Moisés miak xiuitl kinyakantoya israeleuanij, uan nechka mikiskia. Jehová kiiljuik: “Ta amo tikinuikas israeleuanij ipan nopa tlali tlen nikinmakas. San nimitskauas xikita nopa tlali”. Moisés kiiljuik toTeotsij ma kitlapejpeni se akajya katli kinyakanaskia israeleuanij. Jehová kiiljuik: “Ximonojnotsa iuaya Josué uan xikiljui yaya nijtlapejpenijtok”.

Moisés kiniljuik israeleuanij nechka mikiskia. Nojkia kiniljuik Jehová kitlapejpenijtoya Josué, uan yaya kinuikaskia ipan nopa tlali tlen toTeotsij kintenkauilijtoya. Moisés kiiljuik Josué: “Amo ximajmaui. Jehová mitspaleuis”. Teipa, Moisés tlejkok ipan nopa tepetl Nebo. Nopaya Jehová kinextilik nopa tlali tlen kintenkauilijtoya Abraham, Isaac uan Jacob. Moisés kipixtoya 120 xiuitl kema mijki.

Jehová kiiljuik Josué: “Xikixkotona ueyatl Jordán uan xikalaki ipan tlali Canaán. Na nimitspaleuis kej nijpaleuik Moisés. Mojmostla xijpoua tlen kiijtoua notlanauatiljuaj. Amo ximajmaui uan amo ximokueso. Xijchiua nochi tlen nimitsnauatijtok”.

 Josué kintitlanki omej tlakamej ma tlachiatij Jericó. Ipan nopa seyok tlapoualistli tikitasej tlake panok nopaya. Kema nopa tlakamej tlakuepilijkej, kiijtojkej kena ueliskiaj moaxkatisej Canaán. Ualmostla, Josué kiniljuik israeleuanij ma kitlalanakaj ininyoyonkaljuaj pampa kisteuaskiaj. Achtoui kiniljuik nopa sacerdotes katli kiuikayayaj nopa kaxa tlen kipixtoya tlajtolsenkaualistli ma yakaj kampa ueyatl Jordán. Maske nopa ueyatl tlauel temitoya, kema nopa sacerdotes kalajkej atitla, ¡nopa atl uajki! Inijuantij moketsatoj tlajtlajko nopa ueyatl, uan mochixkej ma panokaj nochi israeleuanij. Kema israeleuanij kiitakej tlen panok, ¿timoiljuia kiilnamijkej tlen Jehová kichijtoya ipan ueyi atl Rojo?

Maske panotoya miak xiuitl, israeleuanij asitoj ipan nopa tlali tlen toTeotsij kintenkauilijtoya. Nopaya ueliskiaj mochantisej uan momiakilisej. Ueliskiaj momiltisej uan tlatojtokasej. Ipan nopa tlali onkayaya miak tlamantli tlen kikuaskiaj, yeka kiijtouayayaj eliyaya se tlali kampa onkayaya leche uan nektli.