TLAMACHTILI 31
¿Tlake eli toTeotsij iTlanauatijkayo?
Ipan Biblia pankisa se tlamachtili tlen tlauel ipati: toTeotsij iTlanauatijkayo. ToTeotsij kitekiuis iTlanauatijkayo uan kiampa kichiuas Tlaltipaktli se xochimili. ¿Tlake eli nopa Tlanauatijkayotl? ¿Kenke tikijtouaj ya pejki tekichiua? ¿Tlake kichijtok nopa Tlanauatijkayotl ipan ni tonali, uan tlake kichiuas teipa? Ipan ni uan ipan seyok ome tlamachtili monankilis ni tlajtlanili.
1. ¿Tlake eli toTeotsij iTlanauatijkayo, uan ajkia eli nopa Tlanauatijketl?
Eli se tlanauatijkayotl tlen Jehová kitlalijtok, uan Jesucristo eli nopa Tlanauatijketl. Nopa Tlanauatijkayotl eltok iluikak uan tlanauatis ipan Tlaltipaktli (Mateo 4:17; Juan 18:36). Biblia kiijtoua Jesús “axkema tlamis itlanauatilis” (Lucas 1:32, 33). Kema ya tlanauatis ipan toTeotsij iTlanauatijkayo, kinnauatis nochi maseualmej.
2. ¿Ajkia inijuantij tlanauatisej iuaya Jesús?
Jesús amo tlanauatis iselti. “Tlakamej tlen kipiaj sejse tlamantli inintlalnamikilis uan inincostumbres” uan katli euaj ipan nochi tlaltinij tlanauatisej ipan Tlaltipaktli (Apocalipsis 5:9, 10). ¿Keskij tlanauatisej iuaya Jesús? Kema Jesús itstoya ipan Tlaltipaktli miakej maseualmej mochijkej itokilijkauaj uan ipan ni tonali miakej nojkia kiampa kichiuaj. Maske miakej elij itokilijkauaj, san 144 mil tlanauatisej iuaya Jesús ipan iluikak (xijpoua Apocalipsis 14:1-4). Nochi nopa sekinok itokilijkauaj itstosej ipan Tlaltipaktli kema tekichiuas toTeotsij iTlanauatijkayo (Salmo 37:29).
3. ¿Kenke san toTeotsij iTlanauatijkayo kuali tlanauatis uan amo kej maseualmej?
Maske sekij tlanauatianij kinekij kichiuasej tlen kuali, amo uelij kichiuaj nochi tlen kiijtouaj. Uan teipa katli kintekipatlaj kemantika amo kinekij kinpaleuisej maseualmej. Maske kiampa pano ika tlanauatianij, Jesús, katli tlanauatis ipan toTeotsij iTlanauatijkayo, amo aka kitekipatlas. ToTeotsij kitlalik se Tlanauatijkayotl tlen amo aka uelis kitsontlamiltis (Daniel 2:44). Jesús tlanauatis ipan nochi Tlaltipaktli uan amo techikoitas. Ya teiknelia, tetlasojtla uan kichiua tlen xitlauak, yeka kinpaleuis maseualmej nojkia kiampa ma kichiuakaj (xijpoua Isaías 11:9).
KUALI XIMOMACHTI
Ma tikitakaj kenke san toTeotsij iTlanauatijkayo tlauel kuali tlanauatis uan amo kej maseualmej tlanauatiaj.
4. ToTeotsij iTlanauatijkayo tlanauatis ipan nochi Tlaltipaktli
San Jesús kipia miak tlanauatili uan chikaualistli, uan amo kej sekinok maseualmej katli tlanauatijtokej. Xijpouakaj Mateo 28:18 uan xijnankilikaj ni tlajtlanili:
-
¿Kenke san Jesús kipia miak tlanauatili uan amo kej tlanauatianij?
Tlanauatianij san tlanauatiaj ipan ininaltepe uan amo nochipa tlanauatijtokej. ¿Nojkia kiampa panos ika toTeotsij iTlanauatijkayo? Xijpouakaj Daniel 7:14 uan xijnankilikaj ni tlajtlanili:
-
¿Kenke tlauel kuali pampa toTeotsij iTlanauatijkayo amo aka uelis kitsontlamiltis?
-
¿Kenke tlauel kuali pampa tlanauatis ipan nochi Tlaltipaktli?
5. Tlanauatianij moneki kintekipatlasej
¿Kenke toTeotsij iTlanauatijkayo moneki kintekipatlas tlanauatianij? Xikitakaj nopa VIDEO uan xijnankilikaj ni tlajtlanili:
-
¿Kenijkatsa tiitstokej pampa tekichijtokej maseualmej?
