Tlen kiijkuilok Lucas 24:1-53
24 Ipan nopa achtoui tonali kema peua semana, nopa siuamej yajkej tlauel ijnalok kampa mijkaostotl. Kiuikayayaj nopa pilxiuitsitsij tlen ajuiyak mijyotiyaya tlen kikualchijchijtoyaj.
2 Pero kiitakej kimimilojtoyaj nopa tetl tlen ika kitsaktoyaj nopa mijkaostotl,
3 uan kema kalajkej amo kipantijkej itlakayo toTeko Jesús.
4 Kema nopa siuamej nojua moiljuiyayaj tlake panotoya, monextijtiuetsikoj omej tlakamej uan ininyoyo petlaniyaya.
5 Nopa siuamej momajmatijkej uan mopachojkej. Uajka nopa tlakamej kiniljuijkej: “¿Kenke inkitemouaj kampa mijkatsitsij katli ya yoltok?
6 Amo itstok nikaj: ya moyolkuik.* Xikilnamikikaj tlen inmechiljuik kema nojua itstoya Galilea.
7 Inmechiljuik katli eli iKone se Maseuali* monekiyaya kitemaktilisej ininmako tlajtlakolchiuanij uan kimiktisej ipan se kuauitl, pero ipan eyi tonali monekiyaya moyolkuis”.
8 Uajka inijuantij kiilnamijkej tlen kiijtojtoya,
9 uan kistejkej tlen nopa mijkaostotl uan kinpouilijkej nopa 11 apóstoles uan sekinok maseualmej nochi tlen panotoya.
10 Eliyayaj María Magdalena, Juana uan María inana Santiago. Nojkia nopa sekinok siuamej katli itstoyaj ininuaya kinpouiliyayaj apóstoles ni tlamantli.
11 Pero inijuantij moiljuiyayaj san istlakatiyayaj uan amo kinneltokilijkej.
12 Uan Pedro moketski uan motlalok kampa mijkaostotl, uan kema mopachok para tlachias iijtik, san kiitak nopa linoyoyomitl. Yeka motlatsintokilijtiajki tlake panotoya.
13 Uan ipan nopa tonali, omej itokilijkauaj nejnentiauiyayaj para se pilaltepetsi tlen kiiljuiaj Emaús, tlen mokaua se 11 kilómetros* iuejkaka tlen Jerusalén.
14 Mokamanaljuijtiauiyayaj ika nochi tlen panotoya.
15 Kema mokamanaljuijtiauiyayaj uan kiijtojtiauiyayaj ni tlamantli, Jesús monechkauik uan pejki nejnemi ininuaya,
16 pero inijuantij amo uelkej kiixmatij.
17 Ya kintlatsintokik: “¿Tlake inmokamanaljuijtiauij?”. Inijuantij moketskej uan ipan ininxayak nesiyaya mokuesouayayaj.
18 Uan katli motokaxtiyaya Cleopas, kinankilik: “¿Sejkanok* tieua uan moselti tiitstok ipan Jerusalén, yeka amo tijmati* tlen panotok nopaya ipan ni tonali?”.
19 Ya kintlatsintokik: “¿Tlake panotok?”. Inijuantij kinankilijkej: “Tlen panok ika Jesús katli euayaya Nazaret, katli ininixpa Dios* uan maseualmej, kinextik eliyaya se teokamanalojketl* katli kipia chikaualistli ika tlen kichijki uan ika tlen kiijtok.
20 Tosacerdotes katli kipiaj tlanauatili uan tekichiuanij kitemaktilijkej para ma kimiktikaj uan kilavosminkej ipan se kuauitl.
21 Tojuantij timoiljuiyayaj ya kimakixtiskia altepetl Israel. Uan nama ya kipia eyi tonali ika panok nochi ni tlamantli.
22 Uan nojkia se keskij siuamej katli itstokej touaya kichijkej tlauel ma timosentlachilikaj, pampa tlauel ijnalok yajkej kampa mijkaostotl
23 uan amo kipantijkej itlakayo, yeka ualajkej tepouilikoj kinitstoyaj se keskij ángeles katli monextijkej uan kiijtouayayaj Jesús yoltok.
24 Uajka se keskij katli itstoyaj touaya yajkej kampa mijkaostotl uan kipantijkej nochi kej nopa siuamej kiijtojtoyaj. Pero amo kiitakej Jesús”.
25 Uan ya kiniljuik: “¡Tlauel inuiuitikej uan amo nima inkineltokaj* nochi tlen teokamanalouanij kiijtojkej!
26 ¿Amo kinamikiyaya nopa Cristo ma kiijiyoui nopa tlamantli para kalakis kampa kiuejkapantlaliskiaj?”.
27 Uajka pejki ika tlen kiijkuilok Moisés uan nochi Teokamanalouanij, uan kinixtomilik nochi tlen iTlajkuilol Dios kiijtoua tlen ya.
