1-2. Mâpa a ǃgâi ǀgau Elobmîsa khomâi tsî ǁkhāǁkhāsens diba? ǁGuiǃā re.

 MUNANAI re omsa du ra ǁama ǂgaosa. Sadu mîǁguiba du nî dīs aiǃâ du tae-e nî mû ǂgao? Oms di aisǀkhāb ai-īsib ǀguiba? Ama as ge omsa du ge aitsama nî mû ǂgao tsî du ge omsa nî ǃgû ǂnamipe. ǁÎs ǃnâ ǂgâ tsî du ge hoa kamerde nî ôaǃnâ. Î du ǃamkuse mû, taen hoan nē oms di ǃâ ǃkhaisa. ǀNîsi du ge oms di ǀapeǁguiba ra mû ǂgao, î du mû oms ge mati omhesa. ǁNâuǃāxase du ge ǁama ǂgao du ra oms xūn hoana nî kō.

² ǁKhā xū-e da ge a dī ǁkhā Elobmîsa da ga khomai tsî ǁkhāǁkhāsen o. ǀGui xoa-aob ge ge mî: “Elobmîs ge kaise kai tsî kaise ǀgapi ommi khami i. Hîna kaise ǃgam ǃgaoǃgaob ai omhe hâba.” O mati da ǁnâi Elobmîs ǃnâ hâ xūna ǃgâise nî ǂan? Elobmîsa du ga ǃhaese khomai, o du ge ǃgam xūna ǁkhāǁkhāsen tide tsî ‘du ge ǃgaoǃgaob Elobmîs diba ǁkhawa nî ǁkhāǁkhāhe.’ (Heb. 5:12) Oms ǃnâ du nî ǂgâ tsî ǃnāsase nî ǂan khami, du ge Elobmîsa ǂōrisase nî ǁkhāǁkhāsen î du ǃnāsase ǁnauǃā. ǃAmku ǀgaub Elobmîsa da a ǁkhāǁkhāsen ǁkhab ge, mûsa matin ǃkharagagu ǃân Elobmîs dina nau ǃân ǀkha ra ǃgûǀhaosa. Dītsâ re î ǁnauǃā tae-i ǃnâ du ra ǂgomsa tsî ǁkha ǁaeb ai ǁnauǃā re tae-i ǃaroma du nē xū-i a amasa ra ǂgomsa.

3. Apostel Pauluba Xristeǁîna tae-e ge ǂkhâǃnâ în dī? Tsî tae-i ǃaroma? (Efeseǁîn 3:14-19)

³ Elobmîs ǃân hoana da ga ǁnauǃā ǂgao, o du ge ǀnî xūna ǃgamse nî ǁkhāǁkhāsen. Apostel Paulub ge Xrîsteǁî ǃgâsana  ge ǂkhâǃnâ în Elobmîsa ǂōrisase ôaǃnâ, în amab di ǂhaba, gāxu, ǀgapi tsî ǃgam ǃkhaisa ǃgâise ǁnâuǃā. ǁNās ge ǁîn di ǂgomsa “ǃnomaǃkhō tsî nî ǃgaoǃgaohe.” (Khomai re Efeseǁîn 3:14-19 sa.) Sida tsîn ge ǁkhā xu-e nî dī. Hā re î da ǃgamse Elobmîsa ôaǃnâ, î da hoase Elobmîs di ǂâibasensa hō.

4. Tae-e da dī ǁkhā î da Jehovab ǀgūse tsâ? Aiǁgaude mā re.

⁴ Xrîsteǁîn ase da ge ǂkhî tama, Elobmîs di ǃgam xūna da ga ǁnauǃā tama io. Jehovab di ǃanu gagab huib ǀkha da ge, ǃgam xūn Elobmîs ǃnâ hâna ra ǁkhāǁkhāsen ǂgao. (1Kor. 2:9, 10) Projeksa du ge a tsoatsoa ǁkhā î du ǃgamse ôaǃnâ, Jehovab ǀgūse du nî hāsa ǂâis ǃnâ ūhâse. Aiǁgause, du ge a ôaǃnâ ǁkhā matin ge ǃkharu gere ǁaeb Xrîsteǁîna ǀnamma a ǁgau ǀgausa. Tsîs ǁnāsa mati ra ǁgausa, sadob a ǀnam ǃkhaisa. ǁKhāǁkhāsens ǁkhā du ge a matib ge Jehovaba Israelǁîn nî ǃoababi sa gere ǂhâbasa. Tsî a ǀgopeǀnō ǁkhā matib ra ǂhâbasa î da ǃoaba bi. Tamas ka io da ge Jesub ge dīǀoaǀoa kebode a ôaǃnâ ǁkhā nē ǃhūbaib aib ge hâ io.

