TLAMACHTILI 15
UIKATL 30 NoUampo, noTata uan noTeotsij
Kema tijnechkauiaj Jehová tlauel techpaleuia
“Pero na achi más nimonechkauis kampa Toteko Dios, pampa ya nopa tlen más kuali para na” (SAL. 73:28).
TLEN MOIXTOMAS
¿Tlake uelis tijchiuasej tlaj tijnekij tijnechkauisej Jehová, uan kenijkatsa techpaleuia?
1, 2. 1) ¿Tlake moneki tijchiuasej tlaj tijnekij tijpiasej se kuali touampox? 2) ¿Tlake tikitasej ipan ni tlamachtili?
XIMOILJUI ipan se kuali mouampox. ¿Tikilnamiki tlake kichijki ximouampojchiuakaj? Uelis monejki tiitstos miak tonali iuaya, tijmatis tlake kipanotok uan tikitas tlake kipaktia uan tlake amo. Nojkia, tikitak kinextiyaya miak kuajkuali tlamantli tlen nojkia tijnekiyaya tijnextis. Uan kej panotiajki tonali, tlauel tikiknelik.
2 Tlaj tijneki kuali timouampojchiuas iuaya se akajya, moneki tijkixtis tonali uan tijchiuas kampeka kuali tikixmatis, uan nojkia kiampa pano ika Dios. Ipan ni tlamachtili tikitasej kenijkatsa uelis más tijnechkauisej Jehová, katli eli touampox. Pero achtoui tikitasej kenke tlauel techpaleuis kema timonechkauisej iuaya.
3. ¿Kenke moneki timoyoliljuisej kenijkatsa techpaleuia kema timonechkauiaj ika Jehová? Xikijto se neskayotl.
3 Moneki timoyoliljuisej kenijkatsa techpaleuia tlaj tijnechkauiaj Jehová (Sal. 63:6-8). ¿Kenke? Ma timoiljuikaj ipan se tlamantli tlen techpaleuis ma tijkuamachilikaj. Maseualmej kimatij tlauel kinpaleuia kema kikuaj tlen kipaleuia inintlakayo, kiijij miak atl, kichiuaj ejercicio uan kuali kochij. Maske kimatij ni tlamantli, miakej maseualmej amo kichiuaj uan amo momokuitlauiaj. Pero tlaj se akajya peua moiljuia kenijkatsa kipaleuia nochi nopa tlamantli, kipaleuis nojua kiampa ma kichijto. Tojuantij nojkia tijmatij tlauel techpaleuis tlaj timonechkauiaj ika Jehová. Pero kema timoyoliljuiaj kenijkatsa techpaleuia, tijnekij nojua más tijnechkauisej (Sal. 119:27-30).
4. ¿Tlake kiijtok se salmista ipan Salmo 73:28?
4 (Xijpoua Salmo 73:28). Katli kiijkuilok Salmo 73, eliyaya se iteipaixui Leví uan tlatsotsonayaya ipan teokali. Uelis ya kitekipanojtoya Jehová miak xiuitl, pero kiitak eliyaya tlauel ipati tlaj kiilnamikiskia kenijkatsa tlauel kipaleuiskia tlaj kinechkauiskia Jehová. Uan kinekiyaya sekinok nojkia ma kiitakaj tlauel kinpaleuiskia tlaj mouampojchiuaskiaj iuaya Dios. Ma tikitakaj kenijkatsa techpaleuia.
KEMA TIMONECHKAUIAJ IKA JEHOVÁ TLAUEL TIYOLPAKIJ
5. 1) ¿Kenke tlauel tiyolpakij kema timonechkauiaj ika Jehová? 2) ¿Kenijkatsa mitspaleuia uan mitsmanauia nopa tlalnamikilistli tlen Jehová temaka? (Proverbios 2:6-16).
5 Tlaj más timonechkauiaj ika Jehová, más tiyolpakisej (Sal. 65:4). ¿Kenke kiampa tikijtouaj? Pampa onka miak tlamantli tlen techpaleuis ma tiyolpakikaj. Se neskayotl, kema tijchiuaj tlen itlajtol Dios tlamachtia, techpaleuia amo ma tijchiuakaj tlen amo kuali yon ma tijchiuakaj uejueyi tlajtlakoli (xijpoua Proverbios 2:6-16). Yeka, Biblia kiijtoua: “Ueyi pakilistli kipia se tlakatl tlen kipantia tlalnamikilistli uan mochiua tlalnamiki” (Prov. 3:13).
