1, 2. ¿Tlake tlamantli tlauel kipatiita Jehová, uan tlake kineki ma tijchiuakaj?

 JEHOVÁ tlauel kipatiita kema tikinchiuiliaj sekinok tlen kuali. Jesús kiijtok moneki tikiniknelisej sekinok kej tojuantij timoikneliaj (Mat. 22:37-39). Nopa nojkia kiijtosneki moneki kuali tikinnojnotsasej katli amo kitekipanouaj Jehová. Kiampa, tijchiuasej kej toTata Jehová katli “kichiua ma kisa Tonati para kualmej uan katli amo kualmej” (Mat. 5:45).

² Maske Jehová kiniknelia nochi maseualmej, más kiniknelia katli kineltokaj (Juan 14:21). Ya kineki nojkia ma tijchiuakaj kej ya uan ma tijnextikaj tlauel tikinikneliaj toikniuaj (1 Ped. 4:8; Rom. 12:10). Kema kiampa titeikneliaj eli sanse kej tikikneliskiaj se kuali touampox o se tlen tochampoyouaj.

3. ¿Tlake techpaleuis más ma titeiknelikaj?

³ Nopa tlaiknelili eli kej se xochitl tlen tijpiaj ipan tochaj, tlaj tijnekij ma moskalti, moneki tikatekisej uan tijmokuitlauisej. Apóstol Pablo kiniljuik Cristo itokilijkauaj: “Nojua xijnextijtokaj inmoikneliaj kej iniknimej” (Heb. 13:1). Jehová  kineki ma tijchiuakaj kampeka más ma tikiniknelikaj sekinok. Ipan ni tlamachtili tikitasej kenke moneki tikinnechkauisej toikniuaj uan kenijkatsa uelis nojua kiampa tijchijtosej.

¿KENKE MONEKI MÁS TIKINNECHKAUISEJ TOIKNIUAJ?

4. Kej kiijtoua Salmo 133:1, ¿tlake techpaleuis nojua ma tijpatiitakaj kema timosentikapaleuiaj ipan Jehová itlanechikol? (Nojkia xikita tlaixkopinkayomej).

⁴ (Xijpoua Salmo 133:1). Sanse kej nopa salmista, nojkia tikijtouaj “nelia kuali uan yejyektsi nesi” pampa timouampojchijtokej ininuaya katli nojkia kiikneliaj Jehová. Pero ueliskia ayokmo tijpatiitasej tlen mochiua ipan Jehová itlanechikol uan kenijkatsa timosentikapaleuiaj. Ueliskia techpanos kej se akajya katli ayokmo mosentlachilia ika se kuauitl tlen tlauel ueyi pampa mojmostla kiita. Tojuantij nojkia ajachika tikinitaj toikniuaj ipan tlanechikoli. Yeka, tlauel techpaleuis nojua ma tikinpatiitakaj tlaj timoiljuiaj kenke tijpatiitaj sejse tlen inijuantij uan kenke toikniuaj ipan tlanechikoli nojkia kiampa kichiuaj.

5. ¿Kenijkatsa uelis kinpaleuis sekinok kema kiitaj timoikneliaj?

⁵ Katli achtoui monechikouaj touaya, tlauel mosentlachiliaj pampa kiitaj tlauel timoikneliaj, uan kiitaj kipantijtokej nopa tlanechikoli tlen nelia melauak. Jesús kiijtok: “Kiampa nochi kimatisej inmojuantij inelij notokilijkauaj: tlaj inmoikneliaj se ika seyok” (Juan 13:35). Ma tikitakaj tlen kipanok Chaithra, katli momachtiyaya ipan universidad uan pejki momachtia Biblia. Ya  kitlanejkej ipan se ueyi tlanechikolistli tlen eyi tonali uan kena yajki. Kema tlantoya nopa achtoui tonali, ya kiiljuik nopa tosiuaikni katli kimachtiyaya: “Notatauaj amo kema nechnajnauajtokej. Pero ipan ni tonali toikniuaj nechnajnauajkej 52 imiakpa. Nijyolmatki kejuak Jehová kitekiuik itlanechikol para nechnextilis tlauel nechiknelia. Nojkia nijneki nijtekipanos Jehová”. Chaithra nojua momachtik uan moatsonpoliuiltik ipan 2024. Uajka kema sekinok kiitaj tlen tijchiuaj, kej kema tijnextiaj timoikneliaj, kinpaleuia nojkia ma kinekikaj kitekipanosej Jehová (Mat. 5:16).

