Tlanauatijketl Acab kipixtoya se ueyi kali ipan Jezreel, uan nopaya ipan iventana kiitayaya se mili tlen eliyaya iaxka Nabot. Maske Acab kiiljuik Nabot ma kinamakilti imil, ya amo kinejki pampa Jehová kinnauatijtoya israeleuanij amo ma kinamakakaj nopa tlali tlen inintatauaj kinkauilijtejtoyaj. Maske Nabot kichijki tlen Jehová tlanauatijtoya, ¿tlake kichijki Acab? Tlauel kualanki, yeka mokaltsajki uan amo kinejki tlakuas.

Acab isiua motokaxtiyaya Jezabel, uan kichiuayaya tlen amo kuali. Jezabel kiiljuik iueue: “Ta titlanauatia ipan Israel uan uelis tijpias nochi tlen ta tijnekis. Na nimitsmakas nopa mili”. Uajka Jezabel kintlajkuiljuilik ueuejtlakamej tlen nopa altepetl uan kiniljuik ma kiijtokaj Nabot kitelchijtoya toTeotsij, uan kinnauatik ma kimiktikaj ika tetl. Nopa ueuejtlakamej kichijkej nochi tlen nopa siuatlanauatijketl kinnauatijtoya. Teipa, Jezabel kiiljuik Acab: “Nabot miktok, uelis timoaxkatis imil”.

Jezabel amo san Nabot kimiktik, nojkia kinmiktik miakej katli kiikneliyayaj Jehová. Jezabel kinueyichiuayaya teteyomej uan kichiuayaya miak tlamantli tlen amo kuali. Jehová kiitak nochi tlen Jezabel kichiuayaya. ¿Tlake kichiuaskia?

Kema Acab mijki, ikone Joram, pejki tlanauatia. Uajka, Jehová kititlanki se tlakatl ma kintlatsakuiltiti Jezabel uan ichampoyouaj. Ni tlakatl motokaxtiyaya Jehú.

Jehú tlejkok ipan icarro uan yajki Jezreel kampa itstoya Jezabel. Joram nojkia tlejkok ipan icarro uan kinamikito Jehú. Kema mopantijkej, Joram kitlajtlanilik: “¿Jehú, tiuala ika kuali?”. Jehú kinankilik: “Amo kema kuali tiitstosej tlaj monana Jezabel  nojua kichijtos tlen amo kuali”. Joram kinejki mochololtis ipan icarro. Uajka, Jehú kimajkauilik se kuatlamintli uan kimiktik.

Teipa, Jehú yajki Jezabel ichaj. Kema Jezabel kimatki Jehú yauiyaya, moxiljuik uan moyejyekchijki, uan kichixki uejkapa kampa ventana. Kema Jehú asito, Jezabel san kitlaijiljuik. Uajka Jehú chikauak kiniljuik nopa tlatekipanouanij katli itstoyaj Jezabel inechka: “¡Xijualmajkauakaj!”. Inijuantij kikuamajkajkej, uan Jezabel uetsito tlalchi uan mijki.

Teipa, Jehú kinmiktik nopa 70 Acab ikoneuaj uan ayokmo kikajki ma kiueyichiuakaj Baal ipan nochi nopa tlali. ¿Tikitak? Jehová kiita nochi tlen pano, uan kema kinamiki, kintlatsakuiltia katli amo kualmej.