1, 2. (a) Jesuba mâ sîsen-e ǂgurose ǁîb ûib ǃnâ gere mâi tsî tae-i ǃaroma? (b) Tae-e da nî dī î da “Elob di ǀhaosîsenao” kai?

JESUB XRISTUB ge ge ǃnaokuru-ao tsî aoǁnâ-ao-i. (Markub 6:3; Rom. 15:8) ǁÎb ge hoa ǀgam sîsenga ǃnâ ge ǃgâi i. ǁÎb ge ǃnaokuru-aob ase ge ǁkhāǁkhāsen matib nē sîsen-e nî dī ǀgausa tsî nēs ǃnâ-ū ǃgâi xūna gere kuru. ǃGâiǂhôas di aoǁnâ-aob aseb ge Jesuba Elobmîs di ǂans ǀkha khoena gere hui în Elobmîs amaba ǁnâuǃā. (Mat. 7:28; Lukab 24:32, 45) 30 Kurixab a hînab ge Jesuba ge mûǂan aoǁnâ sîsenni a ǂhâǂhâsa ǃkhaisa tsî ǁnās ǀkha ǃnaokuru sîsen-e ge ǀû. ǁÎb ge ge mî Jehovab ge Gaosib ǃgâiǂhôasab nî aoǁnâ ǃkhais ǃgao ge sî bi. (Mat. 20:28; Lukab 3:23; 4:43) Jesub ge aoǁnâ sîsen-e ǂgurose ǁîb ûib ǃnâ ge mâi tsî nau khoen tsîn nē sîsen-e nî dīsa gere ǂgao.—Mat. 9:35-38.

² Sida ge ǀnîsi ǃnaokuru-ao tama hâ xawe da ge a Gaosib ǃgâiǂhôas aoǁnâ-ao. Nē sîsenni ge kaise a ǂhâǂhâsa, “Elob di ǀhaosîsenao” di da ra ǂgaihe amaga. (1Kor. 3:9; 2Kor. 6:4) Sida ge ‘Jehovab mîs a ama’ ǃkhaisa ra ǂanǃgâ. (Psa. 119:159, 160) ǁNā-amaga da ge ‘amab di mîsa ǂhanuse ra ǀgoraǃgâ’ ǂgao sida aoǁnâ sîsenni ǃnâ. (Khomai re 2 Timoteub 2:15.) Tsî sida Elobmîsa ra sîsen-ū ǀgauba ra ǃgâiǃgâi, nēsa da ge Jehovab, Jesub tsî Gaosib tsîn xa khoena  mîbas ǃnâ ra sîsen-ū. Aoǁnâ sîsenni ǃnâ da nî ǃgâiǃō ǃkhais ǃgao î ge Jehovab ǀapeǂhumisa xūna ra mā da hîna da a sîsen-ū ǁkhāna. Nē xūna da ge sida ǁkhāǁkhā-ū boksis ǃnâ a hō ǁkhā.

3. Tae-i ai da sida ǂâisa nî mâi tsî ǃNaeǃkhaidi 13:48 sa mati nēs ǀkha a hui da ǁkhā?

³ ǀNîsi du ge ra ǂâi, tae-i ǃaroma i ǁkhāǁkhā-ū boksis di ra ǂgaihe tsî aoǁnâs boksis di ǂgaihe tama hâ di. “Aoǁnâs” ge ra ǂâibasen haisi-amsa da ge khoena nî mîba di tsî “ǁkhāǁkhās” ge ra ǂâibasen î da nē haisi-amsa khoe-i ǂgaob tsî ǂâis tsîn ǃnâ ǂgā î-i nēs ǃoagu ûi. Nē ǁaeb hîna da ûi ǃnâ hâb ǃnâ da ge khoena Elobmîsa nî ǁkhāǁkhā. Nēs ge ra ǂâibasen î da ‘ǀamo ûiba ǃoa ǃkhōǂuibasenhe hâna’ ôa tsî ǁîna hui în ǃoaba-ao kai.—Khomai re ǃNaeǃkhaidi 13:44-48.

