1-2. (a) Efeseǁîn 6:16 ǃoagu da tae-i ǃaroma gagasi khōsikhōsa ǂhâ hâ? (b) Mâ dîde da nî ǃhoaǃgao?

‘GAGASI khōsikhōsa’ du ūhâ? (Khomai re Efeseǁîn 6:16.) Î, sadu ge nēsa ūhâ. Khōsikhōs sorosa ra ǁkhauba khamis ge ǂgomsa sadu tsîna nē ǃhūbaib di ǁgauoǃnâ, ǂkhabaxa tsî Elob ǂâi ǀgaub ǀkha ǃgûǀhao tama xūn hoana xu ra ǁkhauba.

² Xawe da ge “ǀuni tsēdi” ǃnâ ûi hâ tsîs ge sada ǂgomsa nî ǃâitsâhe. (2Tim. 3:1) Mati da sada di gagasi khōsikhōsa nî kōǃgâ is ǀgaisase hâ? Tsî mati da sada di khōsikhōs ai nî ǃkhōǀgara? Nē dîra di ǃereamde da ge nēsi nî ǃhoaǃgao.

3. Toro ǃkham-aoga tae-e ǁîgu di khōsikhōde gere dī tsî tae-i ǃaroma?

³ Elobmîs ǁaeb toro ǃkham-aogu ge khōsikhōdi hîna khōb ǀkha a kurusade ge ūhâ i. Toro ǃkham-aogu ge ǁîgu di khōsikhōde ǁuib ǀkha gere ǂkhau i i tā ǀoro sao ra ǃkhams amsi gu nî aiǂhomisaga. Nē aiǁgausa mati sada ǂgoms ǀkha a ǃgaeǀhaosa?

4. Tae-i ǃaroma da sada di gagasi khōsikhōsa nî ôaǃnâ tsî nēsa da mati a dī ǁkhā?

⁴ ǃKharu ge ǁaeb toro ǃkham-aogu khami da ge sada di gagasi khōsikhōde hoaǁae nî ôaǃnâ i da sao ra ǃkhams amsi aiǂhomisa ǁkhā. Xristeǁî da ase da ge gagasi ǃkhams ǃnâ hâ tsî nē ǃkhams ge demonga ǃkhōǂgā hâ. (Efe. 6:10-12) ǀNî hâ khoe-i ge sadu di gagasi khōsikhōsa a khōǃgâba du ǁoa. Mati da a ǂan ǁkhā sada ǂgoms a ǀgaisa ǃkhaisa ǃâitsâhe da ga o? ǂGuro da ge Eloba ǃoa nî ǀgore hui-es ǃaroma. ǁNāpaxū da ge Elobmîsa nî sîsen-ū Elob  ra mû da khami mûsens ǃaroma. (Heb. 4:12) Elobmîs ge ra mî: ‘ǂGomaiǂnûi Jehovab ai sa ǂgaob hoab ǀkha, îts tā sa ǁnâuǃāb ai ǂgomǃgâ.’ (ǂKhm. 3:5, 6) Tae-e ǂâis ǃnâ ūhâse da dī da ge mîǁguigu xa nî ǂâiǃgâ? Aiǁgause mari ǃgomsina du gere hōǃâ? Jehovab mîmâis hîna Hebreǁîn 13:5 ǃnâ hâs xa du ge ǂâi: “Tita ge ǁnāxū tsi tide, tsî ta satsa xu ūdawasen tide” di hâs xa. Nē mîmâisa Jehovab nî huidu ǃkhaisa ge ǂgom kai du? Nēs ga ama o, o du ge sadu di gagasi khōsikhōsa ǃgâi mâsib ǃnâ ra ūhâ.

5. Tae-e da a hō ǁkhā sada di ǂgomsa da ga ôaǃnâ o?

⁵ Sada ǂgomsa da ga ǃgâise ôaǃnâ o, o da ge nî buru hō da ra xūn xa. ǂKhabusasigu hîna du ge ǂanǃgâ tama hâ i ga du ge a hōǁkhā. Aiǁgause, du ge ǀū du a ǂâiǂhansendi tsî ǁgâiǀāgu hîna sadu ǂgomsa ra ǂkhabu kai gu tsîna a ūhâ ǁkhā. Nēs ga sadu ǀkha ī o, o du mati sadu ǂgomsa nî ǁkhauba îs tā aisǀkhāb ǀkha ǂkhabu?

