TLEN KINPANOTOK TOIKNIUAJ
San nijchijtok tlen moneki nijchiuas
DONALD RIDLEY elki se abogado katli kinpaleuik Jehová itlajtoltemakauaj kipano 30 xiuitl. Kinpaleuik miakej toikniuaj kema tepajtianij kinchiualtiyayaj ma kiselikaj estli, uan nojkia kinpaleuik toikniuaj kema moteljuiyayaj ika tekichiuanij ipan Estados Unidos. Don, katli kiampa kitokaxtiyayaj iuampoyouaj, kipaktiyaya tekitis, amo moueyimatiyaya uan kinpaleuiyaya sekinok.
Ipan 2019, tepajtianij kiiljuijkej kipixtoya se kokolistli ipan itsonteko tlen amo kipia pajtli. Don, tlauel mokokok uan mijki ipan agosto 16, 2019. Ma tikitakaj tlen kipanok.
Nitlakatki ipan 1954, ipan Saint Paul (Minnesota, Estados Unidos). Nochi tieliyayaj católicos. Nikinpixki makuiltij noikniuaj, uan nitlakajki kema ya itstoya se noikni. Maske kema nieliyaya niokichpil nimomachtik ipan se escuela católica uan nieliyaya monaguillo, san nijmatiyaya kentsi tlen Biblia. Maske nijmatiyaya itstok se teoTsij katli nochi kichijchijtoya, na ayokmo nijneltokak tlen tlamachtiyayaj ipan Iglesia.
NIKIXMATKI TLEN MELAUAK
Kema nimomachtijtoya se xiuitl ipan Facultad de Derecho William Mitchell, omej Jehová itlajtoltemakauaj nechpaxalojkej. Pampa nitlachikueniyaya, kiijtojkej teipa nechpaxaloskiaj. Kema tlakuepilijkej nijchijki ome tlajtlanili: “¿Kenke katli kichiuaj tlen amo kuali inijuantij kuali itstokej? Uan, ¿tlake moneki nijchiuas uan kiampa niyolpakis?”. Nechmakakej amochtli La verdad que lleva a vida eterna uan Traducción del Nuevo Mundo de las Santas Escrituras, kipixtoya ipantsajka xoxouik. Nojkia, nijnejki ma nechmachtikaj. Nijyekok miak tlamantli. Tlauel nechpaktik kema nijmatki san toTeotsij iTlanauatijkayo uelis techpaleuis uan tlanauatis ipan Tlaltipaktli. Nikitak tekichiuanij amo kuali tlanauatiaj, san kichiuaj ma titlaijiyouikaj, kichiuaj tlen amo xitlauak uan tlen amo kuali.
Ipan 1982, nijmaktilik Jehová nonemilis uan nimoatsonpoliuiltik ipan nopa xiuitl ipan se ueyi tlanechikolistli tlen eyi tonali, tlen motokaxtik “Verdad del Reino”, ipan estadio St. Paul Civic Center. Kema panok se keski tonali sampa nitlakuepilik nopaya, pampa nijchijki se examen uan kiampa nieliskia abogado. Ipan octubre, pejki nitekiti kej abogado.
Ipan nopa ueyi tlanechikolistli nikixmatki toikni Mike Richardson, katli tlatekipanouayaya ipan Betel tlen Brooklyn (Nueva York). Ya nechiljuik ipan Betel kichijtoyaj se yankuik oficina tlen asuntos legales. Nikilnamijki tlen kiijtok nopa tlakatl tlen euayaya Etiopía ipan Hechos 8:36 uan nimotlatsintokilik: “¿Uelis nitekitis ipan nopa Oficina de Asuntos Legales?”. Yeka, nijtemitik se amatl uan nijtitlanki Betel.
Notatauaj amo kinpaktik ma nieli se Jehová itlajtoltemajka. Notata kinejki kimatis kenijkatsa nechpaleuiskia pampa nitekitiskia ipan Watchtower. Nikiljuik nopaya san nitlapaleuiskia uan nijseliskia 75 dólares ipan se metstli, kej kiseliyayaj nochi betelitas.
