Hechos (Tlen apóstoles kichijkej) 6:1-15
6 Ipan nopa tonali kema momiakilijtiauiyayaj tlaneltokanij, judíos katli kamanaltiyayaj griego pejkej kintlateljuiaj judíos katli kamanaltiyayaj hebreo, pampa siuamej katli kamanaltiyayaj griego uan ya miktoya ininueue amo kinmakayayaj tlakualistli tlen temajmakayayaj mojmostla.
2 Uajka nopa 12 apóstoles kinsentilijkej nochi Jesús itokilijkauaj uan kiniljuijkej: “Amo kinamiki tijkauasej titlamachtisej itlajtol Dios san para titemajmakasej tlakualistli.
3 Yeka noikniuaj, xikintlapejpenikaj kampa inmojuantij chikomej tlakamej katli kintlepanitaj, katli kipiaj ichikaualis Dios* uan tlalnamikij, para uelis tikintekimakasej ma kiyakanakaj ni tekitl.
4 Uan tojuantij timosentlalisej timomaijtosej* uan titlamachtisej itlajtol Dios”.
5 Nochi Jesús itokilijkauaj kinpaktik tlen kiijtojkej. Yeka kintlapejpenijkej Esteban, se tlakatl katli kuali tlaneltokayaya uan kipixtoya ichikaualis Dios, uan nojkia Felipe, Prócoro, Nicanor, Timón, Parmenas uan Nicolás, katli mochijtoya judío uan euayaya Antioquía.
6 Teipa kinuikakej kampa apóstoles, uan inijuantij momaijtojkej uan kitlalijkej ininmax ininpani.
7 Ika tlen kichijkej, itlajtol Dios nojua momoyajtiajki, uan ipan Jerusalén nojua tlauel momiakilijtiajkej Jesús itokilijkauaj. Uan miakej sacerdotes pejkej tlaneltokaj.
8 Esteban, katli Dios* kuali kiitayaya uan kimakatoya chikaualistli,* kichiuayaya uejueyi milagros* uan uejueyi tlamantli ininixpa maseualmej.
9 Pero se keskij tlakamej katli kiniljuiyayaj Majkajtokej, uan nojkia se keskij katli euayayaj Cirene, Alejandría, Cilicia uan Asia, pejkej kikamaijixnamikij Esteban.
10 Pero amo ueliyayaj kitlanij pampa kamanaltiyaya ika miak tlalnamikilistli uan Dios kipaleuiyaya ika ichikaualis.*
11 Uajka ichtakatsi kichijkej se keskij tlakamej ma kiijtokaj: “Tijkajkej kinixpanok Moisés uan Dios ika tlen kiijtok”.
12 Uan kiampa kichijkej ma kualanikaj maseualmej, uan nojkia katli kinyakanaj judíos uan escribas.* Uan asitiuetsitoj kampa itstoya Esteban, kiitskijkej ika kualantli uan kiuikakej kampa Tekichiuanij katli kipiaj más Tlanauatili.*
13 Nopaya kinuikakej testigos katli san istlakatiyayaj uan kiijtojkej: “Ni tlakatl kisentlaijiljuijtok ni teokali uan iTlanauatil Moisés.
14 Tijkaktokej kiijtoua nopa Jesús katli eua Nazaret kiuelonis* ni teokali tlen iaxka Dios uan kipatlas nopa tlanauatili tlen Moisés techkauilijtejki”.
15 Uan nochi katli moseuijtoyaj kampa mosentiliaj Tekichiuanij katli kipiaj más Tlanauatili,* kiixtlachilijkej Esteban uan kiitakej ixayak nesiyaya kej ixayak se ángel.
Tlen ijkuilijtok tlatsintla
^ O “espíritu santo”.
^ Kanajya kiijtouaj “timotlatlajtisej”.
^ Kanajya kiijtouaj “toTeotsij”.
^ Kanajya kiijtouaj “tetikayotl”.
^ Ika griego “tlaneskayotl”.
^ O “iespíritu”.
^ O “kixoleuas”.
