1. ¿Tlake kichiua se akajya katli kineki moyolkuepas?

 KEMA tijchiuaj se tlamantli tlen amo kuali, tlauel moneki ma timoyolkuepakaj. Biblia kiijtoua kema se akajya moyolkuepa peua kikualankaita tlen amo kuali kichijki, ayokmo kiampa kichiua uan mosentlalia ayokmo kichiuas (xikita kampa kiijtoua “arrepentimiento” ipan Glosario).

 2. ¿Kenke moneki nochi tijkuamachilisej tlake kiijtosneki timoyolkuepasej? (Nehemías 8:9-11).

² Nochi moneki tijkuamachilisej tlake kiijtosneki timoyolkuepasej. ¿Kenke? Pampa mojmostla titlajtlakolchiuaj. Adán uan Eva techpanoltilijkej tlajtlakoli, yeka nochi titlajtlakolchiuaj uan timikij (Rom. 3:23; 5:12). Nochi kiampa tielij, yeka moneki timoyolkuepasej. Maske uejkajkia se keskij tlakamej kuali tlaneltokayayaj, kej apóstol Pablo, nojkia monekiyaya kichiuasej kampeka amo tlajtlakolchiuasej (Rom. 7:21-24). Nopa amo kiijtosneki mojmostla tlauel timoyolkokojtosej pampa titlajtlakolejkej. Jehová tlauel techtlasojtla uan kineki ma tiyolpakikaj. Ma timoiljuikaj ipan tlen kinpanok judíos kema Nehemías itstoya (xijpoua Nehemías 8:9-11). Jehová amo kinekiyaya tlauel ma moyolkokojtokaj pampa tlajtlakolchijtoyaj, ya kinekiyaya ma kitekipanokaj ika pakilistli. Kema timoyolkuepaj techpaleuia ma tiyolpakikaj, yeka Jehová techmachtia tlake kiijtosneki timoyolkuepasej. Tlauel timotemachiaj Jehová, katli tetlasojtla, techtlapojpoljuis tlaj timoyolkuepaj.

 3. ¿Tlake tikitasej ipan ni tlamachtili?

³ Ipan ni tlamachtili tikitasej sekinok tlamantli tlen moneki  kichiuas se akajya tlaj kineki moyolkuepas. 1) Tikitasej kenijkatsa Jehová kinmachtik israeleuanij ma moyolkuepakaj kema tlaijixnamikiyayaj, 2) kenijkatsa Jehová kinpaleuik maseualmej ma moyolkuepakaj uan 3) kenijkatsa Jesús itokilijkauaj kiyekojkej Jehová kineki kintlapojpoljuis katli moyolkuepaj.

JEHOVÁ KINMACHTIK ISRAELEUANIJ KEMA MONEKIYAYA MOYOLKUEPASEJ

 4. ¿Tlake kiyekojkej israeleuanij kema Jehová kinmachtik monekiyaya moyolkuepasej?

⁴ Kema Jehová kintlapejpenik israeleuanij kej ialtepe, kichijki se tlajtolsenkaualistli ininuaya. Kiniljuik kinmokuitlauiskia uan kinteochiuaskia tlaj kineltokaskiaj itlanauatiljuaj. Nojkia kiniljuik: “Ni tlanauatili tlen nama niinmechmaka axtlauel ouij para inkichiuasej, niyon axouij para inkimachilisej” (Deut. 30:11, 16). Pero tlaj kiixpanoskiaj pampa kinueyichiuaskiaj sekinok teotsitsij, Jehová ayokmo kuali kinitaskia uan tlauel tlaijiyouiskiaj. Maske kiampa kichiuaskiaj, sampa ueliskia kuali mouikasej iuaya Jehová pampa nopa Tlanauatili kiampa kiijtouayaya (Deut. 30:1-3, 17-20). Nopa kiijtosneki ueliskia moyolkuepasej uan Jehová sampa kuali kinitaskia uan kinteochiuaskia.

 5. ¿Kenijkatsa Jehová kinextik israeleuanij nojua ueliskiaj kitekipanosej? (2 Reyes 17:13, 14).

⁵ Israeleuanij miakpa kiixpanokej Jehová, kinueyichijkej sekinok teotsitsij uan nojkia kichijkej sekinok tlamantli tlen tlauel fiero. Yeka, tlauel tlaijiyouijkej. Pero Jehová amo kintlauelkajki uan kintitlanki teokamanalouanij para kinpaleuisej ma moyolkuepakaj uan sampa ma kitekipanokaj (xijpoua 2 Reyes 17:13, 14).

