ToTeotsij Jehová kinamiki kiijtos kenijkatsa timonejnemiltisej. Ya kiijtojtok uelis mokuisej o mosenkauasej san se tlakatl uan se siuatl uan kineki nochipa ma itstokaj sansejko (Mt 19:4-6, 9). Nojkia amo kineki ma tiauilnemikaj o ma tijchiuakaj tlen amo kinamiki iuaya se akajya katli amo toueue o tosiua (1Co 6:9, 10). Nojkia kiijtoua kenijkatsa kinamiki moyoyontisej itekipanojkauaj, kiampa amo nesisej sanse kej katli amo kitekipanouaj (Dt 22:5; 1Ti 2:9, 10).

Ipan ni tonali miakej maseualmej amo kinekij kineltokasej Jehová itlanauatiljuaj (Ro 1:18-32). Moyoyontiaj, mokualchijchiuaj uan monejnemiltiaj kej kiitaj sekinok kichiuaj. Uan yolpakij pampa auilnemij o momekatiaj, uan kinpinajtiaj katli amo kichiuaj kej inijuantij (1Pe 4:3, 4).

Jehová itlajtoltemakauaj moneki tijnextisej tijtlepanitaj Jehová itlanauatiljuaj maske sekinok amo kichiuaj (Ro 12:9). Tijnextiaj tijtlepanitaj toTeotsij itlanauatiljuaj kema ika kuali tikiniljuiaj sekinok tlen ya kipaktia uan kema timonejnemiltiaj kej ya technauatia. Kema tijtlapejpeniaj kenijkatsa timoyoyontisej uan timokualchijchiuasej, uelis timotlajtlanisej: “¿Nijtlepanita Jehová itlanauatiljuaj o tlen sekinok maseualmej kiijtouaj? ¿Kej ni nesi, nijnextia nijtekipanoua Jehová?”. O kema tijtlapejpenisej tlake tikitasej ipan televisión o tlake película tikitasej, moneki timotlajtlanisej: “¿Kiyolpakiltis Jehová tlen nikitas? ¿Kenijkatsa monejnemiltiaj katli nopaya nesij? ¿Uelis kichiuas ayokmo kuali ma nitlaneltoka? (Sl 101:3). Tlen ika nimoyolpakiltia, ¿kinpaleuis nochampoyouaj o sekinok maseualmej, o amo?” (1Co 10:31-33).

¿Kenke tlauel moneki tijnextisej tijtlepanitaj Jehová itlanauatiljuaj? Pampa Jesucristo nechka kintsontlamiltis katli amo kualmej uan nochi tlen amo kuali (Eze 9:4-7). Uan momanauisej san katli kineltokaj toTeotsij (1Jn 2:15-17). Yeka, nochipa ma tijtlepanitakaj toTeotsij itlanauatiljuaj, kiampa katli techitasej kiueyichiuasej toTeotsij (1Pe 2:11, 12).

ACHTOUI XIKITA NOPA VIDEO XIMOUAMPOJCHIUA IUAYA JEHOVÁ: SE TLAKATL UAN SE SIUATL, UAN TEIPA XIJNANKILI NI TLAJTLANILI:

• ¿Kenke tlauel kuali tijtlepanitasej Jehová itlanauatiljuaj?

• ¿Kenke tetajmej moneki kinmachtisej ininkoneuaj tlen Jehová tlanauatia kema nojua pilsiltsitsij?

• ¿Kenijkatsa telpokamej uan katli ya uejueyij uelis kinpaleuisej maseualmej ma kiixmatikaj toTeotsij katli kipia kuali iyolo?