6. ¿Kenijkatsa techpaleuia kema más tikinnechkauiaj toikniuaj?

⁶ Kema más tikinnechkauiaj toikniuaj tlauel techpaleuia. Pablo kiniljuik Cristo itokilijkauaj: “Nojua ximoyolchikajtokaj mojmostla se ika seyok [...] kiampa nopa tlajtlakoli tlen tekajkayaua amo kichiuas yon se tlen inmojuantij ma tetia iyolo” (Heb. 3:13). Tlaj se tonali tijyolmatij ayokmo kuali titlaneltokaj uan ayokmo tijnekij tiitstosej ipan Jehová itlanechikol, ya uelis kiyololinis se toikni para techpaleuis sampa kuali ma titlaneltokakaj (Sal. 73:2, 17, 23). Tlen kichiuas nopa toikni tlauel techpaleuis.

7. ¿Kenijkatsa kema timoikneliaj techpaleuia amo ma timoxelokaj? (Colosenses 3:13, 14).

⁷ Ipan Jehová itlanechikol nochi tijchiuaj kampeka tijnextisej timoikneliaj, yeka tijseliaj miak tlateochiualistli (1 Juan 4:11). Se neskayotl, pampa tikinikneliaj toikniuaj, techpaleuia ma timoijiyouikaj se ika seyok uan nopa kichiua amo ma timoxelokaj (Efes. 4:2-6; xijpoua Colosenses 3:13, 14). Yeka, kema timonechikouaj tlauel tiyolpakij pampa kuali timouikaj uan ipan sekinok religiones amo kiampa kichiuaj.

MA TIMOTLEPANITAKAJ SE IKA SEYOK

8. ¿Kenijkatsa Jehová techpaleuia amo ma timoxelokaj?

⁸ Maske titlajtlakolejkej, Jehová techpaleuia amo ma timoxelokaj (1 Cor. 12:25). Biblia kiijtoua: “Dios inmechmachtia ximoiknelikaj se ika seyok” (1 Tes. 4:9). ¿Kenijkatsa kichiua? Ipan itlajtol techiljuia tlake moneki tijchiuasej uan kiampa más kuali timouikasej ininuaya sekinok. Uan tojuantij tijkauaj Jehová ma techyakana kema kuali timomachtiaj tlen techiljuia uan kema tijchiuaj ipan tonemilis tlen tijyekouaj (Heb. 4:12; Sant. 1:25). Uan nochi Jehová itekipanojkauaj tijchiuaj kampeka kiampa tijchiuasej.

9. ¿Kenijkatsa Romanos 12:9-13 technextilia moneki tikintlepanitasej sekinok?

⁹ ¿Kenijkatsa Biblia uelis techpaleuis más ma tikinnechkauikaj toikniuaj? Ma tikitakaj tlen Pablo kiijtok ipan Romanos 12:9-13 (xijpoua). Kema Pablo kiijtok “achtoui inmojuantij xijnextikaj inkintlepanitaj sekinok”, kinekiyaya kiijtos moneki tikitasej kenijkatsa uelis tijnextisej tikinikneliaj toikniuaj, kiampa tijchiuaj kema titetlapojpoljuiaj, kema kuali tikinseliaj ipan tochaj uan tikinmakaj tlen tijpiaj (Efes. 4:32). Amo ma tijchiakaj inijuantij ma technechkauikaj. Tojuantij achtoui ma tikinnechkauikaj, kiampa tikitasej kenijkatsa moaxitia tlen Jesús kiijtok: “Más tiyolpakis kema titemakas se tlenijki uan amo kej kema tijselis” (Hech. 20:35).

