Tlen kiijkuilok Lucas 10:1-42
-
Jesús kintitlani nopa 70 itokilijkauaj (1-12)
-
Kiniljuia amo kuali tlen kichijkej pampa amo moyolpatlakej (13-16)
-
Nopa 70 tlakuepiliaj (17-20)
-
Jesús kiueyichiua iTata pampa kinteochiua katli amo moueyimatij (21-24)
-
Neskayotl tlen nopa samariaejketl katli kipia kuali iyolo (25-37)
-
Jesús kinpaxaloua Marta uan María (38-42)
10 Kema panok ni tlamantli, toTeko kintlapejpenik sekinok 70 uan kintitlanki ojomej ma tlayakantiakaj ipan nochi altepemej uan pilaltepetsitsij kampa ya nojkia yaskia.
2 Uajka kiniljuik: “Nelia onka miak pixkistli, pero amo itstokej miakej pixkanij. Yeka, xijtlajtlanikaj katli iAxka nopa mili ma kintitlani sekinok pixkanij.
3 ¡Xiakaj! Xikitakaj, niinmechtitlani kej pilborregojtsitsij kampa itstokej lobos.
4 Amo xijuikakaj kampa inkiajokuij tomij yon kuetlaxmorral kampa inmotlatejtemilisej yon inmohuaraches, uan amo aka xijtlajpalokaj* ipan ojtli.
5 Kema inmechselisej ipan se kali, achtoui xikijtokaj: ‘Xijpiakaj tlaseuilistli katli nikaj initstokej’.
6 Uan tlaj nopaya itstok se akajya katli kitemoua tlaseuilistli, nopa tlaseuilistli tlen inkiiljuijkej mokauas iuaya. Pero tlaj amo kineki, nopa tlaseuilistli mokuepas inmouaya.
7 Yeka ximokauakaj ipan nopa kali uan xijkuakaj uan xikikaj* tlen inmechmakasej, pampa se tekitiketl kinamiki kiselis itlaxtlauil. Amo san xijpajpatlakaj kampa inmokauaj.
8 ”Nojkia, kema inkalakisej ipan se altepetl uan inmechselisej, xijkuakaj tlen inmechmakasej,
9 uan xikinchikauakaj kokoyanij katli nopaya itstokej uan xikiniljuikaj: ‘ITlanauatijkayo Dios monechkauijtok kampa inmojuantij’.
10 Pero kema inkalakisej ipan se altepetl uan amo inmechselisej, xikisakaj ipan ueyi ojtli uan xikijtokaj:
11 ‘Para inkiitasej amo kuali tlen inkichijtokej, timoikxitsejtselouaj para ma tepeui tlaltejpoktli* tlen inmoaltepe tlen tlatskik ipan toikxi. Pero xijmatikaj ni: iTlanauatijkayo Dios monechkauijtok’.
12 Niinmechiljuia, ipan nopa tonali más ouij kimatisej inijuantij que katli itstoyaj ipan Sodoma”.
13 ”¡Inteikneltikej katli initstokej ipan Corazín uan Betsaida! Pampa tlaj nopa milagros tlen mochijki kampa inmojuantij mochijtoskia ipan Tiro uan Sidón, nima moyolpatlatoskiaj, moseuijtoskiaj uan motlalilijtoskiaj yoyomitl tlen uapaktik* uan motemilijtoskiaj kuajnextli.
14 Yeka, ipan nopa Tonali kema Dios* teTlajtolsenkauas, más chikauak inmechtlajtolsenkauasej que Tiro uan Sidón.
15 Uan inmojuantij katli initstokej ipan Capernaúm, ¿inmoiljuiaj inmechuejkapantlalisej hasta iluikak? ¡Inmojuantij intemosej hasta Mijkaostotl!*
16 ”Katli inmechtlakakilia nojkia nechtlakakilia, uan katli inmechuejkamajkaua nojkia nechuejkamajkaua. Uan katli nechuejkamajkaua nojkia kiuejkamajkaua katli nechtitlanki”.
17 Uajka nopa 70 tlakuepilijkej yolpaktokej uan kiiljuijkej: “ToTeko, hasta amo kuali ajakamej* techneltokaj kema tijtekiuiaj motoka”.
18 Uan Jesús kiniljuik: “Nikita Satanás ya uetstok kej kema uetsi se tlapetlanilotl tlen iluikak.
19 Xikitakaj, niinmechmakatok tlanauatili para inmokejketsasej ipan kouamej* uan kolomej, uan para inkitlanisej nochi ichikaualis tokualankaitaka. Uan amo tleno uelis inmechchiuilis tlen amo kuali.
20 Pero amo xipakikaj pampa amo kuali ajakamej inmechneltokaj, xipakikaj pampa inmotoka ijkuilijtok ne iluikak”.
21 Ipan nopa tlalochtli, ichikaualis Dios* kichijki tlauel ma yolpaki uan kiijtok: “Nimitsuejkapantlalia ininixpa sekinok, noTata, toTeko katli tijnauatia iluikaktli uan Tlaltipaktli, pampa kuali tikintlatilijtok nochi ni tlamantli katli ixtlamatij uan tlalnamikij, uan tikinnextilijtok katli elij kej konemej. Kena noTata, pampa ta tikitstok kuali kiampa tijchiuas”.
