1-3. (a) Tae-e nî hui da Elob ǃoa-ai ǂgomǂgomsase hâsa nē ǀuni tsēdi ǃnâ? (b) Tae-e da nē ǁkhāǁkhāǃâs ǃnâ nî ǃhoaǃgao?

ǀUNI tsēdi ra ǀū khamin ge eloxoresa khoena “ǁhaon khami ra ǀomkhâi.” (Psa. 92:7) Khoen ǃamku ǁgaraga a ǀū ǃkhais ge buruxa tama hâ. Nē ǃhūbaib ǃnâ da mati “ǂkhabab ǃnâ nî ǀgôa kai” xawe “ǁnâuǃāb ǃnâ nî ao kai”?​—1Kor. 14:20.

² ǃEreams ge nē ǁkhāǁkhāǃâs di xoaǂams ǃnâ a hōhe ǁkhā, nēti ra mîsa: “ǃKhūba ra ôan ge xūn hoana ra ǁnâuǃā” ǁnās ge xūn hoan hîna a ǂhâǂhâsana ǁîba ǃoabasa. (ǂKhm. 28:5) ǂKhoamîdi 2:​7, 9 ǃnâ i ge ra mîhe, Jehovab ge “ǂhauǃnâba ra ǃgâiǃgâ kai” di. Nēs ge ra ǃaroma în khoena “ǂhanu-aisib tsî ǂhanub tsî ǂhauǃnâsigu tsîna . . . ǁnâuǃā.”

³ Noaxi, Danieli tsî Jobi tsîn ge nē gā-aisiba ge ūhâ i. (Ese. 14:​14) Nēs ge nētsē Eloba ra ǃoaba khoen ǀkha a ǀgui. Sida nēs xa mati ra tsâ? “Hoa xūna” da ra ǁnâuǃā Jehovaba ǂkhîǂkhîs ǃaroma? ǁÎba ǃamkuse ǂans ge a ǂhâǂhâsa. Hā re î da kō (1)  Noaxi, Danieli tsî Jobi tsîn ge Eloba mati  a ǂansa, (2) tsî ǁîba ǂansa xu gu ge ǁîga mati a ǀamasa tsî (3) sida mati ǁîgu di ǂgomsa a ǁgae ǁkhāsa.

4. Noaxa mâ ǀgaub ǃnâ Jehovab xa ge ǁkhāǁkhāsen tsî ǁÎb xa ǂansa mati ge huibi?

⁴ Noaxi Jehovaba a ǂan ǀgaub. ǃKharu ge ǁaeba xun ge khoena ǃnona ǀgaugu ǃnâ Elob xa ra ǁkhāǁkhāsen: ǁÎb kurus, ǁîba ra ǃoaba khoen tsî ǀkhaeb hînan ra hōǃâb, ǁÎb di ǁgaragu ǃoagu ûis ǃnâ-ū. (Jes. 48:​18) Jehovab kurusa xub ge Noaxa Elob a ûitsâma ǃkhais ǀguisa ge mû tama hâ i xawe ǁîb mûhe ǁoasa ǀgaugu hoaga ge mû. Nēs ge “ǁîb di ǀamo ǀgaib tsî elosib tsîkha.” (Rom. 1:​20) Nēs ge ge ǃaroma îb Noaxa, Elob ǃnâ ǂgoms ǀguisa ūhâ tama i, xawe ǀgaisa ǂgomsa ūhâ.

5. Noaxa mâ ǀgaub ǃnâ Elob ǃaromas ǃhūbaib disa ge mûǂan?

⁵ ǂGoms ge “ǁnâusa xu hâ.” (Rom. 10:​17) Noaxa mati Jehovab xa ge ǁnâu? ǁÎb ǀaokhoena xub ge Jehovab xa ge ǁkhāǁkhāsen. ǁÎb ǁgûb Lamexi tsîn ge ǁîba gere ǁkhāǁkhā, ǁîb ge ǂgom­sa ūhâ khoeb ase ge ǂansa i. Lamexi gere ǃnaehe ǁaeb ǃnâb ge Adam­ma ge ûitsama i. (Tsoatsoas ǃnâ hâ ai-īsiba mû re.) Nēs ge ǁîb kai ǁgûb Metuselaxi tsî Metuselaxi ǁgûb Jeredi hîna ge 366 kuriga Noaxi ǃnaehe tama hâ hîna ûi hâ i gu tsîna ǃkhōǂgā hâ. * (Lukab 3:​36, 37) Nē aogu tsî ǁîgu taradi tsîna xub ge Noaxa khoen di tsoatsoas xa ge ǁkhāǁkhāsen. Elob mîmâis ǃhūbaiba khoen ǀkhā ǀoaǀoas dis tsî Edenni ǃhanab ǃnâ ge hâ ǁnâuǀnamo­ǃnâsib, nēn hoanab ge Noaxa aitsâma ge mû. (Gen. 1:​28; 3:​16-19, 24) Noaxi ge ǁkhāǁkhāsen xūn ge ge ǃaroma îb ǁîba Jehovaba ǃoaba.​—Gen. 6:9.

