1. Mâna ǃgâi ǃaromana ǁāǁnâhes ǃgao?

 JEHOVA Elobats a ǀnam, mâ ǃgâi ǀkhaeb hoaba ge mā tsi ba, ûib tsîna ǃkhōǂgā hâse? Sa ǀnamats ǁîba ra ǁgau ǂgao? ǃGâi ǀgaub nēsa dīs ge sa ûiba Jehovaba ǃoa mā tsî ǁāǁnâ kaisensa. Nēsats ga dī ots ge Jehovab omaris di ǃâ kai ǁkhā. Nēs xa ǃaromahe hâseb ge sa ǁGûb tsî ǀHōsaba daoǁgau tsî nî kōǃgâ tsi, ǁîb omaris di ǃâts a amaga. (Psa. 73:24; Jes. 43:​1, 2) Māǁnâsen tsî ǁāǁnâ kaisens ge ǃēsa nî mā tsi îts ǀamosib kōse ǃgâiaǂgao.—1Pet. 3:21.

2. Tae-e da nē ǁkhāǁkhāǃâs ǃnâ nî ǃhoaǃgao?

² ǁĀǁnâhe ǂgaots ra xawe i xū-e ra ǃkhō-oa tsi? Ti i ga ī, ots ge ǀguri hâ tama. ǂGuin ge ǀkharaǀkharana ge dī ǁîn tanisen ǀgaub tsî ǂâiǀgaub ǃnâ în ǁāǁnâhe ǁkhā. Tsîn ge ǁîna nēsi Jehovaba ǃgâiaǂgaob tsî ǁkhoaǂgaosib ǀkha ra ǃoaba. ǂGurokam ǁaeb Xristeǁîn hîna ge ǁāǁnâhena xu da tae-e nî ǁkhāǁkhāsen? Hā re î da ǁîn gere hōǃâ ǃgomsina ǃhoaǃgao tsî mû tae-e da ǁnāpaxu nî ǁkhāǁkhāsensa.

SAMARIAǁÎN GE GE ǁĀǁNÂHE

3. Samariaǁîna mâ ǀkharaǀkharana ga dī hâ în ǁāǁnâhe?

³ Jesub tsēdi ǃnâ ge hâ i Samariaǁîn ge ge gagasi khoe-i. ǂGui Samariaǁîn ge Judiab noordes ǃnâ gere hâ, ǁāǁnâhen  nîs aiǃân ge Elobmîsa ǃgâise nî ǂan. Samariaǁîn ge Elobmîs di ǂguro koro ǂkhanidi ǀguide gere ūǃoa, Genesisa xu Deuteronomiums kōse. Tsî īǁkhāsib ga hâ o Josuab di ǂkhanis tsîna. Samariaǁîn ge Deuteronomium 18:​18, 19 ǃnâ hâ mîmâis Elob ge dīs xa ǃaromahe hâse gere ǃâubasen Mesiab nî hā ǃkhaisa. (Jhn. 4:25) Xawen ga ǁāǁnâhe ǂgao, on ge Jesuba mîmâisa Mesiab ase nî ūǃoa. Amase ‘ǂgui Samariaǁîn’ ge ǁnāsa ge dī. (Jhn. 4:39) ǂGui Xristeǁîn ge Jodeǁî ī amaga i ge Samariaǁîna Jodeǁîn ǃoagun ūhâ ǃhaoǃnâbe ǀgorasa nî dawa ge is ge.—Luk. 9:​52-54.

4. ǃNaeǃkhaidi 8:​5, 6, 14 ǃoagun ge ǀnî Samariaǁîna mati Filipub haisi-amsa ǃkhōǃoa?

⁴ Tae-e Samariaǁîna ge hui în ǁāǁnâhe? Filipub aoǁnâ-aob ge Samariaǁîna “Xristub xa gere aoǁnâba” tsîn ge ǀnîna ‘Elob di mîsa ge ǃkhōǃoa.’ (Khomai re ǃNaeǃkhaidi 8:​5, 6, 14 sa.) ǁÎn ge Filipuba gere ǃgâ Jodeǁîb ge ī xawe. ǀNîsin ge Elob ǀgora-e ūhâ tama hâ ti gere mî xoade ge ǂâihō. (Deu. 10:​17-19) ǁÎn ge Filipub ge Xristub xa gere ǃhao xūn hoana ‘ǃgaoǃgaxase gere ǃgâ’ tsî ge ūǃoa ǁgauǁgaun hâsa ǁîb Elob gagaba ūhâsa. Filipub ge ǂgui buruxa dīn tsîna gere dī, aiǁgause ǀaesen hânab ge ge ǂgauǂgau tsî demonga khoena xu gere ǃkhaeǂui.—ǃNǃkh. 8:7.