4. Mati da ǁnān hîna ‘ǀamo ûiba ǃoa ǃkhōǂuibasenhe hâna’ a ǂan tsî mati da ǁîna nî hō?

⁴ Mati da ǁnān hîna ‘ǀamo ûiba ǃoa ǃkhōǂuibasenhe hâna’ a ǂan? ǃKharu ge ǁaeb khami da ge nē khoena aoǁnâ da ga ra o ǀgui a hō ǁkhā. Jesub ge mîmā da khami da ge nî dī: “Tsî mâ kaiǃās tsî ǃhais ǂgâ go kas hoasa aibe ôaǃnâ, tari-i ǁîs ǃnâ a anu ǃkhaisa.” (Mat. 10:11) ǃGâi tanisen ǀgauba ūhâ tama hâ khoen ǃgâiǂhôasa nî ūǃoasa da ge tā nî ǃâubasen. Sida ge ǂhauǃnâ, ǃgamǃgamsen tsî amab ǃoa ǃâ hâ khoen tsîna ra ôa. Nēsa da ge Jesub ge ǃnaokuru-aob ase gere dīs ǀkha a ǀgopeǀnō ǁkhā, ǁîb ge ǂhanu xūn ǀguina gere ôa nē sîsen-e dīs ǃgao. Kuru-ū xūnab gere ǀhaoǀhao toa o, ob ge ǁîb sîsen-i ǀkha gere tsoatsoa. Sida tsîn ge nēsa nî dī î da ǃgâi ǂgaoga ūhâ ǁkhāǁkhāsabena dī.—Mat. 28:19, 20.

5. Tae-e da sida ǁkhāǁkhā-ū boksis ǃnâ hâ xūn xa nî ǂan? ǂKhō re. (Tsoatsoas ǃnâ hâ ai-īsiba mû re.)

⁵ Mâ xū-i hoa i hîna ǁkhāǁkhā-ū boksis ǃnâ hâ î ge sîsen-ūhen ra ǂâibasensa ūhâ. Jesub ga sîsen-ū hâ xūna du aiǁgaus ase ū re. * ǁÎb ge nē xūna ge ǂhâ hâ i îb ǃgâi ǀgaub ǃnâ sao, ǁāra tsî ǃgae. ǁNās ǁkhās khami î ge sida ǁkhāǁkhā-ū boksis ǃnâ hâ xūn hoana sîsen-ūhen ra ǂâibasensa ūhâ. Hā re î da sida ǁkhāǁkhā-ū boksis ǃnâ kō tsî mû mati da nēba māsa xūna a sîsen-ū ǁkhā ǀgausa.

6, 7. (a) Kontak karkiesa du mati ra sîsen-ū? (b) Khoena ǀhaode ǃoa ǁkhaus ǃgao hâ karkide mâ ǀgam ǂâibasen ra ūhâ?

⁶ Sida internets ǂhaweba ǃoa ra ǁnaeǁgau karkies. Nē di ge ǂkhariro xawe kaise ǃgâi karkide mâiǃâsen tsî khoena sida internets ǂhaweba ǃoa ǁnaeǁgaus ǃgao. ǁNāpan ge sida xa ǃnāsase a ǁkhāǁkhāsen ǁkhā. Nēs ge ge ǃaroma în 400 000 xa a ǃnāsa khoena Elobmîsa ǁkhāǁkhāhe tsoatsoa tsî 100 xa a ǃnāsan ge noxoba tsēs hoasa Elobmîs ǁkhāǁkhāsa ra ǂgan. ǀNîsi du ge kontak karkiesa sadu tawa hoaǁae a ūhâ ǁkhā, î du ǃēsa du ga ra hō o khoena jw.orgsa ǃoa ǁnaeǁgau.

⁷ ǁKhauǂuigu. Khoena ǀhaode ǃoa ǁkhaus ǃgao hâ karki di ge ǀgam ǂâibasen ra ūhâ. Nēti ra mî: “ǁKhauǂuihets ge ra îts Elobmîsa ǁkhāǁkhāsen Jehovab di ǀHûǀguitimî-aon ǀkha.” Tsî ǁnāpaxū ra mî nēsa du ge “sida di ǀhaodi tawa” “tamas ka io ǁkhāǁkhā du  nî khoe-i ǀkha” a dī ǁkhā. Nēs ge sida ǀgui da ǁgauǁgau tama hâ xawe ‘gagas ǃnâ ǀgâsan’ tsîna ra ǁkhau în Elobmîsa ǁkhāǁkhāsen. (Mat. 5:3) Khoen ge ra ǁkhoreǁhare-e în sida ǀhaode hâǃnâ Elobmîs ǁkhāǁkhāsan ga ūǃoa tama ga ra i xawe. Nē ǀhaodi tawan ge nî mû tae-e da Elobmîsa xu ra ǁkhāǁkhāsensa.

