1, 2. ¿Tlake eliskia kejuak se ueyi kali, uan kenke moneki kuali tijchiuasej?

XIMOILJUI tlauel titekititok kampa kichiuaj se ueyi kali. Titekititok miak tonali uan nojua poliui miak. Maske ouij, tlauel tiyolpaki uan timosentlalijtok amo tijkauas uan nojua titekitis miak. Tijneki kuali tijchiuas nopa tekitl, pampa tijmati mitspaleuis kuali tiitstos teipa. Uelis timotlajtlania: “¿Tlake nopa ueyi kali?”. Nopa ueyi kali kiijtosneki monemilis.

² Judas kiijtok tlake uelis tijchiuasej ipan tonemilis. Kema techtlajtolmakak “nochipa [ma] [t]inemikaj kuali ika toTeko” uan kej nopa toTeotsij nojua techiknelijtoskia, kiijtok monekiyaya se kichiuas ni: “Ximofuerzamakakaj ipan tlen inkineltokaj” (Judas 20, 21). ¿Kenijkatsa uelis kuali titlaneltokasej uan kiampa nojua techiknelijtos toTeotsij? Ma tikitakaj eyi tlamantli tlen uelis techpaleuis.

3-5. 1) ¿Tlake kineki Satanás ma timoiljuikaj tlen Jehová itlanauatiljuaj? 2) Xikijto kenijkatsa kinamiki tikitasej toTeotsij itlanauatiljuaj uan kenijkatsa tijyolmatisej tlaj kiampa tikitasej.

³ Ma tikitakaj se tlamantli tlen techpaleuis kuali titlaneltokasej: ma timotemachikaj ipan Jehová itlanauatiljuaj. Ipan ni amochtli timomachtijkej miak toTeotsij  itlanauatiljuaj kampa techiljuia kenijkatsa timonejnemiltisej. ¿Kenijkatsa tikita nopa tlanauatili? Satanás kineki ma timoiljuikaj Jehová amo techkaua ika itlanauatiljuaj ma tijchiuakaj tlen techpaktia. Kineki techkajkayauas pampa kiitak uelki kinkajkayajki katli itstoyaj ipan Xochimili Edén (Génesis 3:1-6). ¿Nojkia uelis techkajkayauas? Tlaj tijpatiitaj toTeotsij itlanauatiljuaj amo uelis techkajkayauas.

⁴ Ximoiljui tipaxaloua kampa tlayejyektsi. Kema tinejnentia tikita tlatsaktokej uan yeka amo tiueli tipano kampa nesi tlauel tlayejyektsi. Achtoui mitskualankamaka pampa amo ueli tipano. Kema titlachia kampa tlakaktok, tikita itstok se león tlen tlauel mosisinia. Nama tijmati tlatsaktokej pampa amo kinekij ma mitspano tlen amo kuali. Ipan ni tonali nojkia itstok se akajya tlen kineki techmiktis, yeka Biblia kiijtoua: “Nochipa xiinmotlalnamiktikaj uan xitlachixtokaj, pampa [Diablo], yajaya inmokualankaitaka, nemi kampa ueli kej se tekua[jketl] tlen kitemojtinemi ajkia uelis kitsontlamiltis” (1 Pedro 5:8).

⁵ Satanás kejuak se tlapiali katli techiuilia tlen tlauel amo kuali. Uan pampa Jehová amo kineki Satanás ma ‘techkajkayaua’, techmanauia ika itlanauatiljuaj (Efesios 6:11). Yeka kema timoyoliljuisej ipan itlanauatiljuaj, moneki tikilnamikisej toTata Jehová techmakatok pampa tlauel techiknelia. Kiampa tikitaj kenijkatsa techmanauia uan kichiua ma tiyolpakikaj. Yeka, Santiago kiijtok tlaj “se akajya kitlachilijtinemis itlanauatiljuaj uan axkiilkauas”, yolpakis tlaj kichiuas (Santiago 1:25).

6. ¿Tlake uelis techpaleuis ma timotemachikaj ipan toTeotsij itlanauatiljuaj? Xikijto se tlamantli.