6. Mâna a ǃgâi ǂâiǂhansendi di aiǁgau?

⁶ ǀNî xūn xa ǂâiǂhansens ge a ǃgâi. Aiǁgause da ge Jehovab tsî Jesub tsîna ǂkhîǂkhîs di ǂâiǂhansende ūhâ. (1Kor. 7:32) Tsū ǁore-e da ga dī o, o da ge sada ǀhōsagusisa Jehovab ǀkha ǃgâiǃgâis xa ra ǂâiǂhansen. (Psa. 38:18) Sada ǃgame khoe-e ǂkhîǂkhîs xas tsîna da ge ra ǂâiǂhansen tsî sada omaridi ǁanin tsî ǀhaohâb khoen ǂurusib tsîn xa.—1Kor. 7:33; 2Kor. 11:28.

7. ǂKhoamîdi 29:25 ǃoagu da tae-i ǃaroma khoena ǃao tide?

⁷ Xawe ǂhâbasa tama ǂâiǂhansende ūhâs ge sada ǂgomsa nî ǂkhabuǂkhabu. Aiǁgause da ge ǂâusa ǂû-i tsî saran tsîna ūhâs xa a ǂâiǂhansen ǁkhā. (Mat. 6:31, 32) Sada ǂâiǂhansende ǀoroǀoros ǃaroma da ge ǂgui mari-e a sîsen tsoatsoaba ǁkhā, nē xūna hōs ǃaroma. Mari-i tsîna da ge a ǀnam tsoatsoa ǁkhā. Nēsa da ga mā-am o is ī, o da ge sada ǂgoms Jehovab ǃnâ da ūhâsa a ǂkhabuǂkhabu ǁkhā tsî sada ǀhōsagusis tsîna a khôa ǁkhā. (Mrk. 4:19; 1Tim. 6:10) Tamas ka io da ge ǀnî ǃnôa ǂâiǂhansens ǃnâ a ǁnā ǁkhā, khoen xa ūǃoahes di ǂâiǂhansens. Nēs xa ǃaroma-e hâse da ge khoen xa ǁgâiǀāhesa nî ǃao tsoatsoa tsî Jehovaba nî ǃao ǀû. Nēsa xu ǁkhaubasens ǃaroma da ge Jehovaba ǂgoms tsî ǁkhoaǂgaosib tsîna nî ǂgan i da tā khoena ǃao.—Khomai re ǂKhoamîdi 29:25; Luk. 17:5.

8. Mati da ǂhumib ǃoa-ai nî tanisen?

⁸ Satanni “ǂhumib di ǁgûb” ge ǁîb ǃnāga ra sîsen khoena ra sîsen-ū, Jehovab tsî sada ǃgâsan tsîn xa hâ ǂhumiba aiǃgû kais ǃnâ. (Jhn. 8:44) Aiǁgause ama tama ǂgomdi ge ǂhumiba Jehovab ǀapeǂhumis xa internets tamas ka io ai-īsiǂhôaǂgares ǃnâ-ū ra mā ǃkharu. Nē ǂhumib ǀnîb ge Satanni di “ǀaexa ǂāgu” di ǃâ. (Efe. 6:16) Tae-e da nî dī khoen ga sada ǀkha nē ǃnôa ǂhumib xa ǃhoa tsoatsoa o? Sada ge nē ǂhumiba ǃgâ tide. Tae-i ǃaroma? Sada ge Jehovab ǃnâ ǂgomsa ūhâ tsî sada ǃgâsana ra ǂgomǃgâ. Tsî da ge ama tama ǂgomde xu ra ǂgōsen ǂgao. Sada ge xūn hoana xu ra ǂgōsen tsî xū-e mā-am tama hâ în nē ǃnôa khoen ǀkha ǀhaoǀhao da.

