1, 2. (a) Jesuba mati Petruba ge ǃeream? (Tsoatsoas ǃnâ hâ ai-īsiba mû re.) (b) Tsî tae-i ǃaromab ge di ǃeream?

JESUB di ǁkhāǁkhāsaben ge ǁnâun go xū-e ǂgom ǂgao tama hâ. Jesub hîna Israelǁaes di gaosisa nî ûikhâib ge ra mî ǀgūǁaeb ge ǃgomsiba hōǃâ tsî nî ǁō di. Tsîb ge apostel Petruba xū-e nēs xa ge mî. ǁÎb ge ge mî: “ǀKhomsen re, ǃKhūtse.” “Îs tā nēsa ība tsi re!” Ob ge Jesuba ge ǃeream: “Bē ti khaoǃgâ, Satantse, ǁgonǁgonxaba tets a, Elob dinats ǂâi tama, tsî khoen dinats ra ǂâi xuige.”—Mat. 16:21-23; ǃNaeǃkhaidi 1:6.

² Nē mîdi ǃnâ-ūb ge Jesuba Elob ra ǂâi ǀgaub tsî Satanni ra ǂâi ǀgaub tsîna gere ǀgopeǀnō. (1 Johaneb 5:19) Xaweb ge Petruba ǀkhomsenxa gagab hîna nē ǃhūbaib ai hâb xa gere ǃhoa. Jesub ge ǁîb ǁGûb di ǂâi ǀgaub a ǀgarasa ge ǂan i. ǁÎb ge ge ǂan i Elob ge ǂhâba hâ îsa îb ǀgai ǃgomsigu tsî ǁōb hînab nî hōǃâb ǃgao. Tsî Petrubab ge ǃeream ǀgaub ǃnâb ge Jesuba ge ǁgau ǁîb Jehovaba ǃoaba tama hâ khoen di ǂâi ǀgauba ūǃoa tama hâsa.

3. Tae-i ǃaroma i a ǃgom Jehovaba ǃoaba tama hâ khoen di ǂâi ǀgauba ūhâ tama isa?

 ³ O sida? Elob ǂâi ǀgauba da ūhâ tamas ka io ǁGâuab diba? Ama as ge sida tanisen ǀgauba da ge Elob ǂgaoǀkhādi ǀkha a ǀguiǃnâxa kaisa. O sada ǂâi ǀgaub? Sada ǂâi ǀgaub tsî tsâ ǀgaub tsîna a ǀguiǃnâxa Jehovab dib ǀkha? Nēsa dīs ge kai ǁguiǂgāsens tsî ǁgūtsâs tsîna ǂhâ hâ. ǁGūtsâ tama da ga ra io, o da ge Jehovaba ǃoaba tama hâ khoen di ǂâi ǀgauba a ūǃoa ǁkhā. Nē khoen di ǀgaugu ge sada ǂnamipe hoaǁae hâ. (Efe. 2:2) Nē ǀgaugu ge sada xa ǀgui ǂâisa ra ǁgau tsî ǁnās ǀkha a ǃâitsâ da ǁkhā. Kaise î ge a ǃgom Jehovab ǂâi ǀgauba ūhâ tsî nauǀkhāb ais tsîna Jehovaba ǃoaba tama hâ khoen di ǂâi ǀgauba ūhâ tama isa.

4. (a) Tae-e nî hā Jehovaba ǃoaba tama hâ khoen di ǀgauga da ga ra ūǃoa o? (b) Nē ǁkhāǁkhāǃâsa mati nî hui da?