8. Tae-i ǃaroma î a ǂhâǂhâsa khoena ǀhaode ǃoa īsa? Aiǁgau-e mâ re.

⁸ Kaise î ge a ǂhâǂhâsa khoena sida ǀhaode ǃoa ǁkhausa ǀgui ǃnās tsîna. Tae-i ǃaroma? ǁÎn ge sida ǀhaodi tawa nî mû gagasise da a ǀgaisa ǃkhaisa tsîs Babilons kaisa gagasise ǃâ hâsa . (Jes. 65:13) Raib tsî Lindas hîna Amerikab ǃnâ ǁan hâ ra ge nēsa ǂgui kuriga ǃkharu hâse ge mû. ǁÎra ge ge mîǁgui kerkeba ǃoa ra ge ra ī tsoatsoasa di. ǁÎra ge Elob ǃnâ gere ǂgom tsî gagasi ǂhâsiba ge ūhâ i tsî hoa kerkega ǃoa ge ī tsoatsoa. ǂGui kerkegu tsî kerkegu ǁanin tsîn ge ge hâ i. ǁÎra ge ǀgam ǃaromade ge ūhâ i hoa kerkegu hîna ra gere sarigu ǃgao. ǂGurose ra ge gagasi xū-e nî ǁkhāǁkhāsen kerkeb ǃnâ tsî ǀgamǁîse kerkeb ǁanin ge Eloba ra ǂnûǁkhaeba khoen khami nî mûsen. ǂGui kurigu ǃkharu hâse ra ge ǁnā ǃās ǃnâ hâ kerkegu hoagu ǃoa ge ī tsâ hâ i xawe ǃnās hoasa gere tsûaǂgao kai-e. ǁÎra ge xū-e ge ǁkhāǁkhāsen tama hâ i tsî kerkeb ǁanin ge Eloba ra ǂnûǁkhaeba khoen khami ge mûsen tama hâ i. ǀUniga kerkeba ra ge sari toa o, os ge Lindasa sîsen-e ǃoa ge ī tsî Raiba omsa ǃoa ge oa. Omsa ǃoab garu hînab ge ǀHû-ommi xōǀkhā ge ǃnari ǃkharu tsî ge ǂâi, ‘tae-i ǃaroma ta ǂgâ tsî mû tama tae-i nēpa ra īsa?’ Nēs ge kaise ge ǂoaǂamsa i. Khoen hoan ge ǁnāpa ǃgâise gere tanisen tsî ǃamkuse ge ana hâ i. Raib ge aisǀkhāb ai ge ǂnôa i tsî xūn hînab ge ǁkhāǁkhāsen an xa ge ǃgâibahe i. Nēs ge apostel Paulub ge ǂguro ǃnāsa Xristeǁî ǀhaos tawa ra sī khoe-e ǃoa a mî mîdi ǀkha a ǀgui, mîb ge o: “Elob amase sadu ǃnâ hâ.” (1Kor. 14:23-25) Raib ge hoa Sontaxtsēs ǀhaode gere hâǃnâ tsî ǁnāpaxū wekheb ǁaegub ǃnâ hâdi tsîna ge hâǃnâ tsoatsoa. Lindas tsîn ge ǀhaode ǃoa ge ī tsoatsoa tsî ra ge 70 kurixa ra a hîna Elobmîs ǁkhāǁkhāsa ge ūǃoa tsî ge ǁāǁnâhe.

9, 10. (a) Nē ǂhawega tae-i ǃaroma a supu sîsen-ūsa? (b) ǁGuiǃā re mati du Elob di Gaosiba a tae? di hâ ǂhaweba a sîsen-ū ǁkhā ǀgauba.

