CRISTO itokilijkauaj katli itstoyaj ipan achtoui siglo kichijkej kampeka kiniljuisej nochi maseualmej nopa kuali tlamachtili (Mat. 24:14). Sekij yajkej ipan sekinok altepemej. Apóstol Pablo yajki kampa nama tikixmatij kej Turquía uan nopaya miakpa tlajtolmoyajki. * Se 2,000 xiuitl teipa, ipan 2014 mochijki se campaña kampa kintlanejkej toikniuaj ma tlajtolmoyauakaj ipan nochi nopa altepetl. ¿Kenke mochijki nopa campaña?

Ipan Turquía itstokej kipano 79 millones tlen maseualmej uan san itstokej nechka 2,800 tlajtolmoyauanij. Ni kiijtosneki se toikni moneki kinkamanaljuis 28,000 maseualmej. Toikniuaj kinkamanaljuijtokej san se keskij maseualmej. Yeka ika nopa campaña kinekiyayaj kinkamanaljuisej miakej maseualmej san ipan se keski tonali. Kema mochijtoya nopa campaña, 550 toikniuaj katli kamanaltiyayaj turco uan itstoyaj ipan sekinok altepemej yajkej tlajtolmoyauaj ininuaya toikniuaj katli itstoyaj ipan Turquía. ¿Tlake kichijkej ipan nopa campaña?

Kinnojnotskej tlauel miakej maseualmej. Toikniuaj tlen se tlanechikoli ipan Estambul kiijkuilojkej: “Maseualmej kiitayayaj kampa ueli itstoyaj Jehová itlajtoltemakauaj, yeka techtlajtlaniyayaj tlaj tijchiuaskiaj se ueyi tlanechikolistli”. Ipan Altepetl Izmir, se keskij toikniuaj kiijkuilojkej: “Se tlakatl tlen tekitiyaya kampa moketsaj taxis kinechkauik se ueuejtlakatl uan kitlajtlanik: ‘¿Tlake pano? ¿Kenke nojua tlauel intlajtolmoyauaj?’”. Ipan nopa campaña, tlauel miakej kiitakej tlen toikniuaj kichijkej.

Toikniuaj katli euayayaj ipan sekinok altepemej tlauel kinpaktik tlajtolmoyauasej nopaya. Steffen, katli eua Dinamarca, kiijtok: “Mojmostla nikamanaltiyaya ininuaya maseualmej katli amo kimatiyayaj ajkia eliyaya Jehová. Nama kena nitematiltiyaya itoka toTeotsij”. Toikni Jean-David, katli eua Francia, kiijtok: “Tlauel tiuejkauayayaj titlajtolmoyauaj san ipan se calle. ¡Tlauel kuali tijyolmatiyayaj! Miakej maseualmej amo kimatiyayaj ajkia inijuantij eliyayaj Jehová itlajtoltemakauaj. Miakej kuali techtlakakiliyayaj, tikinnextiliyayaj se video uan tikinkauiliyayaj se amatlajkuiloli”.

 Nopa 550 toikniuaj katli tlajtolmoyajkej ipan nopa campaña, kikajtejkej 60,000 amatlajkuiloli san ipan ome semanas. Pampa mochijki nopa campaña uelki kinkamanaljuijkej tlauel miakej maseualmej.

Nojua tlajtolmoyajkej ika nochi ininyolo. Nopa campaña tlauel kinpaleuik toikniuaj katli nopaya itstoyaj. Miakej nojkia moiljuijkej senkistok tlatekipanosej. Ipan nopa xiuitl, precursores momiakilijkej se 24% ipan altepetl Turquía.

Katli yajkej tlatekipanotoj kiijtojkej kenijkatsa nopa campaña tlauel kinpaleuik kuali ma tlajtolmoyauakaj, uan nojkia kinpaleuik kema tlakuepilijkej ininaltepe. Se tosiuaikni tlen Alemania, katli itoka Şirin, kiijkuilok: “Toikniuaj katli itstokej Turquía tlauel kinpaktia tlajtolmoyauasej kampa ueli. Na achi ouij nijmati pampa amo tlauel nikamanaltiketl. Nopa campaña, tlen kichiuayayaj toikniuaj uan pampa nimomaijtouayaya, nelia tlauel nechpaleuik. ¡Nitlajtolmoyajki uan nitemakak pilamatsitsij ipan metro! Nama ayokmo tlauel ouij nijmati nikamanaltis”.

Johannes, se toikni katli nojkia eua Alemania, kiijtok: “Tlauel nechpaleuik nojua kuali ma nitlajtolmoyaua. Toikniuaj katli itstokej Turquía nelia kinekij kinmachtisej maseualmej uan yeka kichiuaj kampeka nochipa tlajtolmoyauasej. Na nimosentlalik nojkia kiampa nijchiuas kema nitlakuepiliskia Alemania. Uan nama nikinkamanaljuia miakej maseualmej uan amo kej achtouia”.

Se tosiuaikni tlen itoka Zeynep, katli eua Francia, kiijtok: “Nopa campaña tlauel nechpaleuik. Nama ayokmo nimajmaui uan nojua tlauel nimotemachia ipan Jehová”.

Toikniuaj nojua tlauel kuali mouikakej. Maske amo euayayaj ipan sanse altepetl, nochi moikneliyayaj uan mosentikapaleuiyayaj uan nopa tlauel kinpaleuik. Jean-David, katli tikijtokej achtouia, kiijtok: “Tikitakej kenijkatsa toikniuaj tlauel kuali teseliaj, techitakej kej tiininuampoyouaj uan kej tiininchampoyouaj. Nochi kuali techselijkej ipan ininchaj. Na nijmajtoya nochi tiiknimej maske kampa ueli tieuaj pampa kiampa nijpojtoya ipan amatlajkuiloli. Uan kema  niajki nikitak nelia kiampa. Tlauel kuali nijyolmatki pampa nieli se tlen Jehová itlajtoltemakauaj. Uan nijtlaskamatilia pampa nechkaua ma nijtekipano”.

