1. Mâ ǃâb Jakob mîdi diba da nē ǁkhāǁkhāǃâs ǃnâ nî ǃhoaǃgao?

 JAKOB ǀgôagu ge ǁîb ǂnamipe ǂnû tsî ǃgâise gere ǃgâ, ǁîgu di ǁgûb ge tae-e ǁîga gere mîba ǂgaosa. ǃKharugo ǃâs ǃnâ da ge go ǁkhāǁkhāsen Jakob ge ǁîb di ǀgôaga ǃâubasen tama gu hâ xūna mîbasa, Rubenni, Simeonni, Levib tsî Judab tsîga. ǁÎgu ge ǁnîsi gere ǁnâu ǂgao tae-eb Jakoba ǁîb di ǃgau hâ ǁhaisa ǀgôaga nî mîbasa. Hā re î da kō tae-e da Sebulonni, Isaskari, Danni, Gadi, Aseri, Naftalib, Josefi tsî Benjamanni tsîna ǃoab ge mî mîde xu a ǁkhāǁkhāsen ǁkhāsa. a

SEBULONNI

2. Jakoba tae-e Sebulonna ge mîba tsî nē mîde mati ge ama kai? (Genesis 49:13) ( Boksisa mû re.)

² Khomai re Genesis 49:13 sa. Jakob ge ge mî Sebulonni surib hurib xōǀkhā nî hâsa, ǁîn ge nordes ǀkharib ǃnâ nî hâ mîmâisa ǃhūb ǃnâ. Sebulonni surib ge 200 xa ǃnāsa kuriga ǃkharu tsî ǃhūba ge ǀumi. ǁNā ǃhūb ge Galileab hurib tsî Mediteranean hurib ǁaegu ge ǁgoe ī. Moseb ge ge kēbo: “Ab Sebulonna hurib aib ga ǂoa ǁaeb ai ǃgâiǃgâxa.”  (Deu. 33:18) Nēs ge ǀnîsi gere ǂâibasen Sebulonni surib supuse ǂoa tsî ǁamaxu ǁkhā i ǃkhaisa ǀgam hurikha ǁaegub ge ǁān hâ i amaga. ǁNās ga hâ xawe i ge Sebulonni di suriba ǃaromasa ge ūhâ i ǃgâiaǂgaosa.

3. Tae-e a hui da ǁkha î da ū da hâ xūn ǀkha ǂâu?

³ Tae-e da nēsa xu ra ǁkhāǁkhāsen? Hoaǁae da ge ǃaromasa ūhâ ǃgâiaǂgaos disa, mati ǀguib ga sida mâsiba ī xawe. ǃGâiaǂgaoba da ga ūhâ ǀgara ǂgao, o da ge ū da hân ǀkha nî ǂâu. (Psa. 16:6; 24:5) Kaise i ge a supu ǃgâiaǂgaoba ǂoaǃnâsa, ūhâ tama da hâ xūn ai da ga ǂâisa ǂnûio, ǃgâiaǂgao kai da ra xūn xa. ǁNā-amaga ū du hâ ǃgâi xūn xa ǂâi tsî ǃgâiaǂgaoba sadu ûib ǃnâ ūhâ.—Gal. 6:4.

ISASKARI

4. Jakoba Isaskara tae-e ge mîba tsî ǁnā mîde mati ge dīǀoaǀoahe? (Genesis 49:​14, 15) ( Boksisa mû re.)

⁴ Khomai re Genesis 49:​14, 15 sa. Jakob ge Isaskara ǃgari sîsenni ǃaroma ge koa, ǁîb ge Isaskara ǀgaisa donkib, ǃgom xūna ra tanib ǀkha ge ǀgopeǀnō. Jakob ge Isaskari ǃgâi ǃhūba nî hō ti ge mî. ǁÎb mîdi ge ge dīǀoaǀoahe, Isakari surib ge Jordan ǃāb xōǀkhā hâ ǃhūba hō amaga hîna ge ǃgâise gere ǂûtaniba. (Jos. 19:22) ǁNā-amagab ge Isaskari suriba ǃgarise gere sîsen în ǁîn ǃhūba kōǃgâ tsî naun tsîna hui. (1Gao. 4:​7, 17) Aiǁgause ǂhanuǂhanu-aob Baraki tsî kēbo-aos Deboras, ge Israelǁîna huiba ǂgan în Sesirias ǃoagu ǃkham ob ge Iaskari suriba māsenxase ge hui. Nau ǁaegu ai ǃkhams tsîna gu ge ge māsenxa i.—ǂHǂh. 5:15