5. Tae-ets Samariaǁîna xu ǁkhāǁkhāsen ǁkhā?

⁵ Samariaǁîn ge Filipuba xu xū-e ǁkhāǁkhāsensa ga ǂkhā hâ, ǁîb ge Jodeǁî ī tsîn ge ǀnîsi noxopa nēti ī ǁkhāǁkhāde ǁnâu tama hâ i ǃkhais ǃaroma. Xawen ge ǁnāsa ge mā-am tama hâ i. Samariaǁîn ge ge ǁāǁnâ kaisen Filipub xan ge ǁkhāǁkhāhe xūn a amasan ge mûǃā o. Elobmîs ge ra mî: “Xawen ge ǁîna Filipub di aoǁnâs ǃGâiǂhôas Elob Gaosib dis tsî Jesub Xristub di ǀons xa ra ǃgûsa ǁnâu tsî ge ǂgom, tsîn ge ǂguin âna ge ǁāǁnâhe.” (ǃNǃkh. 8:12). ǂGom îts ra Elobmîs amaba ūhâ ǃkhaisa? Tsîts ra ǂgom Jehovab ǃoaba-aon ge ǁkhāǁkhāsensa în ǀnamma ǁgau Jesub ge mî khami? (Jhn. 13:35) Ti i nî īs ka o, tā ǃao ǁāǁnâhesa. ǂGomǃgâsibats ge a ūhâ ǁkhā Jehovab nî ǀkhae tsi sa.

6. Rubenni aiǁgausa mati a hui tsi ǁkhā?

⁶ Rubenni Duitsǃhūba xu ra hāb ge Jehovab ǃoaba-aon omaris ǃnâ ge kai. Xaweb ge ǂkhamsis ǃnâ gere îganǀgē Elob ama hâ ǃkhaisa. Tae-e ge hui bi îb Elob hâ ǃkhaisa mûǂan? Nēs xab ǂâunase ǂan tama hâsab ge ge mûǂan tsîb ge ge mîǁgui îb ǃnāsase ǁkhāǁkhāsen. ǁÎb ge ra mî: “Elobmîsa ta ge aitsama gere ôaǃnâ î ta amaba ǂan. Evolusib xa hâ xoaǂamsa ta ge ǂguiǃnāde ge ǁkhāǁkhāsen.” Is daar ‘n skepper wat omgee vir jou? ti hâ ǂkhanisab ge ge khomai. Nē ǂkhanis ge Rubena kaise ge hui. ǂÂib ge ge amaseb ge Jehovaba ûitsâma. Rubenni ge dana berosa sari toas khaoǃgâb ge ǀguiǃnâxasib ǃnân ǃgâsana ǃhūbaib ǂhawase ra hâ ǀgauba ǃnāsase ge ǀnam. Duitsǃhūba ǃoab ge oa, ob Rubenna 17 kurin ǀkha ge ǁāǁnâ kaisen. Elob, Elobmîs tamas ka io ǀnî hâ xoaǂam i xats ga îganǀgē, o ôaǃnâde dī re sida ǂkhanin ǃnâ. Îganǀgēs ge “ǂgoms tsî ǂans” ǀkha ra danhe. (Efe. 4:​13, 14) ǃHūbaib ǂhawasen ǃgâsana ǀnammi tsî ǀguiǃnâxasiba ra ǁgau ǀgausats ga sa ǀhaohâb ǃnâ mû, ob ge sa ǀnamma ǁîn ǃaroma nî ǀarosen.

