Khomai-aon dîdi
Jesajab 60:1, ǃnâ hâ “tarasa” a ham tsî matis “khâimâ tsî ra ǃnâ kai”?
Jesajab 60:1 ge ra khomai: “Khâimâ îs ǃnâ! Sa ǃnâb go hā xuige tsî ǃKhūb ǂkhaisib go ǁhaiǂam si xuige!” Hoa xoas ge ra ǁgau “taras” Sions tamas ka io Jerusalems, Judab di danaǃās ǁnā ǁaeb di ge isa ǃoa ra ǁnaeǁgausa. a (Jes. 60:14; 62:1, 2) Jerusalems ge hoa Israelǁaesa ra ǂnûǁkhaeba. ǀGam dî ra ge hâ nē xoasa xu da ra ǃeream ǂgao ra: ǂGurose, mâǁae tsî matis ge Jerusalemsa “khâimâ” tsî ǁîs ǃnâba ǃnâ kai? ǀGamǁîse, Jesajab di mîde nētsē sida di ǁaeb ǃnâ kai ǀgaub ǃnâ ra dīǀoaǀoahe?
Mâǁae tsî matis ge Jerusalemsa “khâimâ” tsî ǁîs ǃnâba ǃnâ kai? Jerusalems tsî ǁîs tempeli ge ǃgâi tama mâsib ǃnâ ge hâ i Jodeǁîn ge Babilons ǃnâ 70 kuriga ǃkhōsis ǃnâ hâ i ǁaeb ǃnâ. Xawes ge Babilonsa Mediaǁîn tsî Persiaǁîn xa ǁnāǂamhe, on ge Israelǁîn ǃkharaga ǃâgu Babilons digu ǃnâ gere hâna ge ǃnorakaihe. ǁÎn ge ǃnae ǃnân ge ǃhūga ǃoa ge oa kaihe în Jehovaba ǁnāpa sī ǃoaba. (Esr. 1:1-4) 537ǁÎ kurin ge ǂgomǂgomsan 12 ǃhaode xu ge ǃgau hâ īn hoana ǁkhā xū-e ge dī. (Jes. 60:4) ǁÎn ge Jehovaba ǁguibade dība tsoatsoa, sâtsēde tsēdī tsî tempela ge om tsoatsoa. (Esr. 3:1-4, 7-11; 6:16-22) ǁKhapa i ge Jehovab di ǃnâba Jerusalems ai ge ǃnâ, ǁnās ge ra ǂâibasen ǁîb khoen ai i ge ge ǃnâ tsoatsoa. ǁNās ǀkhan ge ǁîna hoa ǃhaode ǃoa ǃnâb ase ge i, Jehovaba ge ǀū-i de.
Jesajab di kebodi ge ǁnā ǁaeb ai ǃkharese ge dīǀoaǀoahe. ǃNāsa Israelǁîn ge aiǃgû tsî Jehovaba ge ǁnâuǀnam tama hâ i. (Neh. 13:27; Mal. 1:6-8; 2:13, 14; Mat. 15:7-9) Egan ge Jesu Xristuba Mesiab ase ge ūǃoa tama hâ i. (Mat. 27:1, 2) Tsî 70ǁî kurib ǃnâ i ge Jerusalems tsî ǁîs tempeli tsîna ǁkhapa ǀgamǁî ǃnāsa ge hîkākāhe.
Jehovab ge nēs nî ī ǃkhaisa ge kēbo. (Dan. 9:24-27) ǃGāsa i ge a Jehovab di ǂâibasen tama ge is ge î-i Jerusalems di ǀasa kaihes kēbode hoase dīǀoaǀoahe, Jesajab 60ǁî danaǃâs ǃnâ hâde.
Jesajab di mîde nētsē sida di ǁaeb ǃnâ kai ǀgaub ǃnâ ra dīǀoaǀoahe? Îo, xawe nēs ge ǀnî hâ tarekhoes “ǀhomsi Jerusalems” ǀkha ra ī. Apostel Paulub ge ǁîs xa ge xoa: ǁÎs ge “sada di î.” (Gal. 4:26) ǀHomsi Jerusalems ge Elob di ǀhomsi ǀapeǂhumis ǃâba, hîna ǂgomǂgomsa gagasi ǃgāga ūhâsa. ǁÎs “ǀgôan” ge Jesub tsî 144 000 ǂhauhesa Xristeǁîn, apostel Paulub khami ǀhomsi ǃâubasensa ūhâna ǃkhōǂgā hâ. ǁÎn hoan ge “ǃanu ǁaesa” ǃoa ra ǁnaeǁgau, “Elob di khoen hoan ǀkha” ti a ǂanhesa.—1Pet. 2:9; Gal. 6:16.
Matis ge ǀhomsi Jerusalemsa “khâimâ” tsî ǃnâba “ǃnâ kai”? ǁÎs ge ǃhūbaib ai hâ ǂhauhesa ǀgôana ǃkhōǂgā hâ ǀgaub ǃnâ nēsa ge dī. ǀGopeǀnō re mati i ge ǁîn ra hōǃâ xūna Jesajab 60ǁî danaǃâs ǃnâ kēbohe hâ xūn ǀkha ǀgui i ǀgausa.