6, 7. ǃÂubasensa mati Noaxi ǂgomsa ge ǀgaiǀgai?

⁶ ǂGoms ge ǃâubasens xa ra ǂkhâǃnâ-e. Noaxi gere tsâ ǀgaub xa ǂâi re, ǁnâub ge o ǁîb ǀons hîna “sâs” tamas ka io “ǁkhaeǂgao” di ra ǂâibasens ge ǃâubasens ǁgauǁgaus ase ī di. (Gen. 5:​29) Lamexi ge ge mî: “Tsîb ge ǀons âba ­Noaxi ti ǂgai tsî ge mî: Nēb ge nîra ǁkhaeǂgao da sida di sîsenni ǂama, tsî sida ǃomgu di tsûb ǂama, ǃhūbaib ǃKhūb ge ǀâxarexūb ǂama.” Noaxi ge ǃâubasensa Elob ǃoa-ai ge ūhâ i. Abeli tsî Henoxi tsîn khamib ge ǁîba “surib” ǃnâ ge ǂgom hâ i, ǀaob di danasa nî ǂkhūǂkhū.​—Gen. 3:15.

⁷ Noaxi ge Genesis 3:​15 di kēbosa ǁnâuǃā tama hâ i, xaweb ge nē kēbos ǃnâ ǂgomǃgâsib sâuhes diba gere mû. Nēs ge Henoxi ge mî mîmâis ǀkhā a ǀgui, ǁîb ge ge mî Elob eloxoresa khoena nî ǀgoraǃgâ di. (Judab 14, 15) Henoxi mîs hîna Armagedons tawa nî dīǀoaǀoahes ge, Noaxi ǂgoms tsî ǃâubasens tsîna ge ǀgaiǀgai.

8. Noaxa mâ ǀgaugu ǃnâ ge sâuhe Elobab ge ǃamkuse ǂan i amaga?

⁸ ǃAmkuse Eloba ǂansa xub ge Noaxa a ǀama ǀgaub. ǃAmkuse Eloba ǂans ge ­Noaxa ǂgoms tsî gā-aisib tsîna ge mā, nēs ge ǁîba gagasi ǁkhōǁkhōsasiba xu ge sâu. Noaxi ge “eloǃaoǃgâxase gere tanisen” ǁnā amaga eloxoresa khoen ǀkhā ge ǁaeǁaesen tama hâ i. ǁÎb ge gāxaǃnâhe tama ge hâ i demongu  hîna ge khoesi sorode ūhâ i gu xa. ǁÎgu gere dī xūn ge ǂgomoǃnâ khoena kaise ge buruburuxaba i. Nē khoegu di ǃgaib tsî ǀgaib ge ge dī în ǂguina ǁîga ǀgoreǀî. (Gen. 6:​1-4, 9) Noaxi ge ge ǂan i ­khoen ge mîbahesa în “ǂguiǂguisen” tsî “ǃhūbaiba ǀoaǀoa.” (Gen. 1:​27, 28) ǁÎb ge ge ǂan i, khoen tsî ǀhom­ǃgāgu hîna ge khoesi sorode ūhâ îgu tsîna ǁgoe-ūgus a tsū ǃkhaisa. Nēs ge ge ǁgau, nē ǀhomǃgāgu ǀgôan ge kaise ǀgaisa īsa. Elob ge Noaxa ge mîba ǁÎb ge ǁgamgu dâusa ǃhūbaib ai nî hau di. ­Noaxi ǂgoms ge ge dī îb ǁîba arka om tsî nēs ǃnâ-ū ǁîb omarisa sâu.​—Heb. 11:7.

9, 10. Noaxa da mâ ǀgaub ǃnâ nî ǁgae?

