1, 2. ¿Kenke sekij tetajmej kintekipachoua kema ininkoneuaj kinekij motemaktilisej uan moatsonpoliuiltisej?

TLAUEL miakej maseualmej katli momachtiaj Biblia kimaktiliaj Jehová ininnemilis uan moatsonpoliuiltiaj. Miakej elij piltelpokatsitsij katli inintatauaj kinmachtijkej, uan kitlapejpenijtokej kichiuasej tlen tlauel kuali ipan ininnemilis (Sal. 1:1-3). Tetajmej katli kitekipanouaj Jehová tlauel kinekij ma asi nopa tonali kema ininkoneuaj moatsonpoliuiltisej (nojkia xikita 3 Juan 4).

² Uelis tetajmej kintekipachoua se keski tlamantli. Uelis kinixmatkej sekij telpokamej katli moatsonpoliuiltijkej uan teipa moiljuijkej tlen Jehová tlanauatia amo tlauel tepaleuia. Uan sekij kitlauelkajkej Jehová. Yeka tetajmej uelis moiljuiaj ininkoneuaj nojkia kiampa kinpanos uan uelis teipa ayokmo kinekisej kitekipanosej toTeotsij. Kej nopa kinpanok katli itstoyaj Éfeso. Jesús kiniljuik: “Ayok innechikneliaj [...] keja achtouia” (Apoc.  [Rev.] 2:4). ¿Tlake uelis kichiuasej tetajmej tlaj amo kinekij kiampa ma kinpano ininkoneuaj uan ma momakixtikaj? (1 Ped. 2:2). Ma tikitakaj tlake panok ika Timoteo.

3. 1) ¿Kema mochijki Timoteo se Cristo itokilijka, uan tlake kichijki ika tlen kiyekok? 2) ¿Tlake sekinok tlamantli Pablo kiiljuik Timoteo?

³ Uelis Timoteo kiixmatki Jesús itlamachtil ipan xiuitl 47, kema apóstol Pablo yajki Listra. Maske nojua eliyaya telpokatl, kichijki tlen kiyekojtoya, uan kema panok ome xiuitl, pejki tepaxaloua iuaya Pablo. Uan kema panok 16 xiuitl, Pablo kiiljuik: “Xijtokilijtinemi tlen timomachtijtok uan tlen tijmati para melauak pampa tikinixmati ajkeya inijuantij mitsmachtijtokej. Pampa hasta kema tikonetsi tieliyaya, tijmatiyaya nopa Tlajkuiloli tlen tlatsejtseloltik [Escrituras Hebreas]. Uajka amo xijkaua. Uan iTlajtol toTeko mitstlalnamiktijtok uan mitsnextilijtok kejatsa uelki timomakixtik tlen motlajtlakoljuaj pampa tijneltokak Cristo Jesús” (2 Tim. 3:14, 15). Ma tikitakaj eyi tlamantli: 1) “tijmatiyaya nopa Tlajkuiloli tlen tlatsejtseloltik”, 2) “tijmati para melauak” tlen mitsmachtijkej, uan 3) “mitstlalnamiktijtok uan mitsnextilijtok kejatsa uel[is] timomakixti[s] [...] pampa tijneltokak Cristo Jesús”.

4. ¿Tlake tlamantli mitspaleuijtok xikinmachti mokoneuaj? (Xikita nopa achtoui tlaixkopinkayotl).

⁴ Tetajmej katli kitekipanouaj Jehová kinekij ininkoneuaj ma kiixmatikaj “nopa tlajkuiloli tlen tlatsejtseloltik”, nochi Escrituras Hebreas uan Escrituras Griegas Cristianas. Maske sekij nojua konemej, uelis kiyekosej se keski tlamachtili kema kiitasej tlen kichijkej katli uejkajkia itstoyaj uan sekinok tlapoualistli tlen Biblia. Jehová itlanechikol kichijchijtok miak amochtli, pilamochtsitsij uan videos ipan miak tlajtoli, uan tetajmej uelis kinpaleuisej ininkoneuaj ika ni tlamantli. ¿Tijmati tlake tlen ni tlamantli eltok ipan motlajtol? Ma tikilnamikikaj tlauel moneki timomachtisej Biblia uan kiampa uelis kuali timouikasej iuaya Jehová.

5. 1) ¿Tlake kiijtosneki nopa tlajtoli “tijmati para melauak”? 2) ¿Kenke tikijtouaj Timoteo temachtli kimatiyaya Jesús eliyaya Mesías?