Claire, katli eua Francia, kiijtok: “Nochi tikinitayayaj kej tochampoyouaj maske eliyayaj tlen Alemania, Dinamarca, Francia o Turquía. ToTeotsij kejuak kinsansejkotilik nochi nopa altepemej uan kichijki ma eli san se altepetl.

Stéphanie, katli nojkia eua Francia, kiijtok: “Nopa campaña techmachtik amo timosentikapaleuiaj pampa sanse toaltepe o pampa sanse totlajtol, timosentikapaleuiaj pampa nochi tlauel tikikneliaj Jehová”.

Miakej toikniuaj katli yajkej tlapaleuitoj ipan Turquía moiljuijkej teipa kualtiaskia yasej sampa ipan nopa altepetl uan nopaya mokauasej pampa tlauel onka miak tekitl. Sekij ya itstokej nopaya, uan tlauel tikintlaskamatiliaj pampa kinekij tlapaleuisej.

Ipan se pilaltepetsi san itstoyaj 25 tlajtolmoyauanij. Uan miak xiuitl san setsi ueuejtlakatl itstoya. Ipan 2015, chikuasej toikniuaj katli ualayayaj tlen Alemania uan Países Bajos yajkej kinpaleuiaj. ¡Nochi tlajtolmoyauanij nelia tlauel yolpajkej!

¿Kenijkatsa kiyolmatij toikniuaj katli tlatekipanojtokej ipan Turquía? Kej nochi techpano, maske kiixnamiktokej se keski tlaouijkayotl, nojkia kiselijtokej miak tlateochiualistli. Ma tikitakaj tlake kiijtouaj:

Federico, katli mosiuajtijtok uan kipia se 40 xiuitl uan eua España, kiijtoua: “Pampa amo tlauel nitlapijpia nechpaleuia amo tleno ma nechtsakuili uan ma nimosentlali ipan tlen nelia ipati”. ¿Kinyololinia sekinok nojkia ma tlapaleuikaj? Ya kiijtoua: “¡Kena! Kema tia ipan seyok altepetl uan tikinpaleuia maseualmej ma kiixmatikaj Jehová, tijnextia nelia timotemachia ipan ya. Ueli tikitaj kenijkatsa toTeotsij tlauel techmokuitlauia”.

 Rudy, katli mosiuajtijtok uan kipia se 60 xiuitl uan eua Países Bajos, kiijtoua: “Tlauel kuali tijyolmatij pampa titlapaleuiaj kampa monekij tlajtolmoyauanij uan pampa tikinmachtiaj maseualmej katli amo kema kikaktoyaj nopa kuali tlamachtili. Kema titlajtolmoyauaj uan tikitaj maseualmej tlauel yolpakij, nopa kichiua nojkia tlauel ma tiyolpakikaj”.

Sascha, katli eua Alemania uan kipia kipano 40 xiuitl, kiijtoua: “Kema nitlajtolmoyaua, nikinpantia maseualmej katli amo kema kikaktoyaj tlen Biblia tlamachtia. Nelia tlauel niyolpaki pampa ueli nikinpaleuia ma kiixmatikaj Jehová”.

Atsuko, katli monamiktijtok uan kipia se 35 xiuitl uan eua Japón, kiijtoua: “Maske achtouia nijnekiyaya nima ma asi Armagedón, kema niualajki Turquía pejki tlauel nijtlaskamatilia Jehová pampa kipia ueyi iyolo. Kema nikita kenijkatsa Jehová kiyakana tlajtolmoyaualistli, kichiua nojua ma nijneki nijnechkauis”.

Alisa, se tosiuaikni katli eua Rusia uan kipia kipano 30 xiuitl, kiijtoua: “Pampa nimosentlalijtok senkistok nijtekipanos Jehová, nechpaleuijtok ma nikita kenijkatsa nelia kuali iyolo” (Sal. 34:8). Ya nojua kiijtoua: “Amo san nikita Jehová kej noTata, nojkia nikita kej se kuali noUampo katli nojua nikixmajtia kema nechpaleuia ipan se keski tlamantli tlen nechpano. Nechpanotok miak tlamantli tlen kichiua ma niyolpaki, uan toTeotsij tlauel nechteochijtok”.

Pampa miakej tlapaleuijkej ipan Turquía, miakej maseualmej kikaktokej nopa kuali tlamachtili. Maske tlauel tlajtolmoyajtokej, ipan miak pilaltepetsitsij nojua poliui tlajtolmoyauasej. Katli yajtokej tlapaleuiaj ipan Turquía mojmostla kinpantiaj maseualmej katli amo kimatij ajkia Jehová. ¿Nojkia mitspaktiskia titlatekipanos kampa nojkia monekij tlajtolmoyauanij? Tlaj kena, xikilnamiki tlen kiijtoua Juan 4:35: “Xikitakaj [...], inijuantij itstokej keja se pixkistli tlen kualtitojka”. Xijchiua kampeka tijchiuas tlen moneki uan kiampa uelis tias titlatekipanoti ipan seyok altepetl. Tlaj titlajtolmoyauas “kampa más uejuejka pilaltepetsitsij”, ¡temachtli tijselis miak tlateochiualistli! (Hech. 1:8).