6. ¿Kenke ayokmo yolpajki nopa salmista?
6 Tlen kiijtoua nopa texto amo kiijtosneki Jehová iuampoyouaj amo kema mokuesosej. Katli kiijkuilok Salmo 73, mokuesok pampa kiitayaya maseualmej kuali itstoyaj maske kichiuayayaj tlen amo kuali. Tlauel moyolkokojtoya pampa moiljuiyaya katli amo kitlepanitaj yon kichiuaj itlanauatiljuaj Dios, más kuali itstokej, uan ya kinekiyaya itstos kej inijuantij. Moiljuiyaya maseualmej katli mosisiniyayaj uan moueyimatiyayaj, nochipa tlatominpiayayaj, amo mokokouayayaj uan amo kema tlaijiyouiyayaj, pero nopa amo nelia (Sal. 73:3-7, 12). Tlauel moyolkokojtoya, yeka pejki moiljuia amo kipaleuiskia tlaj nojua kitekipanoskia Jehová, yeka kiijtok: “¡Axtleno nechpaleuia para nijpia noyolo tlapajpaktik, uan san tlapik nimokuatotonia para axnijchiuas tlajtlakoli!” (Sal. 73:13).
7. ¿Tlake techpaleuis sampa ma tiyolpakikaj kema timokuesouaj? (Nojkia xikita tlaixkopinkayotl).
7 Nopa salmista kichijki se keski tlamantli pampa ayokmo kinekiyaya mokuesojtos. Kalajki ipan iteopa “Toteko Dios” uan nopaya Jehová kipaleuik ma moiljui kej kinamiki (Sal. 73:17-19). Jehová eli se kuali touampox, yeka kimati kema timokuesouaj. Kema kiampa tijyolmatisej, moneki tikiljuisej ma techyakana uan tijkauasej ma techpaleui ika Biblia uan ika toikniuaj tlen totlanechikol, nopa techpaleuis nojua ma tijtekipanokaj Jehová maske timokuesosej. Uan maske kemantika tlauel timotekipachosej, Jehová techyolchikauas uan techyoltlalis (Sal. 94:19). a
Nopa levita katli kiijkuilok Salmo 73, ijkatok iixpa nopa ueyi teokali tlen Dios. (Xikita párrafo 7).
KEMA TIMONECHKAUIAJ IKA JEHOVÁ TECHPALEUIS NAMA UAN TEIPA
8. ¿Ipan tlake sekinok tlamantli techpaleuia kema timonechkauiaj ika Jehová?
8 Kema timonechkauiaj ika Jehová, techpaleuia ipan ni ome tlamantli. 1) Kichiua ma tiyolpakikaj pampa tijmatij amo san tlapik tiitstokej, uan 2) techpaleuia ma timotemachikaj teipa kuali tiitstosej (Jer. 29:11). Ma tikitakaj kenijkatsa techpaleuia ni ome tlamantli.
9. ¿Kenke kema timonechkauiaj ika Jehová tlauel tiyolpakij?
9 Kema timonechkauiaj ika Jehová techpaleuia ma tikitakaj amo san tlapik tiitstokej. Ipan ni tonali, miakej maseualmej moiljuiaj amo itstok Dios. Yeka, miakej moiljuiaj san tlapik tiitstokej uan se tonali maseualmej tlamisej. Pero tojuantij tijyekojtokej miak tlamantli ipan Biblia, yeka timotemachiaj Dios “nelia itstok uan kinteochiua katli kitemouaj ika nochi ininyolo” (Heb. 11:6). Jehová kichijki ma tijnekikaj tijueyichiuasej. Yeka, tlauel tiyolpakij pampa tijtekipanouaj (Deut. 10:12, 13).
10. Kej kiijtoua Salmo 37:29, ¿tlake tlateochiualistli kiselisej Jehová itekipanojkauaj?
10 Miakej maseualmej amo motemachiaj teipa kuali itstosej. San mosentlaliaj tekitisej, kiniskaltisej ininkoneuaj uan kiajokuisej tomij tlen ika mopanoltisej kema ueuejtiasej. Kiampa kichiuaj pampa amo kimatij tlake kichiuas Jehová teipa. Pero katli tijtekipanouaj Jehová timotemachiaj ya techpaleuis (Sal. 25:3-5; 1 Tim. 6:17). Uan timotemachiaj ipan ya pampa eli touampox uan tijmatij nelia kichiuas tlen kitenkajtok. Teipa tijselisej miak tlateochiualistli, uan nopa tlateochiualistli tlen más ipati eli nochipa tijueyichiuasej Jehová (xijpoua Salmo 37:29).