⁵ Maske tlauel ipati tetajmej kinmachtisej ininkoneuaj tlen Biblia kiijtoua, kej tlen kinpanok katli uejkajkia itstoyaj o sekinok tlapoualistli, moneki kichiuasej seyok tlamantli tlen tlauel ipati. Timoteo kipaleuijkej ma ‘kimati nelia melauak’ tlen kimachtiyayaj. Ipan griego, “tijmati para melauak” kiijtosneki se akajya “temachtli kineltoka se tlenijki” uan “motemachia se tlenijki nelia melauak”. Kema nojua eliyaya okichpil, Timoteo ipa kimatiyaya tlen kiijtoua Escrituras Hebreas. Teipa, kema moskaltik, kimatki se keski tlamantli tlen kipaleuik ma kineltoka Jesús eliyaya nopa Mesías. Pampa ‘kimatki nelia melauak’, moatsonpoliuiltik uan yajki tepaxaloua ipan tlanechikoli iuaya Pablo.

6. ¿Kenijkatsa uelis tikinpaleuis mokoneuaj ma kineltokakaj nelia melauak tlen tikinmachtia ipan Biblia?

⁶ Tlaj tijneki tijpaleuis mokone ma kineltoka nelia melauak tlen tijmachtia, achtoui moneki tijpias moyolo. Amo nima kineltokatiuetsis tlen kimachtiaj, uan nojkia amo kineltokas san pampa kiitas itatauaj kimatij nelia melauak tlen kineltokaj. Se okichpil uelis kineltokas tlen Biblia tlamachtia tlaj kiyekos iselti kitekiuis itlalnamikilis (xijpoua Hebreos 5:14). Tetajmej uelis kinpaleuisej ininkoneuaj ma kichiuakaj ni, uan nojua tlauel moneki kema  kinekij kimatisej se keski tlamantli. Ma tikitakaj se neskayotl.

7, 8. 1) ¿Kenijkatsa se toikni kinextia kipia iyolo kema kimachtia isiuapil? 2) ¿Kema nojkia tijnextijtok tijpia moyolo ika mokoneuaj kema tikinmachtia?

⁷ Thomas, katli kipia se siuapil tlen kipia 11 xiuitl, kiijtoua: “Kemantika nosiuapil nechtlajtlania: ‛¿Timoiljuia Jehová kichijchijki nochi tlen onka ika evolución?’ o ‛¿Kenke tojuantij amo tikintlapejpeniaj katli tekichiuasej yon tijchiuaj se keski tlamantli tlen kinpaleuiskia kuali ma itstokaj sekinok?’. Nijchiua kampeka amo nima nijnankilis pampa tlaj nikiljuijtiuetsis se tlenijki maske eli melauak, amo nijpaleuis pampa amo kikuamachilis. Yeka tlauel kuali tlaj yolik nijnextilijtias ika se keski tlamantli kenke melauak tlen tijneltokaj”.

⁸ Nochi Cristo itokilijkauaj moneki kipiasej ininyolo. Thomas kimati moneki kinextis ni kuali tlamantli kema kimachtia isiuapil (Col. 3:12). Ya kimati moneki miak tonali uan miakpa kiixtomilis isiuapil tlen kineki kimatis, kiampa kipaleuis ma kineltoka nelia melauak tlen Biblia tlamachtia. Ya kiijtoua: “Nosiua uan na tijnekij tijmatisej tlaj tosiuapil nelia kineltoka uan kikuamachilia nopa tlamachtili tlen tlauel ipati katli tijmachtiaj. Uan tlauel kuali pampa techtlajtlania miak tlamantli. Amo nijnekiskia nosiuapil ma kineltoka se tlenijki san pampa tojuantij tikiljuiaj maske amo kuali kikuamachilia”.

9. ¿Kenijkatsa tetajmej uelis kinpaleuisej ininkoneuaj ma kineltokakaj tlen Biblia tlamachtia?

⁹ Kema tetajmej kinextiaj kipiaj ininyolo, ininkoneuaj yolik kikuamachilijtiauij kenijkatsa kuali tlaneltokasej (Efes. 3:18). Moneki kinmachtisej se tlenijki ika amo ouij tlajtoli. Tlaj ininkoneuaj kineltokasej tlen kinmachtiaj, uajka kimatisej kenijkatsa kinixtomilisej katli ininuaya momachtiaj uan sekinok maseualmej (1 Ped. 3:15). ¿Uelis kiixtomasej ika Biblia tlake kinpano katli mikij? ¿Kineltokaj nelia melauak tlen Biblia tlamachtia? * Maske tetajmej moneki kipiasej ininyolo, tlauel kuali tlaj kinpaleuisej ininkoneuaj ma kineltokakaj tlen Biblia tlamachtia (Deut. 6:6, 7).

10. ¿Tlake tlauel moneki kichiuasej tetajmej?