SAULUB TARSUS DIB GE RA ǁĀǁNÂHE

7. Mâǀgaub ǃnâb ga Sauluba ǁîb ǂâiǀgauba dawa hâ?

⁷ Saulub Tarsus dib aiǁgausa ǃgaoǃgâ re. ǁÎb ge ǀgapi ǁkhāǁkhāsensa Jodeǁîn  ǂhanugu ǃnâ ge ūhâ i tsîb ge hoa khoen xa ge ǂanhe i Jodeǁîn ǁaegu. (Gal. 1:​13, 14; Fil. 3:5) ǁNā ǁaeb ain ge ǂgui Jodeǁîna gere ǂâi ǃnāsa Xristeǁîn ǁnāǁgôa hâsa, ǁnā-amagab ge Sauluba ǁîna gere ǃgôaǃgon. ǁÎb ge gere ǂâi Elob ǂâisab ra dīsa. (ǃNǃkh. 8:3; 9:​1, 2; 26:​9-11) Saulub ga Jesub ǃnâ ǂgom tsî ǁāǁnâsa Xristeǁî kai ob ge ǁîb tsîna nî māsenxa îb ǃgôaǃgonhe.

8. (a) Tae-e Sauluba ge hui îb ǁāǁnâ kaisen? (b) ǃNaeǃkhaidi 22:​12-16 ǃoagu, Ananiaba mati Sauluba ge hui? (Ai-īsiba mû re.)

⁸ Tae-e Sauluba ge hui îb ǁāǁnâ kaisen? Jesub ge Saulub ǀkha ǀhomma xu ǃhoa, ob ge ǃnâba ǁîba ge ǂgī kai. (ǃNǃkh. 9:​3-9) ǃNona tsēdeb ge ǂû tamase hâ tsî gere ǂâiǃgâ tae-i go ǁîb ǀkha īsa. Saulub ge ǂgomǃgâsiba ge ūhâ i Jesub ge Messia isa tsî ǁîb saosaben ge ama ǂgomde gere ôaǃnâsa. Saulub ge ǀnîsi ǁgaise gere tsâ Stefanni ǁōbab ge mā-am amaga. (ǃNǃkh. 22:20) Anania ti ǀon hâ ǁkhāǁkhāsabeb ge Saulub tawa sī, ǂgauǂgaubi tsî ǁîba ge ǂkhâǃnâ îb ǁāǁnâhe. (Khomai re ǃNaeǃkhaidi 22:​12-16 sa.) Saulub ge ge ǃgamǃgamsenxa i, Ananiaba ǃgâ tsî ge ǁāǁnâhe.—ǃNǃkh. 9:​17, 18.

9. Tae-ets Sauluba xu ra ǁkhāǁkhāsen?

⁹ Tae-e da Saulub aiǁgausa xu nî ǁkhāǁkhāsen? ǁÎb ge ǀgapiǂâixasib tamas ka io khoena ǃaos di ǂâiǀgauba ga mā-am hâ îb tā ǁāǁnâ kaisen. Xaweb ge ǁnāsa ge mā-am tama hâ i. Saulub ge ǃgamǃgamsenxase tsî māsenxase ǀkharaǀkharana ǁîb ûib ǃnâ ge dī îb Jesub di saosabe kai. (ǃNǃkh. 26:​14, 19) Saulub ge māsenxase ge Xristeǁî kai ǁgâiǀāheb nî ǃkhaisab ge ǂan i xawe. (ǃNǃkh. 9:​15, 16; 20:​22, 23) ǁÎb di ǁāǁnâs khaoǃgâb ge aiǃgû tsî Jehovab ai ge ǂgomǃgâ îb huihe tsî ǃkharagagu ǃgomsina mâǃkharu. (2Kor. 4:​7-10) Sa ǂgoms ge nî ǃâitsâhe tamas ka iots ge ǀnî hâ ǀgaub ǃnâ a ǃgôaǃgonhe ǁkhā, Jehovab ǃoaba-aon asets ga ǁāǁnâhe o. Xawe ǂgomǃgâsiba ūhâ Elob tsî Jesub tsî kha nî  hui tsi sa mâǀgai tsî ǂgomǂgomsase hâ ǀgarasa.—Fil. 4:13.