⁹ Mati da ǂgomsa a omkhâi ǁkhā ­Noaxi khami. Nēsa da ge nî dī, Elobmîsa da ga ǂōrisase ǁkhāǁkhāsen, nē da ra ǁkhāǁkhāsen xūna ǂgaob ǀkhā ū tsî mā-am o î da nēs xa daoǁgauhe. (1Pet. 1:​13-15) ǂGoms tsî gā-aisib tsîn ge nî ǁkhauba da, ǃhūbaib ǃâitsâdi tsî ǃhûbaib ǁgai gagaba xu. (2Kor. 2:​11) ǁNā gagab ge ra eloxoresa tsî ǂhau­ǃnâoǃnâ kai da. Tsîs ge nēsa ra dī î da ǁgansi xūn ai ǂgomaiǂnui. (1Jhn. 2:​15, 16) Nēs ge ǃaroma ǁkhā în gagasise ǂkhabu hâ khoena tā Elob tsēs go ǀgū toa ǃkhaisa mû. Jesub ge Noaxi tsēde sida tsēdi ǀkhā gere ǀgopeǀnō o, ob ge ǁîba eloxoresasib tsî ǂhauǃnâoǃnâsib tsîn xa ge ǃhoa tama hâ i. Xawe sida gagasise nî ǂkhabusa gere mî.​—Khomai re Mateub 24:​36-39.

¹⁰ Dîsen re, ti ûi ǀgauba ǁgau i ra, amabes ǃnâ ta Jehovaba a ǂan ǃkhaisa? Ti ǂgomsa ra ǁgari te Elob ǁgaraga ǂans ǀguisa dī tama īsa xawe nau khoen tsîna nē ǁgaragu xa mîbasa? Sida ǃereamdi ge nî ǁgau sida tsîn Eloba ra ǃoabasa.

11. (a) Danieli ge kaikaihe ǀgausa tae-e ǁîb xa ra ǁkhāǁkhā da? (b) Danieli mâ ǀgauga da ra ǁgae ǂgao?

¹¹ Danieli ge Jehovab xa a ǂan ǀgaub. Danieli ge ǁîb ǁgûra xa ge ǁkhāǁkhāhe îb Jehovab tsî ǁîb mîs tsîna ǀnam. Dan­ieli ge Jehovaba ǁîb ûib hoaba ge ǀnam i. ǁÎb kairasis tsēdi ǃnâs tsînab ge ǁîba Elobmîsa gere khomai. (Dan. 9:​1, 2) Danieli ge Eloba ǃamkuse ǂan i ǀgaus tsî ǁîb ge Israel ǁaes ǀkhā gere tanisen ǀgaus tsîn ge nē kēbo-aob ǀkhom­ma ǀgores hîna Danieli 9:​3-​19 ǃnâ hâs ǃnâ a xoasa. ǁAeba ū tsî da ge nē ǀgoresa khomai tsî nî ǂâiǃâ, tsî ǃamkuse nî ǃgaoǃgâ nēs tae-e Danieli xa ra mîba da sa.

12-14. (a) Daniela mâ ǀgaugu ǃnâ Eloba xu ra hā gā-aisiba gere ǁgau? (b) Daniela mâ ǀgaub ǃnâ ge ǀkhaehe Elob ǃoa-aib ge ǁkhoa­ǂgaosiba a ǁgau amaga?

¹² Danieli ge Eloba ǃgâise ǂansa xu a ǀama ǀgaus. ǂGomǂgomsa Jodeǁîn ǃaroma i ge ûiba Babilons ǃnâ kaise ge ǃgom i. Aiǁgauseb ge Jehovaba Jodeǁîna ge mîba “ǁnā ǃās, ǁîs ǃoa ta nî ǃkhōsase ǂgaeǂguibē kai dus di ǂkhîba ôa” re. (Jer. 29:7) Xaweb ge ǁkhā ǁae ǁîna ge ǁgui-ai în ǁÎb ǀguiba ǀguri ǃoaba. (Eks. 34:​14) Tae-e Daniela ge hui îb nē ǀgam ǁgui-ai ra dī ǁkhā? Eloba xu hâ gā-aisib ge ge huibi îb tsoatsoade ǁnâuǃā tsî sîsen-ū ǁkhā. Tsî Gaob ǁgaraga Elob diga khôa tamase dī ǁkhā. Kaidisi kuriga Danieli khaoǃgâb ge Jesuba ǁkhā tsoatsoade ge ǁkhāǁkhā.​—Lukab 20:25.

