Biblia kiijtoua Satanás “kinkajkayaua nochi tlakamej tlen itstokej kampa ueli ipan Tlaltipaktli” (Apocalipsis 12:9). Ya uan iajakauaj amo kinekij ma tijneltokakaj tlen kiijtoua toTeotsij iTlajtol. Kinekij maseualmej ma kineltokakaj katli ya miktokej nojua yoltokej uan yauij kampa itstokej tonaltsitsij. Ma tikitakaj kenijkatsa tlakajkayauaj.

Ipan miak religiones tlamachtiaj nochi maseualmej kipiaj se tonaltsi o se alma tlen kisa ipan totlakayo kema timikij uan yaui kampa itstokej tonaltsitsij. Nojkia kiijtouaj totlakayo kena miki, uan toalma amo.

Maske kiampa kiijtouaj, Biblia amo ya nopa tlamachtia. Se neskayotl, Biblia kiijtoua kema toTeotsij kichijchijki Adán, “ToTeko Dios kikuik tlali uan kisenkajki itlakayo se tlakatl. Uan kiyakailpitski uan kimakak yolistli. Uan nopa tlakatl pejki kipia yolistli” (Génesis 2:7). Uajka, toTeotsij amo kitlalik Adán ipan itlakayo se tlamantli tlen amo kema mikiskia.

Maseualmej, tlapialmej, michimej uan totomej nojkia mikij (Génesis 1:20, 21, 24, 30).

Biblia kiijtoua kema se akajya miki, amo kisa ipan itlakayo se tlamantli tlen nojua yoltok. Uan ayokmo tleno ueli kichiua, pampa nochi nopa maseuali mijki. Xikita tlake kiijtoua Biblia:

• “Pampa se tonal mikisej nochi tlakamej uan mokuepasej tlali. Kena, tlamis ininijiyo uan ininyolis, uan ika se tlalochtli tlamis nochi tlen moiljuijtoyaj kichiuasej” (Salmo 146:4).

• “Tlen yoltokej kimatij para se tonali mikisej. Pero tlen miktokej ayok tleno kimatij. Nojkia axkichiaj para kiselisej se tlaxtlauili teipa [...]. Nochi tlamantli tlen asi momako para tijchiuas, xijchiua ika nochi nopa chikaualistli tlen tijpia. Pampa ipan nopa mijkaostotl kampa monechkauia para tias, ayok uelis tijchiuas niyon se tekitl, ayok uelis timoyoliljuis kejatsa tijchiuas se tlamantli tlen kuali. Ayok tleno tikixmatis, niyon ayok tijpias tlalnamikilistli” (Eclesiastés 9:5, 10).

• “Uajka xijmatikaj para yajaya tlen kipaleuia nopa tlajtlakolchijketl para ma mokuepa uan ma kikajteua iojui tlen axkuali, kimanauijtok ialma para axkipantis mikistli. Uan nopa tlakatl kipantis tlapojpoljuili pampa moyolpatlatok” (Santiago 5:20).

Ipan sekinok textos tlen Biblia kinextia sanse kej mikij tlapialmej, nojkia mikij maseualmej (Eclesiastés 3:19, 20). Katli mikij ayokmo tleno kimatij. Uajka kema se akajya miki ayokmo tleno yoltok.

Tlaj tijtlamipouas Biblia amo kema tikitas tlaj kiijtoua mijkatsitsij nojua itstokej kanajya. Biblia amo tlamachtia tlaj katli mikij yauij kampa itstokej tonaltsitsij. Nopa tlamantli uala tlen Satanás uan amo kuali ajakamej. Jehová tlauel kikualankaita kema religiones tlakajkayauaj (Proverbios 6:16-19; 1 Timoteo 4:1, 2).

Satanás nojkia kinkajkayaua maseualmej ika tlen kichiuaj tetlajchiuianij. Se katli tetlajchiuia tematiltia tlen kiiljuiaj amo kuali ajakamej. Miakej maseualmej uan nojkia katli tetlajchiuiaj kineltokaj nelia mokamanaljuiaj ininuaya katli miktokej. Maske ya nopa kineltokaj, Biblia kiijtoua amo aka uelis kiampa kichiuas (Eclesiastés 9:5, 6, 10).

Uajka, ¿ajkia ininuaya mokamanaljuiaj? ¡Ininuaya amo kuali ajakamej! Nopa amo kuali ajakamej kuali kitlachiliaj se akajya kema yoltok; kimatij kenijkatsa kamanaltiyaya, kenijkatsa nesiyaya, tlen kichijki uan tlen kimatiyaya. Yeka inijuantij amo ouij kimatij kichiuasej kej nopa maseualmej katli ya miktokej (1 Samuel 28:3-19).

