1. Mati du amab xa ra tsâ?

 JEHOVAB khoen ge Elobmîs ǃnâ da ra hō amaba a ǀnam. Sida ǂgoms ge ǁnā amab ai a ǃgaoǃgaosa. (Rom. 10:17) ǂGomǃgâ da ge ra Xristeǁî ǀhaohâb ge Jehovab xa ǂnubihesa tsî a ‘amab di ǂkhâǃnâ tsî ǃgaoǃgaosa.’ (1Tim. 3:15) ǁNā-amaga da ge ǃgamǃgamsenxase sada di ‘aiǃgû-aoga’ ǃgôasiba ra mā. ǁÎgu ge Elobmîs amaba ǁguiǃā tsî hui da ra daoǁgaude ra mā î da Elob ǂâisa dīǀoaǀoa.—Heb. 13:17.

2. Tae-e sada ǀkha a īǁkhā amaba da ǁkhāǁkhāsen toa hâs khaoǃgâ Jakobub 5:19 ǃoagu?

² Ama as ge amaba ūǃoa tsî da Elob ǀapeǂhumîsa xu ra hā ǀapemāde ra sao, hîna da a ǂgaeǂhapuhe ǁkhāsa. (Khomai re Jakobub 5:19 sa.) ǁGâuab ge ra ǂhâba î da Elobmîs tsî ǀapeǂhumîsa xu da ra hō daoǁgaude ǂgomǃgâ ǀû.—Efe. 4:14.

3. Tae-i ǃaroma da ǂgomǂgomsase amaba nî ǁnâuǀnam? (Efeseǁîn 6:​13, 14)

³ Khomai re Efeseǁîn 6:​13, 14 sa. ǀGūǁaeb ge ǁGâuaba ǀgaisa ama tama ǂhûmi ǂhôana nî sîsenū î di hoa ǁaede Jehovaba mâǃoa. (J.ǂHa. 16:​13, 14) ǃÂubasen ǁkhā da ge a ǁGâuab ǀgaisase nî dītsâsa îb Jehovab khoena ǂgaeǂhapu. (J.ǂHa. 12:9) ǁNā-amaga i ge a ǂhâǂhâsa î da ǁkhāǁkhāsen ǀgorasa mûsa amab tsî ǂhûmi xūn ǁaegu î da  amaba ǁnâuǀnam. (Rom. 6:17; 1Pet. 1:22) Nēs ge a ǂhâǂhâsa kai ǁgâiǀāba da ga ûiǃkharu ǂgao o.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Nē ǁkhāǁkhāǃâs ǃnâ da ge ǀgam ǂhâǂhâsa ǀgaukha nî ǁkhāǁkhāsen, î da mûǂan amab Elobmîsa xu ra hāba. Tsî daoǁgaudi Elob ǀapeǂhumisa xu da ra hōde ūǃoa. ǁNās khaoǃgâ da ge ǃnona xūn dī da nî na nî ǃhoaǃgao î da aiǃgû tsî amaba ǃkhōǀgara.

AMABA MÛǃĀS ǀKHA NÎ HUI DA ǀGAUGA OMKHÂIS

5. Jehovaba da ūba hâ ǃaoba mati ra hui da î da amaba mûǂan?

⁵ Jehovaba ǃaos ge ra ǂâibasen ǁîba da kaise ǀnam tsî tātsē ǁîba tsûtsû ǂgao tamasa. ǃGâise da ge nî ǁkhāǁkhāsen î da ǃgâin tsî tsûn, ǂhûmib tsî amab ǁaegu ǀgorasa kuru. Tsî ǁnās ǃnâ-ū Jehovab xa ūǃoahe. (ǂKhm. 2:​3-6; Heb. 5:14) Tātsē da ge mā-am tide khoena da ūba hâ ǃaoba, Jehovaba da ūba hâ ǀnammi xa tā kaise ǀgai. Ama as ge khoena da ga ǂkhîǂkhî, o da ge Jehovaba nî ǂkhîoǃnâ kai.

