1. ǀHomǃgāba tae-e ra mî tsî ǁnāsa sida mati ra tsâǀkhā?

 ǀHOMǃGĀ-I ga sadu ǀkha ǃhoa, o ǃgâ î du nî ǁî-i ra mî xū-e? Nētsēb ge ǀhomǃgāba “ǃhūbaib ai ǁan hâ ǁaes, ǃhaos, gowab tsî khoen” ǀkha ra ǃhoa. Tae-eb ra mî? ‘Eloba ǃao, î ǁîba ǃgôasiba mā . . . ǀgoreǀî re ǁîb ǀhommi tsî ǃhūbaib tsîna ge kuruba.’ (J.ǂHa. 14:6, 7) Jehovab ge ǀguri ama Eloba, hoada ge ǁîba nî ǃoaba. Matikōse da a ganganbi ǁkhā îxa aiǂhanub hînab ge mā dab ǃaroma, î da ǁîba ǁîb kai gagasi tempeli ǃnâ ǃoaba.

2. Jehovab gagasi tempela a tae? (“ Tae tama i hâ” ti hâ boksisa khomai re.)

² Gagasi tempela a tae tsî mâpa da ǁgûiǃā ra ǂansa hō ǁkhā? Gagasi tempeli ge kuru mâisa om tamaba. Jehovab ǂnûiǂgās ge ǁîb ra ūǃoa ǃoabas ǃaroma, Jesub xoremaris ǁguibas ai ǃgaoǃgaosaba. Apostel Paulub ge nē ǂnûiǂgāsa ǁîb ǂguro ǂkhanis, Hebreǁî Xristeǁîn hîna Judiab ǃnâ ra hâna ǃoab ge xoas ǃnâ ra ǁgûiǃā. b

3-4. Apostel Pauluba mâ ǂâiǂhansende Judiab ǃnâ ge hâ i Hebreǁî Xristeǁîn ǃoagu ge ūhâ i? Tsî matib ge ǁîna hui?

³ Pauluba tae-i ǃaroma ǁîb sîǂkhanisa, Judiab ǃnâ ra hâ Hebreǁî Xristeǁîna ǃoa ge xoa? ǀGam ǃaroma ra ge hâ:  ǂGurose ǁîna ǂkhâǃnâs ǃaroma. Xristeǁî kain nîs aiǃân ge ǂguina Jodeǁî ǂgomsa gere sao. Xristeǁî kain ge, on ge ǁîn Jodeǁî ǂgaeǂgui-aon xa gere ǃhōhe. Tae-i ǃaroma? Xristeǁîn ge ǁguiban altar-i, ǃoaba ǃnân nî tempel-i tsî ǂgaeǂgui nî pristeri tsîna ūhâ tama hâ i amaga. Nēn xa ǃaromahe hâsen ge Xristub saosabena gere ǂkhapuǂâi tsî î ge ǁîn ǂgomsa gere ǂkhapu. (Heb. 2:1; 3:12, 14) ǀNîn ge Jodeǁî ǂgomsa ǃoa-oasa gere ǂâiǃgâ.

⁴ ǀGamǁîseb ge Pauluba ǁnā Hebreǁî Xristeǁîna ge mîba, ǁîn ǁguiǂgāsen, tsî ǀasa tamas ka io “ǀgaisa ǂû-i” Elobmîs ǃnâ hâ ǃgam gagasi ǁkhāǁkhāde ǁnâuǃā tamasa. (Heb. 5:11-14) ǃGāsa i ge a ǂguin ge noxoba Moseb ǂhanuba gere saosa. Paulub ge ge ǁguiǃā ǁnā ǂhanub gere ǂgaoǀkhā ǁguiba di ge khoen ǁorena hoase ūbē tama hâ isa. ǁNā-amaga i ge nē ǂhanuba ‘ǃaruǀî ge sîsenūhe ǁoa i.’ Paulub ge aiǃgû tsî ǃgam amab Elobmîs ǃnâ hâba ǁîna ge ǁkhāǁkhā. ǁÎnab ge ge ǂâiǂâiǃnâ ‘ǃgâi ǃâubasens’ Jesub xoremarib ǁguibas ai ǃgaoǃgaosaba, hîna ama hui nî ǁkhāba în ‘Elob kōse ǀgū.’—Heb. 7:18, 19.