10. Mati da Annas aiǁgausa xu ǃgâiba a ǀama ǁkhā?

¹⁰ Annas ge Europab aiǂoas ǃnâ ge kai. ǁÎs mamasas ge ǁāǁnâhes khaoǃgâs ge khoese kurin ǀkha Elobmîsa ge ǁkhāǁkhāsen tsoatsoa. ǁÎs ǀaokhoen ge Jehovab ǃoaba-aon ǀkhas Elobmîsa ra ǁkhāǁkhāsensa ǁnâu, on ge ge mâǃoa si tsoatsoa. ǀAokhoen ge gere ǂgom, kai ǃnâts hâ ǂgomsats ga ǁnāxū ots ge omarisa ra tao kai. Annas ge 12 kurixa, os ge ǁîsa dadasaba ge ǂgan îs ǁāǁnâhe. ǁÎb ge gere ǂan ǂgao ǁîs ge nē mîǁguiba aitsama a dīsa tamas ka ios ge ǀnî khoe-i xa a dī kaihesa. ǁÎs ge ǃeream tsî ge mî: “Tita ge Jehovaba a ǀnam.” ǁÎs dadab ge ge mā-am is ǁāǁnâhe. ǁĀǁnâs khaoǃgân ge ǁîs ǀaokhoena ǁgaise gere hâ-ū si. ǁÎs ǀaokhoen ǀgui-i ge ge mîbasi: “ǁGauoǃnâ ûiba ûis ge a ǃgâi Jehovaba ǃoabas xa.” Tae-e Annasa ge hui? ǁÎs ge ra mî, “Jehovab ge ǀgaiba ge mā te tsî ǁnās ǂam-ai ra ge ti mamas tsî dadab tsîna ge ǂkhâǃnâte.” Annas ge Jehovab ge huisi ǁaega xoamâi hâ. ǁÎs ge ǁaeba xu ǁaeb ǀkha xoamâis ge xūna ra kō hîna ge huisina îs Jehovab ge huisi ǀgauga tā ǀuru. Mâǃoahesats ga ǃao, o ǂâis ǃnâ ūhâ re Jehovab ge nî hui tsi.—Heb. 13:6.

KORNELIUB GE GE ǁĀǁNÂHE

11. Korneliuba mâ mâsiba ge ūhâ?

¹¹ Korneliub aiǁgausa xus tsîna da ge ǂhâǂhâsa xūna a ǁkhāǁkhāsen ǁkhā. ǁÎb ǃnāga i ge 100 Romeǁî toroǃkham-aoga ge hâ i. (ǃNǃkh. 10:1) ǁÎb ge ǀhûhâsib ǃnâ tsî toroǂans ǃnâ ge ǂanǂansa i. Tsîb ge khoena ǂgui ǀgaugu ǃnâ gere “ǃgâidī.” (ǃNǃkh. 10:2) Jehovab ge apostel Petruba ge sî îb Korneliuba ǃgâiǂhôasa aoǁnâba. Korneliuba ge ǃkhō-oasen ǁāǁnâhesa, ǂanǂansab ge i amaga?

12. Tae-e Korneliuba ge hui îb ǁāǁnâ kaisen?

¹² Tae-e Korneliuba ge hui îb ǁāǁnâhe? Elobmîs ge ra mî ǁîb ge ‘kaise ge eloǃaoǃgâxa i tsî ǁîb di omaris ǀkha Israeli di Eloba gere ǃoaba.’ ǁÎb ge aiǃgû tsî Eloba hoaǁae ǀgores ǃnâ gere ǀkhoma. (ǃNǃkh. 10:2) Petrub ge Korneliub tsî ǁîb omarisa ǃgâiǂhôasa aoǁnâba, on ge ǁîna Xristuba ge ūǃoa tsî ge ǁāǁnâ kaisen. (ǃNǃkh. 10:​47, 48) Korneliub ge ǀkharaǀkharana ge dī ǁkhā i îb ǁîb omaris ǀkha ǀguiba Jehovaba ǃoaba.—Jos. 24:15; ǃNǃkh. 10:​24, 33.

13. Tae-e da Korneliuba xu a ǁkhāǁkhāsen ǁkhā?

¹³ Saulub khamib ge Korneliuba ǁîb ǃkharos xa ǃaromahe hâse ga Xristeǁî kai tama hâ. Xaweb ge ǁnāsa ge mā-am tama hâ i. ǂGui ǀkharaǀkharanats ge sa ûib ǃnâ nî dī ǁāǁnâhe ǂgaots ga o. Jehovab ge nî hui tsi ǁnāsa dīsa. Elobmîs ǁgaraga sa ûib ǃnâ sîsenū sats ga mîǁgui, ob ge Jehovaba nî ǀkhae tsi.

