Tlen maseualmej kinekij kimatisej
Kej kiijtoua Isaías 60:1, ¿kenijkatsa “motlananas” uan “kipias tlauili” Jerusalén?
Isaías 60:1 kiijtoua: “Altepetl Jerusalén motlananas. Jerusalén elis yejyektsi uan kipias tlauili keja tonati para nochi tlakamej ipan nochi tlaltinij ma kiitakaj pampa iueyitilis TOTEKO kitlauilis”. Altepetl Jerusalén o Sion kiixnextia nochi altepetl Israel (Is. 60:14; 62:1, 2). Pero, ¿kema uan kenijkatsa motlananki Jerusalén uan pejki tlauia? ¿Nojkia moaxitia ipan ni tonali tlen kiijtok Isaías? Ma tijnankilikaj ni ome tlajtlanili.
¿Kema uan kenijkatsa motlananki Jerusalén uan pejki tlauia? Judíos kinuikakej Babilonia uan nopaya uejkajkej 70 xiuitl, kema nopaya itstoyaj, nopa altepetl Jerusalén uan teokali uelontoyaj. Kema medos uan persas moaxkatijkej Babilonia, nochi israeleuanij ueliskiaj tlakuepilisej Jerusalén uan sampa kiueyichiuasej Jehová kej kinamiki (Esd. 1:1-4). Ipan xiuitl 537 a.u.J., miakej judíos katli kuali tlaneltokayayaj tlen nopa 12 tribus tlakuepilijkej (Is. 60:4). Pejkej temakaj tlakajkaualistli, iljuichiuaj uan kikualtlalijkej nopa teokali (Esd. 3:1-4, 7-11; 6:16-22). Yeka, Jehová ichikaualis kejuak sampa pejki tlauia ipan Jerusalén, nopa altepetl katli Jehová kitlapejpenijtoya uan kikualchijchijtoya. Nopa judíos kejuak nojkia pejkej tlauiaj ipan sekinok altepemej katli amo kiixmatiyayaj Jehová.
Maske kiampa panok, tlen kiijtok Isaías amo nochi moaxitik ipan nopa tonali. Miakej israeleuanij ayokmo kineltokakej Jehová (Neh. 13:27; Mal. 1:6-8; 2:13, 14; Mat. 15:7-9). Uan teipa amo tlaneltokakej ipan Jesucristo, katli eli nopa Mesías (Mat. 27:1, 2). Ipan xiuitl 70, ika ompa kitsontlamiltijkej Jerusalén uan nopa teokali.
Jehová ya kiijtojtoya kiampa panoskia (Dan. 9:24-27). Pero amo mosentlalijtoya ma motlamiaxitik tlen kiijtoua Isaías capítulo 60 san ipan Jerusalén tlen uejkajkia eltoya.
¿Moaxitia tlen kiijtok Isaías ipan ni tonali? Kena, pero “Jerusalén” kiixnextia nopa “Jerusalén tlen eltok uejkapa”. Apóstol Pablo kiijtok: “Yaya eli tonana” (Gál. 4:26). Ni eli Jehová itlanechikol tlen eltok iluikak, kampa itstokej iluikaeuanij katli amo kitlauelkauaj. Ikoneuaj nopa Jerusalén tlen eltok uejkapa elij Jesús uan nopa 144,000 katli kintlapejpenijtokej yasej iluikak, sanse kej Pablo. Katli yasej iluikak elij se altepetl tlatsejtseloltik, nopa “Israel tlen iaxka Dios” (1 Ped. 2:9; Gál. 6:16).
¿Kenijkatsa motlananki Jerusalén tlen eltok uejkapa uan kejuak pejki tlauia? Kichijki ika maseualmej katli kintlapejpenijtokej yasej iluikak. Ma tikitakaj kenijkatsa tlen kinpanok eli sanse ika tlen kiijtoua Isaías capítulo 60.
Ipan siglo ome, kema ya miktoyaj nochi apóstoles, apóstatas pejkej kinkajkayauaj toikniuaj, yeka Cristo itokilijkauaj monejki kejuak motlananasej pampa itstoyaj ipan tsintlayouilotl (Mat. 13:37-43). Inijuantij kejuak kintsaktoya Ueyi Babilonia, katli kiixnextia nochi religiones tlen amo melauak. Uan kiampa itstoyaj hasta itlamia tonali, tlen pejki ipan xiuitl 1914 (Mat. 13:39, 40). Teipa, ipan 1919 kiskej tlen ueyi Babilonia uan kejuak pejkej tlauiaj pampa mosentlalijkej tlajtolmoyauasej. a Ipan nopa tonali, miakej maseualmej tlen nochi altepemej pejkej monechkauiaj kejuak ipan nopa tlauili, uan nojkia kiampa kichijtokej katli poliuij tlen nopa Israel tlen iaxka Dios, katli nojkia elij nopa tlanauatianij tlen kiijtoua Isaías 60:3 (Apoc. 5:9, 10).
Teipa, katli kintlapejpenijtokej yasej iluikak más tlauisej. Kema mikisej uan yasej iluikak, elisej nopa yankuik Jerusalén o katli elis Cristo isiua, nopa 144,000 katli elisej tlanauatianij uan sacerdotes (Apoc. 14:1; 21:1, 2, 24; 22:3-5).
Nopa yankuik Jerusalén tlapaleuis ma moaxiti tlen kiijtoua Isaías 60:1 (nojkia xikita Isaías 60:1, 3, 5, 11, 19, 20 uan Apocalipsis 21:2, 9-11, 22-26). Sanse kej uejkajkia ipan Jerusalén itstoyaj katli tlanauatiyayaj ipan altepetl Israel, nopa yankuik Jerusalén uan Jesús, kinnauatisej maseualmej ipan yankuik Tlaltipaktli. ¿Tlake kiijtosneki kema Apocalipsis kiijtoua “nopa yankuik Jerusalén temoyaya tlen iluikak kampa toTeko”? Kiijtosneki kinpaleuis katli itstosej ipan Tlaltipaktli. Biblia kiijtoua katli kuali monejnemiltiaj “nejnemisej ipan itlauil nopa altepetl” uan ayokmo kipiasej tlajtlakoli yon mikisej (Apoc. 21:3, 4, 24). Ipan nopa tonali, mokualtlalis nochi tlamantli tlen Dios tematiltik ika Isaías uan ika sekinok teokamanalouanij (Hech. 3:21). Ni mochijtiualajtok desde kema Jesús pejki tlanauatia uan tlamis ipan nopa Mil Xiuitl kema tlamis tlanauatis.
a Ezequiel 37:1-14 uan Apocalipsis 11:7-12 nojkia kiijtoua kenijkatsa sampa kiueyichiuaskiaj Jehová kej kinamiki, uan ni panok ipan 1919. Teokamalojketl Ezequiel kiijtok kema ya panotoskia miak xiuitl, nochi katli kintlapejpenijtokej yasej iluikak sampa kiueyichiuaskiaj Jehová kej kinamiki. Uan ipan Apocalipsis nojkia kiijtoua se keskij toikniuaj katli kintlapejpenijtokej yasej iluikak uan kinyakanaj Jehová itlanechikol, kinkixtiskiaj kampa kintsaktoyaj uan kiampa sampa kitekipanoskiaj Jehová. Ipan 1919, kintokaxtijkej “tlatekipanojketl katli temachtli uan tlalnamiki” (Mat. 24:45; xikita La adoración pura de Jehová: ¡por fin restaurada!, iamayo 118).
