Jehovab di ǀHûǀguitimî-aona mati skol ǂgâsa ra mû?
Sida ge sida mûǂuis skol ǂgās disa Elobmîs ai ǃgaoǃgao hâ. Mâ Jehovab di ǀHûǀguitimî-ao-i hoa-i ge ǁî-i di Elobmîs ǁkhāǁkhāsa nî sîsen-ū. Tsî Elobmîs mîmāde sao ra xūn ǃnâ nî sîsen-ū ǁkhā. *
Skol ǂgâs ge kaise a ǂhâǂhâsa
Skol ǂgâs ge khoe-e ra hui î-i “gā-aisib tsî ǂanǃgâsenxasib tsîkha” sâu. Nē ǀgam ǀgauga ge Elobmîs xa ra koahe. (ǂKhoamîdi 2:10, 11; 3:21, 22) ǁNās xōǀkhāb ge Jesuba ǁîb saosabena ge mîba în mîmāb ge xūna ǁkhāǁkhā. (Mateub 28:19, 20) Sida ge sida ǀkha ra ǃoaba ǀhao khoena ra ǂkhâǃnâ tsî ra hui hoaǃnâ-aixa skol ǂgâsa ūhâsa. Nēs ge khomais, xoas tsî ǃhoa-ūgus ǁkhāsib tsîna ǃkhōǂgā hâ, * nēs ge nau ǂgomdi tsî ǃhaoǃnâbe xūn xas tsîna ǂansa ǃkhōǂgā hâ.—1 Korinteǁîn 9:20-22; 1 Timoteub 4:13.
Khoesi ǂhanugu tsîn ge skol ǂgâs ǂhâǂhâsasiba ra mû. Tsî ǁnās ǀkha ra ǂgaoǀkhā în ǂkhamkhoena ǂkhamsisa xu kain hâs kōse skol ǂgâ. ǁNāti i ǂgaoǀkhāde da ge ra ǁnâuǀnam: “Mâ-i hoa-e a-i ǂamkhoega [khoesi ǂhanuga] ǃnaga hâba.” (Romeǁîn 13:1) ǁNā-amaga da ge sida ǀgôana ra ǂkhâǃnâ în skoli ǃnâ ǁguiǂgāsen. Tsî ra mîba nî în ǁkhān ân hoana dī tsî tā ǀorose dī. * Elobmîs ge sao ra-e ra mî: “Î du dī du ran hoana ǂgaoba xu dī, ǃKhūba dības axase tsî khoena diba axase tama.”—Koloseǁîn 3:23.
Skol ǂgâs ge omaride ra hui. Elobmîs ge ra mî: “Tsî khoe-i ga ǁî-i din tsî ǀō-ai ǁî-i ommi dina sâu tama io, ǁnā-i ge ǂgomsa ge ǀūxū, tsî i ge ǂgomoǃnâ-i ǃgâ-ai a tsū.” (1 Timoteub 5:8) Skol ǂgâs ge nē elosi mîmāsa dīǀoaǀoa tsî omaridi ǁanina kōǃgâs ǀkha ra hui. ǀGui mîdi ǂkhanis ge ra mî: ǃGaoǃgaob skol ǂgâs dib ge “khoena huisa în sîsen ǁkhā ǀhûhâsib ǃnâ . . . tsî ekonomiba omkhâis ǃnâ.” ǁKhāǁkhāsa khoe-i ge ǁî-i omarisa a kōǃgâ ǁkhā, skol-e ūhâ tama hâ khoe-i xa.—ǂKhoamîdi 22:29.
