1-2. Mâ ǃgomsina Markub tsî Timoteub tsîkha ga ǁkhae hâ îkha tā ǀoasase ǃoaba?

 ǂKHAM ǃgâsago ǃnāsa-e go Jehovab ǃoabas ǃnâ dī tsî ǀhaohâba ra hui ǂgao? Amasets ge ǁnā-e ra dī ǂgao. Kaise da ge ra ǃgâiaǂgao mûsa nētikō ǂkhamkhoegu māsenxase nauna ra hui ǂgaosa. (Psa. 110:3) Xawe i ge supu tama ǃnāsa-e Jehovaba dībasa, ǀnîsits ra îganǀgē ǃnāsa-e Jehovab ǃoabas ǃnâ dīsa? ǀŪts a amaga sa ûib mati nî īsa Jehovab ra ǂhâba ǃkhai-i tawats ga sī ǃoabao. ǀNîsits ge aiǂhanuba ǃkhōǃoa ǂgao tama, ǃnāsa-e Jehovab ǃoabas ǃnâ dīsa ǂâits ra xui-ao sats nēsa ǃgâise dīǀoaǀoa ǁkhā tidesa. Ti i nî īs ga, ots ge ǀguri hâ tama.

² Markub tsî Timoteub tsîkha tsîn ge ǁkhā ǃgomsiga gere ǃkharuǃnâ. ǁÎkha ûib mati nî ǀkhara tamas ka io ǂansa kha ūhâ tama khami kha gere tsâ xawe kha ge noxopa ǃnāsa-e Jehovaba dībasa ge ǁhûi. Apostel Paulub tsî Barnabab tsîkha ge Markuba ǁkhauo îb ǁîkha sîsabe sîsenni ǃnâ sao, ob ge ǀnîsi Markuba ǁîb mamas ǀkha îsa oms ǃnâ gere hâ. (ǃNǃkh. 12:​12, 13, 25) Xaweb ge Markuba nēti ī omsa ǁnāxu tsî ǃnāsa-e Jehovaba ge dība. ǂGurob ge Antioxiasa ǃoa ge doe tsîb ge ǁnāpaxu Paulub tsî Barnabab tsîkha ǃnū ǃāde ǃoa gere sao. (ǃNǃkh. 13:​1-5) ǁKhā ǀgaub ǃnâb ge Timoteub tsîna ǁîb ǁgûra ǀkha gere hâ Paulub xab ge ǁkhauheo ,îb aoǁnâ sîsenni ǃnâ ǁhao. Timoteub ge kaise ge ǂkham i tsî ǂâusa ǂansa ge ūhâ tama hâ i, ǁnā-amagab ge ǀnîsib Pauluba a sao ǁoa khami gere tsâ. (ǀGopeǀnō re 1 Korinteǁîn 16:​10, 11 tsî 1 Timoteub 4:12 sa.) ǁÎb ge Paulub ǁkhauǂuisa ge ūǃoa tsî ǁnās xa ǃaromahe hâse ǂgui ǀkhaega ge hōǃâ.—ǃNǃkh. 16:​3-5.

3. (a) Mati da a ǂan Paulub ge Markub tsî Timoteub tsîkha gere ǃgôaǃgâsa? (2 Timoteub 4:​6, 9, 11) (Ai-īsiba mû re.) (b) Mâ dîde da nē ǁkhāǁkhāǃâs ǃnâ nî ǃhoaǃgao?

 ³ Markub tsî Timoteub tsîkha ge ǂgui xūna ge ǁkhāǁkhāsen mati kha ǃkharagagu ǀgaugu ǃnâ ǀhaohâba nî kōǃgâsa ǂkhamsis ǃnâ. Paulub ge nē ǂkhamkhoekha ǁnātikōse gere ǃgôaǃgâ egab ge ǁōb nîsab ge mû, o ge ǂgan kha îkha ǁîb ǃoa hā. (Khomai re 2 Timoteub 4:​6, 9, 11 sa.) Markub tsî Timoteub tsîkha mâ ǃgâi ǀgauga ge ūhâ ī tsî tae-i ǃaromab ge Pauluba ǁîkha ǁnātikōse ǀnam tsî gere ǂgomǃgâ? ǂKham ǃgâsaga mati ǁîkha ǁgae ǁkhā? Paulub ǀnamxaǃnâ ǀapemāsa mati ǂkhamkhoega nētsē hui ǁkhā?