5. Xū-e hâ hîna du ǃgamse Elobmîs ǃnâ ôaǃnâ tsî ra ǁkhāǁkhāsen ǂgao-e?

⁵ ǀNîn hîna ǃgamse ôaǃnâs xa ǃgâibahen ge saora xūna ge mî, hînan ǃgamse ra ǁkhāǁkhāsen ǂgaona. ǁÎn ge mî xū-i ge “ ǃGamse ôaǃnâs ǃaroma da a dī ǁkhā xūn” ǃnâ ra hōhe. Kaise du ge ǃgâiba a hō ǁkhā nēti i xūna du ga ôaǃnâ o, Ôaǃnâs ǀkha ra hui ǂkhanib Jehovab ǃoaba-aon diba ra sīsen-ūse. Elobmîsa da ga ǃgamse ôaǃnâ, o i ge sida ǂgomsa nî ǀgaiǀgai tsî nî huida î da ǃKhūba “ǃaoǃgâsa ǁnâuǃā.” (ǂKhm. 2:4, 5) Nēsi da ge Elobmîs amab hîna da ǃgaoǃgâxase nî ǁkhāǁkhāsena nî ǃhoaǃgao.

6. (a) ǃKharagagusiba hâ ǀapes tsî ǂâibasens tsîn ǁaegu? (b) Tae-i ǃaroma da a mî ǁkhā, Jehovab ǂâibasens khoen tsî ǃhūbaib ǃaromab ūhâs ‘ǀamosib’ kōse nî hâhâsa? (Efeseǁîn 3:11)

⁶ Aiǁgause ǂâiǃgâ re Elobmîs tae-e Elob  ǂâibasens xa ra mî xū-e. ǀApesa ūhâs ge ǂâibasensa ūhâs xa ǃkharagagu. ǀApes ge daob hîna du ra ǁhûib ǀkha a ǀgopeǀnōhe ǁkhā, hîna sī du nî ǃkhaiba ǃoa ra daoǁgauba. Xawe xū-i ga daoba mâǂgan, o du ge sī ǂgao du ra ǃkhais ai sīho ǁkhā tide. Xawe ǂâibasensa da ge sī ǂgao da ra ǃkhais ǀkha ǀgopeǀnō ǁkhā. ǃAmkuse da ge a ǂan, mâpa da ra ī ǂgaosa xawe da ge ǃkhargaǃnâgu daoga a sīsen-ū ǁkhā ǁnāpa sīs ǃaroma. Tsî î ga ǀgui daoba xū-i xa mâǂganhe, o da ge ǀnî hâ daoba a ū ǁkhā. ǃGôaǃgâ da ge ra Jehovab ge ǁaeb ǀkha ǁîb di ǂâibasensa Elobmîs ǃnâ sida ǀkha a ǀgoragusa. Jehovab ge ǃkharagagu ǀgauga a ǁhûi ǁkhā, îb ǁîb di ‘ǂâibasensa’ dīǀoaǀoa. (Efe. 3:11) “ǁÎb ge kuru xū-i hoa i ge ǁî-i di ǃaromasa ūhâ.” (ǂKhm. 16:4) Tsî Jehovab ra dī xū-i hoa-i ge ǀamosib kōse nî hâhâ. Jehovab di ǂâibasensa a tae? Tsî mâ ǀkharaǀkharanab ge dī, îb nē ǂâibasensa dīǀoaǀoa?

7. ǂGuro khoeb ge ǁnâuǀnamoǃnâ, ob ge Jehovaba mati ǁîb ǂâibasensab nî dīǀoaǀoa ǀgausa ǀkharaǀkhara? (Mateub 25:34)