5. Tae-i ǃaroma da ǃgarise nî sîsen?

⁵ Tae-e da nēsa xu ra ǁkhāǁkhāsen? Jehovab ge ǁîb di ǃoabas ǃnâ da ra dī ǃgari sîsen-e ra ǃgôaǃgâ, Isaskari surib gere dī ǃgari sîsen-eb gere ǃgôaǃgâ khami. (Aoǁn. 2:24) ǃGaoǃgâ re, ǀhaohâgu ǃnâ ǃgarise ra sîsen ǃgâsagu aiǁgaude. (1Tim. 3:1) Nē ǃgâsagu ge ǃoman ǀkha ǃkham tama xawe gu ge ǃgarise ra sîsen î gu ǃgâsana ǁkhauba, în ǁîn ǀhōsagusis Jehovab ǀkhan ūhâsa tā tsûtsûhe. (1Kor. 5:​1, 5; Jud. 17-23) ǁÎgu ge ǃgarise sîsen tsî ǃhoade ra aiǂhomi î gu ǃgâsana ǀhaohâb ǃnâ ǂkhâǃnâ.—1Tim. 5:17.

DANNI

6. Mâ ǁgaumâisas ge Danni ǃhaosa ǃkhōǃoa? (Genesis 49:​17, 18) ( Boksisa mû re.)

⁶ Khomai re Genesis 49:​17, 18 sa. Jakob ge Danna kai xamaniba ra ǁnāǂam ǀaob ǀkha ge ǀgopeǀnō, aiǁgause torob ǃnâ ra sîsen-ūhe hāb tsîna nî ǃgam hōse. Danni di ǃhaos ge kaise ge ǁkhoaǂgao i tsî Israelǀaes khākhoena ǁnāǂams ǃaroma ge aiǂhomisa i. Mîmâisa ǃhūb ǃoan gere ī ǁaeb ǃnâs ge Danni di ǃhaosa “ǃgâb ǀkhāba ǃûis” ǃereamsa ge ūhâ i. (Num. 10:25) Hoaǁae di ge nau ǃhaode, Danni ǃhaos ǃgâb ai ra dī xūn hoana mû tama hâ i xawes ge ǁîn ǁgaumâisa kaise ge ǂhâǂhâsa i.

7. Jehovab ǃoabas ǃnâ da ra hō ǁgaumâidi xa da mati nî tsâ?

⁷ Tae-e da ra ǁkhāǁkhāsen? ǀNî ǁaegats ge sîsenne dī tsî a tsâ ǁkhā naun dīts go sîsenne mû tamasa. ǀNîsi du ge sala ǃanus tsî kōǃgâs, ǂkharis kai ǀhaos tamas ka io ǀkharib kai ǀhaos tawa hui tamas ka io nau sîsenna kōǃgâs ǀkha gere hui. ǃGâi i ge a nē ǀgaugu ǃnâ huisa. ǂÂis ǃnâ ūhâ re Jehovab ge ǁîba du ra dība xūna ra mû tsî ra ǃgôaǃgâ. Jehovab ge ra ǃgôaǃgâ ǁîba du ra ǃoabao, nau khoen xa du ra koahe ǂgao amagas ose xawe ǁîba du a  ǀnamsa du ra ǁgau ǂgao amaga.—Mat. 6:​1-4.

GADI

8. Tae-i ǃaroman ge Israeli khākhoena supuse Gadi ǃhaosa ǁnāǂam ǁkhā i? (Genesis 49:19) ( Boksisa mû re.)

⁸ Khomai re Genesis 49:​17, 18 sa. Jakob ge ge kēbo Gadi nî ǁnāǂamhesa. Tsî 200 kurigu khaoǃgâs ge Gadi ǃhaosa Jordanǃāb nau ǀkhāb ai hâ ǃhūba ge ǀumi, ǁnā ǃhūb ge Israelǁaes khākhoen ǀgūse ge hâ i. ǁNā ǃās khoen ge ǁîna supuse ga ǁnāǂam hâ. Nēn hoan ǃnâs ge Gadi ǃhaosa ǁnāpa gere hâ ǂgao, ǃhūb ge ǃgâise gere ǂûtani amaga. (Num. 32:​1, 5) Gadǁîn ge kaise ge ǁkhoaǂgaoxa i khoena. Jehovab ain ge gere ǂgomaiǂnûi ǁînab nî huisa în ǁîn khākhoen ǃoagu ǃkham dan tsî ǁîb xan ge māhe ǃhūba ǁkhauba. ǂGui kurigan ge ǁîn toroǃkham-aoga ge sî î gu nau ǃhaode ǃkham hui, în mîmâisa ǃhūb Jordanni westes ǃnâ ǁgoeb hoaba dan. (Num. 32:​16-19) ǁÎgu ge gere ǂgomǃgâ Jehovab ǁîgu omaridi, taradi tsî ǀgôan tsîna nî ǁkhaubasa ǀkhai gu a ǁaeb ǃnâ. Jehovab ge ge ǀkhaegu ǁîgu ǁkhoaǂgaoxasib tsî māsenxa ǁguibas ǃaroma.—Jos. 22:​1-4.