11. ¿Kenijkatsa techpaleuia kema timonechkauiaj ika Jehová uan ya kenijkatsa kiyolmati?
11 Kema tijnechkauiaj Jehová nojkia techpaleuia ipan sekinok tlamantli. Se neskayotl, ya kiijtojtok techtlapojpoljuis totlajtlakoljuaj tlaj timoyolkuepaj (Is. 1:18). Nopa kiijtosneki ayokmo timoyolkokojtosej tlaj uejkajkia tijchijkej se ueyi tlajtlakoli (Sal. 32:1-5). Nojkia, tijyolpakiltiaj Jehová uan nopa kichiua kuali ma tijyolmatikaj (Prov. 23:15). Uelis tijselijtok sekinok tlateochiualistli pampa kuali timouampojchijtok iuaya. Pero, ¿tlake uelis tijchiuasej tlaj tijnekij más timonechkauisej ika Jehová?
¿TLAKE TECHPALEUIS MÁS MA TIMONECHKAUIKAJ IKA DIOS?
12. ¿Tlake moneki tijchiuas uan kiampa más timonechkauijtias ika Dios?
12 Tlaj ya timoatsonpoliuiltik, kiijtosneki ya tijyekojtok miak tlamantli tlen Jehová uan Jesús, timoyolkuepki tlen motlajtlakoljuaj, tijnextik kuali titlaneltoka uan tijchiua kampeka timonejnemiltis kej Biblia kiijtoua. Nopa kiijtosneki timonechkauijtok ika Jehová. Pero nochi ni tlamantli moneki nojua tijchijtosej tlaj tijnekij más timonechkauijtiasej ika Dios (Col. 2:6).
13. ¿Tlake eyi tlamantli techpaleuis más ma timonechkauikaj ika Jehová?
13 ¿Tlake moneki tijchiuasej tlaj tijnekij nojua tijnechkauisej Jehová? 1) Nojua moneki tijpouasej uan timomachtisej Biblia. Uan amo san moneki timomachtisej nopa tlamachtili tlen amo ouij, nojkia moneki tijchiuasej kampeka tijkuamachilisej tlake kineki toTeotsij ma tijchiuakaj uan timonejnemiltisej kej Biblia tlamachtia (Efes. 5:15-17). 2) Moneki timoyoliljuisej kenijkatsa Jehová kinextijtok tlauel techiknelia pampa nopa techpaleuis kuali ma titlaneltokakaj. 3) Moneki nojua tijkualankaitasej nochi nopa tlamantli tlen Jehová amo kipaktia uan amo timouampojchiuasej ininuaya katli amo kuali monejnemiltiaj (Sal. 1:1; 101:3).
14. ¿Tlake moneki tijchiuasej mojmostla tlaj tijnekij tijyolpakiltisej Jehová? (1 Corintios 10:31; nojkia xikita tlaixkopinkayomej).
14 (Xijpoua 1 Corintios 10:31). Moneki tijchiuasej kampeka tijchiuasej se keski tlamantli tlen Jehová kipaktia. Amo san moneki titlajtolmoyauasej o tiasej tlanechikoli, moneki tijyolpakiltisej Jehová ika tlen tijchiuaj mojmostla. Ya tlauel kipaktia kema amo titekajkayauaj uan titemakaj tlen tijpiaj (2 Cor. 8:21; 9:7). Nojkia kineki ma tijpatiitakaj tonemilis pampa ya techmakatok. Yeka, más timonechkauiaj ika ya kema amo tlauel titlakuaj yon titlaij uan kema tijchiuaj tlen techpaleuis amo ma timokokokaj. Kema Jehová kiita tijchiuaj kampeka tijyolpakiltisej ika nochi tlen tijchiuaj, nojua tlauel techiknelia (Luc. 16:10).
Nojkia uelis tijyolpakiltisej Jehová kema kuali tijnemiltiaj tocarro, tijchiuaj ejercicio, tijkuaj tlen kipaleuia totlakayo uan titemakaj tlen tijpiaj. (Xikita párrafo 14).
15. ¿Kenijkatsa kineki Jehová ma tikinitakaj sekinok?