22 Nojkia kiijtok: “NoTata nechmaktilijtok nochi tlamantli. San noTata kuali kimati ajkia nieli. Uan san na* kuali nijmati ajkia eli noTata, uan nojkia katli na nijnekis nijnextilis ajkia eli ya”.
23 Uajka, Jesús moikankuepki* kampa itokilijkauaj uan iyoka kiniljuik: “Yolpakij katli kiitaj tlen inmojuantij inkiitaj.
24 Pampa niinmechiljuia, miakej teokamanalouanij* uan tlanauatianij kinejkej kiitasej tlen inmojuantij inkiitaj, pero amo kiitakej, uan kikakisej tlen inmojuantij inkitlakakilijtokej, pero amo kikajkej”.
25 Uajka, se tlakatl katli kuali momachtijtoya iTlanauatil Moisés moketski pampa kinekiyaya kiitas tlaj kena nelia kimatiyaya, uan kitlatsintokik: “Tlamachtijketl, ¿tlake moneki nijchiuas para nijpias nemilistli tlen amo kema tlamis?”.*
26 Ya kiiljuik: “¿Tlake ijkuilijtok ipan iTlanauatil Moisés? ¿Kenijkatsa tijkuamachilia?”.
27 Nopa tlakatl kinankilik:“ ‘Xikikneli Jehová* moDios ika nochi moyolo, ika nochi monemilis,* ika nochi mochikaualis uan ika nochi motlalnamikilis’ uan ‘xikinikneli sekinok kej ta timoiknelia’”.
28 Jesús kiiljuik: “Kuali titlanankilik; nojua xijchijto nopa uan nochipa tiitstos”.
29 Pero, nopa tlakatl kinekiyaya kinextis kichiua tlen kuali, yeka kitlatsintokik Jesús: “Uan, ¿ajkia moneki nikiknelis?”.
30 Jesús kinankilik: “Se tlakatl ixtemoyaya tlen Jerusalén para asiti Jericó uan kitlachtekilijkej, kikuilijkej hasta iyoyo uan kimakilijkej, uan nechka kimiktiskiaj.
31 Uan se sacerdote ixtemoyaya ipan nopa ojtli, pero kema kiitak, san kipanok uan neka yajki.
32 Nojkia kema se levita panok nopaya, san kiitak, kipanok uan neka yajki.
33 Pero se samariaejketl katli panoyaya ipan nopa ojtli, asito kampa itstoya nopa tlakatl uan kema kiitak, tlauel kiteikneltiitak.*
34 Uajka kinechkauik, kitlalilik aceite uan vino kampa kokojtoya, uan kiuijkonki. Teipa kitlejkoltik ipan itlapial, kiuikak kampa tepalkochij* uan kimokuitlauik.
35 Ika ualmostla* kikixtik ome denarios* uan kimakak katli iaxka kampa tepalkochij, uan kiiljuik: ‘Xijmokuitlaui, uan tlaj monekis más tomij, nimitsmakas kema nitlakuepilis’.
36 ¿Ajkia tlen nopa eyij timoiljuia kinextik kiiknelia katli kitlachtekilijkej?”.
37 Ya kinankilik: “Katli kitlasojtlak”. Uajka Jesús kiiljuik: “Xia uan nojkia kiampa xijchiua”.
38 Kema nojua yauiyayaj ipan ojtli, Jesús kalajki ipan se pilaltepetsi. Nopaya se siuatl katli motokaxtiyaya Marta kiselik ichaj.
39 Ya kipixtoya se isiuaikni katli motokaxtiyaya María, katli moseuik iikxitla toTeko uan kitlakakilijtoya tlen kiijtouayaya.
40 Pero Marta tlauel motekiuijtoya ika miak tlamantli. Yeka kinechkauik Jesús uan kiiljuik: “NoTeko, ¿amo kenijki tikita para noikni nechkajtok noselti ma nijchiua nochi? Xikiljui ma uala uan ma nechpaleui”.
41 ToTeko kinankilik: “Marta, Marta, timokuatotonijtok uan timotekipachojtok ika miak tlamantli,
42 pero amo moneki tijchiuasej miak tlamantli, uelis san setsi. María kitlapejpenijtok tlen más kuali uan amo kikixtilisej”.
Tlen ijkuilijtok tlatsintla
^ O “amo aka xijnajnauakaj kema inkitlajpalosej”.
^ Kanajya kiijtouaj “xikijikaj”.
^ Kanajya kiijtouaj “tlalpopoxtli”, “tlalkuanextli”.
^ Kanajya kiijtouaj “chachatik”. Kiampa momajtoyaj moyoyontiaj kema tlauel mokuesouayayaj.
^ Kanajya kiijtouaj “toTeotsij”.
^ O “Hades”. Eli kampa kejuak kochtokej nochi katli miktokej. Xikita Mijkaostotl.
^ O “demonios”.
^ Kanajya kiijtouaj “okuilimej”.
^ O “espíritu santo”.
^ Ika griego “iKone”.
^ O “ikantlachixki”.
^ O “profetas”.
^ O “niitstos nochipa”.
^ Kanajya kiijtouaj “kitlayokoltik”.
^ O “kampa kochiyayaj paxalouanij”.
^ Kanajya kiijtouaj “Mostlaijki”, “Kema tonilik”.