9. ǂKhabuǂâis tsâsiga mati a tsâǀkhā da ǁkhā?

⁹ ǂKhabuǂâis tsâsigu ge sada ǂgomsa a ǂkhabuǂkhabu ǁkhā. Sada ǃgomsina xu  da ge a ǂgōsen ǁoa. Nēsa da ga dī o, o da ge ǃgâi tama xū-e ra dī. Tsî da ge ǁaen ai a ǂkhabuǂâi ǁkhā. Xawe da ge hoaǁae sada ǃgomsin xa ǀgui ǂâi ǂgao tama hâ. Nēsa da ga dī o, o da ge ǂgui ǃgâi ǀkhaegu hînab Jehovaba mîmâiba da hâ ga a ǀuru ǁkhā. (J.ǂHa. 21:3, 4) Nē ǂkhabuǂâis tsâsigu ge kai ǁgâiba a mā da ǁkhā tsî da ge Jehovaba a ǃoaba ǀû ǁkhā. (ǂKhm. 24:10) Xawe da ge nēsa a ǁkhae ǁkhā.

10. ǃGâsas xoa hâ sîǂkhanisa xu da tae-e ra ǁkhāǁkhāsen?

¹⁰ Kō re ǃgâsas hîna Amerikab ǃnâ ra hâs ǁîs ǂgomsa ra ǃkhoǀgara ǀgausa ǁîs ti kaikhoeb hîna kaise ǀaesen hâbas ra kōǃgâ hîna. Sîǂkhanis hînas ge ǀapeǂhumisa ǃoa a xoas ǃnâs ge ge mî: “Sim di mâsib ge ra ǂkhabuǂâi kai mî tsî ra khôa mî xawem ge sim di ǂgomsa ra ūhâ ǀgara. Kaise ta ge ra ǃgôaǃgâ Jehovab sim ǂgomsa ǀgaiǀgai tsî sima ǂkhâǃnâs ǃaroma ra mā mî xūn hoan ǃaroma. Nē daoǁgaus tsî ǂkhâǃnâs tsînam ge amabes ǃnâ kaise ǂhâ hâ. Nēs ge ra hui mî Jehovaba ǃoabas ǀkha aiǃgûsa tsî Satanni sima ra mā ǃgomsin ǃnâs tsîna mâǀgais ǃnâ.” Nē ǃgâsas aiǁgausa xu da ge ra ǁkhāǁkhāsen ǂkhabuǂâis tsâsigu ǃnâ da a mâǀgai ǁkhā ǃkhaisa. Mati? ǂAnǃgâ da ge nî Jehovab hoaǁae ra ǁkhaeǂgao da ǃkhaisa. Tsî ǁîb da mā da gagasi ǂûna ǃgôaǃgâ re.

11. Sada ǂgoms a ǀgaisa ǃkhaisa mûs ǃaroma da mâ dîde nî dîsen?

¹¹ Sadu ǂgoms ǀgaiǀgai-esa ǂhâ hâ ǃkhaisa du ra mûǂan? ǃKharu go ǁkhâgu ǃnâ du ǂâiǂhâsens tsâsiga xu go ǂgōsen tsâ? Dītsâ da ra ama tama ǂgomdi sada xa ra mî ǂhumiba ǃgâ tama isa tsî tā ǁîn ǀkha ǂnoagusa? Tsî ǂkhabuǂâis tsâsigu tsîna du ra mâǃoa hō? Nēs ga ama o, os ge sadu ǂgomsa ǃgâi mâsib ǃnâ hâ. Xawe da ge nî ǂanbasen Satanni ge ǀnî hâ ǃâitsâgu tsîna ūhâ hînab sada ǃoa-ai ra sîsen-ū ǂgaoga. Hā re i da ǀgui ǃâitsâba ǃhoaǃgao.