6. Khoena ǃaosa tae-i ǃaroma disi danaǂgaeǂgui-aoga amaba ǃhoasa ge ǃkhō-oa kai?

⁶ Khoena da ga ǃnāsase Jehovab ǂam-ai ǃao, o da ge ama tama xūna a ǂgom ǁkhā, Jehovab di amaba ra mâǃoana. Aiǁgause, 12 danaǂgaeǂgui-aogu Israelǁaes di ga ǃgaoǃgâ re. Sīǂûihe ge ga i gu Jehovab Israelǁaesa mîmâiba hâ ǃhūba sī ǃkhē. Disi ǃkhē-aogu ge Kanaanǁîn ǁanǂgāsabena kaise gere ǃao Jehovaba gu ūba hâ ǀnammi ǂam-ai. ǁÎgu ge Israelǁaesa ge mîba: “ǁNā khoen ǃoagu da ge sada ǁkhāsi-e ūhâ tama, ǁîn sada xa a ǀgaisa xui-ao.” (Num. 13:​27-31) Khoesi mûǂûi ǀgauba xūn ge Kanaanǁîna kaise ge ǀgaisa i Israelǁaes xa. Xawe khoe-i Israelǁaes ǁîs khākhoen xa nî danhe ti gere mî î ge Jehovab xa ge ǂâi tama hâ i. ǁNā disi ǃkhē-aogu ge ge ǃgaoǃgâ tama hâ i, Jehovab ge  Israelǁaesa tae-e gere ǂgaoǀkhāsa. ǁÎgu ge ga ǂâiǃgâ hâ Jehovab ge taena ǁîna ǀgūǁaeb ǃnâ dībasa. ǁNāsa gu ga mûǂan hâ, o gu ge ga ǂan hâ Kanaanǁîn ǀgaib xū tamasa Jehovab di kai ǀgaib ǀkha i ga ǀgopeǀnōhe o. Josuab tsî Kaleb tsîn ge Jehovab mā-amsa gere ǂhâba, ǁnā ǂgomoǃnâ ǃkhē-aogu ose. ǁÎkha ge ǁaesa ge mîba: “ǃKhūb ga sada ǀkha ǂkhîǂâixa, ob ge ǁîba sada ǁnā ǃhūb, . . ǃoa nî ǃgû-ū.”—Num. 14:​6-9.

7. Mati da Jehovaba da ūba hâ ǃaoba nî ǀgaiǀgai? (Ai-īsiba mû re.)

⁷ Jehovaba da ūba hâ ǃaoba da ga ǀgaiǀgai ǂgao, o da ge mîǁguihe da ga dī ǁae-i hoa-i ai nî ǂâi, tae-i Jehovaba nî ǂkhîǂkhîsa. (Psa. 16:8) Elobmîs ǃnaeǃkhaidets ra khomai o dîsen re, ‘ǁnāba ta ga hâhâ, o ta ga mâ mîǁguiba ūhâ?’ Aiǁgause, mûnan-ai re sadu ra ǁnâu hîna nē disi dana ǂgaeǂgui-aoga Israelǁaesa ra mîbasa ǁîn Kanaanǁîna ǃkham dan tidesa. ǁNā ǃnuriba ǂgom tsîts ga khoesi ǃaob ǃnâ māǁnâsen hâ? Tamas ka io i ga sa ǀnammi Jehovabats ūba hâba ǀgaisa hâ khoena ǃaos xa? Hoa Israelǁaes khoen ge Josuab tsî Kaleb amaba ra ǃhoasa ge ǂgom tama hâ i. ǁNās ge ge ǃaroma îb Jehovaba mā-am tama i, în ǁnā Israelǁîna mîmâisa ǃhūb ǃnâ ǂgâ.—Num. 14:​10, 22, 23.

8. Mâ ǀgauba da ǀgaisase nî sîsenǂam omkhâisa tsî tae-i ǃaroma?

⁸ ǃGamǃgamsenxasib. Jehovab ge amaba ǃgamǃgamsenxana ra ǂhaiǂhaiba. (Mat. 11:25) ǃGamǃgamsenxasib ǀkha da ge amaba ǁkhāǁkhāsens di huiba ge ūǃoa. (ǃNǃkh. 8:​30, 31) ǁNā-amaga da ge nî ǂanbasen î da tā ǀgapiǂâixa. ǂNīsa da ga o da ge a ǂâi tsoatsoa ǁkhā sada mûǂûigu a ǂhanusa, Elobmîs ǃgaoǃgaodi tsî Jehovab ǀapeǂhumisa xu ra hā daoǁgaudi xa.