Kaikhoen tsîn ge ǁîn ǀgôana ra aiǂhomi kaisis ǃgao. Tsî skol ǂgâs ge ǁnā-amaga kaise a ǂhâǂhâsa. (2 Korinteǁîn 12:14) Sida ge ǁgûna ǁnās ǀkha ra ǂkhâǃnâ în hoaǃnâ-aixa skol ǂgâsa ǁîn ǀgôana mā, ǀgâsan ga ra xawe. Tsî ǃgaroǃādi ǃnân ga hâ tsî i ga skol ǂgâsa marioǃnâ tama i xawe. ǁNās ga ǃhaoǃnâbe ǁnaetigu ǃoagu hâ xawe. * ǃGâi sîsenǂuiba ūhâ mîǁguiga da ge ǁgûna ra mā, matin nî ǀgôana skol ǂgâs ǀkha hui ǀgausa. *
Skol ǂgâs ge ǁnâuǃāxa ǀgaub ǃnâ nî mûhe
ǂŌrisase da ge ǀgapi ǁkhāǁkhās ra mā ǁgui-aina ra ôaǃnâ. Elobmîs ge ra mî: “Gâreb ra mâ mîs hoasa ǂgom, xawe gā-aib ra ǃgûs âba ǃgaoǃgâ.” (ǂKhoamîdi 14:15) Nē mîmāsa da ge ra sîsen-ū ǃamkuse ǀgapi ǁkhāǁkhās tawa i ga ra ǀkhī o. Tsî ra kō matikō-e i ra ǂgansa tsî ǂhâbasa i asa. Aiǁgause, ǃomgu ǀkha sîsens ǃnâ ǁgauǃnâhes ge kaise a ǃgâi.
Gagasise ǁgauǃnâhes ge kaise a ǃgâi, ǃhūbaisi ǁgauǃnâs xa. Elobmîs ai a ǃgaoǃgaosa ǁgauǃnâs ge ûiba ra mā, Elob xa ǂansa, ǃhūbaib xas ose. (Johaneb 17:3) Elobmîs tsîn ge ǂūba ūhâsa ra ǁkhāǁkhā da. “ǃNubaits ge ǂhanu-aisib tsî ǂhanub tsî ǂhauǃnâsigu tsîna nîra ǁnâuǃā tsî mâ ǃgâi tanisen-i hoa-e” (ǂKhoamîdi 2:9) Apostel Paulub ge ǁîb tsēdi ǃnâ ǀgapi ǁkhāǁkhāsa ge ǃkhōǃoa, nētsē ǀgapi ǁkhāǁkhās di a ǂansasa. Xaweb ge ge ǂanǃgâ tsî ge mî: “ǁÎna [ǀgapi ǁkhāǁkhāsa] ta ge Xristub ǃaroma ǂkhôan ase ge ǃgôa.” (Filipeǁîn 3:8; ǃNaeǃkhaidi 22:3) ǁNās ǁkhās khamin ge Jehovab di ǀHûǀguitimî-aona ǀgapi ǁkhāǁkhāsa ge ǃkhōǃoa. Xawen ge ra ǂgom gagasi ǁkhāǁkhās ge kaise a ǀgapi. *
Gagasi ǁgauǃnâs ge ǃgâi ǂūba ra aiǃgû kai
ǀGapi ǁgauǃnâs ge khoe-e ǁgauoǃnâsib tsî gagasi ǁkhōǁkhōsasib ǃnâ a mâi ǁkhā
Elobmîs ǂkhanis ge ra mî: “Gā-ai khoeb ǂkhababa mû tsî ra gaugausen, xawe gâren ge ǃgûǂgâ tsî ra ǁkharahe.” (ǂKhoamîdi 22:3) Jehovab di ǀHûǀguitimî-aon ge ra mî ǀnî ǀgapi ǁgauǃnâ ǃkhaigu tawab ge mâsiba ǃgâi tama hâ. Tsî ǁnās ǀkha khoe-e a ǁgauoǃnâ tsî gagasi ǁkhōǁkhōsasib ǃnâ a mâi ǁkhā. ǁNā-amagan ge ǂgui khoen hîna Jehova Eloba ra ǃoabana ǁîn ǀgôana ǁnāti i mâsib ǃnâ ǂgā ǂgao tama hâ. ǁÎn ge ra ǂgom, nē ǀgapi ǁkhāǁkhā ǃkhaigu ain ge ǀgôana ǂhanu tama hâ xūna ra ǁkhāǁkhāhe.