MARKUBA ǁGAE TSÎ MĀSENXASE ǃNĀSA-E JEHOVAB ǃOABAS ǃNÂ DĪ

4-5. Markuba mati ge ǁgau naunab ra hui ǂgaosa?

⁴ ǀGui ôaǃnâs ǃoagu i ge nauna ǃoabasa ra ǂâibasen, ǃgom i ga xawe da aiǃgû tsî nauna nî huisa. Markub ge ge ǃgâi aiǁgau i nēs ǃnâ. Markub ge ǀnîsi ge tsûaǂgao hâ i Paulub ge ǁkhapab ge aoǁnâ sîsen-e dī ǃgû, o ūsao bi ǂgao tama hâ i ǃkhais ǃaroma. (ǃNǃkh. 15:​37, 38) Xawes ge ǁnāsa ge ǃaroma tama hâ i îb ǁîb ǃgâsana hui ǀû.

⁵ Markub ge Barnabab ǀkha ǀnî hâ ǃkhai-i ai sī gere aoǁnâ. 11 Kurigu khaoǃgâb ge Markuba, Pauluba Romes Tronkes ǃnâb hâ hîna hui tsî gere ǂkhâǃnâ. (Flm. 23, 24) Paulub ge ǁîb ǂkhâǃnâsa ǁnātikōse gere ǃgôaǃgâ tsî Markub “kai ǁkhaeǂgao-i ase” ǁîba ība ti ge ǁguiǃā.—Kol. 4:​10, 11.

6. Markuba mati ǃgâiba ge ǀama gagasise ǀgaisa Xristeǁîn ǀkhab ge hâ ǀhao o? (ǀGamirosa mû re.)

⁶ Markub ge ǃgâiba ge ǀama gagasise ǀgaisa Xristeǁîgu ǀkhab gere hâ amaga. Romes ǃnâb ge Paulub ǀkha hâ toas khaoǃgâb ge Markuba Babilonsa ǃoa ge ī, îb Petrub ǀkha sī sîsen. ǁÎkha ge ǀgū ǀhōsagusisa ge ūhâ i tsîb ge Petruba, Markuba “ti ôab” ti gere ǂgai. (1Pet. 5:13) ǀGuiba kha ra sîsen khamib ge Petruba ǁîb ǂkham ǀhōsaba ǂgui xūna Jesub ûib tsî aoǁnâ sîsenni xa gere ǁgamba. Egab ge Markuba Elobmîs ǃnâ a xoana. a

7. ǂKham ǃgâsab Seung-Woo ti ǀon hâba mati Markub aiǁgausa ge ǁgae? (Ai-īsiba mû re.)

 ⁷ Markub ge Jehovab ǃoabas ǃnâ ǂgui xūna gere dī tsî gagasise ǀgaisa ǃgâsagu ǀgūse gere hâ. Mati gu ǃgâsaga Markuba ǁgae ǁkhā? ǀNîsits ge ǃnāsa-e Jehovab ǃoabas ǃnâ ra dī ǂgao, aiǁgause ǀhaohâb ǃûi-aob tamas ka io ǀhaohâb hui-aob ase ǃoabasa. Xawets ga noxopa ǁgaumâihe tama io, ǃnūǃnâxa tsî tā ǂkhabuǂâi. ǀNî hâ ǀgauga ôa Jehovab tsî ǀhaohâb tsînats a hui ǁkhā ga. Seung-Woob di aiǁgausa ǃgaoǃgâ, nēsi ǀhaohâb ǃûi-aob ase ra ǃoababa. ǂKhamsis ǃnâb ge ǀnî hâ ǂkham ǃgâsagu ǀkha gere ǀgopeǀnōsen. ǀNî ǃgâsagu ge ǀhaohâb ǃûi-aogu xa ǃnāsa sîsen-e gere māhe, ǁîb noxopa ǁgaumâihe tama hâ hîna. Seung-Woob ge kaise ge tsâǀkhāhe tsî ge tsûaǂgao hâ i ǁîb ge ǀhaohâb ǃûi-aoga ge mîba tsâb ra ǀgausa. ǀGui ǀhaohâb ǃûi-aob ge hui bi tsî ge mî, îb aiǃgû tsî nau ǃgâsana hui dīb ra ǃgâi xūn ga mûhe tama i xawe. Seung-Woob ge nē ǀapemāsa sao-ai tsî kaira ǃgâsana gagasise ge hui tsoatsoa. Audona ôa tama ǃgâsana hui tsîb ge ǀhaode ǃoa gere ī-ū. ǁÎb ge ra mî: “Kaise ta ge ge ǁkhāǁkhāsen tae-e i ra ǂâibasensa nauna ǀoasase ǃoabasa. Kai ǃgâiaǂgaoba ta ge gere hōǃâ nauna huis ǃnâ-ū.”

