijkatsa se ángel kinextik amo moueyimatiyaya kema kitlalnamiktik Juan? (Nojkia xikita tlaixkopinkayotl).

⁵ Ma tikitakaj se tlamantli tlen kinextia ángeles amo moueyimatij. Nechka xiuitl 96, se ángel katli amo tijmatij kenijkatsa itoka, kichijki apóstol Juan ma kiita se tlanextilili (Apoc. 1:1). ¿Tlake kichijki Juan kema kiitak nopa tlanextilili? Motlankuaixtlapachok pampa kinekiyaya kiueyichiuas nopa ángel. Pero nopa ángel nima kiiljuik: “Amo xinechueyimati. Na nojkia nijtekipanoua Toteko keja ta uan moikniuaj [...]. San Toteko xijueyimati” (Apoc. 19:10). Tlen kichijki nopa ángel kinextik amo moueyimatiyaya yon kinekiyaya ma kiueyichiuakaj. Nima kiiljuik Juan san Jehová ma kiueyichiua. Maske nopa ángel miak xiuitl kitekipanojtoya Jehová uan kipiayaya más chikaualistli que Juan, amo moueyimatki yon moiljuik más ipati, yeka kiijtok: “Na nojkia nijtekipanoua Toteko”. Uan maske monejki kitlalnamiktis Juan, amo kiajuak yon kikualankanojnotski. Ya kinojnotski ika miak tlaiknelili pampa Juan ya ueuejtixtoya. Kiampa kichijki pampa uelis kiitak tlauel momajmatijtoya.

6. Sanse kej ángeles, ¿kenijkatsa uelis tijnextisej amo timoueyimatij?

⁶ Sanse kej ángeles, nojkia uelis tijnextisej  amo timoueyimatij. ¿Kenijkatsa uelis tijnextisej? Kema tijchiuaj se tekitl ipan Jehová itlanechikol amo ma timoueyimatikaj yon ma tijnextikaj san tojuantij ueli tijchiuaj miak tlamantli (1 Cor. 4:7). Nojkia amo kinamiki timoiljuisej tojuantij más topati pampa tijtekipanojtokej Jehová miak xiuitl o pampa tijpiaj se tekitl ipan itlanechikol. Yeka tlaj tijpiaj se tekitl, moneki más timoechkapantlalisej (Luc. 9:48). Tijnekij tijchiuasej kej ángeles, tikinpaleuisej sekinok uan amo tijchiuasej ma kiyolmatikaj tojuantij más topati.

7. ¿Kenijkatsa uelis tijnextisej amo timoueyimatij kema titetlajtolmakaj o titetlalnamiktiaj?

⁷ Nojkia uelis tijnextisej amo timoueyimatij kema monekis tijtlajtolmakasej o tijtlalnamiktisej se toikni o se tokone. Kemantika moneki xitlauak titetlajtolmakasej. Pero moneki tijchiuasej sanse kej nopa ángel, maske moneki xitlauak tijtlalnamiktisej se akajya, moneki tijchiuasej ika tlaiknelili uan amo tijyolkokosej. Tlaj amo timoueyimatij, uelis titetlajtolmakasej ika Biblia uan tijchiuasej ika tlatlepanitakayotl uan ika tlaiknelili (Col. 4:6).

ÁNGELES KINIKNELIAJ MASEUALMEJ

8. 1) Kej kiijtoua Lucas 15:10, ¿kenijkatsa ángeles kinextiaj kinikneliaj maseualmej? 2) ¿Kenijkatsa ángeles techpaleuiaj kema titlajtolmoyauaj? (Xikita tlaixkopinkayotl ipan ipantsajka).

⁸ Ángeles kintekipachoua tlen kinpano maseualmej pampa tlauel kinikneliaj. Tlauel yolpakij kema se akajya katli tlajtlakolchijki moyolkuepa uan sampa kitekipanoua Jehová o kema se akajya kiixmati Jehová uan kipatla inemilis para kitekipanos (xijpoua Lucas 15:10). Ángeles nojkia tlapaleuiaj kema titlajtolmoyauaj (Apoc. 14:6). Maske inijuantij amo kinkamanaljuiaj maseualmej, kena uelis techpaleuisej ma tijpantikaj se akajya katli kinekis momachtis. Pero amo nochipa uelis tikijtosej san inijuantij techpaleuijkej, pampa Jehová nojkia kitekiuia ichikaualis para techpaleuis ma tijpantikaj se akajya katli kinekis momachtis o para kinyakanas itekipanojkauaj (Hech. 16:6, 7). Jehová tlauel kintekiuia iángeles, yeka uelis timotemachisej techpaleuisej ipan tlajtolmoyaualistli (xikita recuadro “ Jehová kintlakakilik kema momaijtojkej”). b

9. ¿Kenijkatsa uelis titeiknelisej sanse kej ángeles?

