TLAMACHTILI 5
“Tiasej inmouaya”
“Tijnekij tiasej inmouaya, pampa tijkaktokej toTeotsij itstok inmouaya” (ZAC. 8:23, TNM).
UIKATL 26 Tlen tikinchiuilik, na tinechchiuilik
TLEN MOIXTOMAS *
Nopa miakej maseualmej (“matlaktli tlakamej”) kiitaj kej se ueyi tlateochiualistli kitekipanosej Jehová ininuaya katli kintlapejpenijtokej (“judío”). (Xikita párrafos 1, 2).
1. ¿Tlake kiijtok Jehová panoskia ipan ni tonali?
JEHOVÁ kiijtok se tlajtolpanextili tlen moaxitiskia ipan ni tonali: “Ipan nopa tonali matlaktli tlakamej tlen kamanaltij miak tlajtoli uan tlen kampa ueli euaj kiitskilisej iyoyo se judío, uan kiiljuisej: ‘Tijnekij tiasej inmouaya, pampa tijkaktokej toTeotsij itstok inmouayaʼ” (Zac. 8:23, TNM). Nopa “judío” kinixnextia nochi katli toTeotsij kintlapejpenijtok ika itonal, katli nojkia kinixmatij kej ‘israelitajmej tlen nelia itlakauaj toTeko’ (Gál. 6:16). Uan nopa “matlaktli tlakamej” kinixnextia nochi katli motemachiaj itstosej nochipa ipan Tlaltipaktli. Inijuantij kimatij Jehová kintlapejpenijtok katli yasej iluikak uan kiitaj kej se tlateochiualistli kitekipanosej toTeotsij ininuaya.
2. ¿Kenijkatsa nopa matlaktli tlakamej yauij ininuaya katli kintlapejpenijtokej?
2 Maske amo tijmatij nochi inintoka katli kintlapejpenijtokej uan nojua itstokej ipan Tlaltipaktli, * katli timotemachiaj nikaj tiitstosej kena uelis “tiasej” ininuaya. ¿Kenijkatsa tijchiuaj nopa? Biblia kiijtoua “matlaktli tlakamej” chikauak kiitskiliskiaj “iyoyo se judío” uan kiijtoskiaj: “Tijnekij tiasej inmouaya, pampa tijkaktokej toTeotsij itstok inmouaya”. Maske ni texto kamanalti tlen setsi judío, nopa matlaktli tlakamej amo san setsi kinojnotsaj pampa kitekiuiaj nopa tlajtoli “inmouaya”. Ni kinextia nopa judío amo eli san setsi maseuali pampa kinixnextia nochi katli kintlapejpenijtokej uan nojua itstokej ipan Tlaltipaktli. Uajka, katli amo techtlapejpenijtokej tijtekipanouaj Jehová ininuaya katli kena kintlapejpenijtokej. Maske kiampa tijchiuaj, amo tikinitaj kej totlayakankauaj, pampa kuali tijmatij san Jesús eli toTlayakanka (Mat. 23:10).
3. ¿Tlake tlajtlanili monankilis ipan ni tlamachtili?
3 Ipan ni tonali nojua itstokej se keskij toTeotsij itekipanojkauaj katli kintlapejpenijtokej yasej iluikak. Yeka, uelis sekij motlajtlaniaj: “¿Kenijkatsa kinamiki moitasej katli kintlapejpenijtokej? ¿Kenijkatsa kinamiki tikinitasej katli kikuaj pantsi uan kiijij vino kema moilnamiki Cristo imikilis? ¿Kinamiki timotekipachosej tlaj nojua momiakilijtiauij katli kikuaj pantsi uan kiijij vino?”. Ni tlajtlanili monankilis ipan ni tlamachtili.
¿KENIJKATSA KINAMIKI MOITASEJ KATLI KINTLAPEJPENIJTOKEJ?