TIMOTEUBA ǁGAE NAUNA AMA ǀNAMA ǁGAUS ǃNÂ-Ū

8. Tae-i ǃaromab ge Pauluba Timoteuba ǁhûi, îb ǁîb ǀkha ǃnarimâ sîsen-e dī? (Filipeǁîn 2:​19-22)

⁸ Paulub ge ǁkhoaǂgaosiba ūhâ ǃgâsaga ge ǂhâ hâ i, î gu ǁîb ǀkha ǃnarimâra sîsen-e dī. ǃGōsase ǀnaib ge ǃgôaǃgonhe hâ i ǃāde ǃoab gere oasī xui-ao. ǂGuroseb ge ǂansa ge ūhâ i ǃgâsab Silab ti ge ǀon hâ îba ge ǁhûi îb ūsao. (ǃNǃkh. 15:​22, 40) Paulub ge ega Timoteub tsîna ge ǁhûi îb ǁîba sao. Tae-i ǃaromab ge Pauluba Timoteuba ūsao? ǀGui ǃaromas ge Timoteub ǀkha gere hâ ǃgâsagu ge ǁîb xa ǂgui ǃgâi xūna gere ǃhoa. (ǃNǃkh. 16:​1, 2) Timoteub tsîn ge amabes ǃnâ khoen ǃnâ ǃgâiǃgâibasensa ge ūhâ i.—Khomai re Filipeǁîn 2:​19-22 sa.

9. Timoteuba mati ge ǁgau ǁîb ǃgâsan ǀkhab ǁae hâsa?

⁹ Paulub ǀkhab ge sîsenǁare tsoatsoasa xub ge Timoteuba ge ǁgau, nau khoen ǀkhab ǁae hâsa ǁîb xas ǀguis ose. Paulub ge Bereasa xu ī, ob ge ǂgomǃgâsiba ge ūhâ i Timoteub ǃgâsana ǃgâise nî kōǃgâsa. (ǃNǃkh. 17:​13, 14) ǁNā ǁaeb aib ge Timoteuba ǂgui xūna Silaba xu ge ǁkhāǁkhāsen, ǁîb tsîn ge Bereas ǃnâ ge hâǃgau. Egab ge Pauluba Timoteuba ǀguri Tesalonikasa ǃoa ge sî, îb ǃgâsana sī ǂkhâǃnâ ǁnā ǃās ǃnâ.  (1Tes. 3: 2) Sao ra 15 kurigu ǃnâ î ge Timoteub ge ǃgâsana ūba hâ i ǀnamma ge kai. Nē ǀnammi ge ǁnātikōse ge ǀgai îb āran ǀkha ā, ǃgomsi-en gere ǃkharuǃnâo. (Rom. 12:15; 2Tim. 1:4) Mati gu ǂkham ǃgâsaga Timoteuba ǁgae ǁkhā?

10. Woo Jae ti ǀon hâ ǃgâsaba mati ge ǁkhāǁkhāsen îb naun ǃnâ ǃgâiǃgâibasensa ǁgau?

¹⁰ Woo Jae ti ǀon hâ ǃgâsab ge ge ǁkhāǁkhāsen îb ǃgâiǃgâibasensa naun ǃnâ ǁgau. ǂKhamsis ǃnâb ge ge ǃgombahe i ǁîb xa kai ǃgâsan ǀkha ǁgamsa, ǁnā-amagab ge sali ai nē ǃgâsana tawedes ǀguisa hî tsî gere ǃgûbē. ǀGui ǀhaohâb ǃûi-aob ge Woo Jaeba ge mîba ǁîb ǃgâsan ǀkha ǁgamǀhaos ǃaromab ge nî mîba nî tae-eb ǁîn xa ra ǃgôaǃgâsa. Nē ǀhaohâb ǃûi-aob ge ge mîba bi, îb ǃgâise ǂâiǃgâ tae-i ǃnân nau ǃgâsana ǃgâiǃgâibasensa ūhâsa. Woo Jaeb ge nē ǀapemāsa ge sao. Tsîb ge nēsi a ǀhaohâb ǃûi-ao. ǁÎb ge ra mî: “Nēsi î ge a supu hoa khoen ǀkha ǁgamǀhaode ūhâsa. Nēsi ta ge ǃgâise ra tsâ nau khoen tae-e ra ǃkharuǃnâsa ta ra ǁnâuǃā amaga. Nēs ge ra hui te î ta ǂan ti ǃgâsan tae-e ǂhâhâsa tsî tae-e ta a dī ǁkhāsa î ta ǁîna hui ǁkhā.”

