¿Kuali timomachtijtok tlen kistok ipan pilamochtsi Tlen Tematiltia? Xikita tlaj tiuelis tijnankilis ni tlajtlanili:

¿Kenijkatsa technextilia Biblia tlake kiyolmati toTeotsij?

Kema israeleuanij itstoyaj Egipto, toTeotsij kimatiyaya tlauel tlaijiyouiyayaj uan ya nojkia kiyolmatiyaya tlen inijuantij kiyolmatiyayaj (Éx. 3:7; Is. 63:9). ToTeotsij techchijchijki kej itlachialis, yeka tojuantij nojkia tijyolmatij tlen sekinok kiyolmatij. ToTeotsij kena kiyolmati tlen tijyolmatij maske tojuantij timoiljuiaj amo kinamiki techtlasojtlas (wp18.3, iamayo 8, 9).

¿Kenijkatsa Jesús kinpaleuik maseualmej amo ma techikoitakaj?

Kema Jesús itstoya, miakej judíos tlauel techikoitayayaj. Yeka kiijtok monekiyaya amo moueyimatisej uan moiljuisej san inijuantij tlauel ininpati. Kiniljuik itokilijkauaj nochi monekiyaya moitasej kejuak iknimej (w18.06, iamayo 9, 10).

¿Kenke Jehová amo kikauilik Moisés ma kalaki ipan nopa tlali tlen kitenkauilijtoya uan tlake techmachtia?

Moisés kuali mouampojchijtoya iuaya Jehová (Deut. 34:10). Kema panok se 40 xiuitl, kema nechka kiixkotonaskiaj uaktok tlali, israeleuanij sampa pejkej kualanij pampa tlanki atl. ToTeotsij kiiljuik Moisés ma kinojnotsa nopa tepexitl. Moisés amo kiampa kichijki, ya kiuitejki nopa tetl. Uelis Jehová moyolkokok kema kiitak Moisés amo kichijki tlen kinauatik o pampa amo kiuejkapantlalik kema kichijki nopa ueyi tlamantli (Núm. 20:6-12). Nopa techmachtia moneki tijchiuasej tlen toTeotsij technauatia uan nochipa tijuejkapantlalisej (w18.07, iamayo 13, 14).

¿Tlake ueliskia kichiuas ma titechikoitaj?

Onka eyi tlamantli tlen ueliskia kichiuas ma titechikoitakaj: Toaltepe, tomij, uan toxiui. Yeka tlauel ipati tikinitasej sekinok kej Jehová kinita uan amo tikinchikoitasej (Hech. 10:34, 35) (w18.08, iamayo 8-12).

¿Kenijkatsa uelis tlapaleuisej toikniuaj katli ya uejueyij ipan tlanechikoli?

Maske toikniuaj katli ya ueuejtixtokej ayokmo tlatekipanouaj kej achtouia, Jehová nojua tlauel kinpatiita uan nojua uelis kinpaleuisej sekinok. Uelis kinpaleuisej tosiuaikniuaj ininueuejuaj katli amo kitekipanouaj Jehová, kinpaleuisej katli kitlauelkajtokej Jehová, tlamachtisej ika Biblia uan kampa ueli tlajtolmoyauasej (w18.09, iamayo 8-11).

¿Tlake amatlajkuiloli uan videos tlauel tijtekiuiaj kema titlamachtiaj?

Tijpixtokej tarjetas de contacto, amatl tlen ika titetlaneuij, chikueyi pilamatsitsij uan pilamochtsitsij Tlen Tematiltia uan ¡Despertad! Nojkia tijpixtokej se keski pilamochtsitsij, ome amochtli tlen ika titlamachtiaj uan naui videos, se tlen nopa naui videos eli: ¿Kenke moneki timomachtis Biblia? (w18.10, iamayo 16).

¿Tlake moneki kichiuas se Cristo itokilijka tlaj kineki kikouas o moaxkatis tlen melauak, kej kiijtoua Proverbios 23:23?

Maske amo moneki titemakasej tomij uan kiampa timoaxkatisej tlen melauak, kena moneki tijchiuasej se ueyi kampeka tlaj tijnekij timoaxkatisej tlen melauak (w18.11, iamayo 4).

¿Tlake techmachtia tlen kichijki Oseas kema kitlapojpoljuik isiua Gomer?

Maske Gomer miakpa momekatik, Oseas kitlapojpoljuik uan nojua mosiuajtijtoya iuaya. Tlaj se Cristo itokilijka momekatis, isiua o iueue uelis kitlapojpoljuis. Tlaj nopa siuatl o tlakatl katli kiixpanotokej sampa moteka iuaya, kinextia ya kitlapojpoljuik uan ayokmo uelis kiixpolos nopa amatl kampa nesi mosenkajtokej (w18.12, iamayo 13).