NOPA tlajtoli ika griego tlen kitlajtolkuepkej kej “kuacarro” ipan Biblia tlen Yankuik Tlaltipaktli, uelis kiijtosneki miak kuacarros tlen amo sanse eliyayaj (Hech. 8:28, 29, 38). Uelis nopa kuacarro kampa yauiyaya nopa tlakatl tlen Etiopía, amo eliyaya se kuacarro tlen kitekiuiyayaj kema tlateuiyayaj o kema kichiuayayaj carreras, uelis eliyaya se kuacarro achi más ueyi. Ma tikitakaj kenke kiampa tikijtouaj.

Nopa tekichijketl tlen Etiopía kipiayaya tlanauatili uan uejka yajtoya. “Ni tlakatl kipiayaya tlanauatili uan kitekipanouayaya Candace, nopa siuatlanauatijketl tlen Etiopía, uan kimokuitlauiyaya nochi itomij tlen kipixtoya” (Hech. 8:27). Uejkajkia, altepetl Etiopía eliyaya tlauel ueyi, asiyaya hasta altepetl Sudán uan ika sur tlen Egipto. Maske nopa tekichijketl uelis amo nochipa nenki ipan nopa kuacarro, uelis kena kiuikak miak tlamantli pampa tlauel uejka yajtoya. Ipan achtoui siglo maseualmej kitekiuiyayaj kuacarros katli amo sanse eliyayaj kema yauiyayaj kanajya. Se tlen nopa kuacarros kipiayaya naui ruedas uan kipiayaya itsontsajka. Se amochtli kiijtoua: “Ipan nopa kuacarros, ueliyayaj kiuikaj miak tlamantli, katli yauiyayaj nopaya amo tlauel kuatiyaya uan ueliyayaj uejka yauij” (Acts—An Exegetical Commentary).

Nopa tlakatl tlen Etiopía tlapouayaya kema Felipe kinechkauik. Biblia kiijtoua “Felipe motlalok uan kiasito nopa kuacarro, uan kikajki nopa tlakatl chikauak kipouayaya tlen kiijkuilok teokamanalojketl Isaías” (Hech. 8:30). Nopa kuacarros kampa kinuikayayaj maseualmej ika yolik yauiyayaj, yeka nopa tlakatl tlen Etiopía ueliyaya tlapojtia uan kema Felipe motlalok, kiasito.

Nopa tlakatl tlen Etiopía “kitlajtlanik Felipe ma tlejko ipan ikuacarro uan ma moseui iuaya” (Hech. 8:31). Katli yauiyayaj ipan nopa kuacarros tlen kitekiuiyayaj ipan carreras, amo ueliyayaj moseuiaj. Uan nopa kuacarros kampa kinuikayayaj maseualmej, eliyaya más ueyi, yeka nopa tlakatl tlen Etiopía uan Felipe uelkej moseuijkej.

Ika tlen kiijtoua Hechos capítulo 8 uan ika tlen kiijtouaj katli kiitstokej tlen uejkajkia kitekiuiyayaj, ipan amatlajkuiloli tlen nama tijchiuaj, tikixkopinaj nopa tlakatl tlen Etiopía yaui ipan se kuacarro tlen achi más ueyi, uan amo ipan se kuacarro tlen kitekiuiyayaj kema tlateuiyayaj o kema kichiuayayaj carreras.