⁹ ǂHawegu. ǁKhaisa ǂhawega da ge ūhâ hîna a supuga sîsen-ūsa. Nē ǂhawegu ge 2013ǁî kurib ǃnâ ge māǂuihe tsoatsoa tsî î ge 5 biliuns xa a ǃnāsaga ra ǁgâihe ǁnā ǃnāsa xu. Nē ǂhawegu ǀguiba du ga sîsen-ū tsoatsoa o, o du ge hoaga nî sîsen-ū hō, nē ǂhawegu hoagu ǀgui ǀgaub ǃnâ ra sîsen amaga. Mati da khoen ǀkha a ǃhoa tsoatsoa ǁkhā nē ǂhaweba sîsen-ūs ǃnâ-ū?

¹⁰ ǀNîsi du ge Elob di Gaosiba a tae? di hâ ǂhaweba a sîsen-ū ǁkhā. Khoe-e du ge aisǀkhāb ai hâ dîsa a ǁgau ǁkhā tsî a dî ǁkhā: “Elob Gaosib a tae ǃkhaisa du ra ǂâi? Mî its nî . . . ?” Tsî ǁnāpaxū dî re mâ ǃereamsa i khoe-e nî ǁhûisa nē ǃnona ǃereamde xu. Khoe-i ǃereams a ǂhanu tamas ka io ǂhanu tama hâ ǃkhaisa mî tama hâse “Elobmîs ta mîs” di hâ ǃâba ǁkhowa-am re tsî ǁnāpaxū Danieli 2:44 tsî Jesajab 9:6 tsîna khomai re.  ǂHâbasa î ga ra io ǁgamǀhaosa aiǃgû kai re. Tsî ǀunigase “ǂâi ǃgâs ǃaroma” di hâ ǃâb ǃnāga hâ dîsa dî re mî rasa “ûiba mati nî ī Elob Gaosib ǂgaeǂguis ǃnāga?” Nēs ge ǁkhawa saris ǀkha nî hui. ǁKhawa du ga ra sari o, o du ge Eloba xu hâ !gâiǂhôas! di hâ ǂkhaniba xu 7ǁî ǁkhāǁkhāǃâsa a ǃhoaǃgao ǁkhā, nēs ge Elobmîs ǁkhāǁkhās ǀkha ra hui.

11. Sida ǂkhanikha mâ ǃaromas ǃgao ra ǁgâihe xawe da tae-e nî ǂan?

¹¹ ǂKhanikha. ǃKhē xu ǂgō-ommi tsî Awake! ǂkhanikha tsîn ge ǃhūbaib ǂhawase māǂuihe tsî ra ǂnûiǃkhunihe. ǃHūbaib ǂhawase î ra māǂuihe amaga î ge aisǀkhāb ai hâ ai-īsiba hoa khoena î nî tsâǀkhāse a kurusa. Nē ǂkhanikha da ge khoen tsēkorobe ûiga î nî tsâǀkhā ǀgaub ǃnâ nî sîsen-ū. Nēs ge nî dī î da ǂhanu khoena nē ǂkhanikha mā.

12. (a) Awake! ǂkhaniba ham-i ǃaroma a xoasa? (b) Mati du ge ǃgâiǃō nē ǂkhaniba sîsen-ūs ǃnâ-ū?

¹² Awake! ǂkhanib ge ǂkhariro ǂansa Elobmîs xa ūhâ khoen ǃgao ra ǁgâihe. ǁÎn ge ǀnîsi Xristeǁîn ǁkhāǁkhāde a ǀū tamas ka io ǂgomdi ǁkhāǁkhāna ǂgomǃgâ tama hâ. Awake! ǂkhanib ǂâibasens ge în khoena Elob ǃnâ ǂgom tsoatsoa. (Rom. 1:20; Heb. 11:6) Tsî khoe-i tsîna ra hui î-i ‘Elob mîs asa’ ǂgom. (1Tes. 2:13) ǃNona xoaǀgoradi 2018ǁî kurib didi ge: “The Way of Happiness,” “12 Secrets of Successful Families,” tsî “Help for Those Who Grieve.”

13. (a) ǀHûhâsib ǃgao hâ ǃKhē xu ǂgō-omma ham-i ǃgao a xoasa? (b) Mati du ge ǃgâiǃō nē ǂkhaniba sîsen-ūs ǃnâ-ū?