9. Jehovab ai da ga ǂgomaiǂnûio da mâ mîǁguiga nî dī?

⁹ Tae-e da nēsa xu ra ǁkhāǁkhāsen? Jehovaba  ǃoabas ga ǃgomo da ge nî aiǃgû ǁîb ai ǂgomaiǂnûisa. (Psa. 37:3) Hoaǁae i supu tama xawen ge ǂguina ǃgarise ra sîsen în gaosib oms sîsen ga ǂkhâǃnâ, ǂhâsib hâba aoǁnâ tamas ka io nau ǁgaumâide kōǃgâ. Jehovab ǁîna ra kōǃgâsan ra ǂgomǃgâ amagan ge nēsa ra dī.—Psa. 23:1.

ASERI

10. Aseri ǃhaosa tae-e ga dī hâ? (Genesis 49:20) ( Boksisa mû re.)

¹⁰ Khomai re Genesis 49:20 sa. Jakob ge ge kēbo Aseri ǃhaos nî ǃhūsa tsî ǁnās ge ge i. Aseri ǃhaos ge ǃgâise ra ǂûtani ǃhūba ge ǀumi. (Deu. 33:24) ǁÎn di ǃās ge Mediteranean hurib xōǀkhā ge ǁgoe i tsî ǂgaudi ge Sidons ǃnâ gere mâ ǃkhaib tsîna ge ǃkhōǂgā hâ i. Xawes ge Aseri ǃhaosa Kanaanǁîna ǃhūba xu ge ūǂûi ǁoa i. (ǂHǂh. 1:​31, 32) Kanaanǁîn ǃhūsib tsî ǁgai ǀgaugu xas ge Aseri ǃhaosa ge ǂgaeǂhapuhe tsî ǁnās xa Jehovab ǂâisa dīs ǀkha ge ǁae tama hâ i. Aiǁgause ǂhanuǂhanu-aob Baraki ge Israelǁîna huiba ǂgan în Kanaanǁîn toroǂnubis ǃoagu ǃkham, os ge Aseri ǃhaosa ge hui ǂgao tama hâ i. ǁNā-amagan ge Jehovab ge Israelǁîna “Megidos ǃārob amǃgâ” dība xūna ge mû tama hâ i. (ǂHǂh. 5:​19-21) Aseri ǃhaos ge ǀnîsi ge tao Baraki tsî Deboras ǁnae-ams di mîden ge ǁnâu o,  mîrasa: “Aseri ǃhaos ge hurib tawa ge hâ.”—ǂHǂh. 5:17.

11. Tae-i ǃaroma da mari-e ǂgurose sida ûib ǃnâ mâisa xu nî ǂgōsen?

¹¹ Tae-e da nēsa xu ra ǁkhāǁkhāsen? Jehovaba da ge ǁkhā da a-i hoa-e ra dība ǂgao. ǂAnbasen da ge nî î da tā nē ǃhūbaib khoen ūhâ ǂâiǀgauba ūhâ, mari-i tsî ūn hâ xūn nē ǃhūbaib ǃnâ a ǂhâǂhâsa ti ra ǂâina. (ǂKhm. 18:11) Mari-e da ga ǂhâ xawe da ge ǁnās ǃnāsase Jehovaba ǃoabas xa ǂhâǂhâsa ti tsâ tama hâ. (Aoǁn. 7:12; Heb. 13:5) Sida ǁaeb tsî ǀgaiba da ge ǂhâ tama da hâ xūn ai sîsen-ū tama hâ. ǁKhā da a-i hoa-e da ge Jehovaba ra dība. ǂGomǂgomsase da ga hâ, ob Jehovaba ǀāsa ǃhūbaib ǃnâ nî mādawa-am dasa da a ǂan amaga.—Psa. 4:8.