11. ǂKham ǃgâsaga mati ǀhaohâb ǃnâ hâ nau ǃgâsan ǃnâ ǃgâiǃgâibasensa omkhâi ǁkhā? (Ai-īsiba mû re.)

¹¹ ǂKham ǃgâsagu tsîn ge ǁkhā ǀgaub ǃnâ ǁkhāǁkhāsen ǁkhā î gu nau khoen ǃnâ ǂgâiǃgâibasensa ǁgau. ǀHaodi ai gu ge ǃkharagagu khaoǃhūga xu hâ khoen ǀkha ǃhoa ǁkhā, nēsin ga ǂkham tamas ka io kai xawe. ǁÎn ra ǂâiǀgauba dî tsî ǁnāpaxu ǂōrisase ǃgâ. Nēs ge nî hui tsi, îts matits a hui nî ǁkhāsa ǂan. ǀNîsits ge nî ǁnâu ǃgamme hâ ǁkhara khoe-aogu ra huiba ǂhâ hâsa JW Library app sa sîsenūsa. Tamas ka iots ge nî ǁnâu aoǁnâ sîsenni ǃnâ i nî sîsenǁare-ū khoe-e i ūhâ tamasa. Nēti ī ǃgâsanats ge hui ǁkhā în ǁîn selfona sîsenūsa ǁkhāǁkhāsen tamas ka iots ge aoǁnâ sîsen-e ǁîn ǀkha dī ǁkhā. Sa ǃgâsanats ga nēti ī ǀgaugu ǃnâ hui, ots ge ǀhaohâb ǃnâ ǃgâi aiǁgaus ase nî ī.

PAULUB ǀAPEMĀS GE HUI TSI ǁKHĀ

12. ǂKhamkhoega mati Paulub ge Timoteuba mā ǀapemāsa xu ǃgâiba a ǀama ǁkhā?

¹² Paulub ge Timoteuba ǀapemāde ge mā, îb ǃgâiaǂgaoba ûib ǃnâ ūhâ tsî Eloba ǀoasase ǃoaba. (1Tim. 1:18; 2Tim. 4:5) ǂKham ǃgâsagu ge nētsē Paulub ǀapemāsa xu a ǀama ǁkhā. Mati? Paulub ge Timoteuba ǃoa xoa ǀgam sîǂkhani ra satsa ǃoa-i xoahe hâ khami khomai re tsî mû mâ ǀapemādets a sîsenū ǁkhāsa. Sao ra aiǁgaude ǃgaoǃgâ re.

13. Tae-e a huitsi ǁkhā îts Jehovab ǃoagu ǂgomǂgomsase hâ?

 ¹³ “Îts ǃaruǀîǀgui Eloǃaoǃgâxasib” ǀkha ǁaeǁaesen. (1Tim. 4:7) Eloǃaoǃgâxasiba a tae? Paulub ge Timoteuba gere mîba îb Jehovab ǃoa-ai ǂgomǂgomsa tsî ǁîba ra ǃgâiaǂgao kai xūna dī. Nēti ī ǀnammi tsî ǂgomǃgâsib tsîna Jehovaba ūhâbas ge ǁguiǂgāsensa ǂhâhâ. Nēsa da ge Paulub ge mî xū-e xu ra ǁkhāǁkhāsen. Grikegowab mîs omkâisens tamas ka io ǃâisen ti hâs ge ǀhûgus ǃnâ ra ǁhao khoe-i hîna ra aiǂhumîsen-e ǃoa ra ǁnaeǁgau. Nē ǀhûgus ǃnâ ra ǁhao khoe-i ge ǃkhō-oasensa ge ǂhâ hâ î-i nē ǃkhoe ǀhûgusa dan. ǁNās ǁkhās khami da ge sada tsîna ǃkhō-oasensa ǂhâ hâ î da Jehovab ǀgūse hâs ǀkha nî hui da ǃgâi xūna omkhâi.