⁷ Elob ge ǂguroseb ge kuru khoera ǁîb ǂâibasens a taesa ge mîba. ǁÎra ge ge mîbahe “Ôananôagu, î ǃgôab ǃnâ ǂguiǂguisen, î ǃhūbaiba ǀoaǀoa, î ǁîb ǂama gaosîsen. ǁKhati hurib ǁaun, ǀhommi anin tsî hoaraga xamarin tsî ǀguruǃnôan ǂama gaosîsen re.” (Gen. 1:28) Adammi tsî Eva hâra ge Jehovaba ǁnâuǀnamoǃnâ, o i ge ge ǂâibasen tama hâ î Jehovab ǂâibasens dīǀoaǀoahe tide ti. ǁÎb ǂâibasensab nî dīǀoaǀoa ǀgausab ge ge ǀkharaǀkhara. ǂGui kurina ǃkharu hâseb ge ge mîmâi Gaosibab ǀhommi ǃnâ nî ǂnubisa, ǁîb di ǂâibasensa nî dīǀoaǀoase, khoesib ǃaroma nē ǃhūbaib ai. (Khomai re Mateub 25:34 sa.) Jehovab ge ǁîb ge ǁhûi ǁaeb ai ǀnamxaǃnâse ǁîb di ǀguise ǃnaehâ ǀgôaba ǃhūbaiba ǃoa ge sî, îb khoena ǁnā Goasis xa ǁkhāǁkhā. Tsî ǁîb ûiba mā îb ǂgui khoena ǁōb tsî ǁoreba xu sâu. Tsîb ge Jesuba ǀhomma ǃoa khâisa ge māhe îb Gao-aose Elob Gaosib ǃnâ ǂgaeǂgui. Xawe i ge ǂgui xūna hâ Elob ǂâibasens xa da ǁkhāǁkhāsen ǁkhāna.

8. (a) Elobmîs xoaǂamsa a tae? (b) Efeseǁîn 1:8-11 ǃoagub, Jehovab tae-i tsîna nî sīǃnâ? (Tsoatsoas ai hâ ai-isiba mû re.)

⁸ Elobmîs di danaǂâibasens ge îs Jehovab ǀonsa khaihe, ǁîb di ǂâisab ga nē ǃhūbaib ai dīǀoaǀoa o. Jesub xa ra ǂgaeǂguihe Gaosiba ra sîsenūse. Jehovab ǂâibasens ge a dawahe ǁoa, ǁîb ge mîmâi xūn hoan ge nî dīǀoaǀoahe. (Jes. 46:10, 11, Heb. 6:17, 18) ǁAeb ra ī khamib ge nē ǃhūbaiba paradaisa ǃoa nî ǀkharaǀkharahe. ǀOasa kurusa ūhâ khoen tsî ǂhanu-ai khoen Adammi tsî Eva hâra di surib din ge ‘ǀamosib kōse nî ûi.’ (Psa. 22:26) Xawe Jehovab ge nēs ǀguisa dīǀoaǀoa tide. ǁÎb ǃoaba-aon hoanab ge nî ǀguiǃnâxa kai, ǀhommi tsî ǃhūbaib ai. Tsîn ge hoana Jehovaba ǂgomǂgomsase ǁîn ǂgaeǂgui-aob ase nî ǁnâuǀnam. (Khomai re Efeseǁîn 1:8-11 sa.) Buru tama du hâ Jehovab nē īxa ǀgaub ǃnâ ǁîb mîmaisa nî dīǀoaǀoasa?

9. Elobmîsa da ga khomâi, o da matikō ǃgamse hānîǁaeb ǃnâ a mû ǁkhā?

⁹ ǂÂiǃgâ re kēbos hînab ge Jehovaba Edeni ǃhanab ǃnâ māsa, Genesis 3:15 ǃnâ xoamâihe hâsa. b Xūn hîna nî īna ǃoa î ge ra ǁnaeǁgau hîna ǁîb ǂâibasensa nî dīǀoaǀoana. Xawen ge ǁnā xūna 1000 kurigu  khaoǃgâ ǀgui ge ī. Aiǁgauseb ge Eloba Abrahama ge mîba, ǂgui kurigu khaoǃgâb ǁîb di suriba xu Xristuba nî hā ǃkhaisa. (Gen. 22:15-18) Tsî 33ǁî kuri Xristub ǃnaes khaoǃgâ î ge Jesuba ǃnôas ai ge nâhe, mîmâihe î ge hâ i khami. (ǃNǃkh. 3:13-15) ǀUniga ǃâb ǁnā kēbos dib ge ǁGâuab di danas nî ǂkhūǂkhūhesa, ǁnās ge hânîǁaeb ǃnâ nî ī. (J.ǂHa. 20:7-10) Elobmîs ge ǂgui xūn hîna nî īn xa ra mî, ǁGâuab ǃhūbaib tsî Jehovab di ǀapeǂhomis ūhâ khākhoesis ra ǀgai hîna.

10. (a) Mâ xūna ǀgūǁae nî ī? (b) Mati da sida ǂâis tsî ǂgaob tsîna a aiǂhomi ǁkhā? (ǀGamirosa mû re.)

