¿Kuali timomachtijtok tlen kistok ipan pilamochtsi Tlen Tematiltia? Xikita tlaj tiuelis tijnankilis ni tlajtlanili:

¿Kenijkatsa kinamiki tikinitasej katli kintlapejpenijtokej?

Maske tijpatiitaj pampa kuali tlaneltokaj, amo tikinuejkapantlaliaj. Amo “[ti]kinueyimatij sekinok” (Jud. 16). Amo tikintlajtlaniaj kenijkatsa kintlanejkej ma yakaj iluikak (w20.01, iamayo 29).

¿Kenijkatsa uelis timotemachisej Jehová kiita tlen tijchiuaj?

Biblia kiijtoua Jehová ipa techtlachilijtoya maske ayamo titlakatiyayaj uan nochipa techtlakakilia kema timomaijtouaj. Nojkia, kimati tlen tijpiaj toyolijtik uan tlake timoiljuiaj. Uan tlen tijchiuaj kiyolpakiltia o kiyolkokoua (1 Crón. 28:9; Prov. 27:11). Jehová yaya techyoltilantok (w20.02, iamayo 12).

¿Kema kinamiki tikijtosej se tlenijki uan kema kinamiki amo tleno tikijtosej?

Tiyolpakij kema tikamanaltij tlen Jehová. Nojkia, kinamiki tikamanaltisej kema tikitaj se akajya nechka kichiuas se tlamantli tlen amo kuali. Ueuejtlakamej kitlalnamiktiaj se toikni kema moneki. Amo tikintlatsintokiaj toikniuaj kenijkatsa kichiuaj se keski tlamantli kampa amo techkauaj ma titlaueyichiuakaj. Amo tikijtouaj se keski tlamantli tlen sekinok amo kinamiki kimatisej (w20.03, iamayo 20, 21).

¿Kenke nopa chapolimej tlen Joel kinitak uan tlen Juan kinitak amo elij sanse?

Joel 2:20-29 kiijtoua toTeotsij kinuejkatlalia nopa chapolimej uan teipa kiijtoua kikuepas nochi tlen kikuajkej nopa chapolimej. Teipa kititlani itonal. Ni moaxitik kema babiloniaeuanij moaxkatijkej Jerusalén. Apocalipsis 9:1-11 kinixnextia Jehová itekipanojkauaj katli yasej iluikak, pampa inijuantij amo majmauij kiniljuisej maseualmej kenijkatsa toTeotsij kintlatsakuiltis, uan nopa tlauel kinkualankamaka katli amo kualmej (w20.04, iamayo 3-6).

¿Ajkia mochijtok nopa tlanauatijketl tlen norte ipan ni tonali?

Rusia uan katli kipaleuiaj. Pampa ayokmo kinkauaj toTeotsij itekipanojkauaj ma tlajtolmoyauakaj uan kintlatsakuiltiaj miakej toikniuaj katli itstokej kampa tlanauatia. Nojkia pampa moteuijtok ika tlanauatijketl tlen sur, Gran Bretaña uan Estados Unidos (w20.05, iamayo 13).

¿San ipan Gálatas 5:22, 23 nesi nopa kuajkuali tlamantli?

Amo. ToTeotsij itonal nojkia techpaleuis ma tijnextikaj sekinok kuajkuali tlamantli, kej tijchiuasej tlen xitlauak (Efes. 5:8, 9) (w20.06, iamayo 17).

¿Kenke moneki kuali tikitasej tlen tijtlaliaj ipan redes sociales?

Tlen tijtlaliaj ipan redes sociales uelis kinextis timoueyimatij uan amo timoechkapanouaj (w20.07, iamayo 6, 7).

¿Tlake tijyekouaj tlen se kuali michtlajtlamajketl?

Katli kuali michtlajtlama yaui kampa kimati itstokej michimej uan kema kimati kinpantis, kimati kenijkatsa kitekiuis tlen ika tekiti uan tekiti maske tlauel uetsi atl. Tojuantij nojkia kiampa moneki tijchiuasej kema titlajtolmoyauaj (w20.09, iamayo 5).

¿Kenijkatsa uelis tikinpaleuisej katli tikinmachtiaj ika Biblia nojua ma kiiknelikaj Jehová?

Ma tikiljuikaj mojmostla ma kipoua Biblia, ma monejneuili tlen kipoua uan ma tijnextilikaj kenijkatsa momaijtos (w20.11, iamayo 4).

¿Ajkia kinejki kiniljuis Pablo kema kiijtok ipan Cristo “nochi tlakamej uelis moyolkuisej”?

Kema apóstol Pablo kiijtok “nochi”, amo kinejki kiijtos nochi maseualmej moyolkuiskiaj. Kema kiampa kiijtok kinejki kiniljuis katli kintlapejpenijtokej yasej iluikak uan mochijtokej ‘tlatsejtseloltikej ipan Cristo Jesús’ (1 Cor. 1:2; 15:18) (w20.12, iamayo 5, 6).

¿Tlake kichiuatij ipan iluikak katli kintlapejpenijtokej “kema kipitsasej nopa trompeta”? (1 Cor. 15:51-53).

Kitokilisej Jesús uan sansejko kinnauatisej nochi maseualmej (Apoc. 2:26, 27) (w20.12, iamayo 12, 13).