TLAMACHTILI 26
“Xiualakaj kampa na”
“Xiualakaj kampa na uan na sampa nimokuepas kampa inmojuantij” (MAL. 3:7).
UIKATL 102 Ma tikinpaleuikaj katli mokuesouaj
TLEN MOIXTOMAS *
1. ¿Kenijkatsa kiyolmati Jehová kema se itekipanojka sampa tlakuepilia?
KEJ TIKITAKEJ ipan tlamachtili 25, Jehová eli kej se tlapialmokuitlauijketl katli kinmokuitlauia sejse itekipanojkauaj ika tlaiknelili uan kintemoua katli mouejkatlalijtokej. Se tonali, Jehová kiniljuik israeleuanij katli mouejkatlalijtoyaj: “Xiualakaj kampa na uan na sampa nimokuepas kampa inmojuantij”. Uan ipan ni tonali Jehová nojua kiampa kiniljuia itekipanojkauaj pampa ya axmoyolpatla (Mal. 3:6, 7). Nojkia, Jesús kiijtok Jehová uan iluikaeuanij tlauel yolpakij kema se katli mouejkatlalijtoya sampa tlakuepilia (Luc. 15:10, 32).
2. ¿Tlake tikitasej ipan ni tlamachtili?
2 Ipan ni tlamachtili tikitasej eyi tlapoualistli tlen Jesús kiijtok, nopa techpaleuis tijmatisej kenijkatsa tikinpaleuisej katli mouejkatlalijtokej. Nojkia tikitasej tlake kuajkuali tlamantli moneki tijnextisej uan kiampa tikinpaleuisej sampa ma kitekipanokaj Jehová uan kenke amo san tlapik tlaj tijchiuaj kampeka tikinpaleuisej.
MA TIJTEMOKAJ “NOPA TOMIJ TLEN POLIJKI”
3, 4. Kej kiijtoua Lucas 15:8-10, ¿kenke nopa siuatl kichijki kampeka kipantis nopa tomij tlen kipolojtoya?
3 Tlaj tijnekij tikinpantisej katli sampa kinekij kitekipanosej Jehová, moneki tijchiuasej kampeka tikintemosej. Ipan pilamochtsi Lucas, Jesús kiijtok se tlapoualistli tlen se siuatl katli kipolok se tomij tlen kiiljuiyayaj dracma uan eliyaya tlauel ipati. Nopa siuatl kichiua kampeka sampa kinpantis nopa tomij (xijpoua Lucas 15:8-10).
4 Kema Jesús itstoya, se tenaj kimakayaya iichpoka katli monamiktiyaya matlaktli dracmas. Ipan nopa tlapoualistli tlen Jesús kiijtok, uelis nopa siuatl kipolok se tlen nopa tomij. Uelis moiljuik uetski tlalchi, yeka kitlatia tlauili uan peua kitemoua, uan amo kipantia pampa uelis nopa tlauili amo kuali tlauia. Yeka, peua kuali tlachpana. Uan kema kinechikoua tlasoli kiita se tlamantli tlen petlani, eli nopa dracma tlen kipolojtoya. Jesús kiijtok nopa siuatl tlauel yolpajki uan kinnotski iuampoyouaj uan ikalnechkauaj pampa kinejki kiniljuis ya kipantijtoya nopa tomij.
5. ¿Kenke moneki tijchiuasej kampeka tikintemosej katli mouejkatlalijtokej?
5 Tlen Jesús kiijtok techmachtia moneki tijchiuasej kampeka tijpantisej se tlamantli tlen tijpolojkej. Nojkia, kiampa moneki tijchiuasej kema tikintemosej katli mouejkatlalijtokej. Uelis ya uejkajtok amo monechikouaj, uan uelis nama itstokej kampa toikniuaj amo kinixmatij. Se keskij tlen inijuantij sampa kinekij kitekipanosej Jehová ininuaya toikniuaj uan moneki ma tikinpaleuikaj.
6. ¿Kenijkatsa nochi toikniuaj uelis kintemosej katli mouejkatlalijtokej?
6 ¿Ajkia inijuantij uelis kintemosej katli mouejkatlalijtokej? Nochi toikniuaj tlen tlanechikoli, ininuikaljuaj, ueuejtlakamej, precursores uan tlajtolmoyauanij. ¿Tijpiaj se touampo o se touikal katli ayokmo kitekipanoua Jehová? ¿Tijpantijkej se akajya katli ayokmo kitekipanoua Jehová kema titlajtolmoyauayayaj kajkalpa o kampa nemij miakej? Ma tijtlatsintokikaj nopa maseuali tlaj kinekiskia ma kipaxalotij ichaj. Tlaj kena, uajka ma tikiljuikaj uelis tikiniljuisej ueuejtlakamej tlen totlanechikol kenijkatsa itoka, kanke ichaj uan tlake inúmero. Kema kiampa tijchiuasej, moneki tikitasej tlaj ipan nopa altepetl amo onka se tlanauatili kampa kiijtoua amo uelis titematiltisej inintoka maseualmej o sekinok tlamantli.
