Kemantika amo tijmatij kenijkatsa tijpaleuisej se akajya katli tlauel mokuesojtok. Uelis amo tijmatij tlake tijchiuasej o tlake tikiljuisej. Maske kiampa techpano, onka se keski tlamantli tlen kena uelis tijchiuasej.

Uelis tijyolchikauasej maske san tiasej tikitatij uan tikiljuisej tlauel techyolkokoua tlen kipano. Kanajya momajtokej kinajnauaj katli mokuesojtok o chikauak kimatlajpalouaj, kiampa kinextiaj kiikneliaj. Tlaj katli tlaijiyouijtok kineki kamanaltis touaya, kuali ma tijtlakakilikaj. Nojkia uelis tikinpaleuisej ininchampoyouaj, uelis tikintlakualchiuilisej, tikinmokuitlauisej ininkoneuaj o tlaj inijuantij kinekij, uelis titlapaleuisej ika tlen kichiuaj kema nechka kitlalpachosej. Tlen tijchiuasej tlauel kinyolchikauas maske amo tleno tikiniljuisej.

Kema panos tonali, katli mokuesojtok uelis kinekis kiijtos kenijkatsa eliyaya katli mijki, uelis kiilnamikis tlen kinpanok kema sansejko itstoyaj o kiilnamikis se kuali tlamantli tlen kinextiyaya ipan inemilis. Tlauel kuali kiyolmatis tlaj tijtlakakiliaj, uelis kichiuas ma yolpaki se kentsi. Ya nopa kipano Pam, ya panotok se chikuasej xiuitl kema iueue Ian mijki. Pam kiijtoua: “Maseualmej nechiljuiaj se keski tlamantli tlen Ian kichijki, na amo nijmatiyaya tlaj kichijtoya nopa, yeka tlauel niyolpaki kema nijmati tlen kichijki”.

Sekij kiijtouaj maske nima kinpaleuiaj katli mokuesojtokej, teipa ininuampoyouaj kiilkauaj moneki nojua kinyolchikauasej. Yeka, maske ya panotok tonali, nochipa xikinnojnotsa katli mokuesojtokej. * Inijuantij tlauel kipatiitaj kema se akajya nochipa kintlakakilia maske ya panok tonali kema mijki se akajya katli tlauel kiikneliyayaj.

Xikita tlen kipanok Kaori, se ichpokatl katli eua Japón. Tlauel mokuesok kema inana mijki, uan kema panok nechka se xiuitl uan tlajko, mijki iikni katli achtoui ejki. Ya tlauel kuali kiyolmatki kema iuampoyouaj nochipa kipaleuijkej. Ritsuko, se iuampo kinejki kimokuitlauis kejuak eliskia iichpoka. Kaori kiijtoua: “Na amo nechpaktik. Amo nijnekiyaya seyok ma nechmokuitlaui kejuak eliskia nonana. Maske achtoui amo nechpaktik, teipa pejki nikiknelia pampa ya nochipa kinextiyaya nechiknelia. Sejse chikueyi sansejko titlajtolmoyauayayaj uan sansejko tiauiyayaj tlanechikoli. Nechuikayaya ma tikitij té, nechtlamakayaya uan nechtlajkuiljuiliyaya. Tlen Ritsuko kichijki, nelia tlauel nechpaleuik”.

Ya panok 12 xiuitl kema Kaori inana mijki. Ipan ni tonali, ya iuaya iueue tlauel tlajtolmoyauaj. Kaori kiijtoua: “‘Nonana’ Ritsuko, nojua kitekipachoua tlen nechpano. Kema niasi nochaj, nia nijpaxaloua, tlauel nechpaktia niitstos iuaya”.

Poli, se tlen Jehová itlajtoltemakauaj katli eua Chipre, nojkia tlauel kuali kiyolmati pampa sekinok kipaleuijtokej. Iueue Sozos tlauel kuali kitekipanoyaya toTeotsij uan tlauel teikneliyaya. Kemantika kintlaneuiyaya toikniuaj katli ayokmo kinpixtoyaj ininueue uan iknotsitsij ma tlakuatij ichaj uan sentik moyolpakiltisej (Sant. 1:27). Kema kipixtoya 53 xiuitl mijki pampa kipixki se tumor ipan itsonteko. Poli kiijtoua: “Tiitstoyaj sansejko 33 xiuitl, uan nama noueue ayokmo itstok nouaya”.

Teipa, Poli mochantito Canadá iuaya ikone Daniel katli kipixtoya 15 xiuitl. Nopaya yauiyayaj ipan se tlanechikoli. Poli kiijtoua: “Maske toikniuaj amo kimatiyayaj nochi tlen techpanotoya, kuali techselijkej uan techpaleuijkej. Nopa tlauel kipaleuik nokone pampa itata ayokmo itstoya iuaya. Katli tlayakanaj ipan tlanechikoli kinextilijkej Daniel tlauel kiikneliyayaj. Se tlen nopa toikniuaj nochipa kitlaneuiyaya kema yauiyayaj  mauiltiaj ininuaya sekinok toikniuaj o pampa kinekiyaya ma moyolpakilti ininuaya kuali iuampoyouaj”. Nama, Poli uan Daniel tlauel kuali itstokej.

Uajka, uelis tikinpaleuisej uan tikinyolchikauasej katli mokuesojtokej ika miak tlamantli. Ma tikitakaj kenijkatsa Biblia nojkia tlauel techyolchikaua.