9. Mati da aiǃgû tsî ǃgamǃgamsenxase a hâ ǀgara ǁkhā?

⁹ ǃGamǃgamsenxase da ga hâ ǀgara ǂgao, o da ge nî mûǂan xū tama da hâsa Jehovab ǀkha da ga ǀgopeǀnōsen o. (Psa. 8:​3, 4) Jehovaba ǃoa ǀgore tsî da ge a ǂgan ǁkhā îb hui da, î da aiǃgû tsî ǃgamǃgamsenxasiba ūhâ ǀgara tsî ǁkhāǁkhāhe ǁkhā. Jehovab ge nî hui da î da ǁîb di ǂâiǀgauba ǃgôaǃgâ, Elobmîs tsî ǁîb ǀapeǂhumis tsîna xu da ra ǁkhāǁkhāsena sida di ǂâiǀgaub ǂam-ai. Elobmîsa du ra khomai ǁaeb ai ǃgaoǃgâ re, Jehovab tae-i ǃaroma ǃgamǃgamsenxasiba ǀnam tsî ǀgapiǂâixasiba ǃhui hâsa. ǁKhā du as kōse dītsâ tsî ǃgamǃgamsenxase hâ ǀgara re, ǀapeǂhumis ǃnâ du ga aiǂhanu ga hō o.

AIǃGÛ TSÎ DA GE AMABA NÎ ǁNÂUǀNAM

10. Jehovaba ham-e ra sîsenū ǁîb khoena daoǁgaus ǃaroma?

¹⁰ Aiǃgû tsî ǂgomǃgâsiba Jehovab ǀapeǂhumis di daoǁgaudi ǃnâ ūhâ re. Jehovab ge Moseb tsî Josuab tsîna gere sîsenū îkha ǁîb daoǁgaude Israelǁaesa ǃoa mâǃkharu. (Jos. 1:​16, 17) Israelǁaes ge nē khoekha Jehovab xa ǁgaumâihe hâ khoekha hîna daoǁgaude ra mā kha ase gere mû, ob ge Jehovaba ǁîna gere ǀkhae. ǂGui kuriga ǃkharu tsî i ge Xristeǁî ǀhaohâba a ǂnūbikhâihe, o gu ge 12 Apostelga daoǁgaude gere mā. (ǃNǃkh. 8:​14, 15) Ega i ge 12 apostelgu ǂam-ai ǀnî hâ ǀhaohâb ǃûi-aogu tsîna ge ǁgaumâihe Jerusalems ǃnâ. Nē ǂgomǂgomsa khoega xu gere hā daoǁgauden gere sao, “o gu ge ǀhaohâga ǂgoms ǃnâ ge ǀgaiǀgaihe tsî ǃgôab ǃnâ tsēkorobe gere ǀarohe.” (ǃNǃkh. 16:​4, 5) Sida tsēdi ǃnâb ge Jehovaba ra ǀkhae da ǁîb ǀapeǂhomisa xu ra hā  daoǁgaude da ga sao o. Xawe Jehovaba mati nî tsâ ǁîb ǁgaumâi hâ aoga xu ra hā daoǁgaude da ga sao tama io? ǁNā dîsa ǃhoaǃgaos ǃaroma hā re, î da ǃhoaǃgao tae-i ge Israelǁaes ǀkha a īsa mîmâisa ǃhūba ǃoan gere ī o.

11. ǁNān hîna ge Moseba ǂgaeǂgui-aob ase gere mâǃoan ǀkhab ge Jehovaba tae-e dī? (Ai-īsiba mû re.)