Satanás nojkia kinkajkayaua maseualmej ika tlapoualistli tlen mijkatsitsij tlen amo nelia panok. Ni tlamantli kichiua maseualmej amo ma kineltokakaj tlen Biblia tlamachtia (2 Timoteo 4:4).

Ipan África miakej maseualmej kiijtouaj sampa kinitaj maseualmej katli ya mijkej. Nochipa kiijtouaj kinitaj itstokej sejkanok, uan amo kampa mochantijtoyaj. ¿Timoiljuia tlaj se akajya moyolkuis kinekis itstos sejkanok uan amo ininuaya ichampoyouaj uan iuampoyouaj?

Ximoiljui ni: uelis iixayak nopa maseuali katli kiitakej eli sanse kej katli mijki. Se neskayotl, omej Jehová itlajtoltemakauaj katli tlajtolmoyauayayaj ipan se pilaltepetsi, kiitakej se tlakatl katli ya ueyi kintokilijtiauiyaya. Kema kitlatsintokijkej kenke kiampa kichiuayaya, kimatkej nopa tlakatl moiljuiyaya se tlen inijuantij eliyaya iikni katli ya miktoya. Maske nopa tlakatl mokuapolojtoya, ya amo kiampa moiljuiyaya. ¡Ximoiljui tlake kinpouilik ni tlakatl ichampoyouaj uan ikalnechkauaj!

Uelis tijmati miakej maseualmej kiitstokej, kikaktokej uan kitemiktokej se keski tlamantli tlen kichiua tlauel ma momajmatikaj. Marein, katli eua África, kikakiyaya iueyinana kinojnotsayaya ika tlayoua. Ya tlauel momajmatiyaya, yeka chikauak tsajtsiyaya uan kinikxitiyaya ichampoyouaj, teipa uiuitixki.

Uajka, tlaj katli miktokej nojua yoltokej, ¿timoiljuia kinmajmatiskiaj ininchampoyouaj katli tlauel kinikneliaj? Amo. Nopa tlamantli kichiuaj nopa amo kuali ajakamej.

¿Uan kenijkatsa kinamiki tikitasej nopa tlamantli tlen nesi tepaleuia uan teyolchikaua? Se neskayotl, Gbassay, katli eua Sierra Leona, mokokouayaya. Se tonali, kitemijki itata katli ya miktoya kiiljuiyaya ma yaui kikuiti ixiuiyo se kuauitl, ma kitlali ipan atl uan ma kiiji. Amo aka monekiyaya kimatis kema kichiuaskia. Ya kiampa kichijki uan mochikajki.

Seyok siuatl kiijtok se youali iueue monextik iixpa. Ya kiitak yejyektsi nesiyaya uan tlauel kuali moyoyontijtoya.

Nopa tlamantli nesi kejuak nelia tepaleuia. ¿ToTeotsij kichiua ma pano? Amo. Jehová amo kiampa kichiua, pampa ya kiijtoua tlen melauak (Salmo 31:5). Amo kema techkajkayauaskia. San amo kuali ajakamej kiampa kichiuaj.

¿Itstokej amo kuali ajakamej katli kuajkualmej? Amo. Maske kemantika nesij tepaleuiaj, nochi kichiuaj tlen amo kuali. Kema Satanás mokamanaljuik iuaya Eva, nesiyaya kinekiyaya kipaleuis (Génesis 3:1). ¿Uan tlake kipanok Eva pampa kitlakakilik uan kichijki tlen kiiljuik? Mijki.

Tijmatij maseualmej katli amo kuajkualmej nesij kejuak kinekij tepaleuisej uan kuali mouikaj ininuaya katli kinekij kinkajkayauasej o kintlachtekilisej. Se tlajtoli tlen tlauel kiixmatij ipan África kiampa kiijtoua: “Itlankoch chipauak, iyolo yayauik”. Uan Biblia kiijtoua: “Axkualtlakatl [o Satanás] nojkia moixpatla uan mochiua keja se iluikaejketl tlen uala nepa kampa onka tlauili” (2 Corintios 11:⁠14).

ToTeotsij ayokmo kinnojnotsa maseualmej ika temiktli o ika inintoskak ajakamej. Ya kinyakana uan kinmachtia maseualmej ika tlen Biblia kiijtoua. Kiampa “techkualtlalia nochi tojuantij tlen tiiaxkauaj para uelis tijchiuasej nochi tlen kuali” (2 Timoteo 3:17).

Jehová tlauel techiknelia, yeka techiljuia kenijkatsa Satanás kineki techkajkayauas. ToTeotsij kimati amo kuali ajakamej kichiuaj tlen tlauel amo kuali.