4. Kej kiijtoua 1 Corintios 11:27-29, ¿tlake tlamantli kinamiki kiilnamiktosej katli kintlapejpenijtokej, uan kenke tlauel moneki?
4 1 Corintios 11:27-29 kinextia se tlamantli tlen tlauel moneki kiilnamiktosej katli kintlapejpenijtokej (xijpoua). ¿Kenijkatsa se toikni katli kitlapejpenijtokej ueliskia “kiuikas tlajtlakoli” kema moilnamiki Cristo imikilis? Kiampa eliskia tlaj kikuaskia pantsi uan kiijiskia vino maske amo kuali monejnemiltia o amo kineltoka Jehová itlanauatiljuaj (Heb. 6:4-6; 10:26-29). Nochi katli kintlapejpenijtokej kimatij moneki amo kiixpanosej o itstosej xitlauakej iixpa Jehová tlaj kinekij kiselisej “nopa tlatlankayotl” tlen kiniljuijtok kinmakas (Filip. 3:13-16).
5. ¿Kenijkatsa kinamiki moitasej katli kintlapejpenijtokej?
5 ToTeotsij itonal kinpaleuia maseualmej ma moechkapantlalikaj uan amo ma moueyimatikaj (Efes. 4:1-3; Col. 3:10, 12). Yeka, katli kintlapejpenijtokej amo moiljuiaj san inijuantij tlauel ininpati. Kuali kimatij Jehová kinmaka itonal nochi itekipanojkauaj uan amo san inijuantij tlauel miak kinmaka. Nojkia amo moiljuiaj san inijuantij tlauel kuali kikuamachiliaj tlen Biblia tlamachtia. Uan amo kema kiiljuiskiaj seyok: “Ta nojkia mitstlapejpenijtokej, yeka xijkua pantsi uan xikiji vino kema moilnamiki Cristo imikilis”. Katli kintlapejpenijtokej amo mouejkapantlaliaj uan kuali kimatij san Jehová uelis kiijtos ajkia yas iluikak.
6. Kej kiijtoua 1 Corintios 4:7, 8, ¿tlake amo kinamiki kichiuasej katli kintlapejpenijtokej?
6 Maske kimatij eli se ueyi tlateochiualistli pampa kintlanejkej ma yakaj iluikak, amo moiljuiaj kinamiki ma kinuejkapantlalikaj (Filip. 2:2, 3). Nojkia kimatij kema Jehová kintlapejpenik, amo kinmatiltik sekinok. Uajka, se toikni katli kitlapejpenijtokej amo mosentlachilia tlaj sekinok amo nima kineltokaj tlaj nojkia toTeotsij kitlapejpenijtok. Kemantika kiampa tijchiuaj pampa tijmatij Biblia kiijtoua amo kinamiki nimantsi tijneltokasej se akajya katli kiijtoua toTeotsij kitlapejpenik o kimakak se tekitl tlen tlauel ipati (Apoc. 2:2). Nojkia, katli kintlapejpenijtokej amo kinekij tlauel pankisasej, yeka kema kinixmatij sekinok, amo tleno kiniljuiaj. Uan amo kema kiijtojtinemij inijuantij kintlapejpenijtokej (xijpoua 1 Corintios 4:7, 8).
7. ¿Tlake amo kichiuaj katli kintlapejpenijtokej, uan kenke amo kichiuaj nopa?
7 Katli kintlapejpenijtokej amo san mouikaj ininuaya sekinok katli nojkia kintlapejpenijtokej, kejuak san inijuantij eliskiaj tlauel ininpati. Nojkia amo kintemouaj sekinok katli kintlapejpenijtokej pampa kinekij kamanaltisej tlen nopa tlateochiualistli tlen kiselijtokej o pampa kinekij sansejko momachtisej Biblia (Gál. 1:15-17). Tlaj kiampa kichiuaskiaj, kixeloskiaj tlanechikoli. Amo kichiuaskiaj tlen toTeotsij itonal kineki, katli tlapaleuia ma onka tlaseuilistli uan nochi kuali ma mouikakaj (Rom. 16:17, 18).