Kema tlanki nijchiua se keski tekitl ipan tribunal, ipan 1984 pejki nitlatekipano ipan Betel tlen Brooklyn. Nopaya nechiljuijkej ma nitekiti ipan Oficina de Asuntos Legales. Tlauel nechpaleuik pampa ipa nijchijtoya nopa tekitl ipan se tribunal.
KIKUALCHIJCHIJKEJ TEATRO STANLEY
Kema kikojkej nopa Teatro Stanley.
Ipan noviembre 1983, Jehová itekipanojkauaj kikojtoyaj nopa Teatro Stanley, ipan altepetl Jersey City (Nueva Jersey). Toikniuaj tlajtlankej ma kinkauilikaj kikualchijchiuasej tlauili uan atl. Kema mosentilijkej ininuaya tekichiuanij, kiniljuijkej Jehová itlajtoltemakauaj kinekiyayaj kitekiuisej nopa kali kampa kichiuaskiaj uejueyi tlanechikolistli. Tekichiuanij kiijtojkej pampa nopa kali eltoya ipan se ueyi altepetl, san ueliskiaj mosentilisej kampa miakej maseualmej mochantijtoyaj. Uan kampa kikojtoyaj toikniuaj, nopaya san onkayaya kali kampa tlanamakayayaj, yeka amo kinkauilijkej. Uan maske toikniuaj motlateljuijkej, amo kinpaleuijkej.
Kema nitekititoya se semana ipan Betel, toikniuaj moteljuitoj ipan tribunal federal de distrito tlen Saint Paul (Minnesota). Pampa nopaya nitekititoya ome xiuitl, kuali nijmatiyaya kenijkatsa kisenkauayayaj nopa tlamantli. Se abogado katli techpaleuiyaya, kiijtok ipan nopa Teatro Stanley kiitayayaj películas uan tlatsotsonayayaj rock. Uajka tlaj kiampa kichiuayayaj, nojkia ueliskiaj tlaueyichiuasej. Nopa Tribunal kiijtok ipan Jersey City, kiixpanotoyaj se tlanauatili kampa kiijtouayaya ueliskia titlaueyichiuasej uan kiijtok ayokmo ma techtlateljuikaj. Nikitak kenijkatsa Jehová kipaleuia itlanechikol uan kiampa tekichiuanij nojua techkauaj ma tijtekipanokaj Jehová. Tlauel niyolpajki pampa nojkia nitlapaleuik se kentsi.
Toikniuaj nima pejkej kikualchijchiuaj nopa kali, uan nechka se xiuitl kitlamiltijkej. Teipa ipan nopa kali, tlen kitokaxtijkej Kali kampa mochiua uejueyi tlanechikolistli tlen Jersey City, momachtijkej clase 79 tlen Galaad, ipan septiembre 8, 1985. Elki se ueyi tlateochiualistli uan tlauel niyolpajki nitlapaleuis kej abogado ipan Betel, amo kiampa nijyolmatiyaya kema ayamo nitlatekipanouayaya. Amo kema nimoiljuik Jehová nechtekiuiskia.
NIKINPALEUIK TOIKNIUAJ AMO MA KINPAJTIKAJ IKA ESTLI
Ipan 1980, miakej tepajtianij uan kampa tepajtiaj amo kintlepanitayayaj kema toikniuaj kiijtouayayaj amo kiseliaj estli. Ouij eliyaya kema tosiuaikniuaj tlanemiltiyayaj, pampa tekichiuanij kiijtouayayaj monekiyaya kiselisej estli, pampa tlaj mikiskiaj, ininpilkoneuaj amo kipiaskiaj ininnana.
Ipan diciembre 29, 1988, kema tosiuaikni Denise Nicoleau kipixki se pilkonetsi tlauel esotemok. Yeka, san kipixtoya se 5.0 estli, uan nopa tepajtijketl katli kipaktiyaya kiiljuik tosiuaikni ma kiseli estli. Tosiuaikni amo kinejki ma kitlalilikaj estli. Ika ualmostla, tepajtianij kiiljuijkej se tekichijketl ma kiijto kena ueliskiaj kitlalilisej estli, maske toikni Nicoleau yon iueue amo kintlajtlanilijkej.