¹⁰ ǀNî buruburuxa xūn hîna Elobmîs ǃnâ hân xa ǂâi re. ǂGurosen ge khoena “ǂkhîb tsî ǃnorasasib ge hâ” ti nî ǂgaiǂûi. (1Tes. 5:2, 3) ‘ǃKhaese’ î ge kai ǁgâiǀāba nî tsoatsoa nē ǁaedi ga hoa ama tama hâ ǂgomde ǁnâǂam o. (J.ǂHa. 17:16) ǁNâs khaoǃgâ î ge buruburuxa ǀgaub ǃnâ ‘khoen Ôaba ǀgaib tsî kai ǂkhaisib ǀkhab ǀhommi di ǃâudi ai ǃgoaxase nî mûhe.’ (Mat. 24:30) Jesub ge khoena nî ǀgoraǃgâ, pirin tsî gūn ase. (Mat. 25:31-33, 46) Nē ǁaeb ǃnâb ge ǁGâuaba, ǁîb mâǃoas ǀkha nî âiǃgû tsî Jehovab ǃoagu nî sîsen. Elob khoenab ǁnātikose ǃhui hâ amagab ge ǃhaode nî ǀhaoǀhao, Elobmîs ge nē ǃhaode Gogi Magogi di ra ǂgai, ǁîn ge Elob di khoena nî ǁnāǂam. (Ese. 38:2, 10, 11) ǂKhauhesa Xrîsteǁîn hîna ǀhommi ǃnâ hân ge nî ǀhaoǀhaohe, în ǀhommi ǃnâ Xristub ǀkha ǁîb di ǀhommsi toro ǂnubis ǀkha Armagedons di toroba ǃkham. ǁNās ge kai ǁgâiǀāb di ǀamsa. c (Mat. 24:31; J.ǂHa. 16:14, 16) ǁNās khaoǃgâs ge Xristub di 1 000 kurigu di ǂgaeǂguisa nî tsoatsoa, ǃhūbaib ǂhabase.—J.ǂHa. 20:6.

11. ǀAmo ûiba ūhâs di ǃaubasensa tae-e ra ǂâibasen? (Ai-īsiba mû re.)

¹¹ Nēsisa 1 000 kurigu khaoǃgâ nî ī xūn xa ǂâi re. Elobmîs ge ra mî, sida Kuru-ob ge khoesiba ‘ǀamosiba a mâi-aiǃâsa.’ (Aoǁn. 3:11) Nēs tae-e sadu ǃaroma ra ǂâibasens xa ǂâi re tsî Jehovab ǀkha du  ūhâ ǀhosagusis tsîna. Draw Close To Jehovah, ti ǀon hâ ǂkhanis di 319ǁî ǂhaweb ge saora xū-e ra mî, “sida ga duisend tamas ka io miliundi tamas ka io billiuns di kuriga ûis khaoǃgâ da ge nēsi da Jehovab xa ǂans xa ǃnāsase nî ǂan. Xawe da ge noxoba nî tsâ ǂgui buruxa xūn hâsa Jehovab xa da nî ǂana. ǂÂihōs tsîna da ge hî ǁoa matikōse i īxa tsî nî ǃgâi ǀgausa nē paradais ǃnâ ûisa. Tsî hoan xa a îxa i ge Jehovaba ǃoa ǀgūsa.” Nē hâ ǁaeb ǃnâ aiǃgû tsî da Elob xa ra ǁkhāǁkhāsen khami, taena noxoba hâ ǃgamse da nî ôaǃnâna?

12. Mati da ǀgapise ǀhomgu ǃnâ a kōǂgâ ǁkhā? Aiǁgau-e mā re.

¹² Elobmîs ge ǂkharirose ra ǁguiǃāba da mati i a îxasa, Jehovab ais-ai hâsa ǁîb hîna ‘ǀgapise ǁanhâba.’ (Jes. 33:5) Elobmîs ge buruxa xūn Jehovab xa hân tsî ǀhommsi ǃâb ǁîb ǀapeǂhomis diba xas tsîna ra ǁguiǃāba da. (Jes. 6:1-4; Dan. 7:9; J.ǂHa. 4:1-6) Aiǁgause Esekieli ge mû buruburuxa xūn xa da ge a khomai ǁkhā. ǁÎb ge ge xoa ‘ǀhommi ge ǁkhowa-amsen, o ta ge Elob di ai-e ge mû.’—Ese. 1:1.