⁴ Jehovaba ǃoaba tama hâ khoen di ǂâi ǀgauba da ga ra ūǃoa o, o da ge a ǂgaeǂhapuhe ǁkhā tsî ǁî-aitsama ǀnamsens ǀgaugu tsî ǃnorasasiba ūhâ ǂgaos di ǀgauga a ǃomaǃkhō ǁkhā. (Markub 7:21, 22) ǁNās ǀkha da ge nî dītsâ î da ‘Elob dina ǂâi’ tsî tā ‘khoen dina ǂâi.’ Nē ǁkhāǁkhāǃâs ge nēs ǀkha nî hui da. Mû da ge nî sada ǂâi ǀgauba Jehovab dib ǀkha ǀguiǃnâxa kaisa xu da mati a ǀama ǁkhā ǀgauba. Tsî da ge mati da nē ǃhūbaib di ǂâi ǀgauba a mâǃoa ǁkhā ǀgaub tsîna nî kō. Sao ra ǁkhāǁkhāǃâs ǃnâ da ge mati da Jehovab ǂâi ǀgauba ǂgui ǀgaugu ǃnâ a sîsen-ū ǁkhā ǀgaub tsî ǁîb ǂâi ǀgauba ûiǂuis tsîna nî ǁkhāǁkhāsen.

5. Tae-i ǃaroman ǀnîna khoe-i xa ǂgaeǂguihesa ūǃoa tama hâba?

⁵ ǀNî khoen ge nau khoe-e ǁî-i ǂâi ǀgauba ǀkharaǀkharas tamas ka io ǂgaeǂhapusa mā-am tama hâ. ǁÎn ge ra mî “tita ge aitsama a ǂâibasen ǁkhā.” ǁÎn ge nēs ǀkha ǀnîsi ra ǂâibasen ǁîn aitsama mîǁguiga a dībasen ǁkhāsa. ǁÎn ge ǂgao tama hâ nau khoe-i xa ǂgaeǂguihesa tsîn ge nēs ǀkha aitsama ra mâbasen ǂgao. *

6. (a) Jehovaba mā ǃnorasasiba ra mā-am? (b) Nē ǃnorasasiba a ǂhunumâ?

⁶ ǂÂis ǃnâ da nî ūhâs ge sida ǂâi ǀgauba da ga Jehovab dib ǀkha ga ra ǀguiǃnâxa kai o, os ǁnāsa ǂâibasen tama hâsa sida ra tsâ ǀgaub tamas ka io ra ǂâi ǀgauba da nî dawa di. 2 Korinteǁîn 3:17 ge ra ǁgau, “ǃKhūb di Gagab hâpa, ǁnāpab ǃnorasiba” hâsa. Sada ge ǁnā aiǂhanuba ūhâ ǂgao da ra ǀgauga omkhâisa. Sada ge ǁkhoaxabahe da a xūna ǃnorasase ǁhûi ǁkhā. Jehovab ge di a kuru da amaga. Xawe da ge aitsama ǁhûibasens ǃnorasasiba ǃgâi ǀgaub ǃnâ nî sîsen-ū. (Khomai re 1 Petrub 2:16.) ǃGâin tsî tsūn ǁaegu ǁhûis tawa î ga ra hā o, o da ge Jehovab ǂâi ǀgaub xa ra daoǁgauhe ǂgao ǁîb mîsa xū. Nēsa ǃkhōsis ǃnâ ra ǃkhōda tamas ka io da nēsa xū ra ǀama?

7, 8. Jehovab ǂâi ǀgauba ūhâsa mati ǃkhōsi tama hâ? Khō re.

⁷ Nē ǂkhōs xa ǂâi re. ǁGûn ge ra dītsâ ǁîn ǀgôan ǃnâ ǃgâi ǀgauga omkhâisa. ǁÎn ge ǀgôana a ǁkhāǁkhā ǁkhā în ǂhauǃnâ, ǃgarise sîsen tsî nau khoen xas tsîna ǂâi. Nē ǀgaugu ge tsū tama hâ. Nēs ǀgôana hānîǁaeb ǃgao ra aiǂhomi amaga. Tsî nēs tsîn ge ǀgôana  nî hui omsa xūn ga doe ǂoa ǁaeb ai în ǁîn mîǁguiga aitsama dī ǁkhā. ǀGôan ga ra ǁhûi o în ǁîn ǁgûna xūn ge ǁkhāǁkhāsen xūna ūǃoa, os ge nēsa ǁîna nî hui în ǃgâi mîǁguigu hîna tsûba ǃaroma tidena dī. Tsîs ge nēs tsîna nî huin în ǃgomsigu tsî ǂâiǂhansendi tsîna xū ǂgōsen.