14. Elobmîsa da tae-e ǂâis ǃnâ ūhâse nî khomai?

¹⁴ Kaise i ge a ǂhâǂhâsa î da ǁnaedīb ase Elobmîsa tsēs hoasa khomai tsî da ge ǂâis ǃnâs tsîna nî ūhâ Elobmîsa khomais ra hui dasa î da Jehovaba ǀgū. Aiǁgause Jesub tsî ǃkhū hâ ǂgaeǂgui-aob ǃnaeǃkhais xats ga khomai os ǁnāsa tae-e Jehovab xa ra ǁkhāǁkhā tsi? (Mrk. 10:​17-22) Nē ǂkhamkhoeb ge gere ǂgom Jesub a Mesia ǃkhaisa xaweb ge ǀgaisa ǂgomsa ge ūhâ tama hâ i, Jesub ǁkhāǁkhāsabe kaisa. Nē ǂkhamkhoeb ge ǀgaisa ǂgomsa ūhâ tama hâ i xaweb ge Jesub xa kaise ge ‘ǀnamhe-i.’ Jesub ge kaise khoexaǃnâse ǁnā ǂkhamkhoeb ǀkha ge ǃhoa. Ama as ge Jesub ge ǂhâba hâ isa îb ǁnā ǂkhamkhoeba ǃgâiaǂgaob ǀkha Jehovaba ǃoaba. Jesub ge nē ǂkhamkhoeba gere tsâba ǀnammi ǂûbab ge Jehovab tsîna gere tsâ. (Jhn. 14:9) Nē ǃnaeǃkhais tsî sa mâsib tsîn xats ra ǂâiǃgâ ǁaeb ai dîsen re, ‘tae-e ta a dī ǁkhā î ta Jehovaba ǃoa ǀgū tsî nauna hui?’

15. Tae-i ǃaroma i a ǂhâǂhâsa îb ǂkham ǃgâsaba ǃgâi aiǁgause nauna ība? Aiǁgau-e mā re. (1 Timoteub 4:​12, 13)

¹⁵ “Hoaraga ǂgomsabena aiǁgause ība.” (Khomai re 1 Timoteub 4:​12, 13 sa.) Paulub ge Timoteuba ge mîba îb tā khomais tsî ǁgauǃnâs ǀguisa dī xawe ǀgauga omkhâi ǀnammi, ǂgoms tsî ǃgâise tanisens tsîna ǃkhōǂgā hâ ga. Tae-i ǃaroma? Khoe-i ǃgâi aiǁgaus ge ǃnāsase ǂhâǂhâsa, ǁî-i ra ǃhoa xūn xa amaga. ǀNîsits ge ǁgaumâisa go māhe îts ǃhoasa ǀhaohâb ǃnâ mā, mâ ǀgaugu ǃnâ da ǃnāsase aoǁnâ sîsenni ǃnâ nî dīsa. Kaise i ge nî supu nē ǃhoasa māsa, sats ga ǃnāsa-e aoǁnâ sîsenni ǃnâ dīo. ǃGâ-aon ge nî ǂkhâǃnâhe în ǃnāsase aoǁnâ sîsenni ǃnâ dī, sa aiǁgausan ga mûo.—1Tim. 3:13.

16. (a) Mâ koro ǀgaugu ǃnân ǂkham Xristeǁîna aiǁgausa a ǁgau ǁkhā? (b) ǂKham ǃgâsaba mati ǃhoab ra ǀgaub ǃnâ aiǁgause a īǁkhā?

¹⁶ Paulub ge 1 Timoteub 4:12 ǃnâ koro ǀgaugu ǂkhamǃgâsab a sao ǁkhā gu xa ra ǃhoa. Kaise i ge nî ǃgâi ǁaeba ǁamaǂûi tsîts ga nē ǀgaugu xa ǁkhāǁkhāseno. ǀNîsits ge ǃgâi aiǁgausa ra ǁgau ǂgao ǃhoats ra ǀgaub ǃnâ. ǂÂi re sats ra ǃhoa ǀgaub nauna a omkhâi ǁkhā ǀgaub xa. ǀNîsits ga noxopa sa ǁgûra oms ǃnâ hâo, ǁaeba xu ǁaeb ǀkha ǁîra gangan dība tsi ra ra xūn ǃgao. ǀHaos khaoǃgâts ǀnîsi ǃgâsa-e a mîba ǁkhā ǁî-i ǃhoas ǃnâts go tae-i xa a mâǂoabahesa. Dītsâ tsîts ge ǀnîsi ǀhaos tawa sa mîdi ǃnâ ǃereamde a mâ ǁkhā khomai ǁnâ tamase. Dītsâ tsîts ga aiǁgause io ǃhoats ra ǀgaub ǃnâ on ge nauna nî mû sats gagasise ra kai ǀgausa.—1Tim. 4:15.