13. Hebreǁîn 4:14-16 ǃoagu, Jesub ǀhomma xu ra dī xū-i xa du mati ra tsâ?

¹³ Jesub di ǃâb xa ǂâiǃgâ re, ǀkhomxaǂgaoxa ǀGapipristeri hîna ǀhomma xu, sida di Gao-aob ase ra ǂgaeǂguiba. ǁÎb ǃnâ-ū da ge Elob di “ǀkhommi trons” aiǃâ a ǂkhai ǁkhā, ǀgores ǃnâ-ū tsî huiba ‘ǂhanu ǁaeb ai’ a ǂgan ǁkhā. (Khomai re Hebreǁîn 4:14-16 sa.) Hā re îda tsēs hoasa ǂâiǃgâ Jehovab tsî Jesub ra dība da xūn xa tsî hāniǁaeb ǃnâ kha ǀhomma xu nî dī xūn xas tsîna. ǁÎkha sida ūba hâ ǀnammi ge nî tsâǀkhā da, î da ǂgaob ǃgamsiba xu Jehovaba ǃoaba.—2Kor. 5:14, 15.

14. Mâ ǃgâi xū-e da a dī ǁkhā, î da Jehovab tsî Jesub tsikha ra dī xūna da ra ǃgôaǃgâsa ǁgau? (Ai-isiga mû re.)

 ¹⁴ ǀGui ǃgâi ǀgaub hîna da Elob tsî ǁîb ǀgoab ra dība da xūna ra ǃgôaǃgâs ge dītsâsa, î da nau khoena hui în ǁîn tsîna Jehovab di ǃoaba-ao tsî Jesub di ǁkhāǁkhāsabe kai. (Mat. 28:19, 20) Nē i ge Apostel Paulub ge ganganxasiba xu a dī-e, Jehovab tsî Xristub tsikha ǃaroma. ǁÎb ge ge ǂan i “mâ khoe-i hoa-i nî ǃgâiǃō tsî amaba ǂan ǃkhaisab ra ǂgao amaga.” (1Tim. 2:3, 4) ǁÎb ge kaise aoǁnâ sîsenni ǃnâ ǃgarise gere sîsen, îb ǂgui khoena hui ǁkhā, ‘mâ ǀgaus hoas aib ǀnîna nî ore ǁkhāse.’—1Kor. 9:22, 23.

15. Psalmdi 1:2 ǃoagu, tae-e nî ǂkhî kai da?

¹⁵ ǂHanuseb ge Psalmdi xoa-aoba ge ǁguiǃā, ǂkhî tsî ǃgâiǃo khoe-i ge “ǃKhūb di ǂhanub ǃnâ ǃgâiǃgâisen tsî ǁîba tsēs tsî tsuxuba ra ǂâiǃgâ.” (Psa. 1:1-3) ǀGui Elobmîs ǂnûiǃkhûni-aob ge nē xoadi xa saorase ge mî: “Khoe-i ge ǁnātikōse Elob di daoǁgausa ôaǃnâ, ǁkhāǁkhāsen tsî gaxu ǁaeba ǁnāsa dīs ai ǂâisa nî ǂnûi, î-i Elobmîs xa ǂâiǃgâ.” Aiǃgû tsîb ge ge mî; “tsē-i ga khoe-i Elobmîsa khomâi tama hîna ǃkharu, os ge ǁnā tsēsa ǂhôab khami i.” ǃGâiba du ge a hō ǁkhā Elobmîsa ǁkhāǁkhāsen tsî du ga ǃgâiǃgâibasensa ǂgui ǂhâǂhâsa tsî buburuxa xūn ǁîs ǃkhōǂgā hâna mû tsî matin ra ǃgûǀhaos tsîna mûo. Kaise i ge a ǁkhoaxa ǂhabasib, ǃgamsib tsî gaxusib Elobmîs diba ôaǃnâsa.

16. Tae-e da saora ǁkhāǁkhāǃâs ǃnâ nî ǃhoaǃgao?

¹⁶ Elobmîs ǃnâ hâ îxa amab Jehovab ra ǁkhāǁkhā dab ge kaise ǃgom tama hâ ǁnâuǃāsa. Saora ǁkhāǁkhāǃâs ǃnâ da ge ǃgam Elobmîs amaba saora xūn xa hâba nî ôaǃnâ. Jehovab di kai gagasi tempeli Paulub ge ǁguiǃāb, ǁîb sîǂkhanis Hebreǁî Xristeǁîna ǃoa. Amase as nē xoaǂamsa kai ǂkhîba mā du.