Ya panotoya matlaktli tonali kema Jesús tlakuepilijtoya iluikak. Uajka, itokilijkauaj kiselijkej toTeotsij itonal. Ipan nopa tonali, kichiuayayaj nopa iljuitl Pentecostés tlen xiuitl 33, yeka miakej maseualmej katli kampa ueli euayayaj asitoyaj Jerusalén. Uan se 120 Cristo itokilijkauaj mosentilijtoyaj uejkapa ipan se kali, nopaya panok se tlamantli tlen amo kema panotoya. Neski ipan inintsonteko kejuak se tlilelemektli, uan nochi pejkej kamanaltij miak tlajtoli. Nojkia, ipan nopa kali kakistik se chikauak ajakatl.

Nopa maseualmej katli euayayaj ipan sekinok altepemej kikajkej nopa chikauak ajakatl, yeka tlachiatoj ipan nopa kali pampa kinekiyayaj kimatisej tlake panotoya. Uan nochi mosentlachilijkej kema kinkajkej Cristo itokilijkauaj kamanaltiyayaj ipan sekinok tlajtoli. Kiijtouayayaj: “Ni maseualmej euaj Galilea, ¿kenijkatsa uelij kamanaltij ipan totlajtol?”.

Uajka, Pedro uan nopa sekinok apóstoles moketskej kampa nochi kinitaskiaj. Uan Pedro kiniljuik: “Maske inmojuantij inkimiktijkej Jesús, Jehová kiyolkuik. Uan nama itstok iluikak ipan imanejmatl toTeotsij.  Uan techmakatok toTeotsij itonal, tlen techiljuijtoya kititlaniskia. Yeka inkiitstokej uan inkikaktokej nochi ni tlamantli tlen panotok”.

Nopa maseualmej amo ueliyayaj kineltokaj tlen panotoya. Uan tlen Pedro kiniljuik asik ipan ininyolo, yeka kiijtojkej: “¿Tlake moneki tijchiuasej?”. Pedro kinnankilik: “Ximoyolkuepakaj uan ximoatsonpoliuiltikaj ipan Jesús itoka. Uan teipa nojkia inkiselisej toTeotsij itonal”. Ipan nopa tonali moatsonpoliuiltijkej se 3,000 maseualmej, uan ipan Jerusalén pejkej momiakiliaj Cristo itokilijkauaj. Pampa toTeotsij kinmakak itonal nopa apóstoles kichijkej ma onka sekinok tlanechikoli. Kiampa uelkej kinmachtiaj Cristo itokilijkauaj nochi tlen Jesús kinnauatijtoya.