Nopa carta tlen kintitlanilijkej Cristo itokilijkauaj tlen Galacia 6:1-18
6 Noikniuaj, tlaj se tlakatl yaui ipan se ojtli tlen amo kuali uan amo momaka cuenta, inmojuantij katli inkikauaj ma inmechyakana ichikaualis Dios,* sampa xijualikakaj ipan nopa ojtli tlen kuali.* Pero moneki inkinojnotsasej ika yamanik tlajtoli. Uan nojkia ximotlachilikaj inmojuantij para amo inkichiuasej tlen amo kuali.
2 Nojua ximopaleuijtokaj se ika seyok ika nopa tlamantli tlen eli kej se tlamamali para inmojuantij uan kiampa inkichiuasej tlen kiijtoua itlanauatil Cristo.
3 Pampa tlaj se akajya moiljuia ya tlauel ipati maske amo nelia, iselti mokajkayaua.
4 Pero sejse ma kitlachili tlen kichiua, uan kiampa uelis yolpakis ika tlen ya kichijtok uan amo san motekitlachilijtos ika sekinok.
5 Pampa sejse tlen tojuantij moneki kiuikas itlamamal uan amo inintlamamal sekinok.
6 Nojkia, katli kimachtiaj itlajtol Dios ma kimaka itlamachtijka nochi tlamantli tlen kuali.
7 Amo ximokajkayauakaj: amo aka uelis kikajkayauas Dios.* Pampa tlen se akajya kitoka, ya nopa kipixkas.
8 Katli kejuak kitoka tlen itlakayo kinektok para ma tlajtlakolchiua, kipixkas mikilistli, pero katli kejuak tlatoka pampa kikaua ichikaualis Dios ma kiyakana, ichikaualis Dios kichiuas ma kipixka nemilistli tlen amo kema tlamis.*
9 Uajka amo ma tijkauakaj tijchiuasej tlen kuali, pampa kema asis tonali tipixkasej tlaj amo tisiauij.*
10 Yeka nama kema nojua tiuelij, ma tikinchiuilikaj tlen kuali nochi maseualmej, pero más ma tijchiuakaj ika toikniuaj katli nojkia tlaneltokaj.
11 Xikitakaj kenijkatsa niinmechtlajkuiljuilijtok ika uejueyi letras.
12 Katli kinekij inmechchiualtisej ximochiuilikaj circuncisión,* kinekij sekinok kuali ma kinitakaj. Kichiuaj nopa para amo ma kintlaijiyouiltikaj pampa tematiltiaj Cristo mijki ipan se kuauitl.*
13 Pampa yon katli mochiuiliaj circuncisión amo kichiuaj tlen kiijtoua nopa Tlanauatili, pero inijuantij kinekij ximochiuilikaj circuncisión para moueyimatisej ika tlen kichiuilijtokej inmotlakayo.
14 Pero na amo kema nijnekiskia nimoueyimatis ika yon se tlamantli, san nijnekiskia nimoueyimatis pampa toTeko Jesucristo kimiktijkej ipan se kuauitl. Ika Cristo, na nikita katli itstokej ipan Tlaltipaktli kejuak ya miktokej* uan inijuantij nojkia nechitaj kejuak ya nimiktok.
15 Pampa amo ipati tlaj timochiuilisej circuncisión o amo, tlen más ipati eli Dios ma techchiua tiyankuikej.
16 Nochi katli xitlauak monejnemiltiaj pampa kineltokaj tlen nikijtok, ma kipiakaj tlaseuilistli uan Dios ma kintlasojtla, kena, nochi katli itstokej ipan Israel tlen iaxka Dios.
17 Desde nama, ayokmo aka ma nechkuesolmaka, pampa ipan notlakayo nijpia nopa tlateposmachiotl* tlen kinextia nieli se itlatekipanojka Jesús.
18 Noikniuaj, toTeko Jesucristo ma kinexti ueyi iyolo ika inmojuantij* pampa inkipiaj kuali inmotlalnamikilis. Amén.*
Tlen ijkuilijtok tlatsintla
^ O “espíritu santo”.
^ O “xijtlalnamiktikaj”.
^ Kanajya kiijtouaj “toTeotsij”.
^ O “ma itsto para nochipa”.
^ O “tlaj amo tijkuesiuiliaj”.
^ Xikita circuncisión.
^ Xikita kuauitl kampa tetlaijiyouiltiaj.
^ O “kinlavosmintokej ipan kuauitl”.
^ O “marcas”.
^ O “ma inmechmaka tlateochiualistli tlen amo kinamiki tijselisej”.
^ O “kiampa ma eli”.