⁶ Tlaj tijnekij timotemachisej ipan Jehová uan ipan itlanauatiljuaj, moneki mojmostla tijchiuasej ipan tonemilis  tlen technauatia. Nojkia moneki tijneltokasej “tlen Cristo technauatijtok”, kej kema tlanauatik ma tikinmachtikaj sekinok “nochi tlen [t]echnauatijtok” (Gálatas 6:2; Mateo 28:19, 20, TNM). Cristo itokilijkauaj tlauel kipatiitaj monechikosej uan kiampa kiueyichiuasej toTeotsij uan sansejko yolpakisej (Hebreos 10:24, 25). ToTeotsij nojkia technauatia ma timomaijtokaj ika nochi toyolo (Mateo 6:5-8; 1 Tesalonicenses 5:17). Kema tijneltokaj ni, tikitaj kenijkatsa toTeotsij tlauel techiknelia. Uan kichiua nelnelia ma tiyolpakikaj maske onka miak tlaijiyouilistli. Uan kema timoyoliljuiaj kenijkatsa techpaleuijtok pampa tijneltokatokej tlen toTeotsij technauatia, kichiua nojua ma timotemachikaj ipan Jehová itlanauatiljuaj.

7, 8. ¿Kenijkatsa kinyolchikaua Biblia katli kimakasij kitlauelkauasej toTeotsij kema panos miak xiuitl?

⁷ Kemantika sekij motekipachouaj pampa moiljuiaj amo uelisej kineltokasej sejse xiuitl Jehová itlanauatiljuaj. Tlaj nojkia kej nopa tijyolmatij, ma tikilnamikikaj ni: “Na [...] niinmoTeko [Jehová] tlen niinmechmachtia [...]. Uan niinmechyakanas ipan nopa ojtli tlen kinamiki inkitokilisej. Nelia kuali eltoskia intla inkichijtoskiaj tlen kiijtoua  notlanauatiljuaj, pampa keja nopa inkipiaskiaj tlaseuilistli tlen ajachika uala keja se yejyektsi atemitl tlen axkema uaki” (Isaías 48:17, 18). ¿Tikita kenijkatsa techyolchikaua ni texto?

⁸ Jehová kiijtoua tlaj tijneltokasej itlanauatiljuaj, techpaleuis nochipa ma tijpiakaj tlayolseuilistli uan nochipa tijchiuasej tlen xitlauak, kej se ueyatl. ¿Kenke tikijtouaj nopa? Kema tijtlachilijtokej nopa ueyatl tikitaj kenijkatsa nochipa panotok atl, uan nopa kichiua ma timotemachikaj nochipa panotos. Tlen kiijtoua nopa texto kinextia nojkia uelis tijchiuasej tlen xitlauak o nochipa kuali timonejnemiltisej. Tlaj amo kema tijtlauelkauasej toTeotsij, ya kichiuas ma kisa kuali nochi tlen tijchiuasej (xijpoua Salmo 55:22). Kema timomachtiaj ni yejyektsi tlajtoli techpaleuia ma timotemachikaj ipan Jehová uan ipan itlanauatiljuaj.

9, 10. 1) ¿Kenke kualtiaskia nochi ma timosentlalikaj kuali titlaneltokasej? 2) ¿Kenijkatsa techpaleuia tiyolpakisej kema kuali titlaneltokaj?

⁹ Nopa ome tlamantli tlen techpaleuis kuali titlaneltokasej ijkuilijtok ipan Hebreos, nopaya kiijtoua moneki kuali tijkuamachilisej ‘tlamachtili tlen techpaleuis timoskaltisej’ (Hebreos 6:1). Maske titlajtlakolejkej, nochi kualtiaskia timosentlalisej tijpiasej kuali totlaneltokilis. Tlaj kuali titlaneltokatiasej, tlauel tiyolpakisej kema tijtekipanosej Jehová. ¿Kenke?