Ipan viernes 30, tosiuaikni kitlalilijkej estli maske ya uan iueue uan sekinok ichampoyouaj amo kinekiyayaj ma kitlalilikaj. Nojkia ipan nopa tonali amo kinkajkej ma kisakaj se keski ichampoyouaj uan ueuejtlakamej. Kiijtojkej pampa amo kinekiyayaj ma kitlalilikaj estli, amo kinkauiliyayaj tepajtianij ma kalakikaj kampa Nicoleau itstoya. Yeka, ipan sábado 31, ipan Nueva York uan ipan sekinok altepemej neski ipan noticias tlen panotoya.
Iuaya Philip Brumley kema tieliyayaj titelpokamej.
Teipa, timoteljuitoj kampa tribunal superior, uan lunes ika ijnalok nimokamanaljuik iuaya nopa tekichijketl Milton Mollen, katli kiitayaya nopa tlamantli. Nikiljuik tlen panok uan nikiljuik tlen kichijki nopa seyok tekichijketl. Mollen nechiljuik ma nia kampa tekiti uan nopaya kiijtoskia tlen panotoya. Niajki iuaya toikni Philip Brumley katli nechyakanayaya ipan oficina. Nopa tekichijketl nojkia kiiljuik ma yaui nopa abogado katli kinpaleuiyaya tepajtianij. Pejkej mokualaniaj kema kiitakej tlen panotoya. Yeka, toikni Brumley nechtlajkuiljuilik ipan se amatl, kiijtok: “Amo chikauak xikamanalti”. Tlauel kuali tlen nechiljuik, pampa nijnekiyaya nikinkualankanojnotsas kema nikiniljuiyaya tlen panotoya.
Peua ika momaopoch: Richard Moake, Gregory Olds, Paul Polidoro, Philip Brumley, na uan Mario Moreno kema kinteljuijkej toikniuaj ipan nopa Tribunal Supremo tlen Estados Unidos Watchtower contra Stratton (xikita pilamochtsi ¡Despertad! 8 enero, 2003: “El origen del conflicto”, “El Tribunal Supremo admite el caso a trámite”, “El primer obstáculo: la vista oral ante el Tribunal Supremo” uan “El Tribunal Supremo falla a favor de la libertad de expresión”).
Kema ya tiuejkajtoyaj, nopa tekichijketl Mollen kiijtok ika ualmostla kiitaskiaj tlen panotoya. Kema tikiskej kampa tekiti, Mollen kiijtok nopa abogado katli kinpaleuik tepajtianij “kipixtoya se ueyi kuesoli”, pampa tlen kichijki amo kipaleuiskia. Nopa kichijki ma nimotemachi Jehová techpaleuiskia ma tikintlanikaj. Jehová techtekiuiyaya uan kiampa mochiuayaya tlen kinekiyaya ma mochiua.
Pampa tikitayayaj tlake tikijtosej, nechka titlanexiliyayaj. Nopa tribunal eltoya nechka Betel tlen Brooklyn, yeka san nejnenkej katli ininuaya nitekitiyaya. Kema kikajkej tlen tikiniljuijkej, nopa nauij tekichiuanij katli kiitayayaj tlen panotoya, ayokmo techteljuijkej. Nopa tribunal kiijtok amo kuali tlen kichijtoyaj ika tosiuaikni Nicoleau, uan kiijtok tlaj se abogado kichiuayaya se tlamantli uan amo kiiljuiyayaj katli mopajtia, uajka kiixpanoyaya se tlanauatili.
Teipa, nopa ueyi tribunal tlen Nueva York kipaleuik tosiuaikni Nicoleau ma kipajtikaj uan amo ma kitlalilikaj estli. Najpa nitlapaleuik kema kinteljuijkej toikniuaj ipan uejueyi tribunales tlen Estados Unidos, pampa kinekiyayaj kintlalilisej estli (xikita recuadro “ Kampa tlatlankej ipan uejueyi tribunales”). Nojkia ipan Betel nitekititok ininuaya sekinok abogados kampa tikitaj tlake kichiuasej kema kiixpolouaj inintoka kampa nesi mosenkajkej, ajkia kinmokuitlauis konemej, tlen kikajteuaj kema mikij uan tlake kichiuasej kema mochantiaj ipan se ueyi altepetl.