12. Mari-e ǀnamma omkhâibasa tae-e a dī kai da ǁkhā?

¹² Mari-e da ga ǀnam o, os ge sada ǂgomsa nî ǂkhabu tsî da ge Jehovaba  ǀorose nî ǃoaba. Apostel Paulub ge ge mî: “Torob ǃnâ ra ǃoaba-i xare-i ge ûib di ǂhansendi ǀkha ǁae tama hâ, toroǃoabas ǃoa ǁî-e ge ǃgaeba-i nî ǃgâiǃgâibase.” (2Tim. 2:4) Romeǁî toro ǃkham-aogu ge ǀnî hâ sîsen-e dīsa ge mā-amhe tama hâ i. Tae-e ge īǁkhā i toro ǃkham-aob ga nēsa ǁnâu-am tama io?

13. Tae-i ǃaromab toro ǃkham-aoba ǀnîhâ sîsen i ǃnâ ge ǃâ tama hâ i?

¹³ Nēs xa ǂâi re. Toro ǃkham-aogu ge hoa ǁgoasa ra aiǂhomisen tsî ǁîgu gôaga ra ǀāǀā xaweb ge ǀgui toro ǃkham-aob a ǀkhai. Nē toro ǃkham-aob ge ǁamaxū ǁgâugu tawa xūnab nî ǁamaxū ǃkhaisa ra ǁkhowa-ambasen. ǃUia gu ge toro kham-aoga ǁîgu di toro ǃkham-ū xūna ra kōǃgâ tsî ǁîgu di gôaga ra ǀāǀā. Xawe nau toro ǃkham-aob ge nau ǁgoagab nî ǁamaxū ǂûna ra aiǂhomi. Sao ra tsē gu ge ǀnîhâ toro ǃkham-aoga ǀūǃgâsegu hâ hîna ra ǁnāǂamgu. Mâ toro ǃkham-aoga nî aiǂhomisa i tsî nē ǃkhamsa nî dan tsî ǁîgu toro mûǂam-aoba nî ǂkhîǂkhî? Tsî torob ga ǃkham-e toa o, ob toro mûǂam-aoba aiǂhomisen go hâ i toro ǃkham-aogu xōǀkhā nî mâ tamas ka io ǂâis âba go ǀnî hâ xûn ai ūhâ i toro ǃkham-aob xōǀkhā?

14. Xristub di toro ǃkham-aon ase da tae-e ra ǃgôaǃgâ?

¹⁴ Sada ge ǃgâi toro ǃkham-aogu khami i. ǂHâǂhâsa xū-i sada ǃaroma i ge Jehovab tsî Xristub, sada di mûǂam-aokha ǂkhîǂkhîsa. Nēs ge Satanni ǃhūbaib ǃnâ da a hō ǁkhā xūn hoan xa kaise a ǂhâǂhâsa. ǁAeb tsî ǀgaib tsîna da ge Jehovaba ǃoabas ǃaroma ra ūhâ ǂgao tsî sada di gagasi khōsikhōsa ǃgâi mâsib ǃnâ ra ūhâ ǂgao.

15. Pauluba tae ǃkhâikhom-e ge mā da tsî tae-i ǃaroma?

¹⁵ Hoaǁae da ge ǂkhaikari nî hâ. Tae-i ǃaroma? Apostel Paulub ge ge ǃkhâikhom: “ǃKhū ǂgao ran ge ǂgomsa xu ge ǃkhoeǂnâ.” (1Tim. 6:9, 10) “ǃKhoeǂnâ” di hâ mîs ge ra ǂâibasen ǃkhūsisa ǀhaoǀhaobasens sada ǂâisa nî ǂgaeǁnâ ǃkhaisa.  Nēsa da ga dī o, o da ge sada ǂgaoga “ǂgui gâre tsî ǂkhôasa tura-aigu” ǃoa-ai nî ǁkhowa-am. Nē turaga sada ǂgaob ǃnâ mā-ams xa da ge nēsa Satanna xu ra hā ǁgâiǀāgu ase nî mû sada ǂgomsa ǂkhabuǂkhabus ǃaroma.