⁹ Sanse kej ángeles, nojkia uelis tijnextisej titeikneliaj. ¿Kenijkatsa uelis tijnextisej? Kema ipan tlanechikoli kiijtouaj se akajya sampa eli se toikni, uelis tiyolpakisej sanse kej ángeles. Kuali ma tijselikaj nopa toikni uan ma kiita tikikneliaj (Luc. 15:4-7; 2 Cor. 2:6-8). Nojkia uelis tijchiuasej kej ángeles tlaj tijchiuaj kampeka tlauel titlajtolmoyauasej (Ecl. 11:6). Inijuantij techpaleuiaj kema titlajtolmoyauaj, uajka nojkia ma tijchiuakaj kampeka tikinpaleuisej toikniuaj. Ma timotlatsintokikaj, ¿uelis tijtlaneuisej ma tlajtolmoyaua touaya se katli namanok pejtok tlajtolmoyaua o se toikni katli mokokoua o ya ueyi?

10. ¿Tlake techmachtia tlen kipanok Sara?

¹⁰ ¿Uan tlaj ayokmo ueli titlajtolmoyauaj kej tijnekiskiaj? Nojua uelis tijchijtosej kampeka titlajtolmoyauasej uan timotemachisej ángeles techpaleuisej. Ma tikitakaj tlen kipanok tosiuaikni Sara, c katli eua India. Ya tlatekipanok 20 xiuitl kej precursora, pero teipa mokokok uan san uilantoya ipan icama. Nopa kichijki tlauel ma mokueso. Pero toikniuaj tlauel kipaleuijkej uan ya kichiuayaya kampeka mojmostla kipouas Biblia, nopa  kipaleuik sampa ma yolpaki. Teipa kipatlak kej tlajtolmoyauayaya, uan pejki tlamachtia ika teléfono pampa amo ueliyaya moseuia para kichiuas cartas. Yeka, kinnojnotsayaya katli achtouia kinpaxalouayaya uan inijuantij kiiljuiyayaj sekinok nojkia kinekiyayaj momachtisej Biblia. ¿Tlake panok teipa? San ipan se keski metstli, Sara pejki kinmachtia 70 maseualmej uan ayokmo ueliyaya kinmachtia nochi. Yeka kiniljuik sekinok toikniuaj ma kinmachtikaj. Uan nama miakej tlen inijuantij yauij tlanechikoli. Ángeles tlauel yolpakij kema kinpaleuiaj toikniuaj katli tlauel tlajtolmoyauaj kej Sara.

ÁNGELES KIIJIYOUIAJ TLEN AMO KUALI

11. ¿Tlake techmachtia pampa ángeles kiijiyouijtokej tlen amo kuali?

¹¹ Ángeles nojkia technextiliaj kenijkatsa uelis tikijiyouisej tlen techpanos. Miak xiuitl kiitstokej kenijkatsa sekij amo kichiuaj tlen xitlauak uan kichiuaj tlen amo kuali. Inijuantij kiitakej kenijkatsa Satanás uan sekinok ángeles katli nojkia kitekipanouayayaj Dios  tlaijixnamijkej (Gén. 3:1; 6:1, 2; Jud. 6). Biblia nojkia kiijtoua se amo kuali ajakatl kiteuik se ángel (Dan. 10:13). Uan ipan miak xiuitl ángeles kiitstokej kenijkatsa miakej maseualmej amo kinekij kitekipanosej Jehová. Maske kiitaj nochi nopa tlamantli, inijuantij nojua kitekipanojtokej Jehová ika pakilistli. Ángeles motemachiaj Dios kitsontlamiltis tlen amo kuali kema kinamiki.

12. ¿Tlake techpaleuis ma tikijiyouikaj tlen techpanos?

¹² Tojuantij nojkia uelis tikijiyouisej tlen techpanos sanse kej ángeles. ¿Tlake techpaleuis? Uelis nojkia tikitaj mochiua tlen amo xitlauak o amo techkauaj ma tijtekipanokaj Jehová, pero sanse kej ángeles, ma timotemachikaj Dios kitsontlamiltis tlen amo kuali kema kinamiki. Uajka sanse kej inijuantij, “amo ma tijkauakaj tijchiuasej tlen kuali” (Gál. 6:9). Jehová kiijtojtok techpaleuis ma tikijiyouikaj tlen ueli tlamantli (1 Cor. 10:13). Uelis tikiljuisej ma techmaka ichikaualis pampa nopa techpaleuis ma tijpiakaj toyolo uan ma tiyolpakikaj (Gál. 5:22; Col. 1:11). ¿Uan tlake uelis tijchiuas tlaj amo mitskauaj xijtekipano Jehová? Ximotemachi ipan ya uan amo ximajmaui. Ya nochipa itstos monechka uan mitsmakas chikaualistli (Heb. 13:6).

