Israeleuanij sampa kitlauelkajkej Jehová uan pejkej kinueyichiuaj teotsitsij. Kema amóneuanij kintlaijiyouiltiyayaj, nopa teotsitsij amo kinmanauiyayaj. Yeka tlaijiyouijkej miak xiuitl. Teipa, kiiljuijkej Jehová: “Titlajtlakolchijtokej. Xitechmanaui tlen tokualankaitakauaj”. Nojkia, kinijkuinijkej nopa teotsitsij uan sampa kiueyichijkej Jehová. Uajka Jehová ayokmo kikajki nojua ma tlaijiyouikaj israeleuanij.

Israeleuanij kitlapejpenijkej Jefté ma kinyakana kema kinteuiskiaj amóneuanij. Jefté kiiljuik Jehová: “Tlaj titechpaleuis ma titlatlanikaj, na nimitsmaktilis katli achtoui nechnamikiki kema nitlakuepilis nochaj”. Jehová kitlakakilik Jefté kema momaijtok uan kipaleuik ma tlatlani.

 Kema Jefté tlakuepilik ichaj, katli achtoui kinamikito eliyaya isiuapil. Eliyaya iyojtsi ikone. Kema kinamikito, mijtojtijtiauiyaya uan tlatsotsontiauiyaya ika pandereta. ¿Tlake kichiuaskia Jefté? Kiilnamijki tlen kiijtojtoya uan kiijtok: “¡Ay tinosiuapil! Nelia tlauel nimokuesoua. Nijtenkauilik Jehová se tlamantli, uan nama moneki nimitstitlanis Silo uan nopaya tijtekipanos Jehová ipan tabernáculo”. Isiuapil kinankilik: “Notata, tlaj tikiljuik Jehová ya nopa tijchiuaskia, nama moneki tijchiuas. San nimitstlajtlania xinechkaua ma nia ome metstli ininuaya nouampoyouaj ipan tepetinij. Uan teipa nias ipan tabernáculo”. Jefté iichpoka nochipa kitekipanok Jehová ipan tabernáculo. Sejse xiuitl iuampoyouaj kionpaxalouayayaj ne Silo.