Nopa carta tlen kintitlanilijkej Cristo itokilijkauaj tlen Colosas 2:1-23
2 Pampa nijneki xikitakaj nijchijtok kampeka niinmechpaleuis inmojuantij, uan nojkia katli itstokej ipan altepetl Laodicea uan nochi katli ayamo nechitstokej.
2 Na nimosentlalijtok nikinyolchikauas uan nijneki nochi ma itstokaj sansejko ika tlaiknelili. Kiampa uelis kipiasej miak tlateochiualistli pampa itstokej temachmej ipan nochi tlen kikuamachiliaj, para uelis kuali kimatisej nopa tlamantli tlen Dios* ayamo tematiltijtoya,* tlen eli Cristo.
3 Ika ya uelis tijpantisej nochi nopa tlalnamikilistli uan ixtlamatili, tlen kuali motlatijtok* kej se tlamantli tlen patiyo.
4 Nikijtoua nopa para amo aka ma inmechkajkayaua ika tlalnamikilistli tlen teyoltilana.
5 Maske amo niitstok inmouaya, ika notlalnamikilis* kejuak niitstoskia nopaya, uan niyolpaki pampa nikita inkichiuaj nochi kej kinamiki uan kuali intlaneltokaj ipan Cristo.
6 Uajka, sanse kej inkiselijtokej toTeko Cristo Jesús, nojua xinemikaj iuaya.
7 Sanse kej inmechmachtijtokej, inmotlaneltokilis ipan Cristo moneki inmechchiuas intetikej uan intemachmej kej se kuauitl tlen uejkatla moneljuayotijtok, moneki nojua tlauel kuali xitlaneltokatokaj ipan ya uan nochipa xijtlaskamatilikaj Dios.
8 Ximomokuitlauikaj para amo aka ma inmechmasilti ika tlalnamikilistli uan tlamachtili tlen amo melauak uan amo tlapaleuia pampa kisa ipan tlen maseualmej momajtokej kichiuaj, ipan tlamantli tlen onka ipan ni Tlaltipaktli uan amo ipan Cristo.
9 Pampa ipan ya senkistok monextia kenijkatsa eli Dios.
10 Uajka inmojuantij inkipiaj nochi uan amo tleno inmechpoloua ika Cristo, katli eli más ueyi* que nochi tekiuejkayotl uan nochi katli kipiaj tlanauatili.
11 Uan pampa intlaneltokaj ipan ya, inmechchiuilijkej se circuncisión* pero amo kej maseualmej kichiuaj, inmechchiuilijkej se circuncisión kej mochiuiliaj Cristo itokilijkauaj, tlen kiijtosneki tijtlauelkauasej tlen kiyoltilana totlakayo para ma tlajtlakolchiua.
12 Pampa inmojuantij inmechtlalpachojkej* iuaya kema inmoatsonpoliuiltijkej sanse kej ya, uan kuali inmouikaj iuaya, yeka nojkia inmoyolkuikej iuaya pampa intlaneltokaj ipan tlen mochijki ika iueyichikaualis Dios, katli kiyolkuik Cristo.
13 Nojkia, maske inmojuantij initstoyaj kejuak inmiktokej pampa intlajtlakolchijtoyaj uan pampa amo inmechchiuilijtoyaj circuncisión,* Dios inmechmakak nemilistli iuaya Cristo. Techtlapojpoljuik nochi totlajtlakoljuaj ika nochi iyolo
14 uan kiixpolok nopa amatl kampa ijkuilijtoya miak piltlanauatiltsitsij tlen kinextia titlajtlakolejkej. Dios kiijkuinik kema Cristo kikuapilojkej ipan nopa kuauitl kampa kitlaijiyouiltijkej.*
15 Uan ika nopa,* kinkixtilik nochi tlen ika momanauiyayaj tlanauatianij uan tekichiuanij, uan ininixpa miakej kinuikak kejuak ipan se marcha* para kinextis kintlantoya.
16 Uajka, amo aka ma inmechtlaijiljui ika tlen inkikuasej uan inkiisej,* o pampa iniljuichiuaj o inkitlepanitaj kema moyankuilia metstli o se sábado.*
17 Nopa tlamantli san eliyaya kej se ekauili* tlen kiixnextiyaya tlen ualaskia teipa, pero nochi nopa moaxitia ipan Cristo.
18 Amo xijkauakaj yon se maseuali katli san tlachiua moechkapanoua* uan kipaktia kinueyichiuas ángeles ma inmechtsakuili para inkiselisej nopa tlateochiualistli. Nopa maseualmej “tlauel kimanauiaj” tlen kiitstokej. Moiljuiaj san ipan tlen kiyoltilana inintlakayo ma tlajtlakolchiua, yeka tlauel moueyimatij maske amo kinamiki kiampa kichiuasej,
19 uan amo kitokiliaj katli eli kej inintsonteko, Cristo, katli kimaka itlakayo nochi tlen moneki, kichiua nochi ipartes kuali ma mosalokaj, uan kichiua ma moskalti ika nopa tetikayotl tlen uala tlen Dios.
20 Tlaj inmojuantij kejuak inmijkej iuaya Cristo pampa ayokmo inkitokiliaj tlen onka ipan ni Tlaltipaktli, ¿kenke inmonejnemiltiaj kejuak nojua ineliskiaj kej katli itstokej ipan Tlaltipaktli? ¿Kenke nojua inkitokiliaj nopa tlanauatili tlen kiijtoua
21 “amo xijkui, amo xijkua,* amo xikitski”?
22 Nochi nopa tlanauatili kiijtosneki tlamantli tlen tlami kema motekiuiaj. San eli inintlanauatil uan inintlamachtil maseualmej.
23 Maske nopa tlanauatili nesi tlauel tlapaleuia para ma kipiakaj tlalnamikilistli, yon kentsi kinpaleuia para ayokmo ma kichiuakaj tlen kinyoltilana, pampa ininseltitsitsij kitlapejpeniaj kenijkatsa tlaueyichiuasej, san tlachiuaj moechkapanouaj uan chikauak kitlaijiyouiltiaj inintlakayo.
Tlen ijkuilijtok tlatsintla
^ Kanajya kiijtouaj “toTeotsij”.
^ Xikita tlen Dios ayamo tematiltia.
^ Kanajya kiijtouaj “miyantok”.
^ Ika griego “nochikaualis (noespíritu)”.
^ Ika griego “eli itsonteko”.
^ Xikita circuncisión.
^ Kanajya kiijtouaj “inmechtojkej”.
^ Xikita circuncisión.
^ Xikita kuauitl kampa tetlaijiyouiltiaj.
^ O uelis “ika ya”.
^ O “desfile”.
^ Kanajya kiijtouaj “inkiijisej”.
^ Kanajya kiijtouaj “akauilotl”.
^ O “amo moueyimati”.
^ O “amo xijyeko”.