¹⁰ Katli kuali tlaneltoka kichiua kampeka kitekipanos Jehová uan nojkia tlalnamikis kej ya (Juan 4:23). Apóstol Pablo kiijtok “tlen kitokiliaj inintlajtlakolchijkayolo san moiljuiaj tlake tlajtlakoli kinekij kichiuasej [...]. Pero tlakamej tlen kitokiliaj itonal toTeko moiljuiaj tlen nopa  kuali tlamantli tlen itonal toTeko kineki kichiuas” (Romanos 8:5). Katli kinekij kichiuasej san tlen inintlakayo kineki, amo yolpakij pampa kitlasomatij nochi, amo kiitaj tlen sekinok kinpoloua uan san kinekij tlapijpiasej. Uan katli kichiuaj tlen toTeotsij kineki, tlauel yolpakij pampa mosentlalijtokej kitekipanosej san Jehová, katli nochipa yolpaktok. Kinekij kiyolpakiltisej toTeotsij uan yolpakij maske kinpano tlayejyekoli. ¿Kenke yolpakij? Pampa kimatij tlaj amo tlaixpanosej, kinextisej Satanás san istlakati uan kichiuasej ma yolpaki ininTata katli itstok iluikak (Proverbios 27:11; xijpoua Santiago 1:2 uan 3).

11, 12. 1) ¿Tlake kiijtok Pablo ma tijchiuakaj ika ‘totlalnamikilis’, uan tlake kiijtosneki nopa tlajtoli “kitekiuijtokej”? 2) ¿Kenijkatsa moneki mokualchijchiuas se akajya uan kiampa uelis kuali mojmolinis?

¹¹ Kema tijchiuaj tlen kiijtoua Biblia, techpaleuia kuali ma titlaneltokakaj. Yeka ni texto kiijtoua: “Tlakualistli tlen tetik eltok para tlakamej tlen ya moskaltijtokej uan uelij kimachiliaj iTlajtol toTeko tlen más ouij. Ni tlakamej kitekiuijtokej inintlalnamikilis para kiixmatisej tlen kuali uan tlen axkuali” (Hebreos 5:14). Pablo kiijtok moneki “kitekiuijto[s]ej” inintlalnamikilis. Ni tlajtoli ika griego kiijtosneki “kema se katli mauiltia mokualchijchiua”. Ma tikitakaj kenijkatsa kichiuayayaj.

¹² Pilkonetsitsij amo uelij mojmoliniaj kuali uan amo kimatij kanke kipiaj ininikxiuaj o ininma, yeka kema momakiliaj ipan ininixayak, momajmatiaj uan kualanij. Yolik uelij kuali mojmoliniaj: achtoui manejnemij, peuaj nejnemij uan teipa uelij motlalouaj. * Tlen kichiua se mauiltijketl kinextia  kenijkatsa uelis kuali timojmolinisej. Kema tijtlachiliaj tlen kichiuaj, tikitaj kejuak eliskia se tepostli tlen kichijtokej kiampa ma mojmolini. Inijuantij uelij kichiuaj nopa pampa miak horas mokualchijchijkej. Maske Biblia kiijtoua mitspaleuis kuali xiitsto tlaj “tijkualchijchiuas motlakayo”, ni amo tlauel ipati, pampa tlaj timomachtis kuali tijtekiuis motlalnamikilis, ya nopa tlauel mitspaleuis (1 Timoteo 4:8).

13. ¿Kenijkatsa uelis tijmachtisej totlalnamikilis?

¹³ Ipan ni amochtli tikitstokej miak tlamantli tlen techpaleuia kuali ma tijtekiuikaj totlalnamikilis uan kiampa kuali tijtekipanosej Jehová uan amo kema tijtlauelkauasej. Kema tijtlapejpenisej tlake tijchiuasej, moneki timomaijtosej uan tikitasej tlen Biblia tetlajtolmaka. Ma timotlajtlanikaj: “¿Tlake tlanauatili uelis nechpaleuis ika ni kuesoli? ¿Kenijkatsa nijchiuas tlen kiijtoua Biblia? ¿Kipaktis Jehová tlen nimoiljuijtok nijchiuas?” (xijpoua Proverbios 3:5 uan 6, uan Santiago 1:5). Tlaj nochipa tikilnamikisej ni tlamantli, kuali tijmachtisej totlalnamikilis. Kej nopa uelis kuali titlaneltokasej.

14. ¿Tlake moneki techpaktis tijchiuasej, uan tlake moneki tijchiuasej?