¹³ ǃKhē xu ǂgō-ommi, ǀhûhâsib ǃgao hâ ǂkhanib ge khoena ra hui hîna Elob tsî ǁîb mîs tsîna ǃgôasiba ūba hâna. Elobmîs ǂansan ga ra ūhâ xawen ge nē ǁkhāǁkhāde ǁnâuǃā tama hâ. (Rom. 10:2; 1Tim. 2:3, 4) ǃNona xoaǀgoradi 2018ǁî kurib didi ge: “Is the Bible Still Relevant Today?,” “What Does the Future Hold?,” tsî “Does God Care About You?”

14. (a) Sida ǁkhāǁkhā-ū boksis ǃnâ hâ vidioga mâ ǀgaub ǃnâ a sîsen-ūhe ǁkhā? (b) Mati du ge ǃgâiǃō nē vidioga sîsen-ūs ǃnâ-ū?

¹⁴ Vidiogu. Jesub tsēdi ǃnâ î ge ǃnaokuru-ao-e ǁî-i ǃomga gere sîsen-ū. Xawe nētsēn ge ǃnaokuru-aona ǀgaisa xūna ra sîsen-ū ǁîn sîsen-e dīsa. ǁGâisa ǂkhanin ǂam-ai da ge vidiogu tsîna ūhâ, aiǁgause: Mati i io da Elobmîsa nî ǁkhāǁkhāsen? Tae-e ra ī Elobmîs ǁkhāǁkhās tawa? tsî Jehovah’s Witnesses—Who Are We? di hâga. Nē vidiogu ge 2 haiga a gaxu tsî ǂguro saris ai ra sîsen-ūhe. Gaxu vidiogu ge ǀgamǁî saris tamas ka io ǃgâ ra khoen tawa a sîsen-ūhe ǁkhā. Nē vidiogu ge khoena nî ǂkhâǃnâ în Elobmîsa ǁkhāǁkhāsen tsî ǀhaode hâǃnâ.

15. ǂKhō re sida vidioga ǁîn gowab ǃnâ kōs khoena mati a tsâǀkhā ǁkhāsa.

¹⁵ Aiǁgause, ǃgâsas ge khoes hîna ge Micronesiaba xu a does ǀkha a ǀhao o hîna ge Yapese gowaba gere ǃhoasa, os ge ǁîsa mati i io da Elobmîsa nî ǁkhāǁkhāsen? di hâ vidioba khoesa ǁîs gowab ǃnâ ge ǁgau. Vidiob ge ǀhuru tsoatsoa o, os ge kaikhoesa ge mî: “Nēb ge di gowaba. ǂGom ǁoa ta ge a. ǁÎb ǃhoa ǀgauba xu ta ge ra hōǃâ di ǃhūba xub ra hāsa. Ti gowabab ge ra  ǃhoa.” ǁNās khaoǃgâs ge ǁîsa ge mî sida internets ǂhaweb ais ge hoa xūna sī khomai tsî nî kō di. (ǀGopeǀnō re ǃNaeǃkhaidi 2:8, 11.) ǀNî hâ aiǁgausa kō re. ǃGâsas hîna Amerikab ǃnâ hâs ge ǁîs abutib di ǀgôaba nē vidiob linka ge sîba ǁîb gowab ǃnâ. ǁÎb ge nē vidioba kō toa tsî ge mî: “ǁGâuab di gagab hîna ǃhūbaiba ra ǂgaeǂguib di ǃâb ge tita go tsâǀkhā. Tsîb ge Elobmîs ǁkhāǁkhās ǃgao ge xoaǂgāsen.” ǁÎb ge Jehovab di ǀHûǀguitimî-aon sîsenni a ǂkhāsa ǃhūb ǃnâ ra hâ.

16. Sao ra ǂkhanigu ra sîsen-ūhe ǀgauba ǁguiǃā re: (a) Eloba ǁnâuǀnam tsî ǀamosib kose ûi re. (b) Eloba xu hâ ǃgâiǂhôasǃ (c) Hamna Jehovab ǂâisa nētsē ra dī?