7. ¿Tlake tijyekouaj tlen kiijtoua se ueuejtlakatl katli itoka Thomas?
7 ¿Tlake uelis kichiuasej ueuejtlakamej tlaj kinekij kinpantisej katli kinekij sampa kitekipanosej Jehová? Ma tikitakaj tlen kiijtoua Thomas *, se ueuejtlakatl katli eua España. Ya kinpaleuijtok kipano 40 toikniuaj sampa ma kitekipanokaj Jehová. Thomas kiijtoua: “Achtoui nikintlajtlania toikniuaj tlaj kimatij kanke itstokej katli mouejkatlalijtokej o tlaj kiilnamikij se toikni katli ayokmo monechikoua. Inijuantij ika pakilistli nechiljuiaj tlen nikintlajtlania. Teipa, kema nikinpaxaloua toikniuaj katli mouejkatlalijtokej nikintlajtlania kenijkatsa itstokej ininkoneuaj o ininuikaljuaj. Se keski tlen inijuantij kinuikayayaj ininkoneuaj tlanechikoli uan uelis nojkia tlajtolmoyauayayaj. Ininkoneuaj nojkia uelis tikinpaleuisej sampa ma kitekipanokaj Jehová”.
MA TIKINPALEUIKAJ SAMPA MA TLAKUEPILIKAJ
8. Kej kiijtoua Lucas 15:17-24, ¿kenijkatsa nopa tetaj kiselik ikone?
8 ¿Tlake kuajkuali tlamantli moneki tijnextisej tlaj tijnekij tikinpaleuisej katli mouejkatlalijtokej? Ma tikitakaj tlake techmachtia nopa tlapoualistli tlen nopa telpokatl katli sampa tlakuepilik (xijpoua Lucas 15:17-24). Jesús kiijtok kema panok se keski tonali, nopa telpokatl moiljuik kenijkatsa itstoya iuaya itata uan sampa kinejki tlakuepilis. Itata motlalok kema kinamikito uan kikuanajnauajki ika miak tlaiknelili pampa kinekiyaya ma kimati nojua kiikneliyaya. Nopa telpokatl kiyolkokouayaya tlen kichijki uan moiljuiyaya ayokmo kinamikiyaya ma kiita kej ikone. Nopa tetaj yolpajki kema itelpoka kiiljuik nochi tlen kiyolmatiyaya uan kiitak nelia moyolpatlatoya. Yeka, nopa tetaj tlanauatik ma iljuichiuakaj uan ma kimakakaj se kuali uan yejyektsi yoyomitl. Ika tlen kichijki kinextik kiseliyaya kej ikone uan amo kej se itlatekipanojka.
9. ¿Tlake kuajkuali tlamantli moneki tijnextisej tlaj tijnekij tikinpaleuisej katli mouejkatlalijtokej? (Xikita nopa recuadro “ ¿Kenijkatsa uelis tikinpaleuisej katli kinekij tlakuepilisej?”).
9 Jehová eli kej nopa tetaj tlen Jesús kiijtok. Ya kiniknelia katli mouejkatlalijtokej uan kineki sampa ma kitekipanokaj. Tlaj tijchiuasej kej Jehová, uelis nojkia tikinpaleuisej ma tlakuepilikaj. Yeka, tlauel ipati tijnextisej ueyi toyolo, tijkuamachilisej tlen kiyolmatij uan tikiniknelisej. ¿Kenke moneki tijnextisej ni kuajkuali tlamantli uan kenijkatsa uelis tijnextisej?
10. ¿Kenke moneki tijpiasej ueyi toyolo tlaj tijnekij tijpaleuisej se akajya katli mouejkatlalijtok?
10 Tlaj tijnekij tijpaleuisej katli mouejkatlalijtok, moneki tijpiasej ueyi toyolo pampa uelis amo nima kuali mouikas iuaya Jehová. Miakej toikniuaj katli mouejkatlalijtoyaj kiijtouaj tlauel kinpaleuik kema ueuejtlakamej uan sekinok toikniuaj miakpa kinpaxalojkej. Nancy, se tosiuaikni katli eua Asia, kiijtoua: “Se nouampo tlen tlanechikoli tlauel nechpaleuik. Nechikneliyaya kej se noikni uan nechilnamikiliyaya tlen tijchiuayayaj sansejko. Kema nikiljuiyaya tlen nijyolmatiyaya, kuali nechtlakakiliyaya uan kema kinamikiyaya nechtlajtolmakayaya. Nelia elki se kuali nouampo pampa nochipa nechpaleuiyaya”.