5. Tae-e da nî ǁnâuǃā Hebreǁî ǂkhanisa xu? Tsî tae-i ǃaroma?

⁵ Paulub ge Hebreǁî ǃgâsana ge ǁguiǃāba, nēsin Jehovaba Xristeǁîn ase ra ǃoaba ǀgaub ǃkharugeb xa a ǃgâi ǃkhaisa. Jodeǁîn ge ǂhanub ǃoagu gere ǃoaba ǀgaub ge “ǃgôaxaǁaeb di som, xawe amab ge Xristub ǃnâ hâ.” (Kol. 2:17) Xū-i xa ra dīhe som-i ge ǁnā xū-i ǀkha ǀgui tama hâ xawe i ge ǁnā xū-i īsib ǀguiba ūhâ. ǁKhā ǀgaub ǃnâ da ge a mî ǁkhā, Jodeǁîn ge ǃkharu gere ǁaeb ǃnâ Jehovaba ǃoaba ǀgaub ge som isa, hānîǁaeb ǃnân ǃgâi ǀgaub ǃnâ Eloba nî ǃoabas dib nî hāse ge ī xūiao. Jehovab ge ǂnûiǂgā xū-e da ge nî ǁnâuǃā, sida ǁoren ǀûbasa da ga ǂhâbao, î da ǁîb ǂhâba hâ ǀgaub ai ǁîba ǃoaba. Hā re î da ‘somma’ (Jodeǁîn ǃoaba ǀgauba) ‘amab’ (Xristeǁîn ǃoaba ǀgaub) ǀkha ǀgopeǀnō Hebreǁîn ǃnâ î ra ǁguiǃāhe khami. ǁNāsa da ga dī, o da ge gagasi tempela ǃgâise nî ǁnâuǃā tsî mati i sida ǃkhōǂgā hâ ǀgausa.

6. Tabernakela mati gere sîsenūhe?

⁶ Jodeǁî ǃoaba ǀgaub. Paulub ge ǁîb ǃhoaǃâsa tabernakeli ai ge ǃgaoǃgao, hîna  ge Moseb xa 1512ǁî kuri Jesus ǃnaes khaoǃgâ mâihesa. (“ǃKharuge ǁaeb ǃoaba ǀgaub tsî Xristeǁîn amab” ti hâ boksisa mû re.) Tabernakeli ge Israelǁîn ge tani tsî gere doemâ ū tents khami gere mûsen. ǁAubexan ge 500 kuriga nē tabernakela ge sîsenū tempeli Jerusalems ǃnâ nî omhes aiǃâ. (Eks. 25:8, 9; Num. 9:22) Nē “Tentommi” ǃnân ge Israelǁîna ǀhao tsî Eloba ǀgū, ǁîn ǁguibade dī tsî gere ǃoaba. (Eks. 29:43-46) Xaweb ge nē tabernakela Xristeǁîn ǃaroma nî hā ǃgâi xū-i tsîna gere ǂnûǁkhaeba.