¹⁰ Tetajmej nojkia moneki kinmachtisej ininkoneuaj ika tlen inijuantij kichiuaj, kiampa nojkia kinpaleuisej ma kineltokakaj tlen melauak. Stephanie, katli kinpia eyij pilichpokamej, kiijtoua: “Kema nojua eliyayaj siuapilmej, nochipa nimotlajtlaniyaya: ‘¿Nikinixtomilia kenke na nijneltoka Jehová nelia itstok, kichiua tlen xitlauak uan teiknelia? ¿Kiitaj nelia nikiknelia Jehová?’. Tlaj na amo nijneltoka se tlenijki, inijuantij nojkia amo kineltokasej nopa”.

11, 12. ¿Tlake kiijtosneki tlalnamikilistli, uan kenke se akajya uelis kinextis tlalnamiki maske nojua piltelpokatsi?

¹¹ Kej tikitstokej, Timoteo 1) kimatiyaya tlen kiijtoua Escrituras Hebreas uan 2) kimatiyaya melauak tlen kineltokayaya. Uan, ¿tlake kinejki kiijtos Pablo kema kiijtok nopa Tlajkuiloli tlen tlatsejtseloltik kipaleuiskia ma tlalnamiki uan ma momakixti?

¹² Amochtli Perspicacia, volumen 2, kiijtoua tlalnamikilistli kiijtosneki se akajya “kimati kenijkatsa kitekiuis tlen kiixmati uan tlen kikuamachilijtok uan kiampa kisenkauas se kuesoli, momokuitlauis, kichiuas tlen mosentlalijtok o kinpaleuis  sekinok nojkia kiampa ma kichiuakaj. Kichiua nochi tlen amo kichiuaskia se akajya katli uiuitik”. Biblia kiijtoua “se okichpil kichiua miak tlamantli tlen uiuitik ipampa nopa uiuiyotl tlen eltok ipan iyolo” (Prov. 22:15). Se akajya katli amo uiuitik kinextia kuali tlalnamiktok. Uan kinextia kuali tlalnamiktok pampa kitlepanita Jehová uan kineltoka itlanauatiljuaj, uan amo pampa ya kipia miak xiuitl (xijpoua Salmo 111:10).

13. ¿Kenijkatsa telpokamej uelis kinextisej tlalnamikilistli?

¹³ Telpokamej katli kuali tlaneltokaj amo “kipatlaj inintlalnamikilis ajachika uan kitokiliaj tlen ueli tlamachtili”, pampa inijuantij amo kichiuaj tlen kinyoltilana yon tlen sekinok kiniljuiaj (Efes. 4:14). Inijuantij “kitekiuijtokej inintlalnamikilis para kiixmatisej tlen kuali uan tlen axkuali” (Heb. 5:14). Kinextiaj peuaj kuali tlalnamikij kema kuali kitlapejpeniaj tlen kichiuasej maske inintatauaj o sekinok amo kinitaj (Filip. 2:12). Nopa tlalnamikilistli kinpaleuis ma momakixtikaj (xijpoua Proverbios 24:14). ¿Tlake uelis kichiuasej tetajmej uan kiampa kinpaleuisej ininkoneuaj ma tlalnamikikaj? Achtoui moneki kiitasej kenijkatsa monejnemiltiaj inijuantij, kiampa kinnextilisej ininkoneuaj kichiuaj kampeka monejnemiltisej kej Biblia kiijtoua (Rom. 2:21-23).

14, 15. 1) Tlaj se toikni ikone kineki moatsonpoliuiltis, ¿ipan tlake kinamiki moiljuis? 2) ¿Kenijkatsa tetajmej uelis kinpaleuisej ininkoneuaj ma kimatikaj tlauel kuali itstosej tlaj kichiuasej tlen Biblia kiijtoua?

¹⁴ Tetajmej amo kinamiki san kiniljuisej ininkoneuaj tlake kuali uan tlake amo, moneki kinpaleuisej ininselti ma moiljuikaj kenke kuali se tlamantli o kenke amo. Kualtiaskia kintlajtlanisej: “¿Kenke Biblia kiijtoua amo ma tijchiuakaj se keski tlamantli? ¿Kenke tijmati tlen Biblia kiijtoua nochipa mitspaleuis?” (Is. 48:17, 18).