10. ¿Kenijkatsa uelis tijnextisej tikintlepanitaj sekinok? (Nojkia xikita tlaixkopinkayotl).

¹⁰ Kema Pablo ya kiijtojtoya moneki tikintlepanitasej sekinok, nojkia kiijtok: “Nochipa chikauak xitekitikaj, amo ximotlatsiuiltikaj”. Se akajya katli kipaktia tekitis, kichiua ika pakilistli nopa tekitl tlen kimakaj. Proverbios 3:27, 28 techiljuia: “Kema  kinamiki tijpaleuis se tlakatl uan tiueli tijchiuas, amo xikiljui para axtle”. Yeka, tlaj tikitaj se akajya moneki ma kipaleuikaj, nima ma tijpaleuikaj ika tlen tiuelij. Amo ma tijkauakaj ma pano tonali yon ma timoiljuikaj seyok kipaleuis (1 Juan 3:17, 18).

11. ¿Tlake techpaleuis más ma tikinnechkauikaj toikniuaj?

¹¹ Nojkia tijnextiaj tikintlepanitaj sekinok kema nima tikintlapojpoljuiaj katli techixpanoj. Efesios 4:26 kiijtoua: “Amo xikualantokaj se tonal”. ¿Kenke? Pampa ipan versículo 27, kiijtoua kiampa amo tijkauasej “yon kentsi ma kalaki Diablo”. Ipan Biblia, Jehová miakpa techiljuia moneki tikintlapojpoljuisej sekinok. Colosenses 3:13, techiljuia: “Ximotlapojpoljuijtokaj ika nochi inmoyolo”. Kema tikintlapojpoljuiaj toikniuaj techpaleuia más ma tikinnechkauikaj. Kiampa titlapaleuiaj sansejko ma tiitstokaj pampa ichikaualis Dios kichiua ma tijpiakaj tlaseuilistli (Efes. 4:3). Uajka, tlaj titetlapojpoljuiaj, amo timoxelosej uan tiitstosej ika tlaseuilistli.

12. ¿Kenijkatsa Jehová techpaleuia ma tikintlapojpoljuikaj sekinok?

¹² Uelis ouij tijmatisej tijtlapojpoljuisej se akajya katli techyolkokok. Pero ichikaualis Dios techpaleuis ma titetlapojpoljuikaj. Biblia kiijtoua moneki timoiknelisej uan chikauak titekitisej, pero nojkia kiijtoua: “Xijkauakaj ichikaualis Dios ma kichiua tlauel xijnekikaj inkichiuasej tlen kuali”. Uajka, ichikaualis Dios uelis kipaleuis se akajya ma kineki kichiuas tlen kuali, kiampa uelis kinextis teiknelia uan tetlapojpoljuia (Rom. 12:11). Yeka, ika nochi toyolo tikiljuiaj Jehová ma techpaleui (Luc. 11:13).

“AMO XIMOXELOKAJ”

13. ¿Tlake ueliskia techxelos?

¹³ Ipan tlanechikoli itstokej miakej maseualmej katli amo sanse elij (1 Tim. 2:3, 4). Amo sanse techiskaltijkej, yeka amo sanse tijtlapejpeniaj kenijkatsa timoyoyontisej, ika tlake timopajtisej uan ika tlake timoyolpakiltisej. Tlaj tlauel timosentlaliaj ipan nopa tlamantli, ueliskia kichiuas  ma timoxelokaj (Rom. 14:4; 1 Cor. 1:10). Pero Jehová technextilijtok kenijkatsa timoiknelisej se ika seyok, yeka amo timoiljuiaj más kuali tlen tojuantij tijtlapejpeniaj uan amo tlen sekinok kitlapejpeniaj (Filip. 2:3).

14. ¿Tlake moneki tijchijtosej nochipa, uan kenke?