¿KENIJKATSA KINAMIKI TIKINITASEJ KATLI KINTLAPEJPENIJTOKEJ?
Amo kinamiki tlauel tikinuejkapantlalisej katli kintlapejpenijtokej yon katli techyakanaj. (Xikita párrafo 8). *
8. ¿Kenke moneki tikinitasej kej kinamiki katli kintlapejpenijtokej? (Nojkia xikita nota).
8 ¿Kenijkatsa kinamiki tikinitasej toikniuaj uan tosiuaikniuaj katli kintlapejpenijtokej? Amo kinamiki tlauel tijuejkapantlalisej se akajya maske kitlapejpenijtokej, katli eli Cristo iikni (Mat. 23:8-12). Biblia kiijtoua tlen ueuejtlakamej: “Xijchiuakaj kampeka para kuali inkineltokasej toTeko keja inijuantij kineltokaj”. Maske kiampa kiijtoua, amo techiljuia ma tijtokilikaj yon se maseuali (Heb. 13:7). Uan maske nojkia kiijtoua sekij toikniuaj kinamiki “achi más ma kintlepanitakaj”, moneki tijchiuasej pampa “tekitij kuali” ipan tlanechikoli uan pampa “ika nochi ininchikaualis [tlakamanaljuiaj] uan tlamachtiaj itlajtol toTeko”, uan amo pampa kintlapejpenijtokej (1 Tim. 5:17). Tlaj tlauel tikinuejkapantlalisej, amo kuali kiyolmatisej * o ueliskia moueyimatisej san pampa kintlapejpenijtokej yasej iluikak (Rom. 12:3). Tojuantij amo tijnekiskiaj tijchiuasej se toikni katli kitlapejpenijtokej ma tlaixpano (Luc. 17:2).
9. ¿Kenijkatsa tijnextisej tikintlepanitaj katli kintlapejpenijtokej?
9 ¿Kenijkatsa uelis tijnextisej tikintlepanitaj katli Jehová kintlapejpenijtok? Amo tikintlajtlanisej kenijkatsa kintlanejkej ma yakaj iluikak. Tojuantij amo kinamiki tijmatisej pampa ‘axtocuenta’ (1 Tes. 4:11; 2 Tes. 3:11). Uan amo timoiljuisej isiua o iueue, itatauaj, ikoneuaj o sekinok iuikaljuaj nojkia kintlapejpenijtokej. Nopa tlateochiualistli amo uelis kinpanoltilisej sekinok, pampa san toTeotsij kimati ajkia kimakas (1 Tes. 2:12). Nojkia, amo titlatsintokasej se keski tlamantli tlen kichiuaskia sekinok ma moyolkokokaj. Yeka, amo kema tijtlajtlaniskiaj isiua kenijkatsa kiyolmati itstos nochipa ipan Xochimili uan iueue itstos iluikak. Tojuantij temachtli tijmatij ipan Xochimili Jehová kinmakas maseualmej nochi tlen moneki (Sal. 145:16).
10. ¿Kenke amo kinamiki tikinueyimatisej sekinok?
10 Tlauel techpaleuia kema amo tikinitaj katli kintlapejpenijtokej kejuak san inijuantij tlauel ininpati. ¿Kenijkatsa techpaleuia? Biblia kiijtoua sekij uelis tlaixpanosej (Mat. 25:10-12; 2 Ped. 2:20, 21). Tlaj amo “[ti]kinueyimatij sekinok”, uajka amo kema tikintokilisej maseualmej, maske kintlapejpenijtokej, maske tlauel kinixmatij o miak xiuitl kitekipanojtokej Jehová (Jud. 16). Kiampa, tlaj tlaixpanosej o kisasej tlen tlanechikoli, tojuantij nojua titlaneltokatosej uan amo tijtlauelkauasej Jehová.