⁸ ǀNamǀnamsa ǁgûb khamib ge Jehovaba ra ǂhâba în ǁîb ǀgôana ǃgâi ǀgaub ǃnâ ûi. (Jes. 48:17, 18) ǁNās ǀkhab ge ǃgâi Elobmîs tsoatsoade ûib tsî nau khoen ǀkha da nî hâ ǀgaub xa ra māda. Tsîb ge ra mîba da î da ǁîb ǂâi ǀgauba omkhâi tsî ǁîb xūna ra mû ǀgaub tsîna mû. Sida ǁgaris xab ge ǁîba ǃgâiǃgâi, khâikhâiǃnâ tsî sida ǂâi ǀgauba ra khoraǂûi. (Psa. 92:5; ǂKhm. 2:1-5; Jes. 55:9) Tsîs ge nēsa ra hui da î da mîǁguigu hîna ǃgâiaǂgaoba ra māda ga ūhâ, khoe-i ase da ra kai khami. (Psa. 1:2, 3) Jehovab di ǂâi ǀgauba ūhâsa xu da ge kaise ra ǀama.

9, 10. Jehovab ǂâi ǀgauba mati a ǀgapi nē ǃhūbaib dib xa?

⁹ ǀNî hâ ǃaromas Jehovab di ǃoaba-aon ǁîb ǂâi ǀgauba ǁîn di ǂâi ǀgaub ǀkha ra ǀguiǃnâxa kais ge, ǁÎb di ǀgaub a ǀgapi amaga. Nē ǃhūbaib di ǃâgu ge ûi ǀgaub, omaris di ǁanin, sîsenni tsî ǀnîhâ ǀgaugu ǃgaos tsîna ra ǀapemā. Nēn hoan ge Jehovab di ǂâi ǀgaub ǀkha ǀgui tama hâ. Aiǁgause, aitsama ǀgapiǃgôasens ge ra ǂkhâǃnâhe. Tsî ǁgauoǃnâ ǁgoe-ūgub tsîna. ǃGame khôas tsî ǀgoras tsîn ge ǂhâbasa tama hâ ǃaromadi ǃgao ǂkhîba ūhâs ǃgao ra ǁgauǂûihe. Nēti-i ǀapemādi ge Elobmîs ǀkha ǀguiǃnâxa tama hâ. Xawe ǀnî ǀapemāde sada ûiǃnâ hâ ǁaeb ǃgao a ǃgâi?

¹⁰ “Gā-aisiba ǁîb di ôan[sîsengu] xa ǂhanu-ai kaihe hâ” dib ge Jesuba ge mî. (Mat. 11:19) ǃHūbaib ge texnologib ǀkha ra aiǃgû, xawe î ge tātsēs tsîna hâ a kai ǃgomsiga a ǀamǀam ǁoa hîna ǂkhîba ra ūbeba. Aiǁgause torogu, ǃhao ǀgoras tsî ǂkhabadīb. O ǁîn khoesib tsoatsoade ra mû ǀgaub? ǂGuin ge ge mûǂan, nēs omaride ra ǀgora tsî ǀaegu tsî ǀnîhâ ǃgomsigu tsîna ra ǃaromasa. Tsîn ge nau ǀkhāb ai Xristeǁîn hîna Elob di ǂâi ǀgauba ra ūǃoana omaris ǂkhîb tsî ǀaegu hînan ra hōǃâgan a ǃkham ǃoa ǀgaub tsîna ra ǁkhāǁkhāsen. Tsî ǁnās tsîn ge ǀguiǃnâxasib tsî ǂkhîb tsîna Elob ǃoaba-aon ǁaegu ǃhūbaib ǂhawase ra aiǃgû kai. (Jes. 2:4; ǃNǃkh. 10:34, 35; 1Kor. 6:9-11) ǁNāsa amabes ǃnâ ǁgau tama hâ Jehovab ǂâi ǀgaub a ǀgapisa ǃhūbaib dib xa?

