¿Nojkia kiampa timoiljuia? Uelis kemantika nochi tijnekij tiistlakatisej se kentsi. Tlen tijtlapejpenisej tijchiuasej kema tijnekisej tiistlakatisej, kinextis tlaj tijchiuaj tlen xitlauak o amo. Kemantika pampa tijnekij sekinok kuali ma techitakaj, uelis timoiljuiskiaj amo kenijki tlaj tiistlakatisej. Uan kema kimatij san tiistlakatkej, ayokmo kuali techitaj. Ma tikitakaj tlake pano kema tiistlakatij.

Katli kuali mouikaj moneki motemachisej ipan inijuantij, kiampa kuali mouampojchijtosej. Kema omej mouampojchiuaj, amo nimantsi motemachiaj, achtoui moneki moixmatisej, xitlauak monojnotsasej uan kinextisej kintekipachoua tlen kinpano. Maske uelis tlauel kuali mouikaj, se istlakatili uelis kichiuas ayokmo ma motemachikaj ipan inijuantij, uan tlauel ouij sampa motemachisej.

¿Mitskajkayajtok se katli timoiljuiyaya eliyaya mouampo? Tlaj kena, ¿kenijkatsa tijyolmatki? Uelis tlauel mitsyolkokok, o timoiljuik tlauel mitsixpanok. Uelis nochi tijyolmatiskiaj kiampa. Ni kinextia kema se akajya amo kichiua tlen xitlauak, ayokmo kuali mouika ininuaya sekinok.

Robert Innes, katli tlamachtia Universidad de California, kiitak “kema se akajya kichiua tlen amo xitlauak, sekinok nojkia peuaj kichiuaj kej inijuantij”. Eliskia kejuak se kokolistli tlen temaua, tlaj timouikaj iuaya se akajya katli nochipa istlakati, uelis teipa nojkia peuas tiistlakatisej.

¿Tlake techpaleuis amo tijchiuasej kej inijuantij? Tlen Biblia tlamachtia uelis techpaleuis. Yeka, xikita tlake techtlajtolmaka Biblia.