14. Tae-e da Tsuyoshib aiǁgausa xu ra ǁkhāǁkhāsen?

¹⁴ Tsuyoshi ti ǀon hâ khoeb Japanni ǃnâ ra hâb ge ǀkharaǀkharana ǁîb sîsenni ǃnâ ga dī hâ îb ǁāǁnâhe ǁkhā. ǁÎb ge Ikenobo skoli tawa gere sîsen skoli danab ǀkha, blomna kha ge îsa ǀgaub ǃnâ gere ani. Skoli danab ge ǁkhōde hâǃnâ tama gere i ob ge Tsuyoshiba ǁîba gere mâǂgāba. Tsî i ge ǁnā ǁkhōdi tawa ama tama ǂgomdi ǁnaetiga gere dīhe. Amabab ge ǁōb xa a ǁkhāǁkhāsen ob ge ge ǂan-i nē ǁkhōdi xūnab ga aiǃgû tsî hâǃnâ, ob ǁāǁnâhe tidesa. ǁÎb ge ge mîǁguibasen ǁnā ǁkhōdeb ǁkhāpa hâǃnâ tidesa. (2Kor. 6:​15, 16) Tsuyoshib ge skoli danab ǀkha nēs xa ge  ǃhoa. ǀAmǂoasa ge tae-i? Tsuyoshib ge ǁîb di sîsenne ge ǃkhōǀgara nau ǂgomdi ǁnaetigu ǃnâ ǃâ-e ūhâ tamase. ǁÎb ge kuribab Elobmîsa ǁkhāǁkhāsen hâs khaoǃgâ ge ǁāǁnâhe. a Sîsenni mâsibats ga ǀkharaǀkhara ǂgao o îts Jehovaba ǂkhîǂkhî, ots ge ǂgomǃgâsiba a ūhâ ǁkhā ǁîb sats tsî sa omarisa nî kōǃgâsa.—Psa. 127:2; Mat. 6:33.

KORINTEǁÎN GE GE ǁĀǁNÂHE

15. Korinteǁîna tae-i xa ga ǂhanihe hâ ǁāǁnâhesa?

¹⁵ ǀOrokam ǁaeb Korintes ǃnâ gere hâ khoen ge ǃkhūsiba ge ǀnam-i tsî ǁgauoǃnâ ûiba gere ûi. ǂGui khoen ǁnāpa gere hân ge Elob ge ūǃoa tama hâ i ǀgaub ǃnâ gere ûi. ǁNā ǃās ǃnâ gere hâ khoena i ge kaise ga ǃgomba hâ Jehovaba ǃoabasa. Xaweb ge apostel Pauluba ǁnā ǃās ǃnâ ǃgâiǂhôasa ge aoǁnâ Jesub xa. “Tsîn ge ǂgui Korinteǁîn hîa ge nē ǂhôasa ǁnâun tsîna ǂgom tsî ge ǁāǁnâhe.” (ǃNǃkh. 18:​7-11) Jesub ge apostel Pauluba ge mîba: “Nē ǃās ǃnâ ta ge ǂgui khoena ūhâ.” Paulub ge ge aiǃgû tsî ǀgui tsî ǃkhare kuriga ge aoǁnâ.

16. Korintes ǃnâ ge hâ i khoen ǀnîna tae-i xa ge hui-e în ǁāǁnâ kaisen? (1 Korinteǁîn 6:​9-11)

¹⁶ Korinteǁîna tae-i xa ge hui-e în ǁāǁnâhe? (Khomai re 2 Korinteǁîn 10:​4, 5 sa.) Elobmîs tsî Elob ǃanu gagab ge ǁîna ge hui în ǃkhaese ǀkharaǀkharana ǁîn ûigu ǃnâ dī. (Heb. 4:12) Korintes ǃnâ ge hâ i khoen hîna ge Xristub xa hâ ǃgâiǂhôasa ūǃoan ge ǁgai ǁnaetiga ge ǁnāxu aiǁgause kaise ās, ǃnarib tsî mofin ûiǀgaub tsîna.—1Kor. 6:​9-11. b