11. Ham-i ǂâi ǀgauba Moseba ge daoǁgau tsî nēsa mati ge ǀamǂoa?

¹¹ Elobmîs ǁaeb di Xristeǁîn ge ge mûǂan Jehovab ǂâi ǀgaub a ǀgapisa. Moseb aiǁgaus xa ǂâi re, ǁîb ge “Egipteǁîn di gā-aisib hoaba gere ǁkhāǁkhāhe.” Xaweb ge Elob ǃoa ge kō îb ‘gā-ai ǂgaoba’ māhe. (ǃNǃkh. 7:22; Psa. 90:12) ǁÎb ge Jehovab tsîna ge ǀkhoma: “A ta ǂan sa daoba.” (Eks. 33:13) Jehovab ǂâi ǀgaub xa daoǁgauhe hâseb ge ǁîba ǀoasase ǁÎb ǂâibasensa ge sîsenǂui. Tsîs ge xoasa Moseba aob hîna ge ǂoaǂamsa ǂgomsa ūhâ îb ase ra ǁgau.—Heb. 11:24-27.

12. Apostel Pauluba mâ ǂâi ǀgauba gere sao?

¹² Apostel Paulub ge ge gā-ai khoe-i, ǁîb ge kai ǂansa ge ūhâ i tsî ǀgam gowakha tsîna gere ǃhoa. (ǃNǃkh. 5: 34; 21:37, 39; 22:2, 3) Xaweb ge ǁîba tsoatsoadi tawa î gere hā o, o ǃhūbaib di ǂâi ǀgauba gere ǂhābe. ǁÎb ge Xoadi ai gere kō. (Khomai re ǃNaeǃkhaidi 17:2; 1 Korinteǁîn 2:6, 7, 13.) Tsî nēs xa ǃaromahe hâseb ge Pauluba ǁkhoaxa aoǁnâ ǁaeba ge ūhâ i tsî hānî ǀkhaeba ǃoa gere mûǂui.—2Tim. 4:8.

13. Ham-e ǃereamsa ra tani sida ǂâi ǀgauba Jehovab dib ǀkha ǀguiǃnâxa kaisa?

¹³ Nē ǃhūbaib di ǂâi ǀgaub xab ge Elob di ǂâi ǀgauba a ǀgapi. Elob di ǂâi ǀgaub ǃoagu ûis ge ǃgâiaǂgaob tsî ǃgâiǃōb tsîna nî māda. Xaweb ge Jehovaba ǁîb di ǂâi ǀgauba sida ai ǁgari tide. Tsî “ǂgomǂgomsa tsî gā-ai ǃgāb” tsî ǀhaohâb ǃûi-aogu tsîn ge sida ai gaoǂam tama hâ. (Mat. 24:45; 2Kor. 1:24) Xawe î ge mā Xristeǁî-i hoa-e ǁnā ǃereamsa ra tani, ǁî-i ǂâi ǀgauba Elob dib ǀkha ǀguiǃnâxa kaisa. Nēsa da mati a dī ǁkhā?

14, 15. (a) Tae-i ai da sada ǂâisa nî mâi? (b) Romeǁîn 12:2 sa tae-e ra ǁgau nē ǃhūbaib ǃâ kai ǂgao tama da ga ra io? ǂKhō re.

¹⁴ Romeǁîn 12:2 ge ra mî: “Î tā nē ǃhūbaib ǀkha ǀguiti dīsen, î du sadu ǂâis di ǀasa kaisis ǃnâ ǀkhara, ǃâitsâ ǁkhā du nîga, mâs a Elob di ǃgâi tsî ǃgâiǃgâibasensa tsî dīǀoaǀoasa ǂâi ǃkhaisa.” Nē mîdi ge ra ǁgau, amaba da ge hōs aiǃâ da ge nē ǃhūbaib ǂâi ǀgaub xa gere gaoǂam-e xawe da noxoba sida ǂâi ǀgauba Elob dib ǀkha a ǀguiǃnâxa kai ǁkhāsa. Sada ǂâi ǀgaub ge ǀumi da ge ǀgaugu tsî ǃkharu ge ǁaeb ǃnâ da ge hōǃâ xūn tsîn xa ge gaoǂam-e. Xawe ǂkhûs ge a ǃhae tsî dawas ǀguisa ra dī. Tsî nē ǀkharaǀkharan ge sada ǂkhûs ǃnâ ra mā-am xūn tsî ǂâi ǂgao da ra xūn tsîn ai ǃgaoǃgaosa. Jehovab di ǂâi ǀgaub xa ǂâiǃgâs ǃnâ-ū da ge ǁîb ra tsâ ǀgauba nî mû. Tsîs ge ǁnās tsîna nî hui da î da sada ǂâi ǀgauba ǁÎb dib ǀkha ǀguiǃnâxa kai.

