Tlen kiijkuilok Juan 16:1-33
16 ”Niinmechiljuijtok ni tlamantli, kiampa nojua kuali intlaneltokatosej.
2 Inmechkixtisej kampa tlaueyichiuaj judíos. Kena, monechkauia nopa hora kema nochi katli inmechmiktisej moiljuisej kitekipanouaj Dios.*
3 Pero kichiuasej nochi ni pampa amo kiixmatij noTata yon nechixmatij.
4 Niinmechiljuijtok ni tlamantli, kiampa kema asis hora para panos, xikilnamikikaj niinmechiljuik.
”Amo niinmechiljuijtoya ni tlamantli achtouia, pampa niitstoya inmouaya.
5 Pero nama nia kampa itstok katli nechualtitlanki, uan yon se tlen inmojuantij nechtlatsintokia ‘¿Kanke tia?’.
6 Inmojuantij tlauel inmoyolkuesojtokej pampa niinmechiljuik ni tlamantli.
7 Pero niinmechiljuia tlen melauak: tlaj nias inmechpaleuis. Pampa tlaj amo nias, nopa tlapaleuijketl amo ualas kampa inmojuantij; pero tlaj nias, na niinmechtitlanilis.
8 Uan kema ualas, xitlauak kinnextilis inintlajtlakol katli itstokej ipan Tlaltipaktli, kinnextilis nijchiua tlen xitlauak uan ajkia kinamiki kitlajtolsenkauasej.
9 Achtoui kinnextilis inintlajtlakol, pampa inijuantij amo tlaneltokaj ipan na;
10 teipa kinextis para nijchiua tlen xitlauak, pampa nia kampa noTata uan inmojuantij ayokmo innechitasej,
11 uan teipa kinextis ajkia kinamiki kitlajtolsenkauasej, pampa katli tlanauatia ipan ni Tlaltipaktli ya kitlajtolsenkajtokej.
12 ”Nojua onka miak tlamantli tlen ueliskia niinmechiljuis, pero nama eliskia tlauel miak para inmojuantij.
13 Pero kema ualas ichikaualis Dios* tlen tematiltia tlen melauak, inmechyakanas para kuali xijkuamachilikaj nochi tlen melauak, pampa amo kiijtos san tlen ya kineki, kiijtos tlen kikakis uan inmechmatiltis tlen nechka panos.
14 Ichikaualis Dios nechuejkapantlalis pampa kiselis tlen eli noaxka uan inmechmatiltis.
15 Nochi tlen noTata kipixtok, nojkia noaxka. Yeka nikijtok kiselis tlen noaxka uan inmechmatiltis.
16 San kentsi tonali poliui uan ayokmo innechitasej, pero nojkia amo miak tonali poliui uan innechitasej”.
17 Kema se keskij itokilijkauaj kikajkej, motlatsintokijkej: “¿Tlake kineki techiljuis kema kiijtoua ‘San kentsi tonali poliui uan ayokmo innechitasej, pero nojkia amo miak tonali poliui uan innechitasej’? ¿Uan kema kiijtok ‘Pampa nia kampa noTata’?”.
18 Inijuantij kiijtouayayaj: “¿Tlake kineki kiijtos kema kiijtoua ‘San kentsi tonali poliui’? Amo tijmatij kenke kiampa kiijtoua”.
19 Jesús kimatiyaya kinekiyayaj kitlatsintokisej, yeka kiniljuik: “¿Inmotlatsintokilijtinemij se ika seyok pampa nikijtok ‘San kentsi tonali poliui uan ayokmo innechitasej, pero nojkia amo miak tonali poliui uan innechitasej’?
20 Nelnelia niinmechiljuia, inmojuantij inchokasej uan inmoyolkuesosej, pero maseualmej yolpakisej; inmojuantij intlaijiyouisej, pero teipa inyolpakisej.
21 Kema se siuatl kipia ipilkone, tlauel kuajkualo pampa ya asik hora. Pero kema ya kipia ipilkone, yolpaki pampa tlakatki se maseuali uan nopa kichiua ma kiilkaua nochi tlakuajkualojkayotl.
22 Nojkia kiampa pano ika inmojuantij. Nama tlauel inmoyolkuesouaj; pero na sampa niinmechitas, uan tlauel inyolpakisej uan amo aka uelis kichiuas amo xiyolpakikaj.
23 Uan ipan nopa tonali amo tleno innechtlatsintokisej. Nelnelia niinmechiljuia, tlaj inkitlajtlaniaj noTata tlen ueli tlamantli ipan notoka, ya inmechmakas.
24 Hasta nama amo intlajtlantokej yon se tlamantli ipan notoka. Xitlajtlanikaj uan inkiselisej, kiampa senkistok inyolpakisej.
25 ”Niinmechiljuijtok ni tlamantli ika neskayotl. Monechkauia nopa hora kema ayokmo niinmechmachtis ika neskayotl, uan xitlauak niinmechkamanaljuis tlen noTata.
26 Ipan nopa tonali inkitlajtlanisej noTata se tlenijki ipan notoka. Ika ni amo nijneki nikijtos na nijtlajtlanis por inmojuantij.
27 Pampa noTata inmechiknelia pampa innechiknelijtokej uan inkineltokatokej yaya nechualtitlanki.
28 Niualajki ipan Tlaltipaktli pampa noTata nechtitlanki. Nama nijkaua ni Tlaltipaktli uan nia kampa noTata”.
29 Itokilijkauaj kiiljuijkej: “Nama kena xitlauak tikamanalti uan amo tijtekiuia neskayotl.
30 Nama tikitaj ta nochi tijmati uan amo moneki se akajya ma mitstlatsintoki. Yeka tijneltokaj Dios mitstitlanki”.
31 Jesús kinnankilik: “¿Nama inkineltokaj?
32 Xijkakikaj ni. Monechkauia hora, nelia, ya asiko, kema inmosemanasej.* Sejse tlen inmojuantij yas ichaj uan innechkajteuasej noselti. Maske amo noselti niitstok, pampa noTata itstok nouaya.
33 Niinmechiljuijtok ni tlamantli para xijpiakaj tlaseuilistli ipan na. Ipan Tlaltipaktli inkipiasej tlaijiyouilistli. Pero, ¡amo ximajmauikaj!, na nijtlantok tlen amo kuali tlen onka ipan Tlaltipaktli”.
Tlen ijkuilijtok tlatsintla
^ Kanajya kiijtouaj “toTeotsij”.
^ O “espíritu santo”.
^ Kanajya kiijtouaj “kampa ueli inyasej”.