¹³ ǂÂi oa re Danieli ge tae-e a dīsa ǀgapi ǂgaeǂgui-aob ge ǀgoresa mā-am tama hâ i o ǀnîhâ elo-e ǃoa, gao-aob ǀguib ge 30 kuriga nî ǃoabahese ge ī i. (Khomai re Danieli 6:​7-10.) Dan­ieli ge ǀnîsi ga mî hâ ǃnonadisi tsēdi ǀgui di ge di, xaweb ge ǁîba ge mā-am tama hâ i, îb nē gao-aoba tā dī ǁîb Elob ǁgaraga nî ǁnâuǀnamoǃnâse. ǁÎb ge mûhe tamase gere ǀgore. ǁÎb ge ge ǂan i ­khoen ge ǁîb tsēkorobe ra dī xūna a ǂansa. Danieli ge ge ǁgau tama hâ i, gao-aob di ǃoabasab ra ūǃoasa.

¹⁴ Jehovab ge Danieli ǁkhoaǂgaosiba ge ǀkhae ǁîbab ge ǁōba xu a sâu o. Nēs ge Jehovaba ǃgâi ǃgâiǃgâibasen­sa ge mā. Tsî Medo-Persian gaosib ǃnâs tsîna ge ǁnâuhe!​—Dan. 6:​25-27.

15. Mâ ǀgaub ǃnâ da Danieli khami ī ǂgomsa a omkhâi ǁkhā?

¹⁵ Danieli khami ī ǂgomsa da mâ ǀgaub ǃnâ ra omkhâi. ǀGaisa ǂgomsa ūhâs ge ǂâibasen tama Elobmîs ǀguisa da ge nî khomai di, xawe da ge ǃgamse nî kō nēs tae-e ra ǂâibasensa. (Mat. 13:​23) Jehovab ǂâi ǀgauba da ga ra ūhâ ǂgao o, o da ge ǁîb ǁgaraga nî sao. Khomai da ra xūna da ge nî ǂâiǃâ. ǂHâǂhâsa as ge ǂgao­ba xus tsîna ǀgoresa, ǃgomsina da ga hōǃâ o. Gā-aisib tsî ǀgaib tsîna da ga ǀgoreba o, ob ge Jehovaba nēna nî mā da.​—Jak. 1:5.

16, 17. Joba mâ ǀgaub ǃnâ, gā-aisib Eloba xu ra hāba ge hōǃâ?

¹⁶ Jobi ge Jehovaba ge ǂan. Jobi ge ge Israelǁî tama hâ i. ǁÎb ge Abrammi, Isaki tsî Jakobub tsîgu omarisa xu gere hā. Jehovab ge ǁîga aitsâma ǁîb xa ge mîba tsî ǁîb ǂâibasens ǃhūbaib ǃgao. Jobi ge ǀō-aisa amaba ge ǁkhāǁkhāsen. (Job 23:​12) Tsî ge mî “ǁnâus ǂgaes dis ǀkha ta ge sats xa ge ǁnâu.” (Job 42:5) Jehovab ge aitsâma ge mî Jobi ge ǁîb xa ama xūna gere ǃhoa di.​—Job 42:​7, 8.

¹⁷ Jobi ge Elob di mûhe ǁoasa ǀgauga ǁîb kurus ǃnâ-ū ge mû. (Job 12:​7-9, 13) Elihub tsî Jehovab tsîn ge kurusa ge sîsen-ū, Joba Elob di ǀgaib xa ǁgausa ǁîb kurus ǃnâ-ū. (Job 37:​14; 38:​1-4) Jehovab mîdi ge Joba ge tsâǀkhā, ǁîb ge Eloba ǃoa a mî xui-ao: “Tita ge a ǂan  sats hoa xūna a ǁkhā ǃkhaisa; tsîts a ǁkhaehe ǁoa ǃkhaisa. . . . tsî ta ge ǃhausen hâ tsarab tsî tsaob tsîkha ǃnâ.”​—Job 42:​2, 6.

18, 19. Joba mâ ǀgaugu ǃnâ ge ǁgau Jehovabab a ǂansa?

¹⁸ Gā-aisib Eloba xu ra hāba xub ge Joba a ǀama ǀgaub. Jobi ge Elob ǁgaraga ǃamkuse ge ǂan i. ǁÎb ge Jehovaba ge ǂan i tsî nēs ǀkhā hoa xūna gere dī. Jobi ge ge ǂan i, Elobab a ǀnam dib ra mî hînab khoena ǁgai ǀgaub ǃnâ a hâ-ū ǁoasa. (Job 6:​14) ǁÎb ge ge ǀgapiǀgapisen tama hâ i, xawe ǁîb ǃgâsan ǀgâsan tsî ǃkhū hân tsîn hoana gere tsâba. ǁÎb ge mî xui-ao “ǁnāb tita ǃnāb ǃnâ ge kuruba, ǁîb ona kha kuru tamab hâ?” (Job 31:​13-22) Jobi ge ǃkhūsis hînab ge ūhâ īs xa ge ǀgapiǀgapisen tama hâ i tamas ka io nau khoena ge ǃgôaǁnâ tama hâ i. Nēs ge nē ǃhūbaib ǂgaeǂgui-aogu hîna ǃkhū hâga xu ra ǀkhara!