¹¹ Israelǁaes ge mîmâisa ǃhūba ǃoa gere ī ǁaeb ǃnâ gu ge ǀnî ǂanǂansa khoega, Moseb tsî Jehovab ge mābi ǁgaumâis ǃoagu ge khâikhâisen. ǁÎgu ge sao rase ge mî: “Nē ǀhaohâb hoab, ǁîn hoan kom a ǃanuo, tsî ǃKhūb ǁîn ǁaegu hâo.” (Num. 16:​1-3) Ama as ge Jehovab mûǁae i ge hoa ǁaesa ǃanu isa. Xaweb ge Jehovaba Moseba ge ǁgaumâi îb ǁîb ǁaesa ǂgaeǂgui. (Num. 16:28) Moseba gu gere mîǁgaiǁgai, o gu ge ǁîgu tsîna ǀnî mîdi ǃnâ Jehovab tsîna gere mîǁgaiǁgai. ǁÎgu ge Jehovab tae-e gere ǂhâbas ai ǂâisa ge ǂnûi tama hâ i. Xawe ǁîgu tae-e gere ǂhâbas ai ǀgui ǂâisa gere ǂnûi, ǁnās ge ǀgaib tsî mûǂanhesa naun xa. Jehovab ge nē mâǃoa-ao gu tsî ǁîga gere ǂkhâǃnân tsîn hoana ge ǃgam. (Num. 16:​30-35, 41, 49) ǁKhā ǂgomǃgâsiba da ge nētsē ūhâ, Jehovab ǁnān ǁîb ǀapeǂhumîsa xu ra hā daoǁgaude ra mâǃoana ūǃoa tama hâsa.

12. Tae-i ǃaroma da ǂgomǃgâsiba Jehovab ǀapeǂhomis ǃnâ a ūhâ ǀgara ǁkhā?

¹² Jehovab ǀapeǂhumîs ǃnâ da ūhâ ǂgomǃgâsiba da ge a ūhâ ǀgara ǁkhā. Elobmîs amaba da ra ǁnâuǃā ǀgaub ga ǀkharaǀkharahe tamas ka io i ga aoǁnâ sîsen-e da ra dī ǀgauba ǀkharaǀkharahe, o gu ge ǁnā gu hîna ǃereamsa ǀapeǂhumîs ǃnâ ūhâ ga hâ nē ǀkharaǀkharana ra dī. (ǂKhm. 4:18) Nē ǀkharaǀkharana gu ge ra dī, hoan ǂam-ai gu Jehovaba ra ǂkhîǂkhî ǂgao amaga. ǁÎgu ge ǁkhā gu an hoana ra dī î-i ǁîgu mîǁguiba Elobmîs ai ǃgaoǃgaosa. Nēb ge ǀgaub hoa khoen nî saoba.

13. “ǂUru ǁkhāǁkhāsa” a tae tsî tae-e da nēs ǀkha nî dī?

 ¹³ ǁKhāǁkhāsen “ǂuru ǁkhāǁkhāsa.” (2Tim. 1:13) ǂUru ǁkhāǁkhās ge Xristeǁîn ǁkhāǁkhādi Elobmîs ǃnâ hâde ǃoa ra ǁnaeǁgau. (Jhn. 17:17) Nē ǁkhāǁkhādi ge ǂgom da ra xūn hoan di ǃgaoǃgaoba. Jehovab ǀapeǂhomis ge ge ǁkhāǁkhā da, î da sida ǂgomsa ǁnā ǃgaoǃgaob ai ūhâ ǀgara. Nēsa da ga dī ǀgara, o da ge nî ǀkhaehe.

14. Matin ge Xristeǁîna ǁîn “ǂuru ǁkhāǁkhāsa” ǃkhōǀgara ǀû?

¹⁴ Tae-e a īǁkhā sida ǂgomǀgauba da ga “ǂuru ǁkhāǁkhās” ai ǃgaoǃgao tama io? Sao ra aiǁgausa ǃgaoǃgâ re. ǂGurokham ǁaeb Xristeǁîn ǁaegu i ge ama tama ǂhôana gere khōraǂûihe. Khoen ge gere mî Jehovab tsēs go hāsa. ǁNāpa î ge sîǂkhanisa ge hâ i tsîn ge khoena gere ǂâi Apostel Paulub ge nēsa a xoasa. Nēs a amasa ôaǃnâs xan ge Tesalonikas ǃnâ hâ Xristeǁîna nēsa ǂgom tsî naun khoen ǀkhas tsîna gere ǀgoragu. ǁÎn ge ga gâre mûhe tama hâ, Paulub ge ǁîn ǀkha hâ i ob gere ǁkhāǁkhāni xūnan ga ǂâi-oa hâ o. (2Tes. 2:​1-5) Paulub ge ǁîb ǃgâsana ge ǁnama în tā ǁnâun ra xūn hoana ǂgom. ǁÎna hānîǁaeb ǃnâ huis ǃaromab ge Pauluba Tesalonikaǁîna ǃoab ge xoa ǀgamǁî sîǂkhanisa nēti ge ǀamǀam: “Ti ǂhunuma ǃommi ǀkha ta ge nēsa ra xoa: Pauluba xu hâ tawedes. Nēs ge mâ sîǂkhanis, tita ra xoas hoas di saosa.”—2Tes. 3:17.