16. Markub 10:17-22 ǃnâ xoasa mîde mâ dîdi xa nî ǂâi kai da?

¹⁶ ǂÂi re ǂhâba da hâ xūn hoana ǁamas ǃaroma da ge ǂâusa mari-e ūhâ. Tsū xū-e da ra dī, xū-i hîna da ǁnātikōse ǂhâ tama hâ-e da ga ǁama o? Hî-i. Xawe nē dîdi xa ǂâi re: Nē xū-e ǁamas di mari-e da ga ūhâ xawe da nē xū-e sîsen-ū tsî nî kōǃgâ? Tsî xūn hîna da sada mari i ǀkha ra ǁaman xa da ǃnāsase a ǂâi tsoatsoa ǁkhā? Mari-e ǀnamma omkhâibasa ǂkham khoeb hîna Jesub di ǁkhauǂuisa ge ūǃoa tama hâ i Eloba ǃnāsa-e dības ǃnâb khami a ī kai da ǁkhā? (Khomai re Markub 10:17-22.) Kaise i ge nî ǃgâi ǀguiǃgūpu ûiba ūhâ tsî da ga sada di ǁaeb tsî ǀgaib tsîna Elob di ǂâisa dīs ǃnâ sîsen-ū o.

17. Tae-e da ǀuru tide?

¹⁷ Toro ǃkhams ǃnâ da hâ ǃkhaisa da ge ǀuru tide tsî nēs ǃaroma tsēs hoasa ǂkhaikhari nî hâ. (J.ǂHa. 12:17) Sada ǃgâsan  ge sada di gagasi khōsikhōsa a taniba da ǁoa. Sada ge aitsama nē khōsikhōsa nî ǃkhōǀgara.

18. Tae-i ǃaromagu ǃkharu ge ǁaeb di toro ǃkham-aoga ǁîgu di khōsikhōde ǀgaisase gere ǃkhōǀgara?

¹⁸ ǃKharu ge ǁaeb ǃnâ gu ge toro ǃkham-aoga ǁkhoaǂgaosiba gu torob ǃnâ gere ǁgau o, o ǃgôaǃgâsiba gere ǁgau-e. Xaweb ge toroba xub ga ǁîb di khōsikhōs ose oaǀkhī o, o kaise gere tao. Romeǁî Tacitusi ge ge xoa: “Toro ǃkham-aob ga ǁîb di khōsikhōs ose oaǀkhī o, ob ge kai ǃgôaoǃnâsiba gere ǁgau-e.” Nēs ǃaroma gu ge toro ǃkham-aoga hoaǁae ǁîgu di khōsikhōde gere ǃkhōǀgara.

19. Mati da sada di gagasi khōsikhōsa a ǃkhōǀgara ǁkhā?

¹⁹ Sada di gagasi khōsikhōsa da ge ǀgaisase ra ǃkhōǀgara hoaǁae da ga Xristeǁî ǀhaode ǃoa ī, Jehovab ǀons xa ǃhoa tsî ǁîb Gaosib xa nau khoena aoǁnâba o. (Heb. 10:23-25) ǁKhā ǁaeb ai da ge Elobmîsa tsēs hoasa ra khomai tsî Jehovaba ǃoa ra ǀgore îb khomai da ra xūna ûiǂuis ǀkha huida. (2Tim. 3:16, 17) Nēsa da ga dī o, o gu ge Satanni sada ǃoa-ai ra sîsen-ū ǁgâiǀāga hâ hâ tide. (Jes. 54:17) Sada ‘khōsikhōb ǂgoms’ dib ge nî ǁkhauba da. ǁKhoaǂgaosib ǀkha da ge sada ǃgâsan ǀkha ǀguiba nî sîsenǀhao. Sada ǃkhams hîna da tsēkorobe ūhâsa da ge nî dan tsî sada ǂgomsa ǀgaisase nî ūhâ tsî kaise a ǂhâǂhâsas ge Jesub ǀkhāb ai da nî hâsa torob hînab Satanni tsî ǁîb saosaben ǃoa-ai ūhâ tsî nî dani ǃnâ.—J.ǂHa. 17:14; 20:10.