¹⁵ Xawe ǂâis ǃnâ ūhâ re, Jehovab ǂâi ǀgauba da ga ra ūǃoa o, o da ge ‘tā nē ǃhūbaib ǀkha ǀguiti nî dīsen.’ Tā da ge Elob ǃoagu hâ ǂâi ǀgauba nî omkhâi. Nēs ge ǂûn ǀkha a ǀgpoeǀnōhe ǁkhā. Khoe-i ge ǀnîsi sorosa ǀgaiba ra mā ǂûna ra ǂû tsoatsoa. Xawe tae-e hui hâ ǁî-i ga nauǀkhāb ais tsîna ǁgai hâ ǂûna ga ra ǂû o? ǁNās ǁkhās khami da ga Jehovab ǂâi ǀgaub tsî ǃhūbaib di ǂâi ǀgaub tsîna ǀgui ǁaeb ai ga ra ūǂgā o, os ge ǁnāsa hui tide.

16. Tae-i ǃoagu da nî ǁkhaubasen?

¹⁶ Jehovaba ǃoaba tama hâ khoena xū da hoase a ǂgō ǁkhā? Hî-î, nē ǃhūbaiba xu da a ǃgûǂoa ǁoa amaga. ǁÎn di ǂâi ǀgauba xu da ge a ǃkhoebē ǁoa. (1Kor. 5:9, 10) Xawe da ge aoǁnâ sîsenni ǃnâs tsîna ǂhanu tama ǂgom ǀgauba ūhâ khoen ǀkha ra ǀhao. ǀNîsi da ga ǃgâi tama mâsib ǃnâ ǁîn ǁaegu ga ra hōsen o, o da ge ǁkhā da an hoana nî dītsâ ǁîn ǀgauga ūǃoa tama isa. Jesub khami da ge ǁkhā da as kōse Satanni di ǂâi ǀgauba ra ǃkhōǃkhō ǀgauga nî ǂhābē. Nēs ǃnâ-ū da ge ǃgâi tama ǂâi ǀgauga ūhâ khoen di ǀgauga xu ra ǁkhaubasen.—Khomai re ǂKhoamîdi 4:23.

17. Mâ ǀgaugu ǃnâ da ǁgai ǂâi ǀgauba ūhâ khoena xū a ǂgōsen ǁkhā?

¹⁷ Aiǁgause, ǀhōsana da ga ra ǁhûi ǁaeb ai da ge kaise ǂōrisase nî ǁhûi. Elobmîs ge ra ǃkhâikhom, khoen hîna Jehovaba ǃoaba tama hân ǀkha da ge tā nî hâ ǀhao ǁîn ǂâi ǀgaugu a ǂgaeǂhapu da ǁkhā amaga. (ǂKhm. 13:20; 1Kor.  15:12, 32, 33) ǁKhoaxa ǁaeba ūhâsa da ga ra ǁhûi ǁaeb ais tsîna da ge ǃgâise nî kō. Kurus, ǂkhābadīb tsî ǁgauoǃnâ ǀgauga ra khâikhâiǃnâ ǁaxasiga xu da ge nî ǂgōsen. Nē ǀgaub ǃnâ-ū da ge sida ǂâi ǀgauba ra ǁkhauba tsî “Elob ǂans ǃoagu” hâ ǀgauga ra ǂhābe.—2Kor. 10:5.