7. Gagasi tempela mâǁae ge tsoatsoa?

⁷ Xristeǁîn ǃoaba ǀgaub. ǃKharuge ǁaeb tabernakeli ge ‘ǀhomsi xūn sommi’ ase ge ī-i tsî Jehovab kai gagasi tempela ǃoa gere ǁnaeǁgau. Paulub ge nē “tentommi” [tamas ka io tabernakeli] xa saorase gere mî, “nēs ge ǁgauǁgaus nē hâ ǁaeb ǁga ra ǁnaeǁgausa.” (Heb. 8:5; 9:9) Hebreǁîna ǃoab gere xoa ǁaeb ǃnâ i ge ǀnai nē gagasi tempela ge hâ i. Nēs ge 29ǁî kurib ǃnâ ge ge tsoatsoa. ǁNā kurib ǃnâb ge Jesuba ǁāǁnâhe tsî ǃanu gagab ǀkha ge ǂkhauhe. Tsîb ge Jehovab “kai ǀgapipristeri” ase gagasi tempeli ǃnâ gere ǃoaba. c—Heb. 4:14; ǃNǃkh. 10:37, 38.

8-9. Hebreǁîn 7:23-27 ǃoagu, i mâ ǃkharagagusiba hâ Israeli di ǀGapipristeri tsî kai ǀGapipristeri Jesu Xristub ǁaegu?

⁸ ǃKharuge ǁaeb ǃoaba ǀgaub. ǀGapipristeri ge khoena Elob aiǃâ gere ǂnûǁkhaeba. Israelǁîn di ǂguro ǀgapi pristeri Aronni ge Jehovab xa ge ǁgau mâihe tabernakeli ge māǁnâhe tsēs ai. Xaweb ge Pauluba ge ǁguiǃā: “ǂGui ǃgôab ǃnâ hâ pristergu ge ge mâihe, ǁōb xa ǃaromahe hâse gu ge pristerse hâhâ ǁoa i xui-ao.” d (Khomai re Hebreǁîn 7:23-27 sa.) ǁNā ǀgapi Pristergu ge ǀaosa kurusa ūhâ tama hâ i amaga gu ge ǁîgu ǁōren ǃaroma ǁguibade gere dī. Nēb ge kai ǃkharagagusiba Israelǁîn di ǀGapipristeri tsî kai ǀGapipristeri Jesu Xristub ǁaegu.

⁹ Xristeǁîn ǃoaba ǀgaub. ǀGapipristeri aseb ge Jesuba “Hoan xa ǃAnu ǃKhaib, Tentommi hîa khoe-i xas ose, xawe ǃKhūb xa aitsama kuruhe hâb ǃnâ ra ǃoaba.” (Heb. 8:1, 2) “Jesub ge ǀamose ûi hâ tsî ǁîb di pristersis ge māǃkhuniguhe ǁoa” tib ge Pauluba ge ǁguiǃā. ǀAro tsîb ge ge mî Jesub ge ‘ǃanu, ǀhapio, ǁoreo tsî ǁore-aona xu ǀgorahe hâ.’ Tsî ‘Israeli ǀgapipristergu ge tsēkorobe aibe ǁîgu di ǁoren ǃaroma ǁguibagu, khamib ge Jesuba ǁguibasa dīsa ǂhâbasa tama.’ Altardi, ǃkharuge ǁaeb ǁguibadi tsî Xristeǁîn ǃoaba ǀgaub ǁaegu hâ ǃkharagagusib xa ǁkhāǁkhāsen re.

10. Kopper-e xu kurusa altars ai gere dīhe ǁguibana tae-e ǃoa gere ǁnaeǁgau?

¹⁰ ǃKharuge ǁaeb ǃoaba ǀgaub. Tabernakeli ǃaugab, ǂgâ-ams tawa i ge Jehovaba ǃoa gere ǁguibahe xamnin altars koper-e xu kurusasa ge hâ i. (Eks. 27:1, 2; 40:29) Xawen ge ǁnā ǁguibana khoen ǁōrena hoase ge ǁûba ǁoa i. (Heb. 10:1-4) Tabernakeli tawa gere dīhe xamarin ǁguibadi ge, khoen ǁōren nî ǀûbahe ǀgauba ǃoa gere ǁnaeǁgau.