¹⁶ ǂKhanigu. Mati du khoe-i hîna khomai tama-e Elobmîsa a ǁkhāǁkhā ǁkhā? Eloba ǁnâuǀnam tsî ǀamosib kose ûi re di hâ ǂkhanib ge nēs ǀkha a hui ǁkhā. * Elobmîsa da khoena a ǁkhāǁkhā-ū ǁkhā ǂkhanib ge Eloba xu hâ ǃgâiǂhôasǃ dî hâba. Nē ǂkhanib ǃnâ î ge 14 ǁkhāǁkhāǃâde hâ khoena du a ǁhûi kai ǁkhāde. Tsî Elobmîs ǁkhāǁkhāsa khoe-i go ǁhûi ǁkhāǁkhāǃâsa xu tsoatsoa re. Nēsa du ǀnai dī tsâ hâ? Hamna Jehovab ǂâisa nētsē ra dī? di hâ ǂkhanib ge a ǃnonaǁî hîna du a sîsen-ū ǁkhāba sida ǁkhāǁkhā-ū boksisa xu. Nēs ge khoena sida ǀapeǂhumisa ǃoa ra ǁnaeǁgau. Nē ǂkhanib ra sîsen-ūhe ǀgauba mûs ǃgao, Our Christian Life and Ministry—Meeting Workbook Maarti 2017ǁî kurib diba mû re.

17. (a) Mâ ǂkhanis hoasa mâ ǀgaub ǃnâ ra sîsen-ūhe? (b) ǁĀǁnâhe ǂgao ra khoe-e tae-e nî dī tsî tae-i ǃaroma?

¹⁷ ǂKhanidi. Elobmîs ǁkhāǁkhās ga ǂkhanigu ǃnâ ga ra tsoatsoahe o, o du ge Elobmîsa tae-e a ǁkhāǁkhā da ǁkhā? di hâ ǂkhanisa ǃoa a doe ǁkhā. Nē ǂkhanis ge sida Elobmîs ǂansa nî khoraǂui. ǁNā ǂkhanis ǀkha du ga ra toa o, o du ge How to Remain in God’s Love di hâ ǂkhanis ǀkha a tsoatsoa ǁkhā. Nē ǂkhanis ge Elobmîsa du ra ǁkhāǁkhā khoe-e nî hui î-i Elobmîs tsoatsoade ǁî-i ûib ǃnâ ûiǂui. ǁĀǁnâs khaoǃgâs tsîna î ge khoe-e ǁî-i ǁkhāǁkhās ǀkha nî aiǃgû nē ǂkhanisa î nî toas kōse. Nēs ge nî hui nî în ǃgâi ǃgaoǃgaosa amab ǃnâ ūhâ.—Khomai re Koloseǁîn 2:6, 7.

18. (a) 1 Timoteub 4:16 sa tae-e ra ǂkhâǃnâ da ǁkhāǁkhās tawa î ga ra hā o? (b) ǁKhāǁkhā-ū boksisa da ra sîsen-ū khami da tae-e nî mîǁgui?

¹⁸ Jehovab di ǀHûǀguitimî-aon ase da ge ‘amab di mîs ǃgâiǂhôas disa’ ra aoǁnâ hîna khoena ǀamo ûiba a mā ǁkhāsa. (Kol. 1:5; khomai re 1 Timoteub 4:16.) Nēs ǂam-ai da ge ǁkhāǁkhā-ū boksisa ūhâ hîna ǂgui xūna ūhâsa sida ǂhâ hâna. (Mû re “ ǁKhāǁkhā-ū boksisa.”) Nē xūna da ge ǃamku ǀgaub ǃnâ nî sîsen-ū. Mâ aoǁnâ-ao-i hoa i ge nî mîǁgui mâ ǂkhani-e î ra sîsen-ū ǂgaosa ǁkhāǁkhā-ū boksisa xu. ǂKhanin ǀguina da ge māǂui ǂgao tama hâ tsî khoen ga ǃgâiǃgâibasensa ǁgau tama ga ra io, o da ge ǁîna ǂkhani-e tā nî mā. Sida ge ǁkhāǁkhāsabena ra dī ǂgao hîna a ǂhauǃnâ, ǃgamǃgamsenxa tsî gagasise ǃâ hâna tsî ‘ǀamo ûiba ǃoa ǃkhōǂuibasenhe hâna.’—ǃNaeǃkhaidi 13:48; Mat. 28:19, 20.