¡Kena uelis tijkauas!

NAMA moneki timoyoltetilis uan tijchiuas tlen timoiljuijtok (1 Crónicas 28:10). ¿Tlake sekinok tlamantli uelis tijchiuas uan kiampa ayokmo titlachichinas?

Xikijkuilo kema ayokmo titlachichinas. Nopa Departamento de Salud y Servicios Humanos tlen Estados Unidos kiijtoua ipan ome semanas moneki xijtlapejpeni tlake tonali timosentlalijtok ayokmo titlachichinas. Kiampa nojua tijnekis tijchiuas tlen timosentlalik. Xikijkuilo nopa tonali ipan mocalendario, xikiniljui mouampoyouaj uan amo xijpatla nopa tonali kema timoiljuijtok tijkauas maske mopatlas kej tiitstok.

Xikijkuilo tlen mitspaleuis ayokmo titlachichinas. Ipan se amatl, xikijkuilo tlen kiijtoua tlatsintla uan sekinok tlamantli tlen timoiljuia mitspaleuis:

● Kenke ayokmo tijneki titlachichinas.

● Ininnúmero katli uelis tikinnojnotsas kema sampa tijnekis titlachichinas.

● Se keski tlamantli tlen uelis timoiljuis uan kiampa ayokmo titlachichinas, uelis tikijkuilos se keski textos kej Gálatas 5:22, 23.

Nochipa xijnemilti nopa amatl uan miakpa xijpoua ipan se tonali. Uan maske ayokmo titlachichinas, nojua xijpoua kema sampa tijnekis titlachichinas.

Ximoiljui tlake uelis tijchiuas achtoui. Kema ayamo asi nopa tonali kema timosentlalijtok ayokmo titlachichinas, xijpatla se keski tlamantli tlen ueliskia kichiuas sampa xitlachichina. Tlaj timomajtok tijtlatia mocigarro kema timeua, nama xijtlati kema panotok se hora ika timejki. O tlaj titlachichina kema titlakua o kema tlami titlakua, ayokmo kiampa xijchiua. Amo xia kampa tijmati tlachichinaj. Moselti xikompaui ni tlamantli uan chikauak xikijto: “Amo, tlaskamati, ayokmo nitlachichina”. Ni tlamantli amo san mitspaleuis ayokmo titlachichinas ipan nopa tonali kema timosentlalijtok, nojkia mitspaleuis xikilnamiki nechka ayokmo titlachichinas.

Sekinok tlamantli tlen nojkia mitspaleuis. Kema nechka asis nopa tonali tlen tikijkuilok, ximokoui se keski tlamantli tlen uelis tijkuas, kej zanahoria tlen kiuejuelojtokej, chicles, kakauatl uan sekinok tlamantli. Xikinilnamikili mouampoyouaj uan mochampoyouaj nopa tonali kema timosentlalijtok ayokmo titlachichinas uan xikiniljui kenijkatsa uelis mitspaleuisej. Kema nechka asis nopa tonali tlen tikijkuilok, xijtepeua nochi cigarros tlen tijpia ipan mochaj, ipan mocarro, ipan moyoyo, uan nojkia xijmajkaua kampa tijtlalia cigarros tlen ya tijchichintok, encendedores uan sekinok tlamantli tlen uelis kichiuas sampa xitlachichina. Nojua tlauel ouij tijmatis tijkouati se cigarro o tikiljuis se mouampo ma mitsmaka se, uan amo tlaj tijkixtis se cigarro kampa tikajoktok. Nojkia, xikiljui toTeotsij ma mitspaleui, uan nojua kiampa xijchiua kema ya timoiljuik ayokmo sampa titlachichinas (Lucas 11:13).

Tlauel miakej maseualmej ayokmo tlachichinaj maske achtouia moiljuiyayaj nopa cigarro eliyaya kejuak se kuali ininuampo pampa kiitakej kichiuayaya tlauel ma tlaijiyouikaj. Ta nojkia uelis ayokmo titlachichinas uan tikitas kenijkatsa tlauel tiyolpakis pampa cigarro ayokmo kejuak mitsnauatis. Uan nojkia ayokmo timokokos.

[Tlaixkopinkayotl]

Nochipa xijnemilti nopa amatl uan miakpa xijpoua ipan se tonali