11. Mâ altars aib ge Jesuba ǁguibas ase māsen? (Hebreǁîn 10:5-7,10)

 ¹¹ Xristeǁîn ǃoaba ǀgaub. Jesub ge ge ǂan i Jehovab ge ǃhūbaiba ǃoa a sîbisa, îb ǁîb di khoesi ûiba xoremarib ase mā, khoen ǃaroma. (Mat. 20:28) ǁNā-amagab ge Jesuba ǁîb di ǁāǁnâs tawa ge māsen îb Jehovab ǂhâba hâ-e dī. (Jhn. 6:38; Gal. 1:4) Jesub ge māsenxase a māsen ai altars ge khoe-i xa ge kuruhe tama hâ i xawe Jehovab “ǂâisa” gere ǂnûǁkhaeba. Jesub ûib ge “ǀguiǃās ama” ge māhe, în khoen hîna ǁîb ǃnâ ra ǂgoman di ǁōrena ǀûbahe ǁkhā. (Khomai re Hebreǁîn 10:5-7, 10 sa.) Saorase da ge tabernakeli ǂganaga ge hâ i xūn ǂâibasensa nî ǃhoaǃgao.

12. Hame-e tabernakeli ǃnâ ge hâ i ǃkharagagu kamerdi ǃnâ ge ǂgâ ǁkhā i?

¹² ǃKharuge ǁaeb ǃoaba ǀgaub. Tabernakeli tsî tempelgu hîna ge Jerusalems ǃnâ gere omhe gu ge ǀguiti gere mûsen. ǂGanaga î ge ǀgam kamera ge hâ i—‘ǃAnu ǃkhaib’ tsî ‘Hoan xa ǃanu ǃkhaib’ ti ge ǂansa ira. Nē ǀgam ǃkhaira ge lapip ǀkha ge ǀgorasa i. (Heb. 9:2-5; Eks. 26:31-33) ǃAnub ǂganaga î ge ǃhuniǀuriba xu kurusa lamdi, altars ǃgâi ham xūn nî ǂhūbi-aihes tsî tafels tsîna ge hâ i. “ǂKhauhesa Pristeri” ǀguib ge ge mā-amsa i, ǃanub ǃnâ ǂgâsa îb ǁgaumâiheb hâ sîsenne dī. (Num. 3:3, 7, 10) Hoan xa ǃanu ǃkhaib ge ǃhuniǀuriba xu kurusa arki ǃgaeǀhaos tiba ge ūhâ  i ǁîb ge Jehovab hâsa gere ǂnûǁkhaeba. (Eks. 25:21, 22) Mâ kurib hoabab ge ǀGapipristeri ǀguiba ge mā-amsa i ǁnā ǀapip ǃnâ-ū hoan xa ǃanub ǃnâ ǂgâsa, ǀûbagus tsēs ai. (Lev. 16:2, 17) Mâ kurib hoabab ge xamanin ǀaob ǀkha gere ǂgâ, îb ǀûbagusa ǁîb tsî hoa ǁaes ǁōren ǃaroma dī. Jehovab ge ǁîb ǃanu gagab ǃnâ-ū tabernakeli ǃnâ ge hâ i xūn tae-e ra ǂnûǁkhaeba ǃkhaisa ge ǂanǂan.—Heb. 9:6-8. e