¹⁵ Kema se toikni ikone kineki moatsonpoliuiltis, moneki kipaleuisej ma moiljui tlake kinamiki kichiuas se akajya katli moatsonpoliuiltia. ¿Kenijkatsa kiita nopa?  ¿Kenijkatsa kipaleuis tlaj moatsonpoliuiltis? ¿Tlake tlaouijkayotl kiixnamikis? ¿Kenke nopa tlateochiualistli tlen kiselis tlauel ipati maske kipias tlaouijkayotl? (Mar. 10:29, 30). Tlaj kineki moatsonpoliuiltis, tlauel moneki moiljuis ipan ni tlajtlanili. Tlaj tetajmej kinpaleuiaj ininkoneuaj ma moiljuikaj kenijkatsa kinpaleuis tlaj kineltokasej tlen toTeotsij tlanauatia uan tlake panos tlaj amo kichiuasej, uajka temachtli kimatisej tlauel kuali itstosej tlaj nochipa kichiuasej tlen Biblia kiijtoua (Deut. 30:19, 20).

16. ¿Tlake uelis kichiuasej tetajmej tlaj ininkone ayokmo kuali tlaneltoka?

¹⁶ ¿Tlake uelis kichiuasej tetajmej tlaj kiitasej ininkone katli moatsonpoliuiltijtok ayokmo tlauel tlaneltoka? Kemantika, se telpokatl uelis peua kipaktia tlen sekinok kichiuaj o moiljuia tlen Biblia kiijtoua amo tlauel tepaleuia (Sal. 73:1-3, 12, 13). Uan tetajmej moneki kimajtosej kej kitlalnamiktisej ininkone uelis kichiuas nojua ma kitekipano Jehová o ma kitlauelkaua. Tlaj ya telpokatl o nojua okichpil, moneki kichiuasej kampeka amo mokualanisej iuaya. Nopa telpokatl moneki kiitas itatauaj nelia kiikneliaj uan kinekij kipaleuisej.

17, 18. Tlaj se telpokatl ayokmo kuali tlaneltoka, ¿kenijkatsa uelis kipaleuisej itatauaj?

¹⁷ Kema se telpokatl moatsonpoliuiltik, kiiljuik Jehová san ya tlauel kiiknelis uan san ya kineltokas (xijpoua Marcos 12:30). Jehová tlauel kipatiita tlen tijtenkauiliaj kema timoatsonpoliuiltiaj, uan tojuantij moneki tijpatiitasej tlen tijtenkauilijtokej Jehová (Ecl. 5:4, 5). Tetajmej kiitasej kema kinamiki kiilnamikilisej ininkone nopa tlamantli, uan moneki kichiuasej ika miak tlaiknelili. Tlaj achtoui kipouasej tlen kiijtoua amatlajkuiloli, kinpaleuis ma kiixtomilikaj kenke moneki kuali kitekipanos toTeotsij uan tlake tlateochiualistli kiselis pampa kimaktilijtok Jehová inemilis uan moatsonpoliuiltijtok.

¹⁸ Tetajmej tlauel kinpaleuis tlen kiijtoua amochtli Los jóvenes preguntan, volumen 1 ipan tlaxeloli “Los padres preguntan”. Nopaya kiijtoua: “Amo ximoiljui motelpoka o moichpoka ayokmo tleno kineki kimatis tlen moreligión. Kemantika telpokamej san moneki kuali moiljuisej tlake kinekij kichiuasej ipan ininnemilis”. Uelis se telpokatl kiampa kichiua pampa katli ininuaya momachtia kitetsopaj, pampa kiyolmati itstok iselti o pampa moiljuia sekinok telpokamej ipan tlanechikoli kena kintekimakaj uan ya amo. Nopa amochtli nojua kiijtoua: “Maske kiampa kiyolmatij, nopa amo kiijtosneki ayokmo uelis kitekipanosej Jehová. Kemantika onka se keski tlamantli tlen kichiua se telpokatl ma kimati ouij kichiuas tlen kineltoka”. Teipa, nopa amochtli kiniljuia tetajmej tlake uelis kichiuasej tlaj se ininkone ayokmo kineltoka tlen kimachtijtokej.

19. ¿Kenijkatsa tetajmej uelis kinpaleuisej ininkoneuaj ma tlalnamikikaj uan kiampa momakixtisej?

¹⁹ Tetajmej kipiaj se ueyi tekitl. Ipan Efesios 6:4 kiniljuia: “Xikiniskaltikaj kuali. Xikintlalnamiktikaj ika teiknelijkayotl uan xikinmachtikaj tlen toueyiTeko kineki ma kimatikaj”. Kej tikitakej, tetajmej amo san moneki kinnextilisej ininkoneuaj tlen Biblia tlamachtia, nojkia moneki kinpaleuisej ma motemachikaj nelia melauak tlen momachtiaj. Telpokamej moneki kuali kineltokasej tlen kiyekouaj, kiampa kinekisej kimaktilisej Jehová ininnemilis uan kitekipanosej ika nochi ininyolo. Biblia, toTeotsij itonal uan nochi tlen inmojuantij inkichiuaj kinpaleuis inmokoneuaj ma tlalnamikikaj uan ma momakixtikaj.