17. Tae-e da Korinteǁîna xu nî ǁkhāǁkhāsen?

¹⁷ Korintes ǃnâ hâ khoen ge ǂgui ǀkharaǀkharana ga di hâ. ǁÎn ge ge ǂâi tama hâ i ǁnāsa dīs kaise a ǃgomsa în Xristeǁî kai. ǁÎn ge ǃgarise ge sîsen în ǀamo ûiba ǃoa garu ǀui daob ai ǃgû ǀgara. (Mat. 7:​13, 14) ǀKharaǀkharana sa ûib ǃnâ dīs xats a ǃgombahe îts ǁāǁnâhe? Tā ǀûsen re ǀkharaǀkharana dīsa. Jehovaba ǀkhoma re îb ǁîb ǃanu gagab ǀkha hui tsi îts ǁgai xūna dīsa xu ǃkhō-oasen.

18. Matits Monikas aiǁgausa xu ǃgâiba a ǀama ǁkha?

¹⁸ Monikas, Georgiab dīs ge ǃgarise ge dītsâ is ǀurixa ǃhoa ǀgauba tā sîsenū tsî ǃgâi tama xūna ǃgâ tsî kō ǀû îs ǁāǁnâhe  ǁkhā. ǁÎs ge ra mî: “ǁĀǁnâhe ta nîs aiǃâ ta ge Jehovaba ǃoa ge ǀgore îb ǀgaiba mā te î ta ǀkharaǀkharana dī. Jehovab ge ge ǂan i ǂhanu xū-e ta gere dī ǂgaosa tsîb ge hui te tsî ge daoǁgaute.” Monikas ge 16 kurixas ge o ge ǁāǁnâhe. ǀNî ǁnaetinats nî ǁnāxū îts Jehovaba ǂgaoǀkhāb ra ǀgaub ǃnâ ǃoaba? Aiǃgû tsî Jehovab ai ǀgaiba ǂgan re îts ǀkharaǀkharana dī. Jehovab ge ǃkhō-oa tamase ǁîb ǃanu gagaba nî mā.—Jhn. 3:34.

ǀGAISA ǂGOMSATS GE ŪHÂ ǁKHĀ

19. Tae-e nî hui tsi îts ǃgom mâsiga mâǃkharu? (Ai-īsiba mû re.)

¹⁹ ǂGomǃgâ re Jehovab kaise a ǀnam tsi tsî ra ǂhâbasa îts ǁîb omaris di ǃâ kai. Nēs ge a ama matikō ǃgomsinats ga hōǃâ xawe îts ǁāǁnâhe. Jesub ge ǁîb di ǁkhāǁkhāsabe ge mîba: “Amase ta ra mîba go, mostardǃkhomro-i khami ǂkhari ǂgomsa go ga ūhâ tsî nē ǃhommi ǃoa ‘Nēpaxu nauǀî gon’ ti mî ob nî gonbēsa. Elob ǃnâts ga ǂgom, ots ge xū-i hoa-e a dī ǁkhā.” (Mat. 17:20) ǁNān Jesub ge mî mîde ge ǁnâun ge ǁîb ǀkha ǀoro kurigu ǀgui ge hâ i. ǁNās ǀkha i ǁîn ǂgomsa ǃaruǀî nî kai ge īs ge. Jesub ge ǁîna ǂgomǃgâsiba ge mā ǀgaisa ǂgomsan ga ūhâ ob Jehovaba ǁîna nî huisa, în ǃgomse ra mûsen ǃgomsina sîsenǂam. Jehovab ge ǁnāsa dīs ǀkha nî hui tsi.

20. ǂGurokam ǁaeb Xristeǁîn tsî nētsēkam ǁaeb aiǁgaude mati ra ǂkhâǃnâ da?

²⁰ Sa ûib ǃnâ î ga xū-e ǁkhae tsi ǁāǁnâhesa, o nēsa sîsenǂams ǃoagu ǃkhaese xū-e dī. ǂGurokam ǁaeb Xristeǁîn tsî nētsēgam ǁaeb din aiǁgaudi tsîn xa ǁkhaeǂgaohe tsî ǀgaiǀgaihe re. A-i ǁîn aiǁgaude ǂkhâǃnâ tsi, îts Jehovab ai māǁnâsen tsî ǁāǁnâ kaisen. Nēb ge kaise ǃgâi mîǁguib dīts nîba.