ǂHanu tama ǂâi ǀgaub: Mari-i ge ǂkhîb tsî ǃnorasasib tsîkha ra mā
Mîhe rasa ǃoats ga ǀgapi ǁkhāǁkhāsa ūhâ o, ots ge ǃgâise ra matare tsi sîsen-e a hōǁkhā. ǁNā-amagan ge ǂgui ǂkhamkhoena ǀgapi ǁkhāǁkhāsa ra ǁgūtsâba în ǃkhū ǁkhā. ǀNîn ge ra ǂâi mari-i ǂkhîb tsî ǃnorasasib tsîna nî mā nî ti. Xawe Elobmîs ge ǁnāti i ǂâi ǀgauba ǁause ra ǃgôa. (Aoǁnâ-aob 5:10) Xawe kaise a ǂhâǂhâsa xū-i hînas Elobmîsa ra mîs ge “xūǃgunuxasib a ǂkhaban hoan di ǃnoma xui-ao” tsî hoaǁae Xristeǁî-e daoba xu ra ūbēsa. (1 Timoteub 6:10) Jehovab di ǀHûǀguitimî-aon ge ra dītsâ tsî ra ǂgōsen gāxaǃnâ ǀgaib “ǁuiǃkhūsib” disa xu.—Mateub 13:22.
ǂHanu tama ǂâi ǀgaub: ǀGapi ǁgauǃnâs ǂoaǂamsa ûiba ra mā ǃkhaisa
Aiǁgause, Nika Gilaurib hîna ge ǃkharu ge ǁae Georgiab di ǂguro prime minister ge īb ge ǁîb ǃhūb xa ra mî: “ǀGapi ǁkhāǁkhās grada ūhâs ge kaise a ǂhâǂhâsa Georgiab ǃnâ. . . . . ǃKharu ge ǁae ge grad-e ūhâ tama hâ i ǂkhamkhoe-i ge ǁîn omaris ǁanin xa ǁause gere mûhe.” * Nēs ǃoagus ge Elobmîsa ra ǃkhâikhom î da tā ǃhūbaib ǃnâ ǂkhaisiba ôa. Jesub tsîn ge ǁîb tsēdi ǃnâ ge hâ i, ǂgomdi ǁkhāǁkhā-aoga sao ra-e ge mîba: “Mati du kha a ǂgom ǁkhā, sadu ǃnâ ǃgôa-e ra ūǃoabagu do.” (Johaneb 5:44)ǀGapi ǁkhāǁkhās ǃkhaigu ge ǀgapiǀgapisens gagaba a omkhâi ǁkhā hîna Elob xa ǃhuihe hâ ga—ǂKhoamîdi 6:16, 17; 1 Petrub 5:5
ǂHanu tama ǂâi ǀgaub: Mâ khoe-i hoa-i ge nî mîǁgui tae-i a ǂhanus tsî tsūs ǁaegu
Jehovab di ǀHûǀguitimî-aon ge Elob mûǂuisa xu tae i a ǂhanus tsî tsūs tsîna ra ūǃoa. (Jesajab 5:20) ǀGui ǂkhanib the Journal of Alcohol and Drug Education di ra ǂgaiheb ge ra mî, ǀgapi ǁkhāǁkhā ǃkhaigu tawa hâ ǀgôan ra ǁîn ǀhōsana xu hō ǁgâib ge xūna ra dī “ǂhanus tsî tsūs ǂam-ain a ǂans ǃgâ-ai.” * Nē mûǂuis ge Elobmîs mîmās ǀkha ra ǃgûǀhao: “Tā ǁhapu re: ǂKhaba ǃhoa-ūgu-aidi ge ǃgâi ǂūga ra ǁgaoǁgao.” (1 Korinteǁîn 15:33) ǀGapi ǁkhāǁkhā ǃkhaigu ain ge Elob ra ǂkhā xūna ra dīhe, aiǁgause, ǀhoromâs, ǀhubuǀhubusen xūna sîsen-ūs tsî ǃgame tama hâse ǁgoe-ūgub, nē xūn ge hoaǃnâ-aixa tsî ra ǂkhâǃnâhe dīsa. 1 Korinteǁîn 6:9, 10; 2 Korinteǁîn 7:1.
