Nopa tlajtoli precursor no kiijtosneki kema se akajya kichiua se ojtli kampa amo aka moojtijtok uan kej nopa katli kitokilijtiauij uelis nejnemisej nopaya. Uajka ueliskia tikijtosej Jesús elki kej se precursor, pampa kititlankej ipan Tlaltipaktli ma kimoyauaki tlen techmakaskia nemilistli uan nojkia kejuak kitlaposkia nopa ojtli tlen temakixtia (Mateo 20:28). Ipan ni tonali no tijchiuaj kej Jesús, tijtekiuiaj nochi tonali tlen tiuelij uan kej nopa titepaleuiaj ma mochiuakaj Jesús itokilijkauaj (Mateo 28:19, 20, TNM). Sekij tlatekipanouaj kej precursores, kej tojuantij tikinixmatij.

Se precursor tlajtolmoyaua miak. Maske nochi Jehová itlajtoltemakauaj tlajtolmoyauaj, sekij tlatekipanouaj kej precursores regulares, inijuantij tlajtolmoyauaj 70 horas sejse mestli. Yeka tekitij san se keski tonali. Sekij kintlapejpenijtokej ma tlatekipanokaj kej precursores especiales uan kintitlanij kampa amo itstokej miakej tlajtolmoyauanij; inijuantij tlajtolmoyauaj se 130 horas o kipano. Nochi precursores mopanoltiaj san ika se keski tlamantli uan motemachiaj Jehová kinmakas tlen monekis (Mateo 6:31, 32; 1 Timoteo 6:6-8). Katli amo uelij tlatekipanouaj kej precursores regulares o especiales uelis tlatekipanosej kej precursores auxiliares, inijuantij tlajtolmoyauaj 30 o 50 horas ipan se mestli.

Tlatekipanouaj kej precursores pampa kiikneliaj toTeotsij uan maseualmej. Kej Jesús, tojuantij nojkia tijmatij tlauel moneki miakej kiixmatisej toTeotsij uan tlen mosentlalijtok kichiuas (Marcos 6:34). Uan tojuantij tijpiaj nopa tlamachtili tlen nama uelis kinpaleuis ma motemachijtokaj kuali itstosej teipa. Nopa precursores kinikneliaj maseualmej, yeka kitekiuiaj tonali uan ininchikaualis uan kiampa tepaleuiaj ma kiixmatikaj toTeotsij iTlajtol (Mateo 22:39; 1 Tesalonicenses 2:8). Ni kinpaleuia precursores pampa nojua kuali tlaneltokaj, kuali mouikaj iuaya toTeotsij uan tlauel yolpakij (Hechos 20:35).

• ¿Tlake kichiua se precursor?

• ¿Tlake kinyololinia sekij ma tlatekipanokaj kej precursores?