 6. ¿Kenijkatsa Jehová kintekiuik teokamanalouanij para kinpaleuis israeleuanij ma moyolkuepakaj? (Nojkia xikita tlaixkopinkayotl).

⁶ Jehová miakpa kintitlanki teokamanalouanij para kintlalnamiktis uan para kiniljuis israeleuanij tlake kinpanoskia tlaj amo moyolkuepaskiaj. Se neskayotl, Jehová kiniljuik ika teokamanalojketl Jeremías: “Intlajtlakolchijkaisraelitamej tlen ayok innechneltokaj, ximokuepakaj ika na, pampa na tlauel  nitetlasojtla. Axnikualanis inmouaya para nochipa. [ . . . ] Xijmachilikaj imiaka nochi nopa tlajtlakoli tlen inkiuikaj noixpa […] uan xinechpouilikaj nochi nopa tlajtlakoli tlen inkichijtokej” (Jer. 3:12, 13). Nojkia, ika teokamanalojketl Joel kiniljuik: “Ximoyolkuepakaj noka na ika nochi inmoyolo” (Joel 2:12, 13). Isaías nojkia kiijtok: “Uajka ximotlapajpakchiuakaj. Ayok xijchiuakaj niyon se tlamantli tlen axkuali noixtla na. Nochi tlamantli tlen axkuali inkichiuayayaj xijkauakaj” (Is. 1:16-19). Uan nojkia ika Ezequiel, Jehová kiniljuik: “¿Inmoiljuiaj nechpaktia ma miki se tlakatl tlen fiero iyolis? ¡Axtle, axneli! Na nijneki ma moyolkuepa tlen itlajtlakoljuaj uan ma itsto. [ . . . ] Na axnechpaktia ximikikaj. […] Ximoyolkuepakaj uan xijsenuikilikaj xiitstokaj” (Ezeq. 18:23, 32). Jehová tlauel yolpaki kema maseualmej moyolkuepaj pampa kineki nochipa ma itstokaj. Jehová amo san kichia se akajya ma moyolkuepa, ya kiita kenijkatsa kipaleuis. Ma tikitakaj se keski neskayotl tlen kinextia ya kiampa kichiua.

 7. ¿Tlake kinmachtik Jehová israeleuanij ika tlen kipanok Oseas ika isiua?

⁷ Ma tikitakaj tlen Jehová kinnextilik israeleuanij ika tlen kipanok teokamanalojketl Oseas uan isiua, Gómer. Nopa siuatl momekatik uan kikajki iueue pampa kintokilik sekinok tlakamej. ¿Moiljuik Jehová nopa siuatl ayokmo moyolkuepaskia? Ya kimati tlen tijpiaj ipan toyolo, yeka kiiljuik Oseas: “Xia uan sampa xijtemoti tlen eliyaya mosiua uan xijualika mouaya uan xikikneli yonke yajaya momekatia. Keja nopa tikixnextis kejatsa niinmoTEKO nikiniknelia israelitajmej yonke kinueyichiuaj toteotsitsij” (Os. 3:1; Prov. 16:2). Maske Gómer nojua momekatijtoya, Jehová kiiljuik Oseas ma kitlapojpoljui uan ma kichiua kampeka sampa itstos iuaya. a Ika tlen panok, Jehová kinnextilik israeleuanij kinekiyaya ma moyolkuepakaj. Maske inijuantij tlauel tlajtlakolchijtoyaj, Jehová nojua kinikneliyaya, yeka kintitlanki miakej teokamanalouanij para kinpaleuisej ma moyolkuepakaj uan ma kipatlakaj kej monejnemiltiyayaj. Uajka, ¿kiijtosneki Jehová, katli kiita tlen tijpiaj ipan toyolo, kinpaleuis maseualmej ma moyolkuepakaj maske nojua tlajtlakolchijtokej? (Prov. 17:3). Ma tikitakaj tlen Jehová kichijki.

JEHOVÁ KINPALEUIA KATLI KINEKIJ MOYOLKUEPASEJ

 8. ¿Tlake kichijki Jehová para kipaleuis Caín ma moyolkuepa? (Génesis 4:3-7; nojkia xikita tlaixkopinkayotl).