ǂKhauhesa Xristeǁîn ge ge “khâi” gagasi ǃkhaenab ǃnân ge hâ i amaga, ǁnās ge ge ǃaroma ǁnāǁgôahân ge apostelgu ǁōb khaoǃgâ a khoraǂûisensa. (Mat. 13:37-43) ǁNā ǁaeb ǃnân ge Babilons kais xa ǃkhōsis ǃnâ ge ūhe. ǂKhauhesan ge ǃkhōsis ǃnâ ge hâ ǀgara ‘xūn di ǀams kōse,’ ǁnā ǁaeb ge 1914 ge tsoatsoa. (Mat. 13:39, 40) ǃNūbu ǁaeba ǁnās khaoǃgâ 1919ǁî kurib ǃnân ge ge ǃnorakaihe tsîn ge ǁnāpaxu ǃnâba ge khoraǂûi tsoatsoa, ǀoasase ǃgâiǂhôas Elob Gaosib disa aoǁnâs ǃnâ-ū. b Kurin ra ǃkharu khamin ge hoa ǃhaodi khoena ǁnā ǃnâba ǃoa ge ǀkhī, nēs ge ǃgau hâ Israelǁaes Elob dis “gaogu” hîna Jesajab 60:3 ǃnâ ra ǂgaihe ga ǃkhōǂgā hâ.—J.ǂHa. 5:9, 10.
Hāniǁaeb ǃnân ge ǂhauhesa Xristeǁîna kai ǀgaub ǃnâ Jehovaba xu ra hā ǃnâba nî khoraǂûi. ǁNāsa tae-e ra ǂâibasen? ǃHūbaib ain ga ǁō on ge ra “ǀhomsi Jerusalems” tamas ka io Xristub di taras 144 000 gao-aogu tsî pristergu ǃâ kai.—J.ǂHa. 14:1; 21:1, 2, 24; 22:3-5.
ǀAsa Jerusalems ge Jesajab 60:1 di dīǀoaǀoas ǃnâ ǂhâǂhâsa ǃâba nî ūhâ. (Jes. 60:1, 3, 5, 11, 19, 20 tsî J.ǂHa. 21:2, 9-11, 22-26 tsîna ǀgopeǀnō re.) Jerusalems ge Israels di ǂhanub danaǃās ase i-ī khamis ge ǀasa Jerusalemsa Jesub Xristub a danase nî ǀasa ǃhūbaib di ǂhanu kai. ‘ǀAsa Jerusalemsa’ mati ‘ǀhomma xu Eloba xu ra ǁgôaxa’? ǃHūbaiba ra tsâǀkhā xūna sîsenǂams ǃnâ-ū. Eloǃaoǃgâxa khoen hoa ǃhaode xu hân ge “ǁîs ǃnâb ǃnâ nî ǃgû.” ǁÎn ge ǁōb tsî ǁoreba xus tsîna nî orehe. (J.ǂHa. 21:3, 4, 24) ǀAmǂoas ge “hoaraga xūn di ǀasa kaihes kōse” nî sī. Jesajab tsî nau kēbo-aogu ge mîmâi khami. (ǃNǃkh. 3:21) Nē kai ǀasa sîsenni ge Xristub ge Gao-ao kai, o ge tsoatsoa tsî ǁîb di 1 000 kurigu di ǂgaeǂguis ǀams ai nî ǀam.
a Jesajab 60:1 ǃnâs ge New World Translation sa “taras” ti hâ mîsa ra sîsen-ū, “Sions” tamas ka io “Jerusalemsa” sîsen-ūs xa. Nēs ge Hebre mîs “khâimâ” tsî “ǃnâba ǃnâ kais” ase ra mîhe tarekhoe ǀgaub ǃnâ, Hebre gowab ǃnâ i ra xoahe amaga, “sās” ti hâ mîs khami. Taras ti hâ mîs ge ǀawaǃao gowaba ra khomai khoena ra hui în ǂan tarekhoes xa i ra ǃhoahe ǃkhaisa.
b Ama ǃoabasa ǀasa kais di sîsenni 1919 ge tsoatsoa i tsîn ge Esegieli 37:1-14 tsî ǂHaiǂhais 11:7-12 ǃnâ ra ǁguiǃāhe. Esegieli ge gagasi ǀasaǀasa kaihes hoa ǂhauhesa Xristeǁîn disa ge kēbo gaxu ǁaeban ge ǃkhōsis ǃnâ hâ is khaoǃgâ. ǂHaiǂhais ǃnâ hâ kēbos ge gagasise ǁkhapa ǃnaes ǂkhari ǃgôarob ǂhauhesa ǃgâsagu ǂgaeǂguisa gere ūgu ge ǁkhapa Jehovaba ǃnūbu ǁaeroba ǃoaba ǁoa isa ǃoa ra ǁnaeǁgau. ǁÎn ge ǃgâi tama ǀgaub ǃnâ ǃkhō-oms ǃnâ ǂnûihe hâ i amaga. 1919ǁÎ kuri gu ge “ǂgomǂgomsa tsî gā-ai ǃgāb” ase ge ǁgaumâihe.—Mat. 24:45; Pure Worship of Jehovah—Restored At Last! ti ǀon hâ ǂkhanisa 118ǁî ǂhaweb ai khomai re.