ǂHanu tama ǂâi ǀgaub: ǀGapi ǁkhāǁkhās ge ǃhūbaiba nî ǃgâiǃgâi
ǂAn da ge a ǂgui khoen ge ǀgapi ǁkhāǁkhāsa ra ǂhâba. ǁÎn ge ǃkhūsib ǂoaǂamsib tsî ǁkhoaxasib tsîna ôa tama hâ, xawe aitsama omkhâisens tsî ǃhūbaiba omkhâis tsîna ra ôa. ǁNā gu ge ǃgâi mîǁguiga xawe Jehovab di ǀHûǀguitimî-aon ge ǀkhara mîǁguiga ǁhûibasen hâ. Jesub khami da ge Elob Gaosib ai ra kō hîna nî ǃhūbaib ǃgomsiga nî ǃgâiǃgâiba. (Mateub 6:9, 10) Xawe da ge nē Elob Gaosib ǃhūbaib ǃgomsiga nî ūbē hāba da ǃâu hâ hîna, Jesub khami “ǃgâiǂhôas gaosib” disa ǃhūbaib ǂhawase ra aoǁnâ. Tsî da ge ǁnās ǀkha ǂgui khoena mâ kurib hoaba ra hui în ǁîn ûiga ǀkharaǀkhara. *—Mateub 24:14.
^ par. 1 Jehova Eloba ra ǃoaba ǂkhamkhoen hîna ǁîn ǁgûn omdi ai ra hân ge ǁîn ǁgûn ǂgaoǀkhās skol ǂgās disa nî ǁnâuǀnam, Elobmîs ǃoagus ga ǁnāsa hâ tama io.—Koloseǁîn 3:20.
^ par. 2 Nēsis kōse da ge 11 miliuns xa ǃnāsa ǂkhanina ǁgâi hâ, aiǁgause, Apply Yourself to Reading tsî Writing di ǀon hâs khami. Tsî da ge khomais kladi tsîna 120 gowagu ǃnâ ǃhūbaib ǂhawase ūhâ. 2003 Sa xu 2017 nî kōse da ge 70 000 khoena matin nî khomai tsî xoa ǀgausa ge ǁkhāǁkhā.
^ par. 3 Khomai re, ǁkhāǁkhāǃâsa “Should I Quit School?”
^ par. 5 Aiǁgause, da ge ǁgûna ra ǂkhâǃnâ în ǁîn ǀgôana skoli ǃoa sî. Khomai re, sao ra ǁkhāǁkhāǃâsa “Should My Child Go to School?” The Watchtower ǂkhanib Maarti 15, 2003ǁîb dib ǃnâ.
^ par. 5 Khomai re, sao ra ǁkhāǁkhāǃâsa “How to Help Your Child Improve His Grades.”
^ par. 7 Toxoba khomai re, jw.org ǃâba “Viewpoints on the Origin of Life.”
^ par. 12 Sîsenǂuiba ūhâ ekonomib: Ekonomib tsî ǂhanub ǀkharaǀkharas Georgiab ǃnâ 2004—2012, 170ǁî ǂhaweb ai.
^ par. 14 Volume 61, No. 1, Aprili 2017, 72ǁî ǂhaweb ai.
^ par. 16 Toxoba jw.org ǃâba khomai re, “The Bible Changes Lives” ama aiǁgaudi Elobmîs tsî Gaosib ǀgaib xa, di hâba.