28 Kema asitoj ipan nopa pilaltepetsi kampa yauiyayaj, Jesús tlachijki kejuak yauiyaya achi uejka.
29 Pero inijuantij miakpa kiiljuijkej ma mokaua. Kiiljuiyayaj: “Ximokaua touaya pampa ya nechka tlatlayouas uan Tonati nechka kalakis”. Uajka kalajki uan mokajki ininuaya.
30 Kema tlakuayayaj sansejko kikuik se pantsi, kichijki se tlamaijtoli,* kitlajkoitak uan pejki kinmajmaka.
31 Uajka kejuak motlapok ininixteyol uan kiixmatkej; pero yaya ixpolijki.
32 Uan moiljuijkej: “¿Amo tijmachiliyayaj kualtsi ipan toyolo kema techkamanaljuijtiualayaya ipan ojtli, kema kuali techixtomiliyaya iTlajkuilol Dios?”.
33 Ipan nopa tlalochtli* moketskej uan tlakuepilijkej Jerusalén kampa kinitakej nopa 11 apóstoles uan katli mosentilijtoyaj ininuaya,
34 katli kiijtouayayaj: “¡Temachtli toTeko moyolkuik uan monextik iixpa Simón!”.
35 Uajka inijuantij tepouilijkej tlen panotoya ipan ojtli uan kenijkatsa kiixmatkej kema kitlajkoitak pantsi.
36 Kema nojua mokamanaljuiyayaj tlen ni tlamantli, Jesús monextik tlatlajko kampa itstoyaj uan kiniljuik: “Xijpiakaj tlaseuilistli”.
37 Pero mosentlachilijkej uan momajmatijkej, pampa moiljuiyayaj kiitayayaj se ángel.*
38 Yeka kiniljuik: “¿Kenke inmomajmatiaj? ¿Kenke inmoiljuijtokej tlaj nelia na o amo?
39 Xikitakaj nomax uan noikxi: na nieli. Xinechitskikaj uan xikitakaj, pampa se ángel amo kipia inakayo yon iomiyo, kej inkiitaj nijpia”.
40 Kema kiijtok nopa, kinnextilik imax uan iikxiuaj.
41 Pero inijuantij ayamo kineltokayayaj pampa tlauel yolpaktoyaj uan mosentlachilijtoyaj, yeka kintlatsintokik: “¿Inkipixtokej se tlenijki tlen uelis nijkuas?”.
42 Inijuantij kimakakej se achi michij tlakakatsoli.
43 Ya kikuik uan kikuajki ininixpa.
44 Uan kiniljuik: “Ya ni tlen niinmechiljuik kema nojua niitstoya inmouaya: nochi tlen ijkuilijtok tlen na ipan iTlanauatil Moisés, ipan Teokamanalouanij uan ipan Salmos monekiyaya moaxitis”.
45 Uajka kintlapouilik inintlalnamikilis para ma kikuamachilikaj tlake kiijtosneki iTlajkuilol Dios
46 uan kiniljuik: “Ya ni tlen ijkuilijtok: Cristo tlaijiyouiskia uan moyolkuiskia ipan eyi tonali,
47 uan ipan itoka tematiltiskiaj ipan nochi altepemej ma moyolkuepakaj para ma kintlapojpoljuikaj inintlajtlakoljuaj, uan peuaskiaj ipan Jerusalén.
48 Inmojuantij moneki inelisej testigos* tlen ni tlamantli.
49 Uan xijmajtokaj, nijtitlanis ipan inmojuantij tlen noTata kitenkajki. Pero ximokauakaj ipan ni altepetl hasta kema inkiselisej nopa chikaualistli tlen uala iluikak”.
50 Uajka kinuikak hasta altepetl Betania, uan momatlananki uan kinteochijki.
51 Kema kinteochiuayaya, kinkajtejki uan yajki iluikak.
52 Inijuantij motlankuaketskej iixpa uan tlakuepilijkej Jerusalén ika miak pakilistli.
53 Uan nochipa itstoyaj ipan teokali kiueyichiuayayaj Dios.
Tlen ijkuilijtok tlatsintla
^ Ika griego “motlanantok”.
^ Xikita katli eli iKone se Maseuali.
^ Ika griego “60 estadios”. Se estadio eliyaya 185 metros.
^ Kanajya kiijtouaj “oksejko”, “sejkoyok”.
^ O uelis “tieli iyojtsi tepaxalojketl ipan Jerusalén katli amo kimati”.
^ Kanajya kiijtouaj “toTeotsij”.
^ O “profeta”.
^ O “inmoyolo ika yolik kineltoka”.
^ Kanajya kiijtouaj “netlatlajtili”.
^ Kanajya kiijtouaj “tlatoktsi”.
^ Ika griego “espíritu”.
^ O “intematiltisej”.