15 Jehová kinextia kiniknelia maseualmej katli kitekipanouaj uan katli amo (Mat. 5:45). Uan nojkia kineki kiampa ma tijchiuakaj. Se neskayotl, Jehová kineki itekipanojkauaj “amo aka ma kiijilnamikikaj”, “amo ma kichiuakaj kualantli” uan “ma elikaj yolyamanikej ika nochi maseualmej” (Tito 3:2). Yeka, amo timoiljuiaj tojuantij más topati uan maseualmej katli amo kitekipanouaj Jehová amo (2 Tim. 2:23-25). Tlaj nochipa tijnextiaj tikinikneliaj maseualmej, más timonechkauisej ika Jehová.
KEMA AMO KUALI TIJYOLMATIJ NOJKIA UELIS TIJNECHKAUISEJ JEHOVÁ
16. ¿Tlake kiyolmatki katli kiijkuilok Salmo 73?
16 ¿Uan tlaj se tonali timoiljuisej Jehová techtlauelkajki pampa timokuapolojkej? Ma tikitakaj tlen kipanok katli kiijkuilok Salmo 73. Ya tlauel moyolkokojtoya kema kiijtok: “San kentsi poliuiyaya para niuetstoskia. Noikxiuaj xitlaniyayaj uan nechkatitoya para nimomimilos tlatepexiko. Nelia tlauel nikualanki [...] pampa nikitak para tlauel niuiuitik nieltoya. ¡Hasta ninesiyaya moixpa keja se nitlapiali tlen axkipia itlalnamikilis!” (Sal. 73:2, 21, 22). ¿Moiljuik Jehová ayokmo kinamikiyaya ma kiikneli yon ma kitlapojpoljui pampa mokuapolojtoya?
17. 1) ¿Tlake kichijki nopa salmista kema tlauel amo kuali kiyolmatki? 2) ¿Tlake techmachtia tlen kipanok? (Nojkia xikita tlaixkopinkayomej).
17 Maske nopa salmista moiljuik Jehová kitlauelkajtoya, amo nochipa kiampa kiyolmatki. Uelis kema tlauel amo kuali kiyolmatiyaya kiitak monekiyaya monechkauis ika Jehová. Kiampa tikijtouaj pampa ya kiiljuik: “Pero yonke ya ni nopantik, nochipa niitstok mouaya ta, Toteko, uan tinechitskitok ipan nomanejmak. Uan nijmati para motlamachtil kisenuikilis nechyakanas ipan nochi noyolis. Uan teipa, [tinechuikas, TNM] kampa tlayejyektsi” (Sal. 73:23, 24). Kema timokuesosej o amo kuali tijyolmatisej, nojkia moneki timotlatskilisej ipan Jehová katli techmanauia, pampa kiampa sampa kuali tijyolmatisej (Sal. 73:26; 94:18). ¿Uan tlaj se tonali tijtlauelkauaj Jehová pampa tijchiuaj se ueyi tlajtlakoli? Sampa uelis tijtekipanosej pampa ya ‘mokualtlalijtok para tetlapojpoljuis’ (Sal. 86:5). Uan kema tlauel amo kuali tijyolmatij moneki más timonechkauisej ika Jehová (Sal. 103:13, 14).
Tlaj tikitaj ayokmo kuali titlaneltokaj, moneki más timomaijtosej uan tiasej tlanechikoli, kiampa más timonechkauisej ika Jehová. (Xikita párrafo 17).
NOCHIPA MA TIMONECHKAUIKAJ IKA JEHOVÁ
18. ¿Kenke nochipa uelis tijnechkauisej Jehová?
18 Nochipa uelis tijnechkauisej Jehová uan tijmatisej sekinok tlamantli tlen ya, pampa Biblia kiijtoua “amo aka ueli kikuamachilia nochi iojui”, itlalnamikilis yon itlaixmatilis (Rom. 11:33).
19. ¿Kenijkatsa techpaleuia tlen kiijtoua ni Salmos?
19 Salmo 79:13 kiijtoua: “Tojuantij, timotlakauaj tlen tiitstokej keja timoborregojuaj, timitsueyichiuasej para nochi tonali uan timitspakilismakasej ika uikatl para nochipa”. Ximotemachi tlaj nochipa timonechkauijtias ika Jehová, ya nochipa mitsteochiuas, uan nojkia uelis tikijtos: “Yajaya kifuerzajmaka noyolo uan san yajaya noaxka para nochipa” (Sal. 73:26).
UIKATL 32 ¡Xiitsto inechka Jehová!
a Katli uejkajtok amo kuali kiyolmatij, motekipachouaj uan mokuesouaj, uelis monekis yasej ika se tepajtijketl. Uelis tikitas sekinok tlamachtili ipan Tlen Tematiltia, pilamochtsi 1, 2023.
