Nochi tiualauij tlen nopa achtoui tlakatl Adán, nopa kiijtosneki tielij tiiknimej. Uelis timoiljuisej katli itstokej ipan se kali kinamiki moiknelisej uan motlepanitasej, maske kiampa kinamiki ma kichiuakaj, ipan ni tonali maseualmej amo kiampa kichiuaj. ToTeotsij amo kipaktia kema kiampa kichiuaj.

“Xikikneli seyok keja ta moselti timoiknelia” (LEVÍTICO 19:18).

“Xikiniknelikaj inmokualankaitakauaj” (MATEO 5:44).

Ipan 1 Corintios 13:4-7 toTeotsij techiljuia kenijkatsa titeiknelisej.

Katli teiknelia “kipia iyolo ininuaya sekinok uan kinchiuilia tlen kuali”.

Ximoiljui ni: ¿Kenijkatsa tijyolmati kema se akajya kuali mitsnojnotsa, kipia iyolo, uan amo mitsajua kema timokuapoloua?

Katli teiknelia “axkineki tlen sekinok kipiaj”.

Ximoiljui ni: ¿Kenijkatsa tijyolmati kema se akajya amo motemachia ipan ta o kineki kipias tlen ta tijpia?

Katli teiknelia “axkamati san kej ueli”.

Ximoiljui ni: ¿Kenijkatsa tijyolmati kema se akajya kitlepanita tlen tikijtoua uan amo nochipa kineki ma mochiua tlen ya kiijtoua?

Katli teiknelia “axkichiuilia cuenta kema seyok kichiuilia tlen axkuali”.

Ximoiljui ni: ToTeotsij kineki kintlapojpoljuis katli moyolkuepaj. Amo kintlaijiljuia ajachika yon amo uejkaua kualantok (Salmo 103:9). Tlauel tijpatiitaj kema se akajya techtlapojpoljuia kema tikixpanoj. Yeka, tojuantij nojkia moneki tikintlapojpoljuisej katli techixpanoj (Salmo 86:5).

Katli teiknelia “axkema paki ika tlen axkuali”.

Ximoiljui ni: Kema techpano se tlamantli tlen amo kuali, amo tijnekij sekinok ma pakikaj ika tlen techpanok. Yeka, tojuantij nojkia amo ma tipakikaj kema sekinok kinpano tlen amo kuali maske techchiuilijkej tlen amo kuali.

Tlaj tijnekij toTeotsij ma techteochiua moneki tikiniknelisej sekinok maske amo sanse ininxiui, kampa ueli euaj o maske kipiaj seyok ininreligión. Tijnextiaj titeikneliaj kema tikinpaleuiaj katli kinpoloua se tlamantli.