18, 19. (a) Tae-i ǃaroma da ǁgai ǂâi ǀgauga xū nî ǂgōsen? (b) Mâ dîde da nî dîsen tsî tae-i ǃaroma?

¹⁸ Mûǂan tsî da ge ǁgai ǂâi ǀgauga xū nî ǂgōsen nēsi î ga ǃgâise ga ra mûsen xawe. Aiǁgause, hoaǃnâ-aixa ǂhôa-i ge ǀnîsi ǀkhāga ǂgīǂgōsi ǃnandi ǁaegu ra ūse ra ǁgauhe. Khoesiba ra tsâǀkhā ǀgaub xa î ge ra ǃhoa-e, ǁnās ge ǃkhūsib tsî xū kais tsîna ra khâikhâi ǃnâ. ǀNî muvin tsî ǂkhanin tsîn ge “tita ǂgurose” tsî “ti omaris ǂgurose” di hâ ǀgauga ra ǁgauǂûi. ǁÎn ge nē xūna ǃgâi ǀgaub ǃnâ ra ǁgauǂûi. Nē ǀgauga Elobmîs di ǁkharagu ǃoagu hâ tama hâ, hîna ra ǁgauga omaris tsî aitsama ǀgapiǀgapisen ǁnātikōse ǂhâǂhâsa tama hâsa. (Mat. 22:36-39) Tsî ǀnî ǀgôaron di ǂkhanin tsîn ge ǁgauoǃnâ ǀgauga ūǃoasa ra khâikhâi ǃnâ.

¹⁹ Nēs ge ǂâibasen tama hâ î da ǁkhoaxa ǁaeba tā ūhâ. Xawe da ge a dîsen ǁkhā: ‘Jehovaba ǃoaba tama hâ khoen di ǀgauga ǀnî hâ ǀgaub ǃnâ gu ga ra ǁgauǂûihe o, os tsîna ra mâǂoa? ǁKhā da as kōse da ra dītsâ omaris ase ǁgai ǁaxasiga xu hâbesa? ǁGai ǂâi ǀgaugu hîna da ra mûgu tamas ka io ra ǁnâugu tsîna da Jehovab di ǂâi ǀgaub ǀkha ra ǀgopeǀnō? Elob ǂâi ǀgaub tsî ǁîba ǃoaba tama hâ khoen di ǂâi ǀgaub tsîna ǀgopeǀnōs ǃnâ-ū da ge “ǃhūbaib ǀkha ǀguiti dīsen” tide.

20. Tae-e nî ǁgau sada Elob ǂâi ǀgaub tamas ka io Satanni xa ra ǂgaeǂguihe ǃhūbaib di ǂâi ǀgauba ūǃoa hâsa?

²⁰ ǂÂis ǃnâ ūhâ re ǀgam ǀgaukha xu da ge ǃgāsasiba ra hō, ǁnāb ge Jehovab tsî ǃhūbaib hîna Satanni xa ra ǂgaeǂguiheb. O sada ham-i xa ra ǀkharaǀkhara-e? Nē ǀkharaǀkharan ge ǃgāsasib ra hāba xu hâ. Nē ǃhūbaib hîna Satanni xa ra ǂgaeǂguiheb di ǂâi ǀgauba da ga ra ūǃoa o, ob ge sida ǂâi ǀgauba nî ǀkhara tsî nî ǁgari da î da ǁgansi turaga sao. ǁNās ǀkha î ge a ǂhâǂhâsa î da ǁnā ǂâi ǀgauba xu ǂgōsen tsî ǂâi da ra xūna kō. 

21. Tae-e da sao ra ǁkhāǁkhāǃâs ǃnâ nî ǃhoaǃgao?

²¹ Jehovab khami da ga ra ǂâi ǂgao o, o, da ge ǃnāsa-e nî dī. Sida ǂâi ǀgaub ǀguiba da ge ǁgai ǀgauga xu ūbe tide xawe da ge Elob di ǂâi ǀgauba nî ūǂgā tsî nî ûiǂui. Sao ra ǁkhāǁkhāǃâs ge noxoba ǃnāsase nî ǁgau mati da nēsa a dī ǁkhā ǀgauba.