13. Xristeǁîn ǃoaba ǀgaub ǃnâ i tabernakeli ǃnâ hâ ǃanub tsî hoan xa ǃanuba tae-e ra ǂnûǁkhaeba?

¹³ Xristeǁîn ǃoaba ǀgaub. ǀOro ǃgôab ǁkhāǁkhāsaben Xristub din ge ǃanu gagab ǀkha ǂhausa, tsî ǀō-aisa ǀhōsagusisa Jehovab ǀkha ūhâ. Nē ǀguikaidisi tsî hakadisihakaǀaǀoadisi (144 000) khoen ge Jesub ǀkha ǀhommi ǃnâ pristerse nî ǃoaba. (J.ǂHa. 1:6; 14:1) Tabernakeli di ǃanub ge Elob gagasi ǀgôasen ǃhūbaib ai hâ, hînan ūǂgāhe hâsa ra ǂnûǁkhāeba. (Rom. 8:15-17) Haon xa ǃanu ǃkhaib ge ǀhomma ra ǂnûǁkhaeba, Jehovab ǁanǃkhaisa. ‘ǃAnu ǃkhaiba ge hoanxa ǃanu ǃkhaiba xu gere ǀgora lapip ge Jesub sorosa gere ǂnûǁkhaeba, ǁîb ǁgansi soros ǀkhab ge kai ǀGapi pristerse gagasi tempeli ǃnâ ǂgâ ǁoa-isa. ǁÎb ǁgansi sorosab ge khoen ǃaroma ǁguiba, ob ge dao-amde hoa ǂkhauhesa Xristeǁîn ǃaroma ge ǁkhowa-am. ǁÎn tsîn ge ǁîn ǁgansi sorode nî māǁnâ în ǀhomsi mādawa-amsa hōǁkhā. (Heb. 10:19, 20; 1Kor. 15:50) Jesub ge khâisa hō toas khaoǃgâb ge hoan xa ǃanub gagasi tempeli ǃnâ ge ǂgâ. Tsîn ge hoa ǂkhauhesa ǃgâsan tsîna ǁnāpa ǁîb ǀkha nî ǂgâ.

14. Hebreǁîn 9:12, 24-26 ǃoagu, i Jehovaba gagasi tempeli ǃnâ ǃoabas ǂnûiǂgāsa mati a kai?

¹⁴ Nēba da ge ǃgāsase ra mû Jehovab ǂnûiǂgās, ama ǃoabas tis mati a ǃgâisa. Tsî ǁnās ge Jesu Xristub xoremari ǁguibas tsî pristersis ai a ǃgaoǃgaosa. Israeli di ǀgapipristeri ge khoen xa ge kuruhe hoan xa ǃanub ǃnâ gere ǂgâ, xamarin di ǀaob ǁguiba di ǀkha. Xaweb ge Jesuba hoan xa ǃanu ǃkhaib “ǀhommi ǂûb” ǃnâ ra ǂgâ, îb Jehovab aiǃâ ǂkhai. ǁNābab ge Jesuba ūb ge hâ i ǂhanuba ge ǁguiba, îb ǀoasa kurusa ūhâ khoeb ase ǃhūbaib ai ûi sida ǃaroma. Îb “ǀgui ǃnās ama ǃhūbaib di ǀuni ǁaegu ǃnâ ǁî-aitsama ǁguibasens ǃnâ-u ǁorena” ūbē. (Khomai re Hebreǁîn 9:12, 24-26 sa.) Jesub di ǁguibas ge ǁorena ǀamosib kōse ra ūbē. Saorase da nî ǁkhāǁkhāsen khami da ga nēsi ǀhomsi tamas ka io, ǃhūbaisi ǃâubasensa ūhâ xawe da ge hoada Jehovaba gagasi tempeli ǃnâ ǃoaba ǁkhā.

15. Hame-e tabernakeli kai ommi ǃnâ gere ǃoaba?

¹⁵ ǃKharuge ǁaeb ǃoaba ǀgaub. Tabernakeli ge ǀgui kai yardsa ge ūhâ i hîna ge drab ǀkha omǂnamihe hâ isa, ǁnāpa gu ge prister ga ǁîgu sîsenne gere dī. Kai altars kopper-e xu ge kuruhe hâ îs, khauǁguiba di gere dī-aihes ge nē ai-ommi ǃnâ ge hâ i. Kopper-e xu kurusa ǁgammi ǃores, pristergu ǃanu ǃoabasa gu nî dīs aiǃâ gere ǃanuǃanusen ūs tsîn ge nē ai-ommi ǃnâ ge hâ i. (Eks. 30:17-20; 40:6-8) Ēga gere omhe tempelgu tsîn ge ai-omma ge ūhâ i tsîn ge prister tama ge hâ ina ǁnāpa mâ tsî Eloba ge ǃoaba ǁkhā i.