Xijpouakaj Eclesiastés 8:9 uan xijnankilikaj ni tlajtlanili:
-
¿Timoiljuia toTeotsij iTlanauatijkayo kinamiki kintekipatlas nochi tlanauatianij? ¿Kenke kiampa timoiljuia?
6. Katli tlanauatisej ipan toTeotsij iTlanauatijkayo kikuamachiliaj tlen techpano
ToTlanauatijka Jesús elki se maseuali uan itstoya ipan Tlaltipaktli, yeka “techtlasojtla kema axtijpiaj fuerza para tijchiuasej tlen xitlauak” (Hebreos 4:15). Jehová kintlapejpenijtok 144 mil tlakamej uan siuamej ma tlanauatikaj iuaya Jesús. Inijuantij “kipiaj sejse tlamantli inintlalnamikilis uan inincostumbres” uan euaj “ipan nochi tlaltinij” (Apocalipsis 5:9).
-
¿Mitsyolchikaua pampa Jesús uan katli iuaya tlanauatisej kikuamachiliaj nochi tlen techpano? ¿Kenke mitsyolchikaua?
Jehová kintlapejpenijtok ma tlanauatikaj iuaya Jesús tlakamej uan siuamej katli kampa ueli euaj uan katli amo itstoyaj ipan sanse xiuitl.
7. ToTeotsij iTlanauatijkayo techmaka tlanauatili tlen tlauel techpaleuia
Tlanauatianij kitlaliaj tlanauatili pampa kinekij ma techpaleui uan kuali ma tiitstokaj. ToTeotsij iTlanauatijkayo nojkia kitlalijtok tlanauatili uan katli kipaleuiaj nopa Tlanauatijkayotl moneki kineltokasej nopa tlanauatili. Xijpouakaj 1 Corintios 6:9-11 uan xijnankilikaj ni tlajtlanili:
-
¿Kenijkatsa timoiljuia tiitstosej ipan Tlaltipaktli kema nochi maseualmej kichiuasej tlen toTeotsij tlanauatia? a
-
Tlaj tijnekij tiitstosej kema toTeotsij iTlanauatijkayo tekichiuas, ¿timoiljuia kinamiki tijtlepanitasej ni tlanauatili tlen Jehová kitlalijtok? ¿Kenke kiampa timoiljuia?
-
¿Kenijkatsa tijmatij maseualmej katli amo kichiuaj tlen toTeotsij kineki uelis kipatlasej kej monejnemiltiaj? (Xikitakaj versículo 11).
Tlanauatianij kitlaliaj tlanauatili pampa kinekij ma techpaleui uan kuali ma tiitstokaj. Nopa tlanauatili tlen toTeotsij iTlanauatijkayo kitlalijtok nelia techpaleuia kuali ma tiitstokaj uan amo kej maseualmej inintlanauatiljuaj.
TLEN SEKINOK KIIJTOUAJ: “ToTeotsij tlanauatia ipan toyolo”.
-
¿Tlake titlanankiliskia?
TLEN TIMOMACHTIJKEJ
ToTeotsij iTlanauatijkayo eltok iluikak, uan nopa Tlanauatijkayotl nelnelia eltok, uan tlanauatis ipan nochi Tlaltipaktli.
¿Tlake tijyekok?
-
¿Ajkia inijuantij tlanauatisej ipan toTeotsij iTlanauatijkayo?
-
¿Kenke san toTeotsij iTlanauatijkayo kuali tlanauatis uan amo kej maseualmej tlanauatiaj?
-
¿Tlake kineki Jehová ma kichiuakaj katli kinnauatis?
NOJKIA XIKITA NI
Xikita kanke kiijtok Jesús eltoskia toTeotsij iTlanauatijkayo.
“¿ToTeotsij iTlanauatijkayo eltok ipan toyolo?” (Tlamachtili ipan jw.org)
¿Kenke Jehová itlajtoltemakauaj kipaleuiaj toTeotsij iTlanauatijkayo uan amo maseualmej inintlanauatijkayo?
Mosentlalijkej san kineltokasej toTeotsij iTlanauatijkayo (1:43)
Xikita tlake kiijtoua Biblia tlen nopa 144 mil maseualmej katli Jehová kintlapejpenijtok ma tlanauatikaj iuaya Jesús.
“¿Ajkia inijuantij yauij iluikak?” (Tlamachtili ipan jw.org)
Xikita tlake kipaleuik se siuatl katli kitsaktoyaj ma kikuamachili san toTeotsij iTlanauatijkayo kichiuas kuali ma tiitstokaj.
“Nijmatki ajkia kichiuas kuali ma tiitstokaj” (¡Xitlachixtokaj!, noviembre 2011)
a Ipan tlaxeloli 3 tikitasej kenijkatsa kineki toTeotsij ma timonejnemiltikaj.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