ÁNGELES TLAPALEUIAJ AMO MA MOCHIUA TLEN AMO KUALI IPAN TLANECHIKOLI

13. ¿Tlake tekitl tlen tlauel ipati kichiuaj ángeles ipan ni tonali? (Mateo 13:47-49).

¹³ Ipan ni tonali, Jehová kinmakatok ángeles se tekitl tlen tlauel ipati (xijpoua Mateo 13:47-49). Kema titlajtolmoyauaj, miakej maseualmej kinpaktia kikakisej nopa kuali tlamachtili. Sekij kipatlaj ininnemilis uan peuaj kitekipanouaj Jehová pero sekij amo. Ángeles kiniyokatlaliaj “katli amo kuajkualmej ika katli kichiuaj tlen kuali”. Kiampa tlapaleuiaj amo ma mochiua tlen amo kuali ipan tlanechikoli. Ni amo kiijtosneki tlaj se akajya mouejkatlalia ayokmo kema uelis tlakuepilis, yon kiijtosneki amo kema tijpiasej kuesoli ipan tlanechikoli. Uajka, uelis timotemachisej ángeles kichiuaj kampeka amo ma mochiua tlen amo kuali ipan tlanechikoli.

14, 15. Sanse kej ángeles, ¿kenijkatsa uelis titlapaleuisej amo ma mochiua tlen amo kuali ipan tlanechikoli? (Nojkia xikita tlaixkopinkayomej).

¹⁴ Sanse kej ángeles, tojuantij nojkia uelis titlapaleuisej amo ma mochiua tlen amo kuali ipan tlanechikoli. ¿Kenijkatsa uelis tijchiuasej? Moneki tijchijtosej kampeka kuali timonejnemiltisej uan kuali titlaneltokasej. Nochi moneki tijmokuitlauisej toyolo, yeka moneki kuali tikintlapejpenisej touampoyouaj uan  timouejkatlalisej ika tlen uelis kichiuas ayokmo kuali ma tijtekipanokaj Jehová. Tlaj kiampa tijchiuasej, titlapaleuisej amo ma mochiua tlen amo kuali ipan tlanechikoli (Sal. 101:3). Nojkia, uelis tikinpaleuisej toikniuaj amo ma kitlauelkauakaj Jehová. Ma timoiljuikaj, ¿tlake moneki tijchiuasej tlaj tijmatij se toikni kichijki se ueyi tlajtlakoli? Tlauel tikikneliaj nopa toikni, yeka moneki tikiljuisej ma kamanalti ininuaya ueuejtlakamej. Uan tlaj amo kiampa kichiuas, tojuantij moneki tikamanaltisej ininuaya. Tijnekij nima ma kipaleuikaj nopa toikni sampa kuali ma mouika iuaya Jehová (Sant. 5:14, 15).

¹⁵ Kemantika se keskij toikniuaj kichiuaj se ueyi tlajtlakoli uan moneki kinkixtisej tlen tlanechikoli. Kema kiampa pano, ayokmo timouikaj ininuaya (1 Cor. 5:9-13). d Kema kikixtiaj se akajya, tlapaleuia amo ma mochiua tlen amo kuali ipan tlanechikoli. Nojkia, kema amo timouikaj iuaya, tijnextiaj tikikneliaj. Kema kiampa tijchiuaj, uelis tijpaleuisej ma motlalnamikti. Kema se akajya sampa tlakuepilia, Jehová, ángeles uan tojuantij tlauel tiyolpakij (Luc. 15:7).

16. ¿Tlake tlamantli tijneki tijchiuas sanse kej ángeles?

¹⁶ Tlauel tiyolpakij pampa tijmatij tlake tekitl kichiuaj ángeles uan pampa titekitij ininuaya. Sanse kej inijuantij, ma tijchijtokaj kampeka amo timoueyimatisej, ma tikiniknelikaj maseualmej, ma tikijiyouikaj tlen amo kuali uan ma titlapaleuikaj amo ma mochiua tlen amo kuali ipan tlanechikoli. Tlaj tijchiuasej kej inijuantij, nochipa tielisej ichampoyouaj Jehová.