¹⁹ Jobi ge ǁgôatsuiǁgoaǃoabas ǃnâ ǃâ-e ge ūhâ tama hâ i. ǁÎb ge ge ǂan i, nēs “Elob ǀgapise hâb” xa ǃkhōǃoahe tidesa. (Khomai re Job 31:​24-28.) ǁÎb ge ǃgammeba, khoes tsî khoeb tsîn ǁaegu nî hâse gere mû. ǁÎb ge ǃgae­ǀhao-i tsîna ge dī ǁîb mûdi ǀkhā, îb tā ǂkhamkhoesa turagu ǀkhā kō. (Job 31:1) ǁNā ǁaeb ǃnâb ge Eloba khoena ǀgui tamas ka io ǀgam tarade ūhâsa ge mā-am hâ i. ǁNās ge ra ǂâibasen Jobi ge ǀgamǁî tarasa ga ǃgamme hâ dib ga ǂgao hâ o. * ǁÎb ge Elob ǁgaragu hîna ge Eden­ni ǃhanab ǃnâ a māhe ga ǃgameb xa ge ǁnâuǀnam, ǁîb ge aiǁgausa ge mā. (Gen. 2:​18, 24) Jesub ge 1 600 kuriga ǃkharu hâse ǁîb ǃgâ-aona ge mîba în, ǁkhā ǁgaraga sao ǃgammeb xa.​—Mat. 5:​28; 19:​4, 5.

20. Jehovab ǁgaraga ǂansa mâ ǀgaub ǃnâ nî hui da, ǃgâi ǀhōsana ǁhuis tsî ǁkhoaxa ǁaeba ūhâs tsîn ǃnâ?

²⁰ Jobi khami ī ǂgomsa da mâ ǀgaub ǃnâ ra omkhâi. Jehovab xa da ge nî ǂan tsî nē ǂans xa nî daoǁgauhe. Psalmdi xoa-aob Davib ge ge mî Jehovab ge “eloxoresab  . . . âba ra ǁkhan.” Tsîb ge ge xoa î da tā ‘ǂkhabaxa khoen’ ǀkhā hâ ǀhao di. (Khomai re Psalmdi 11:5; 26:4.) Nē xoade mati Elob ra ǂâi ǀgauba ra mûǂan kai da? Nē xoade mati internet­sa da ra sîsen-ū ǀgaub tsî ǀhōsana ǁhuis ǃnâs tsîna nî hui da? Sida ǃereamdi ge nî hui da mûsa mati kōse da Jehovaba a ǂansa. ǃAnuse da ga nē ǃhūbaib ǃnâ ga ra hâ ǂgao o, o da ge sida ǂâide a ǁkhāǁkhā ǁkhā, î da “gârese tama xawe gā-aise” tanisen.​—Heb. 5:​14; Efe. 5:15.

21. Tae-e nî hui da hoa xūna ǁnâuǃāsa, ǂhâǂhâsa ana Jehovaba ǂkhîǂkhîs ǃaroma?

²¹ Noaxi, Danieli tsî Jobi tsîgu ge Jehovaba ǂgaob hoab ǀkhā gere ôa, ǁnā amagab ge Jehovaba ǁîga ǁîb ǃoa ge ǂgae. ǁÎb ge ǁîga ge hui, îgu hoa xūna ǁnâuǃā ǂhâǂhâsa ana ǁîba ǂkhîǂkhîs ǃaroma. ǁÎgu ge ǂhanu-aisib di aiǁgaus ase ge ī i tsî ǂhauǃnâ ûiga gere ûi. (Psa. 1:​1-3) Dîsen re: Jehovaba Noaxi, Dan­ieli tsî Jobi khami ǂan i ta a? Gagasi ǁnâuǃāb hîna da ūhâb ǃaroma da ge Jehovaba ǃamkuse a ǂan ǁkhā. (ǂKhm. 4:​18) Elobmîsa da ge nî ôaǃnâ. Khomai da ra xūn xa ǂâiǃâ. Tsî ǃanu gagaba nî ǂgan. Nēsa da ga ra dī o, o da ge sida ǀhomsi ǁgûb ǃoa nî ǀgū. Tsî da ge nē eloxoresa ǃhūbaib ǃnâ gā-aisib ǀkhā nî ûi.​—ǂKhm. 2:​4-7.