¿KINAMIKI TIMOTEKIPACHOSEJ TLAJ NOJUA MOMIAKILIJTIAUIJ?
11. ¿Tlake tikitstokej ipan xiuitl tlen namanok panotok?
11 Uejkajkia, sejse xiuitl temotiauiyaya ininmiaka katli kikuayayaj pantsi uan kiijiyayaj vino kema moilnamikiyaya Cristo imikilis. Uan ipan xiuitl tlen namanok panotok, tlauel momiakilijtiauij. ¿Moneki timotekipachosej? Amo. Ma tikitakaj se keski tlamantli tlen techpaleuis ma tijkuamachilikaj kenke amo kinamiki timotekipachosej.
12. ¿Kenke amo kinamiki timotekipachosej tlaj momiakiliaj katli kikuaj pantsi uan kiijij vino?
12 “ToTeko [Jehová] kinixmati inijuantij tlen nelia iaxkauaj” (2 Tim. 2:19). Jehová kena kimati ajkia inijuantij nelnelia kintlapejpenijtok, uan katli kinpouaj keskij kikuajkej pantsi uan kiikej vino kema moilnamijki Cristo imikilis amo kimatij. Yeka, kema techmatiltiaj keskij elkej, nopaya itstokej katli moiljuiaj nojkia kintlapejpenijtokej maske amo nelnelia. Sekij ayokmo kikuaj pantsi yon kiijij vino. Uan sekinok moiljuiaj tlanauatisej iuaya Jesús ipan iluikak pampa uelis mokokouaj o amo kuali tekiti inintsonteko. Yeka, amo tijmatij keskij itstokej ipan Tlaltipaktli katli nelnelia kintlapejpenijtokej.
13. ¿Kiijtoua Biblia keskij itstosej katli kintlapejpenijtokej kema peuas ueyi tlaijiyouilistli?
13 Katli kintlapejpenijtokej itstosej kampa ueli ipan Tlaltipaktli kema Jesús kinuikas iluikak (Mat. 24:31). Biblia kiijtoua ipan itlamia tonali nojua itstosej ipan Tlaltipaktli se keskij toikniuaj katli kintlapejpenijtokej (Apoc. 12:17). Maske kiijtoua nopa, amo techiljuia keskij itstosej kema peuas ueyi tlaijiyouilistli.
¿Tlake tijchiuasej tlaj tikitaj se akajya peua kikua pantsi uan kiiji vino kema moilnamiki Cristo imikilis? (Xikita párrafo 14).
14. Kej kiijtoua Romanos 9:11, 16, ¿kinamiki tikijtosej ayokmo moneki kintlapejpenisej toikniuaj ipan ni tonali?
14 San Jehová kimati kema kintlapejpenis (Rom. 8:28-30). Jehová pejki kintlapejpenia kema Jesús ya moyolkuitoya. Ipan achtoui siglo, nochi katli nelnelia eliyayaj Cristo itokilijkauaj kintlapejpenijkej yasej iluikak. Uan kej panotiajki miak xiuitl, miakej amo nelnelia eliyayaj Cristo itokilijkauaj maske kiampa kiijtouayayaj. Maske kiampa panok ipan miak xiuitl, Jehová kena kintlapejpenik se keskij katli nelnelia eliyayaj Cristo itokilijkauaj. Inijuantij eliyayaj kej nopa trigo tlen Jesús kiijtok moskaltiskia ika nopa “toktsontli [o xiuitl] tlen axkuali” (Mat. 13:24-30). Ipan itlamia tonali, Jehová nojua kintlapejpenia katli elisej tlen nopa 144,000. * Uajka, tlaj toTeotsij nojua kintlapejpenia toikniuaj, tojuantij amo kinamiki tikijtosej amo kuali tlen kichiua (xijpoua Romanos 9:11, 16). * Amo tijnekij tijchiuasej kej se keskij tlatekipanouanij tlen Jesús kiijtok ipan se tlapoualistli, katli kitlaijiljuijkej ininteko pampa kintlaxtlauik sanse kej katli pejkej tlatekipanouaj kema nechka tlamiskia tonali (Mat. 20:8-15).