NAFTALIB

12. Jakob ge Naftalib ǃoagu a mî mîde mati ge dīǀoaǀoahe? (Genesis 49:21) ( Boksisa mû re.)

¹² Khomai re Genesis 49:21 sa. Jakob ge ge mî Naftalib “îsa mîde nî ǃhoasa,” ǁnās ge ǀnîsi Jesub ge aoǁnâ sîsenni ǃnâ gere ǃhoa ǀgauba ǃoa ra ǁnaeǁgau. Jesub ge ǃnāsa ǁaeba Kapernaums ǃnâ gere hâ, ǁnā ǃās ge Naftalib ǀkharib ǃnâ ge hâ i. ǁNā-amagas ge Kapernaumsa “ǁîb ǂhunuma ǃās” ti ge ǂansa i. (Mat. 4:13; 9:1; Jhn. 7:46) Jesajab ge ge kēbo Jesub “kai ǃnâb” ase Sebulonni tsî Naftalib khoen ǃoagu nî īsa. (Jes. 9:​1, 2) Jesub ‘ge ge ama ǃnâ i, ǃnâb hîa mâ-i hoa-i ai ra ǃnâba’ ǁîb di ǁkhāǁkhādi ǃnâ-ū.—Jhn. 1:9.

13. Mati da sida ǃhoa ǀgaub ǀkha Jehovaba a ǂkhî kai ǁkhā?

¹³ Tae-e da nēsa xu ra ǁkhāǁkhāsen? Tae-e da ra mîs tsî mati da ra mîs ǃnâb ge Jehovaba ǃgâiǃgâibasensa ūhâ. Mati da “îsa mîde” a sîsen-ū ǁkhā Jehovaba ra ǂkhîǂkhîde? ǂGurose, amaba da ge nî ǃhoa. (Psa. 15:​1, 2) ǁNāpaxu da ge nauna ra ǂkhâǃnâ xūna nî mî aiǁgause, nauna da ge nî koa ǃgâi xūnan ga dīo. Dītsâ da ge nî î da tā naun ra dīsā xūn xa ǃhoa tamas ka io ǃgae. (Efe. 4:29) ǁGamǀhaode da ra tsoatsoa ǀgauba ǃgâiǃgâis mîǁguiga da ge a dī ǁkhā tsî khoena Jehovab xa a mîba ǁkhā.

JOSEFI

14. Josefi xa hâ kēbosa mati ge dīǀoaǀoahe? (Genesis 49:​22, 26) ( Boksisa mû re.)

¹⁴ Khomai re Genesis 49:​22, 26 sa. Jakob ge Josefi ai ge ǂnīsa i tsî “ǁîba ǃgâsa ga xu ge ǀgora.” ǁÎbab ge “ǂûtanixa” hais di ǁnâub ǀkha ge ǀgopeǀnō. Jakob ge hais ase ge ǀgōpeǀnōsen tsî Josefa ǁnâub ase. Josefi ge ge Jakob di ǂguro ǀgôa i ǁîb ǀnaǀnamsa taras Raxels dība. Jakob ge ge kēbo Josefi ǂguro ǃnaesabesis di ǀumisa nî hōsa, Leas di ǂguro ǀgôab Rubenni ga hō hâsa. (Gen. 48:​5, 6, 1Kro. 5:​1, 2) Nē kēbos di ǃâb ge ge dīǀoaǀoahe, Josefi ǀgam ǀgôakha Efraimmi tsî Manaseb tsîkha ge mâb hoaba ǁîb ǃhūba a ǀumio, Israelǁaes di ǃkharagagu ǃhaora ase.—Gen. 49:25; Jos. 14:4.

15. Josefa mati ge tanisen ǂhanuoǃnâsibab ge hōǃâo?

¹⁵ Jakob ge ge mî khākhoen Josefa “ǂāb tsî khās ǀkha nî ǁkhâu” ǃkhaisa. (Gen. 49:23) Josefi ǃgâsagu ge ǁîba suri, ǁgaise hâ-ū tsî ge ǃaroma îb ǁgai xūna ǃkharuǃnâ. Josefi ge ǁîb ǃgâsaga ge ǃhui tamas ka io Jehovaba ge ǀhapi ǂgā-am tama hâ i. Jakob ge mî khami i ge Josefi “khāsa ǀkhamasase ge hâ tsî ǁôagu ge ge ǀgaiǀgaihe.” (Gen. 49:24) Josefi ge Jehovab ai ge ǂgomaiǂnûi ǁîb ǃgomsigu ǃnâ tsî ǁîb ǃgâga ge ǀûba tsî khoexaǃnâse  ge ǃkhōǃoagu. (Gen. 47:​11, 12) Josefi ge ǁîb ǃgomsi ga ge mā-am îb ǃgâi khoe kai. (Psa. 105:​17-19) ǁNās xa ǃaromahe hâseb ge Jehovaba ǁîba ǂhâǂhâsa ǀgaugu ǃnâ ge sîsen-ū ǁkha i.