11. ¿Kenke moneki tijkuamachilisej tlen kiyolmati se akajya katli moyolkokojtok?
11 Tijkuamachilisej tlen kiyolmatij sekinok eli kej se pajtli tlen kinpaleuia sampa kuali ma kiyolmatikaj. Se keskij toikniuaj mouejkatlalijkej pampa se toikni kinyolkokok uan nama nojua moyolkokojtokej, yeka amo kinekij tlakuepilisej. Nojkia, uelis moiljuiaj kinchiuilijkej tlen amo xitlauak. Uelis kinekij se akajya kuali ma kintlakakili uan ma kikuamachili tlen kiyolmatij (Sant. 1:19). María, se tosiuaikni katli mouejkatlalijtoya, kiijtoua: “Nijnekiyaya se akajya ma nechtlakakili, ma nechpaleui uan ma itsto nouaya kema nimochokiliyaya”.
12. ¿Kenke nopa tlaiknelijkayotl tlen Jehová kinextia eli kej se mekatl?
12 Biblia kiijtoua nopa tlaiknelili tlen Jehová kinnextilia itekipanojkauaj eli kej se mekatl. ¿Kenke kiampa tikijtouaj? Ma timoiljuikaj ipan ni tlamantli, ximoiljui ta nechka timisauis uan se akajya mitsmajkauilia se mekatl. Maske mitsmajkauilia nopa mekatl, amo san ya nopa moneki, nojkia moneki ma kitilana pampa tlauel chikauak yaui nopa ueyatl, uan kiampa uelis tikixkotonas. Jehová kiniljuik israeleuanij katli mouejkatlalijtoyaj, kinyoltilanaskia “ika miak tlaiknelijkayotl” (Os. 11:4). Jehová nojkia kiampa kineki kinpaleuis katli mouejkatlalijtokej pampa kipiaj miak kuesoli uan tekipacholi. Kineki kinpaleuis sampa ma tlakuepilikaj uan ma kimatikaj tlauel kiniknelia. Nojkia, Jehová uelis techtekiuis uan kiampa kinnextilis tlauel kiniknelia.
13. ¿Kenke tlen kipanok Pablo kinextia tlaiknelijkayotl uelis kinpaleuis sampa ma tlakuepilikaj katli mouejkatlalijtokej?
13 Katli mouejkatlalijtokej moneki tikiniljuisej Jehová tlauel kiniknelia uan tojuantij nojkia. Pablo, katli tikijtojkej ipan seyok tlamachtili mouejkatlalijtoya kipano 30 xiuitl, kiijtoua: “Se ijnalok kema nikiski nochaj, se tosiuaikni katli ya ueyi nechtlajpalok uan nechnojnotski ika miak tlaiknelili. Pejki nichoka kej se okichpil uan nikiljuik kejuak nikitak Jehová kititlantoya ma kamanaltiki nouaya. Nopa kichijki sampa ma nijneki nijtekipanos Jehová”.
MA TIKINPALEUIKAJ IKA MIAK TLAIKNELILI
14. Kej kiijtoua Lucas 15:4, 5, ¿tlake kichiua se tlapialmokuitlauijketl kema kipantia ipilborrego?
14 Kema sampa tlakuepiliaj katli mouejkatlalijtoyaj, moneki tikinpaleuisej uan tikinyolchikauasej. Uelis tlauel moyolkokojtokej kej nopa telpokatl tlen Jesús kiijtok ipan nopa tlapoualistli. Uan pampa miak xiuitl mouejkatlijtoyaj, ayokmo kuali tlaneltokaj, yeka moneki tikinpaleuisej sampa kuali ma tlaneltokakaj. Ipan nopa tlapoualistli tlen nopa pilborregojtsi katli mokuapolojtoya, Jesús kiijtok nopa tlapialmokuitlauijketl kitlalia ipan iajkol uan sampa kiuika kampa itstokej nopa sekinok borregojmej. Maske nopa tlapialmokuitlauijketl uejkajki kitemoua uan siajki, nojkia kimati moneki kiuikas nopa pilborregojtsi pampa amo uelis yas iselti (xijpoua Lucas 15:4, 5).