15. ¿Kenke tijmatij amo nochi katli kintlapejpenijtokej elij “nopa tlalnamijkatlatekipanojketl tlen nelia temachtli”?
15 Amo nochi katli motemachiaj itstosej iluikak elij “nopa tlalnamijkatlatekipanojketl tlen nelia temachtli” (xijpoua Mateo 24:45-47). Sanse kej ipan achtoui siglo, ipan ni tonali Jehová uan Jesús kintekimakatokej san se keskij katli kinmachtiaj miakej. Uejkajkia, san se keskij katli kintlapejpenijkej kiijkuilojkej nopa Escrituras Griegas Cristianas. Ipan ni tonali, nojkia san se keskij katli kintlapejpenijtokej kinmachtiaj o ‘kintlamakaj kema asi hora’ toTeotsij itekipanojkauaj.
16. ¿Tlake tijyekojtokej ipan ni tlamachtili?
16 Ma tikilnamikikaj tlen timomachtijtokej ipan ni tlamachtili. Jehová kiijtojtok miakej itekipanojkauaj nochipa itstosej ipan Tlaltipaktli uan san se keskij tlanauatisej iuaya Jesús ne iluikak. ToTeotsij kinteochiua nochi itekipanojkauaj: nopa “matlaktli tlakamej” uan nopa “judío”. Kineki nochi ma kineltokakaj itlanauatiljuaj uan amo kema ma kitlauelkauakaj. Nochi moneki moechkapantlalisej uan sansejko kitekipanosej Jehová. Uan nochi moneki tlapaleuisej ma onka tlaseuilistli ipan tlanechikoli. Monechkauijtiuala tonali kema toTeotsij kitsontlamiltis nochi tlen amo kuali, yeka ma tijtekipanokaj Jehová uan “sansejko” ma tijtokilikaj Jesús (Juan 10:16).
^ párr. 5 Ni xiuitl, Cristo imikilis moilnamikis ipan tonali martes, abril 7. ¿Kenijkatsa kinamiki tikinitasej katli kikuaj pantsi uan kiijij vino kema moilnamiki Cristo imikilis? ¿Kinamiki timotekipachosej tlaj tikitaj sejse xiuitl momiakilijtiauij katli kintlapejpenijtokej? Ni tlajtlanili monankilis ipan ni tlamachtili tlen nojkia kiski ipan Tlen Tematiltia, enero 2016.
^ párr. 2 Kej kiijtoua Salmo 87:5, 6, uelis teipa toTeotsij techmatiltis inintoka nochi katli tlanauatisej iuaya Jesús (Rom. 8:19).
^ párr. 8 Xikita nopa recuadro “‘Se tlen teiknelia’ tlatlepanita”, tlen kiski ipan Tlen Tematiltia, enero 2016, iamayo 27.
^ párr. 14 Maske Hechos 2:33 kiijtoua Jesús kinmaka toTeotsij itonal, san Jehová kitlapejpenia sejse maseuali.
^ párr. 14 Tijmatis sekinok tlamantli ipan “Preguntas de los lectores”, tlen kiski ipan La Atalaya, mayo 1, 2007.
UIKATL 34 Nochipa kuali nimitstekipanos
^ párr. 56 TLEN NESI IPAN TLAIXKOPINKAYOMEJ: Ximoiljui ipan se ueyi tlanechikolistli tlauel miakej momontonoskiaj uan kiyaualoskiaj se toikni katli uala iuaya isiua tlen ueyi Kali Betel san pampa kinekij kinixkopinasej. ¡Nelia kinextiskiaj amo tlatlepanitaj yon se kentsi!