¹⁴ Maske uelis kuali titlaneltokaj, nojua moneki kuali ma titlaneltokatiakaj. Ni uelis tijchiuasej tlaj nochipa timomachtisej. Pablo kiijtok “tlakualistli tlen tetik eltok para tlakamej tlen ya moskaltijtokej”. Yeka, tlaj  tijnekij nojua kuali titlaneltokasej, moneki kuali ma timomachtikaj. Uan nojkia moneki kuali ma titlalnamikikaj, kiampa uelis tijmatisej kenijkatsa tijchiuasej tlen timomachtijtokej. Ni tlauel moneki, pampa Biblia kiijtoua ‘tlauel ipati tijtemosej tlalnamikilistli’. Yeka, ma techpakti timomachtisej nopa yejyektsitsij tlamantli tlen techmachtia toTata (Proverbios 4:5-7; 1 Pedro 2:2). Maske tijmatiskiaj miak tlamantli, amo kinamiki timoueyimatisej. Nochipa ma tikitakaj tlaj amo timoueyimatij o tlaj amo tijpiaj tlalnamikilistli tlen amo kuali. Pablo techtlajtolmaka: “Ximotlajtlachilikaj kuali intla nelia intlaneltokanij o axtle. Ximoyejyekokaj intla inkichiuaj tlamantli tlen kinextia para nelia inkineltokaj toueyiTeko” (2 Corintios 13:5).

15. ¿Kenke moneki titeiknelisej tlaj tijnekij nojua kuali titlaneltokasej?

¹⁵ Kema mosenkaua se kali, nojua moneki kikualchijchiuasej uan uelis monekis kiueyilisej. Ika totlaneltokilis nojkia kiampa pano. ¿Tlake moneki tijchiuasej tlaj tijnekij kuali titlaneltokasej? Kej panotias tonali, moneki tlauel ma tikiknelikaj Jehová uan toikniuaj. Tlaj amo tikinikneliskiaj, eliskia san tlapik nochi tlen timomachtijtokej uan tlen tijchijtokej (1 Corintios 13:1-3). Uajka, tlaj titeiknelisej tijnextisej kuali titlaneltokatokej.

16. ¿Tlake kineki Satanás ma timoiljuikaj, uan kenijkatsa techpaleuia Jehová?

¹⁶ Ma tikitakaj eyi tlamantli tlen nojkia techpaleuis kuali ma titlaneltokakaj. Tlaj tijnekij timonejnemiltisej kej toTeotsij kipaktia, moneki timoyoliljuisej tlen kuali. Satanás kimati kenijkatsa kichiuas ma timoiljuikaj ipan  tlen amo kuali, ma tikitakaj nochi amo kuali, amo ma timotemachikaj ipan yon se tlamantli uan ma tijnekikaj nimantsi ma mochiua se tlenijki (Efesios 2:2). Tlauel amo kuali timoiljuiskiaj nopa, eliskia kej nopa piltlapialtsitsij tlen kichiuaj ma kualo se kali tlen kichijtokej ika kuauitl. Yeka Jehová techpaleuia ma timotemachikaj ipan tlen kiijtojtok kichiuas.

17. ¿Ika tlake tlamantli kiixnextia Biblia tlauel moneki ma ‘timochiakaj’?

¹⁷ Biblia kiijtoua tlaj ‘timochiasej ma techmakixtikaj’, techpaleuis amo ma techkajkayaua Satanás yon katli kinnauatia. Biblia kiijtoua ni kejuak eliskia se soldado “itepostsontsajka” (1 Tesalonicenses 5:8). Nopa soldados katli uejkajkia itstoyaj kitekiuiyayaj inintepostsontsajka uan kiampa tlaj kinmakiliskiaj amo tlauel kinkokoskiaj; kimatiyayaj tlaj amo motlaliliskiaj kema tlateuiskiaj, ueliskia kinmiktisej.

18, 19. ¿Kenijkatsa kinextik Jesús moneki ‘timochiasej ma techmakixtikaj’, uan kenijkatsa uelis tijchiuasej kej ya?