16. Josefi aiǁgausa mati ǃgomsigu ǃnâ a hui da ǁkhā?

¹⁶ Tae-e da nēsa xu ra ǁkhāǁkhāsen? Tā mā-am re ǃgomsin xa ǃaromahe hâse Jehovaba du ūba hâ ǀnamma ǂoaǃnâ tsî sadu ǃgâsana xu ǃnūsa. Jehovab ge ǃgomsina a mā-am ǁkhā î da aiǃgû tsî ǃgom ǁaegu ǃnâ ǁîba ǃoaba ǀgara. (Heb. 12:7) Nēti ī ǁkhāǁkhās ge a hui da ǁkhā î da sida Xristeǁî ǀgauga ǃgâiǃgâi aiǁgause, ǀkhomxasib tsî ǀûbaǀnamxasib tsîna. (Heb. 12:11) Jehovab ge sida mâǀgais ǃaroma nî mādawa-am da, Josefi khami.

BENJAMINNI

17. Benjaminni xa hâ kēbosa mati ge dīǀoaǀoahe? (Genesis 49:27) ( Boksisa mû re.)

¹⁷ Khomai re Genesis 49:27 sa. Jakob ge ge mî Benjaminni ǃhaos ǂkhiras khami nî īsa tsî ǃgâi ǃkham ǁkhāsib tsîna nî ūhâsa. (ǂHǂh. 20:​15, 16; 1Kro. 12:2) Sauli ge ge lsraelǁaes di ǂguro gao-ao i, ǁîb ge Benjaminni ǃhaosa xu gere hā. ǁKhoaǂgaoseb ge Filisteǁîn ǃoagu ge ǃkham. (1Sam. 9:​15-17, 21) ǂGui kurina ǃkharu tsîs ge gao-aos Esters tsî Mordekaib tsîna Israelǁaesa ǃgamhesa xu ge sâu, ǁîra tsîn ge Benjaminni ǃhaosa xu gere hā.—Est. 2:​5-7; 8:3; 10:3.

18. Mati da Benjaminni ǃhaos ǂgomǂgomsasiba a ǁgae ǁkhā?

¹⁸ Tae-e da nēsa xu ra ǁkhāǁkhāsen? Benjaminni ǃhaos di khoen ge kaise ge ǂkhî i Sauli ge gao-ao kaio. Egab ge Jehovaba Davida gao-aob ase ge ǁgaumâi, Judab ǃhaosa xu ra hāba xawen ge Benjaminǁîna ǁaeb ǀkha Davida ge ǂkhâǃnâ tsoatsoa. (2Sam. 3:​17-19) Kurina ǃkharu tsî di ge 10 ǃhaode Judab ǃhaos ǃoagu khâikhâisen, os ge Benjaminni ǃhaosa ǂgomǂgomsase Judab ǃhaos tsî Jehovab ge ǁgaumâi gao-aob ǃoagu ge hâ. (1Gao. 11:​31, 32; 12:​19, 21) Benjaminni ǃhaos khami da ge Elob ǃoagu ǂgomǂgomsase a hâ ǀgara ǁkhā tsî ǁîb ǁgaumâi hâ aogu ǃoagus tsîna.—1Tes. 5:12.

19. Jakob mîde xu da mati ǃgâiba a ǀama ǁkhā?

¹⁹ Jakob di ǀuniga mîde xu da ge hoa da ǃgâiba a ǀama ǁkhā. Jakob di kēbodi xa da ra ǁkhāǁkhāsen xūn tsî dīǀoaǀoahe di ge ǀgaus ge ǂgomǃgâsiba ra mā da Jehovab nau kēbodi ǁîb mîs ǃnâ hâ di tsîna nî dīǀoaǀoasa. Jakob ǀgôagu ge ǀkhaehe ǀgaub ge ra hui da, î da ǁnâuǃā mati da Jehovaba a ǂkhîǂkhî ǁkhā ǀgausa.