⁸ Caín elki ininachtouikone Adán uan Eva, yeka nojkia eliyaya tlajtlakole. Biblia kiijtoua Caín “kichiuayaya tlen fiero” (1 Juan 3:12). Uelis yeka Jehová amo kuali kiitak “Caín uan itlakajkaualis”. Pero kema kiiljuik ma moyolkuepa, “Caín kualanki miak uan fiero tlachixtinenki”. ¿Tlake kichijki Jehová? Mokamanaljuik iuaya (xijpoua Génesis 4:3-7). Jehová kitlalnamiktik ika tlaiknelili. Kiiljuik tlaj moyolkuepaskia sampa kuali mouikaskiaj, pero tlaj amo kiampa kichiuaskia, kipanoskia tlen amo kuali. Caín amo kitlakakilik Jehová uan amo kikajki ma kipaleui. Maske kiampa panok, toTeotsij nojua mosentlalik kinpaleuis maseualmej ma moyolpatlakaj.

 9. ¿Kenijkatsa Jehová kipaleuik David ma moyolkuepa?

⁹ Jehová tlauel kiikneliyaya tlanauatijketl David, yeka kiijtok tlauel kiyolpakiltiyaya (Hech. 13:22). David tlauel tlajtlakolchijki pampa momekatik uan temiktik. Uan  iTlanauatil Moisés kiijtouayaya monekiyaya mikis (Lev. 20:10; Núm. 35:31). Pero Jehová katli tlauel teiknelia, kititlanki teokamanalojketl Natán ma kitlalnamiktiti David maske amo kinextijtoya tlaj moyolkueptoya. b Natán kiteuik se neskayotl para ma asi ipan iyolo tlen kiiljuiskia. Yeka, David kikuamachilik tlauel kiixpanotoya Jehová uan moyolkuepki (2 Sam. 12:1-14). Teipa kiijkuilok se salmo kampa kinextik tlauel kiyolkokojtoya tlen kichijtoya (Sal. 51, kampa peua). Ni salmo tlauel kinyolchikajtok miakej maseualmej katli nojkia tlajtlakolchiuaj uan kinpaleuia ma moyolkuepakaj. Tlauel techyolchikaua kema tikitaj Jehová ika miak tlaiknelili, kipaleuik David ma moyolkuepa.

10. ¿Kenijkatsa tijyolmatij pampa Jehová kipia iyolo uan techtlapojpoljuia?

¹⁰ Jehová kikualankaita nochi tlajtlakoli (Sal. 5:4, 5). Pero ya tlauel techiknelia uan kimati nochi titlajtlakolejkej, yeka techpaleuia amo ma titlajtlakolchiuakaj. Ya nochipa kinpaleuia ma moyolkuepakaj katli tlauel tlajtlakolchiuaj uan ma monechkauikaj iuaya. ¡Tlauel techyolchikaua pampa kiampa kichiua! Kema timoyoliljuiaj ya kipia iyolo ika tojuantij uan techtlapojpoljuia, techpaleuia amo ma tijtlauelkauakaj uan nima ma timoyolkuepakaj kema titlajtlakolchiuaj. Nama tikitasej tlake kiyekojkej Jesús itokilijkauaj kema se akajya moyolkuepa.

TLEN KIYEKOJKEJ JESÚS ITOKILIJKAUAJ KEMA SE AKAJYA MOYOLKUEPA

11, 12. ¿Tlake neskayotl kiixtonki Jesús para kinextis iTata tlauel kineki tetlapojpoljuis? (Nojkia xikita tlaixkopinkayotl ).

¹¹ Ipan achtoui siglo, asiskia Mesías. Kej tikitakej ipan tlamachtili 31, Jehová kintekiuik Juan teAtsonpoliuiltijketl uan Jesús para kinmachtisej maseualmej kenke tlauel ipati moyolkuepasej (Mat. 3:1, 2; 4:17).

¹² Kema Jesús tlajtolmoyajki, tlamachtik iTata nochipa kineki tetlapojpoljuis. Kiampa kinextik kema kiijtok nopa neskayotl tlen se telpokatl katli kistejki ichaj uan teipa pejki amo kuali monejnemiltia. Pero  kema panok se keski tonali, nopa telpokatl “motlalnamiktik” uan tlakuepilik ichaj. ¿Tlake kichijki itata? Jesús kiijtok: “Kema nojua uejka ualayaya, itata kiuejkaitak uan tlauel kiteikneltiitak. Motlalojtejki uan kinamikito, kinajnauajki uan kitsoponik ika miak tlaiknelili”. Nopa telpokatl kiiljuik itata ma kikaua kitekipanos kej se tlatekipanojketl. Pero itata tlauel kinekiyaya kitlapojpoljuis uan sampa kiselis ichaj. Uan nopa tetaj kiijtok: “Ni nokone [ . . . ] mokuapolojtoya uan tijpantijtokej” (Luc. 15:11-32). Kema Jesús ayamo ualayaya ipan Tlaltipaktli, uelis miakpa kiitak kenijkatsa Jehová kintlasojtlak katli moyolkuepayayaj. Yeka, kuali kiixtonki kenijkatsa Jehová tlauel tetlasojtla uan tetlapojpoljuia.