17. Tae-e ǂkham ǃgâsaba ge hui îb ǁîb di gagasi mîǁguiga sīǃnâ? (2 Timoteub 2:22)

¹⁷ “ǂKhamkhoesis di tura-ain hoana ǁnâxū, î hoaǁae ǂhanu-aisiba ôa.” (Khomai re 2 Timoteub 2:22 sa.) Paulub ge Timoteuba  ge mîba îb ǁîb ǀhōsagusisa Jehovab ǀkha ǁgaiǁgai ǁkhā ǁgai turaga ǃkhamǃoa. ǀNîsits ge ra mûǂan ǃnāsa ǁaebats ǁkhoaxa ǁaeba ūhâs ai ra sîsenūsa. Tsîts ge nēs xa ǃaromahe hâse Jehovabats nî dība xūna dīhō tama hâ. Aiǁgause ǂâi re, matikō ǁaebats ǀhûgus ǁaxasigu ǃnâ ǁhao, internets ai xūna kō tamas ka io vidio gaimde ra ǀhurusa. ǀNîsits ǁnā ǁaeba sîsenū tsî Jehovab tsî naun tsîna ǃnāsana a dība ǁkhā? ǀNîsits ge māsenxase sala kōǃgâs ǀkha a hui ǁkhā. Trolis ǀkha aoǁnâs ǀapeǁguigu ǃnâs tsînats ge a ǁhao ǁkhā. Nēti ī ǁaxasigu ǃnâts ga ǁhao, ots ge īǁkhāsib ga hâo ǀasa ǀhōsana a hō ǁkhā. Nē ǀhōsan ge huitsi ǁkhā gagasi mîǁguiga dī tsî sīǃnâsa.

NAUNA HUIS ǃNÂ-Ū I GE KAI ǀKHAEGA HÂ

18. Tae-i ǃaroma da a mî ǁkhā Markub tsî Timoteub tsîn ge ǃgâi ûiba ūhâ isa?

¹⁸ Markub tsî Timoteub tsîkha ge ǂgui ǀkharaǀkharana ǁîkha ûib ǃnâ ge dī îkha nauna hui ǁkhā tsîkha ge nēs ǃnâ-ū ǂkhîb xa ǀoa hâ ûiba ge hōǃâ. (ǃNǃkh. 20:35) Markub ge kaise ǃnū ǃāde ǃoa gere ǃgû îb ǁîb ǃgâsana sī hui ǁkhā. ǁÎb ge ǂûǂûsa ǃnaeǃkhaide Jesub ûib tsî aoǁnâ sîsenni xa ge xoa. Timoteub ge Pauluba ge hui ǀasa ǀhaohâga tsoatsoas tsî ǃgâsana ǂkhâǃnâsa. Jehovab ge ge mû matikōse kha ge Markub tsî Timoteub tsîkha māsenxase ǁîba gere ǃoaba ǀgauba tsîs ge nēsa ǁîba ge ǃgâiaǂgao kai.

19. ǂKham ǃgâsaga tae-i ǃaroma Paulub ge Timoteuba mā ǀapemāde nî ǃgaoǃgâ tsî nēsa gu ga dī os ǀamǂoasa nî tae?

¹⁹ Paulub ge kaise Timoteuba ǀnam ī ǀgauba da ge ǁîb ge xoa sîǂkhanidi ǃnâ ra khomai. Nē sîǂkhanidi tsîn ge ra ǁgau Jehovab ǂkham ǃgâsaga kaise a ǀnamsa. ǁÎb ge ra ǂhâba î gu ǃgâiba hō ǁîba ǃoabas ǃnâ. ǁNā-amaga ǁkhāts ana dī tsî Paulub di ǀapemāde ūbasen. ǁNās ge nî huitsi îts turaba omkhâi nauna huisa. Nēsats ga dī, ots ge ǁkhoaxa ûiba nēsi nî ūhâ tsî “ama ûib nî ī ǀgausa hōǃâ ǁkhā.”—1Tim. 6:​18, 19.