KEMA NIMOSIUAJTIK UAN KEJ TIITSTOYAJ
Iuaya nosiua Dawn
Kema nikixmatki Dawn, kinpixtoya eyij ikoneuaj uan ayokmo itstoya iuaya iueue. Tekitiyaya uan eliyaya precursora. Mosentlalijtoya kitekipanos Jehová maske ouij kej itstoya, nopa kichijki ma nimosentlachili. Ipan 1992, tiajkej ipan se ueyi tlanechikolistli tlen eyi tonali, motokaxtik “Portadores de Luz” ipan Nueva York, uan nopaya nikiljuik nojua nijnekiyaya nikixmatis. Kema panok se xiuitl, timosenkajkej uan nojua nitlapaleuik ipan Betel. Eli se tlateochiualistli pampa Jehová nechmakak nosiua katli kuali tlaneltoka uan tlauel yolpaki. Kej kiijtoua Proverbios 31:12, Dawn kichijtok tlauel kuali ma tiitstokaj.
Kema timosenkajkej nopa konemej kipixtoyaj 11, 13 uan 16 xiuitl. Pampa nijnekiyaya nielis se kuali tetaj, nijpouayaya amatlajkuiloli kampa kiijtoua tlake monekiyaya nijchiuas pampa amo nieliyaya inintata uan nijchiuayaya tlen nimomachtiyaya. Maske tikixnamiktokej se keski kuesoli, konemej nechitaj kej se tetaj katli teiknelia uan kej se ininuampo tlen ika uelis motemachisej. Kuali tikinseliyayaj ininuampoyouaj uan techpaktiyaya kema tochaj asiyayaj miakej toikniuaj telpokamej.
Ipan 2013, Dawn uan na timochantitoj Wisconsin pampa tikinmokuitlauitoj totatauaj. Tlauel niyolpaki pampa nojua nechtlanejkej ma nitlatekipano se keski tonali ipan Betel, pampa kinejkej ma nikinmachti katli itstoyaj ipan legales.
MOPATLAK SE KESKI TLAMANTLI
Ipan septiembre 2018, pejki ouij nikamanalti pampa nitlaskauakiyaya. Se tepajtijketl amo kimatki tlake kokolistli nijpiayaya. Teipa, seyok tepajtijketl nechiljuik ma nikitati se katli kitlachilia totsontekuich. Ipan enero 2019, nopa tepajtijketl nechiljuik nijpixtoya se kokolistli ipan notsonteko katli san se keskij maseualmej kipixtoyaj, ni kokolistli itoka parálisis supranuclear progresiva (PSP).
Kema panok eyi tonali ika niajtoya kampa tepajtijketl, niuetski uan nimomalekuenik kema nimauiltiyaya. Nochipa nimauiltijtoya uan amo kema kiampa nechpanotoya. Uajka nikitak notlakayo ayokmo nechpaleuiyaya pampa nimokokouayaya. Kej panotia tonali, nojua tlauel nechtlanauia nokokolis, yeka ouij nijmati nikamanaltis, nimojmolinis uan ouij nijmati nitlakuas uan niatlis.
Tlauel nijtlaskamati Jehová pampa nechkajki ma nitlapaleui ipan itlanechikol kej abogado. Nojkia niyolpaki pampa nikijkuilok se keski pilamochtsitsij uan pampa ipan nochi Tlaltipaktli nikinixtomilik tepajtianij uan abogados kenijkatsa kichiuasej ininteki. Nochi ni tlamantli kichijtok ma nikinpaleui toikniuaj uan ma kimatikaj kenijkatsa kinpajtisej o kintekisej uan amo kintlalilisej estli. Maske kiampa nijchijtok, kej kiijtoua Lucas 17:10, na san nitlatekipanoua uan amo kinamiki nijselis se tlamantli. San nijchijtok tlen moneki nijchiuas.