16. Ham-e gagasi tempeli ai-ommi ǃnâ ge hâ i kamers hoas ǃnâ gere ǃoaba?

¹⁶ Xristeǁîn ǃoaba ǀgaub. ǀHommi ǃnâ  gu Jesub ǀkha pristerse nî ǃoabas aiǃân ge, ǃgau hâ ǂkhauhesa ǃgâsana ǂgomǂgomsase ǃhūbaib ai gagasi tempeli, ai-ommi dib ǃnâ ra ǃoaba. ǁNā kai ǁgammi ǃores ge kai ǂâiǂâisens ase ge i tsî hoa Xristeǁîna ǃoas tsîna a ǂhâǂhâsa în gagasise ǃanuse hâ. Mâpan “kai ǂnubis” khoen hîna Xristub ǂkhauhesana ǂgomǂgomsase ra ǂkhâǃnâna nî ǃoaba? Apostel Johaneb ge trons ‘aiǃân mâse’ ge mû nî, ǁnās ge ǃaugab ai-omi ǀkha a ǀgui. ǁNāpan ge “Elob trons aiǃâ hâ, tsî tsēb tsî tsuxuba ǁîba ǁîb di tempeli ǃnâ ra ǃoaba.” (J.ǂHa. 7:9, 13-15) Kaise da Jehovaba ra ǃgôaǃgâ kai aiǂhanub ǁîb ǃanu tempeli ǃnâ ǃoabas tib ǃaroma.

17. Mâ ǁguibade da aiǂhanub ase ūhâ, Jehovaba ǁguibasa?

¹⁷ Nētsēn ge hoa Xristeǁîna aiǂhanuba ūhâ, Jehovaba ǁguibana dībasa. ǁÎn ǁaeb, ǀgaib tsî ūn hâ xūna sîsenūsa în Elob Gaosiba ǂkhâǃnâ. Apostel Paulub ge Hebreǁî Xristeǁîna mîba khami “a da ǀû tamase Eloba Jesub ǃnâ-u koaǁguiba-i, ǁîb di ǀonsa ra ǂanǃgâ amǁgauga xu ra ǂoaxa-e ǁguiba.” (Heb. 13:15) Jehovaba da ge ǁgau ǁkhā, aiǂhanub ǁîba ǃoaba tsî koas diba da ra ǃgôaǃgâ ǃkhaisa. Sida ǁkhāsib ǃnâ hâ-i hoa-e da ga ǁîba ǃoabas ǃnâ dīo.

18. Hebreǁîn 10:22-25 ǃoagu, da tae-e tātsē ǁnāxu tsî ǀuru tide?

¹⁸ Khomai re Hebreǁîn 10:22-25 sa. ǁÎb di sîǂkhanis Hebreǁînab ge xoabas di ǀams aib ge Pauluba ǀnî xūn hîna da tātsē Jehovab ǃoabas ǃnâ ǁnāxuǃnâ ǁoana ge mî. Nē xūn ge hoaǁae Jehovaba ǃoa ǀgores, nauna aoǁnâbas, ǀhaohâb ase ǀhao tsî ǂkhâǃnâgus tsîna ǃkhōǂgā hâ. Jehovab “tsēs ra ǀgū ǃkhaisa du ra mû” xui-ao. ǂHaiǂhais ǀams ǃoagub ge Jehovab ǀhomǃgāba nē xū-e ǀgomǀgomǃgaos ǃaroma ǀgamǃnāra ra mî: “Eloba ǀgoreǀî!” (J.ǂHa. 19:10; 22:9) Tā da nē Elobmîs ǃgam amab hîna da go Jehovab gagasi tempeli tsî ǀō-aisa ǀhōsagusis sida kai Eloba ǃoabas dib hîna da go ǁkhāǁkhāsena ǀuru!