15. Mati da ama tama ǂhôan amab khami ra mûsena xu a ǁkhaubasen ǁkhā? Aiǁgau-e mā re. (Ai-īsiba mû re.)

¹⁵ Paulub mîdi Tesalonikaǁîna ǃoa hâde xu da tae-e nî ǁkhāǁkhāsen? Elobmîs ǀkha ǃgûǀhao tama ǂhôa-e da ga ǁnâu tamas ka io ǃhuriǃhurisa ǂhôa-e ga ǁnâu, o da ge gā-aisiba nî sîsenū. Soviet Unions ǁaeb ai i ge sida khākhoena sîǂkhanisa ǃgâsana ge mā mî rase dana berosa xu i ra hā ti. Sîǂkhanis ge ǃgâsana gere ǂkhâǃnâ în ǀgurihâse ǀnî hâ ǀapeǂhomisa ǂnûbikhâi. Nē sîǂkhanis ge ama a xū-i ase gere mûsen. Xawe ǂgomǂgomsa ǃgâsan ge nēs  xa ge gâre mûhe tama hâ i. ǁÎn ge ge mûǂan nē sîǂkhanis ǁîn ge ǁkhāǁkhāhe xūn ǀkha ǃgûǀhao tama hâsa. Nētsēn ge amaba ra mâǃoa khākhoena internetsa ra sîsenū tsî ra dītsâ ǀgorasa sada ǁaegu kurusa. ‘ǃKhaese nēs xa ǁnobe’ kaihes xa da ge ǂōrisase khomai tamas ka io da go ǁnâu xūna nî ǀgōpeǀnō ǁkhāǁkhāsen da ge amab ǀkha. Nēsa dīs ǃnâ-ū da ge ra ǁkhaubasen.—2Tes. 2:2; 1Jhn. 4:1.

16. Romeǁîn 16:​17, 18 ǃoagu da tae-e nî dī ǀnîn ga amaba xu ǂgae-oasen o?

¹⁶ ǁNān Jehovaba ǂgomǂgomsase ra ǃoaban ǀkha ǂgomǂgomsase hâ ǀgara. Elob ge ra ǂhâba î da ǀguiǃnâxase ǃoaba bi. Amaba da ra ǃkhōǀgaras kōse da ge ǀguiǃnâxasib ǃnâ nî hâ ǀgara. ǁNān ama tama ǂhôana amab ǃoagu ra mîn ge ǀgorasa ǀhaohâb ǃnâ ra kuru. ǁNās ǀkhab ge Eloba ra ǃkhâikhom da, î da ǁîna xu hâbē. Nēs ge a ǃaroma ǁkhā î da ama tama xūna ǂgom tsî Jehovaba xu ǂgae-oasen.—Khomai re Romeǁîn 16:​17, 18 sa.

17. Mâ ǃgâiba da ra hō amaba da ga mûǂan tsî a ǃkhōǀgara o?

¹⁷ Amaba mûǃā tsî da ga ǃkhōǀgara, o da ge Jehovab ǀgūse hâ tsî sada ǂgomsa ǀgaisase nî ūhâ ǀgara. (Efe. 4:​15, 16) ǁNāsa da ga dī, o da ge ǁGâuab ǂhumib tsî ama tama ǂhôana xu nî ǁkhaubahe. Kai ǁgâiǀāb ǁaeb ǃnâs tsîna da ge Jehovab xa ǁkhaubahe tsî nî kōǃgâhe. Amaba du ga ǃkhōǀgara, ob ge “ǂkhîb di Eloba sadu ǀkha nî hâ”.—Fil. 4:​8, 9.