13, 14. ¿Tlake kiyekok apóstol Pedro kema se akajya moyolkuepa, uan tlake kinmachtik Cristo itokilijkauaj? (Nojkia xikita tlaixkopinkayotl).

¹³ Jesús miakpa kimachtik apóstol Pedro kenijkatsa Jehová kintlapojpoljuia katli moyolkuepaj. Pedro miakpa mokuapolok uan Jesús nochipa kinejki kitlapojpoljuis. Kiampa panok kema expa kiijtok amo kiixmatiyaya Jesús, uan teipa tlauel moyolkokok (Mat. 26:34, 35, 69-75). Pero kema Jesús ya moyolkuitoya, monextik iixpa Pedro kampa amo aka itstoya (Luc. 24:33, 34; 1 Cor. 15:3-5). Jesús kimatiyaya moyolkueptoya, yeka kinejki kiyolchikauas uan kinextilis nelnelia kitlapojpoljuijtoya.

¹⁴ Pedro kuali kiitak kenijkatsa kintlapojpoljuiaj katli nelnelia moyolkuepaj. Yeka uelki kinmachtik sekinok ni tlamantli. Kema ya panotoya nopa iljuitl tlen Pentecostés, kinixtomilik judíos inijuantij kimiktijtoyaj Mesías, pero ika tlaiknelili nojkia kiniljuik: “Uajka ximoyolpatlakaj uan ximokuepakaj ika Dios para kiixpolos inmotlajtlakoljuaj, uan kiampa Jehová kichiuas ma asi tonali kema inkipiasej tlaseuilistli” (Hech. 3:14, 15, 17, 19). Ika tlen kiijtok, kinextik kema se  akajya moyolkuepa moneki kipatlas kej moiljuia, ayokmo kichiuas tlen kichijki uan sampa monejnemiltis kej Dios kipaktia. Kiijtok Jehová kiixpoloskia inintlajtlakoljuaj uan ayokmo kema kiilnamikiskia. Kema ya panotoya miak xiuitl, Pedro kiniljuik Cristo itokilijkauaj Jehová “kipia iyolo ika tojuantij uan kineki nochi ma timoyolpatlakaj [ . . . ]. Axkineki niyon se ma poliui para nochipa” (2 Ped. 3:9). ¡Tlauel techyolchikaua tijmatisej Jehová uelis techtlapojpoljuis tlaj tijchiuasej se ueyi tlajtlakoli!

15, 16. 1) ¿Kenijkatsa Pablo kiyekok moneki titetlapojpoljuisej? (1 Timoteo 1:12-15) 2) ¿Tlake tikitasej ipan tlamachtili 33?

¹⁵ Saulo kichijki miak tlamantli tlen amo kuali. Ya tlauel kintlaijiyouiltik uan kintlatsakuiltik Cristo itokilijkauaj, yeka miakej moiljuiyayaj amo kema kipatlaskia kej eliyaya. Pero Jesús amo kiampa moiljuiyaya. Ya uan Jehová kiitakej nopa kuajkuali tlamantli tlen kinextiyaya. Yeka, Jesús kiijtok: “Nijtlapejpenijtok para nijtekiuis Saulo” (Hech. 9:15). Uan nojkia kitekiuik se milagro para kipaleuis ma moyolkuepa (Hech. 7:58–8:3; 9:1-9, 17-20). Teipa, kema Saulo mochijki se Cristo itokilijka uan kiixmatiyayaj kej apóstol Pablo, miakpa kintlaskamatilik Jehová uan Jesús pampa kinextijkej kipiaj kuali ininyolo uan tlauel tetlasojtlaj (xijpoua 1 Timoteo 1:12-15). Uan kiniljuik sekinok: “Dios kipia kuali iyolo uan yeka kitemolia kenijkatsa mitspaleuis ximoyolkuepa” (Rom. 2:4).

¹⁶ Se tonali, Pablo kimatki ipan tlanechikoli tlen Corinto se tlakatl momekatiyaya uan nojua kikauayayaj nopaya ma itsto. Tlen kichijki Pablo techmachtia kenijkatsa Jehová tlauel teiknelia kema kintlalnamiktia itekipanojkauaj uan kintlasojtla kema moyolkuepaj. Ipan tlamachtili 33 tikitasej tlen panok ipan nopa tlanechikoli.