15. ¿Kenijkatsa uelis tikinpaleuisej katli sampa kinekij kitekipanosej Jehová? (Xikita nopa recuadro “ Tlen kinpaleuis katli mouejkatlalijtokej”).
15 Uelis moneki panos miak tonali uan kiampa uelis tikinpaleuisej sampa kuali ma tlaneltokakaj katli mouejkatlalijtoyaj (Rom. 15:1). Jehová itonal, iTlajtol uan amatlajkuiloli tlen techmaka itlanechikol uelis techpaleuis ma tikinpaleuikaj. ¿Kenijkatsa uelis tikinpaleuisej? Se ueuejtlakatl, katli kipia miak xiuitl tlatekipanojtok, kiijtoua: “Kema katli mouejkatlalijtokej sampa kinekij kitekipanosej Jehová, moneki se toikni ma kinpaleui ma momachtikaj Biblia”. * Yeka tlaj ueuejtlakamej techiljuiaj ma tijpaleuikaj se toikni katli mouejkatlalijtoya, moneki tijchiuasej ika pakilistli. Nopa toikni, nojua kiijtoua: “Katli mouejkatlalijtoyaj kinekij kipiasej se kuali ininuampo, kiampa uelis kipouilisej tlen kiyolmatij”.
ONKA PAKILISTLI IPAN ILUIKAK UAN IPAN TLALTIPAKTLI
16. ¿Kenijkatsa tijmatij techpaleuiaj iluikaeuanij?
16 Miakpa nestok iluikaeuanij techpaleuijtokej ma tikinpantikaj katli sampa kinekij kitekipanosej Jehová (Apoc. 14:6). Silvio, katli eua Ecuador, kiiljuik Jehová ma kipaleui sampa ma tlakuepili ipan tlanechikoli. Kema nojua momaijtouayaya kikaltajtakanijkej omej ueuejtlakamej uan ipan nopa tonali nima pejkej kipaleuiaj.
17. ¿Tlake tlateochiualistli tijseliaj kema tikinpaleuiaj katli mouejkatlalijtoyaj?
17 Tlauel tiyolpakisej tlaj tikinpaleuisej katli mouejkatlalijtoyaj sampa ma kitekipanokaj Jehová. Ma tikitakaj tlake kiijtoua Salvador, katli tlatekipanoua kej precursor uan kichiua kampeka kinpaleuis katli mouejkatlalijtokej: “Nichokasneki pampa tlauel niyolpaki kema nimoiljuia kenijkatsa Jehová kinpaleuia toikniuaj sampa ma tlakuepilikaj uan pampa nojkia nechkaua ma nitlapaleui” (Hech. 20:35).
18. Tlaj timouejkatlalijtok, ¿ipan tlake uelis timotemachis?
18 Tlaj timouejkatlalijtok tlen Jehová itlanechikol, uelis timotemachis Jehová nojua tlauel mitsiknelia uan kineki sampa xijtekipano. Tlaj sampa tijneki titlakuepilis moneki tijchiuas se keski tlamantli. Xikilnamiki tlen kichijki nopa tetaj tlen nopa tlapoualistli katli Jesús kiijtok. Jehová kineki sampa xitlakuepili uan ya mitsselis ika pakilistli.
UIKATL 103 Ueuejtlakamej elij se tlateochiualistli
^ párr. 5 Katli uejkajkia amo tlajtolmoyauaj yon monechikouaj, Jehová kiniljuia: “Xiualakaj kampa na”. Nochi tojuantij uelis tikinpaleuisej katli mouejkatlalijtokej uan kinekij sampa tlakuepilisej. Ipan ni tlamachtili tikitasej kenijkatsa uelis tikinpaleuisej.
^ párr. 7 Ipan ni tlamachtili kinpatilijtokej inintoka.
^ párr. 15 Sekij katli mouejkatlalijtoyaj uelis kinpaleuis tlaj momachtisej se keski tlamachtili tlen nopa amochtli Xijchiuakaj ma inmechiknelijto ToTeotsij. Uan sekinok uelis kinpaleuis tlaj momachtisej se keski tlamachtili tlen nopa amochtli Acerquémonos a Jehová. Nopa Eyij ueuejtlakamej tlen kiitaj se keski tekitl ipan tlanechikoli, kiijtosej ajkia kimachtis nopa toikni katli mouejkatlalijtoya.
^ párr. 68 TLEN NESI IPAN TLAIXKOPINKAYOMEJ: Eyij toikniuaj kipaleuiaj se toikni katli kineki sampa kitekipanos Jehová. Se kitlajkuiljuilia, se kinextia nojua kiiknelia uan seyok kinextia kikuamachilia tlen kiyolmati.