¹⁸ Jesús kuali kinextik kenijkatsa uelis ‘timochiasej ma techmakixtikaj’. Ma tikilnamikikaj kenijkatsa tlaijiyouik kema itstoya ipan Tlaltipaktli. Se iuampo kitemaktilik pampa kinekiyaya tomij. Seyok kiijtok amo kiixmatiyaya. Sekinok kitlauelkajkej uan mochololtijkej. Uan katli euayayaj kampa ya itstoya kikualankaitakej uan kiniljuijkej nopa soldados katli euayayaj Roma ma kimiktikaj. Tojuantij uelis amo titlaijiyouisej kej Jesús, pampa ya kena tlauel tlaijiyouik. ¿Tlake kipaleuik ma kiijiyoui nochi? Hebreos 12:2 kiijtoua: “Yajaya kiijiyouik nopa ueyi pinaualistli para mikis [...] pampa kimatiyaya nopa ueyi pakilistli tlen kichiayaya teipa. Uan ama ya moseuijtok inejmatl toTeko”. Ni kinextia Jesús amo kema kiilkajki nopa “ueyi pakilistli tlen kichiayaya”.

 ¹⁹ ¿Kenke Jesús “kichiayaya” tlauel yolpakis? Pampa kimatiyaya tlaj amo kitlauelkauaskia Jehová, ueliskia kiueyichiuas itoka uan kinextiskia Satanás san istlakati. ¡San nopa kichiuaskia tlauel ma yolpaki Jesús! Nojkia kimatiyaya iTata kiteochiuaskia uan sampa itstoskia iuaya. Kema tlauel tlaijiyouik, nochipa kiilnamiktoya ni. Tojuantij nojkia moneki nochipa ma tikilnamiktokaj tlen Jehová kiijtojtok techmakas. Ya nojkia kineki ma tijueyichiuakaj itoka uan ma tijnextikaj kenijkatsa Satanás san istlakati. ¿Kenijkatsa uelis tijchiuasej? Maske tijpiasej miak tlaouijkayotl, moneki tijkauasej toTata Jehová ma techyakana uan ma tijchiuakaj nojua ma techiknelijto.

20. ¿Tlake techpaleuis amo timoiljuisej kej maseualmej moiljuiaj?

²⁰ Jehová tlauel kineki techteochiuas pampa amo tijtlauelkajtokej (Isaías 30:18; xijpoua Malaquías 3:10). Ya tlauel kipaktia kinmakas itekipanojkauaj nochi tlen kuali (Salmo 37:4). Yeka, ma timotemachikaj ipan tlen toTeotsij kiijtojtok techmakas. Amo kema ma timoiljuikaj kej nopa maseualmej katli Satanás kinnauatia. Tlaj tikitaskiaj nojkia peua timoiljuiaj kej inijuantij, ma tijtlajtlanikaj Jehová ‘tlaseuilistli tlen kiyaualtsakuas totlalnamikilis’, uan ni kimanauis toyolo (Filipenses 4:6, 7).

21, 22. 1) ¿Tlake motemachiaj kiselisej nopa “miak [maseualmej]”? 2) ¿Tlake tlauel tijpatiita tlen toTeotsij kiijtoua kichiuas, uan tlake moneki timosentlalis tijchiuas?

 ²¹ ¡Nelia tlauel kuali tlen Jehová kiijtojtok kichiuas! Tlaj tojuantij nojkia tiitstokej ininuaya nopa “miak [maseualmej]” katli momanauisej “tlen nopa ueyi tlaijiyouilistli”, tijpiasej miak tlateochiualistli (Apocalipsis 7:9, 14). Nelia tlauel kuali tiitstosej kema Satanás uan iajakauaj ayokmo itstosej. Ipan ni tonali Diablo nochi techyejyekoua. Kema ayokmo itstos, tlauel tiyolpakisej tijchiuasej se xochimili ipan Tlaltipaktli, kampa Cristo ininuaya nopa 144,000 technauatijtosej tlen ne iluikak. ¡Tlauel tijnekij tikitasej kenijkatsa ayokmo onkas kokolistli, uan tikinselisej tochampoyouaj katli moyolkuisej uan tiitstosej ika pakilistli kej toTeotsij kinekiyaya! Kema nechka tielisej tixitlauakej, nojkia tijselisej se ueyi tlateochiualistli pampa “nochi tiitstosej timalakantokej” o ayokmo tijpiasej yon se kentsi tlajtlakoli (Romanos 8:21).

²² Jehová tlauel kineki ta nojkia ximomakixti. Tlaj nelia tijneki timomakixtis, uajka moneki tijneltokas tlen tlanauatia. Yeka, mojmostla xijchiua kampeka tijneltokas Jehová, nojua kuali xitlaneltokato uan xijchijto nochipa ma mitsiknelijto toTeotsij.