¹⁴ Nojkia techpaleuia amo ma timoxelokaj kema tijchiuaj kampeka tikinyolchikauasej toikniuaj ipan tlanechikoli (1 Tes. 5:11). Namanok miakej katli ayokmo monechikouayayaj uan katli kinkixtijtoyaj tlen tlanechikoli, sampa pejtokej kitekipanouaj Jehová. Uan tojuantij kuali tikinseliaj (2 Cor. 2:8). Se tosiuaikni katli matlaktli xiuitl ayokmo mosentilijtoya touaya uan sampa yajki tlanechikoli, kiijtok: “Nochi toikniuaj nechtlajpalouayayaj ika pakilistli” (Hech. 3:19). ¿Kenijkatsa kipaleuik tlen kichijkej toikniuaj? Ya kiijtoua: “Nikitak Jehová sampa nechpaleuijtoya ma niyolpaki”. Kema tijchiuaj kampeka tikinyolchikauasej sekinok, Jesús uelis techtekiuis uan kiampa kinyoltlalis katli tlauel mokuesojtokej (Mat. 11:28, 29).

15. ¿Tlake seyok tlamantli techpaleuis amo ma timoxelokaj? (Nojkia xikita tlaixkopinkayotl).

¹⁵ Tlen tikijtouaj nojkia uelis kichiuas amo ma timoxelokaj. Job 12:11 kiijtoua: “Keja tokamak kimachilia iajuiyaka sejse tlamantli tlakualistli, totlakakilis ueli kikaki uan kiyekoua katlia tlajtoli eltok kuali”. Se akajya katli kuali tlakualchiua achtoui kiyekoua nopa tlakualistli para kiitas tlaj ajuiyak  kiski uan teipa kiteka para kikuasej sekinok. Tojuantij nojkia moneki kuali timoiljuisej tlake tikijtosej, kiampa tikinyolchikauasej uan tikinpaleuisej sekinok (Sal. 141:3; Efes. 4:29).

16. ¿Ajkia inijuantij más moneki kichiuasej kampeka teyolchikauasej ika tlen kiijtouaj?

¹⁶ Katli mosiuajtijtokej, tetajmej uan tenamej moneki kichiuasej kampeka teyolchikauasej ika tlen kiijtosej (Col. 3:19, 21; Tito 2:4). Ueuejtlakamej nojkia moneki kinyolchikauasej uan kinyoltlalisej toikniuaj (Is. 32:1, 2; Gál. 6:1). Proverbios 15:23 techilnamikilia: “Nelia yejyektsi kema se akajya kimati kejatsa kikamauis se tlen kipia kuesoli uan kiiljuis tlen kinamiki ipan nopa tlalochtli kema moneki”.

MA TIJNEXTIKAJ NELIA TITEIKNELIAJ IKA TLEN TIJCHIUAJ

17. ¿Tlake uelis tijchiuasej tlaj tijnekij tijnextisej nelnelia tikinikneliaj toikniuaj?

¹⁷ Apóstol Juan kiijtok: “Nopilkoneuaj, amo san xikijtokaj inteikneliaj, xijnextikaj ika tlen inkichiuaj uan nelnelia xiteiknelikaj” (1 Juan 3:18, TNM). ¿Kenijkatsa uelis tijnextisej nelnelia titeikneliaj? Tlaj tijkixtiaj tonali para tiitstosej ininuaya toikniuaj. Nopa techpaleuis más ma tikinnechkauikaj uan más ma titeiknelikaj. Ma timokamanaljuikaj ininuaya ipan tlanechikoli, ipan tlajtolmoyaualistli uan nojkia ma tikinpaxalokaj. Tlaj kiampa tijchiuaj, sekinok kiijtosej: “Dios inmechmachtia ximoiknelikaj se ika seyok” (1 Tes. 4:9). Nojkia, tikitasej kenijkatsa “nelia kuali uan yejyektsi nesi para iknimej ma mokauakaj sansejko ika san se ininyolo” (Sal. 133:1).