1. Filipeǁîn 2:3 ǃoagu i ǃgamǃgamsenxasiba mati ǃgâi ǀhōsaguside ra omkhâi?

HOAǁAE da ge Jehovaba ra ǁnâuǀnâm mûǂan da ra xui-ao ǁîb a ǂansa tae-i sida ǃaroma a ǃgâisa. (Efe. 4:22-24) ǃGamǃgamsenxasib ǀkha da ge ra mûǂan Jehovab ǂâis a ǀō-aisa ǃkhaisa tsî da ge nau khoen tsîna sida ǀgapiga ra ǃgôa. ǁNās ge ra ǃaroma i da ǃgâi ǀhōsagusisa Jehovab ǀkha ūhâ tsî sida di ǃgâsan ǀkhas tsîna.—Khomai re Filipeǁîn 2:3.

2. Apostel Pauluba tae-e ge ǂanǃgâ tsî nē ǁkhāǁkhāǃâs ǃnâ da tae-e nî ǃhoaǃgao?

² ǂAnbasen tama da ka i o, o da ge ǃhūbaib khoen xa ǂgaeǂkhabuhe tsî ǁîn khami a ǀgapi ǂâixa tsî ǁîǂâixa kai ǁkhā. * ǂGuro Xristeǁîn tsîn ge ǁnā ǁkhōǁkhōsa mâsib ǃnâ hâ i sa da ge ra mû Apostel Paulub ge Romeǁîna ǃoa mî o: “Tita ge mâ-i hoa-i âdo ra mîba, anu i hâsa ǃnā hâse i gā-aise ūhâsen tide ǃkhaisa; î-i ǀgaus ǀkha gā-ai.” (Rom. 12:3) Apostel Paulub ge ra mûǂan ǂhâbasa i a ǃkhaisa hoa da nî ǃgôasensa. Xawe ǃgamǃgamsen da ga ra o, o da ge ǀnōsa ǀgaub ǃnâ sida xa nî ǂâi. Nē ǁkhāǁkhāǃâs ǃnâ da ge 3 mâsiga nî ǃhoaǃgao. Sida di ǃgamǃgamsinxasiba a ǃâitsâ ǁkhāga. Nēn ge sida (1) ǃgammeb, (2) Jehovab ǀapeǂhomis ǃnâ da ūhâ aiǂhanugu tsî (3) internets ǃnâ-ū da ra sîbagu ai-īsigu tsîna ǃkhōǂgā hâ.

3. Tae-i xan ǃgomsina hâ ǃgammegu ǃnâ tsî ǀnî khoena nē ǃgomsina mati ra sîsenǂam?

³ Jehovab ge ǂhâba hâ în ǃgamme hâ khoe-aogu ra ǂkhîba ūhâ. ǀOasa kurusa da ūhâ tama hâ amaga ī ge hōgu tama isa ra hâ. Paulub ge ge xoa ǃgamme hâ khoen ǁgâiǀāba nî hōǃâ ti. (1Kor. 7:28) ǀNîn ge kaisen ra ǂkhaba amaga ra ǂâi tā ta ge nē khoe-i ǀkha ga ǃgamme hâ ti. ǃHūbaib ǂâi ǀgauban ga ūhâ ī o, on ge ǀgoras a ǃgâi ti nî ǂâi. Nēti i khoe-i ge ǁî ī xa ǀgui ra ǂâi tsî ǀgoras ǁî-e nî ǂkhî kai ti.

4. Tae-e xu da nî ǂgōsen?

⁴ Tātsē da ge sida ǃgammegu sîsen tama hâ ti tā nî ǂâi. ǂAn da as ge Elobmîs ǀgui ǃaromas ǀguisa ra mâ sa ǀgoras disa. ǁNās ge ǀaib amsi. (Mat. 5:32) ǁNā-amaga da ge Paulub gere ǃhoaǃgao ǁgâiǀāba da ga ra hō o, o da ge nē ra sao dîde dîsen ǂgao tama hâ: ‘Nē ǃgammeba ti ǂhâsiga ra dīǀoaǀoa? Tita nî hōse i ǀnamma ta ra hō? ǀNî khoe-i ǀkha da tita ǂkhî tide?’ Nē dîna du ga dî o, o du ge sadu ǀgui du xa ra ǂâi. ǃHūbaib gā-aisib ge nî mîba tsi sa ǂgaoba sao re, satsa ra ǂkhî kai xū-e dī re ǀgorasa i ga ǃaroma xawe. Elobmîs ge ra mî “a i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.” (Fil. 2:4) Jehovab ge ǂhâba hâ în ǃgammena hâ hâ, khôahes ose. (Mat. 19:6) Jehovab ge ǂhâba hâ ǁîba du ǂgurose nî mâisa.

5. Efeseǁîn 5:33 ǃoagun ǃgamme hâ khoe-aogura mati nî hâ-ūgu?

⁵ Aob tsî taras tsîra ge ǃgôasib tsî ǀnammi ǃnâ nî hâ-ūgu. (Khomai re Efeseǁîn 5:33.) Elobmîs ge ra ǁkhāǁkhā da  mâs ge ūs ǃgâ-ai a ǃgâi. (ǃNǃkh. 20:35) Mâ ǀgauba ǃgamme hâ khoena nî hui în ǀnammi tsî ǃgôasiba ǁgaugu? ǁNā ǀgaub ge ǃgamǃgamsenxasiba. ǃGamǃgamsenxasiba ūhâ khoe-aogura ge ǁî-i di ǃgâib ǀguiba ôa tide xawe “nau ī diba nî ôa.”—1Kor. 10:24.

6. Tae-e da Steveni tsî Stefanies aiǁgausa xu a ǁkhāǁkhāsen ǁkhā?

⁶ ǃGamǃgamsenxasib ge ǂgui Xristeǁî ǃgâsana ge hui în ǂkhîba ūhâ ǁîn di ǃgamme ommi ǃnâ. Aiǁgause, ǃgamme hâ aob Steveni ge ra mî: “ǃGomsin ga hâ ǁaeb ai ro ge nî sîsenǁare. ‘Tita tae-i xa a ǃgâibahe’ ti dîsens xa, ‘sima tae-i xa a ǃgâibahe’ ti dîsen re.” ǁÎb taras Stefanies ge ra ǂā-am: “Khoe-i ge hoaǁae ra ǂkhaba khoe-i ǀkha hâ ǂgao tama hâ. ǁNâusāgum ga ra o, om ge ǃaromas ǁnā ǁnâusāgus disa ôa tsî ra sîsenǂam. ǁNāpāxum ge ǀgore, Jehovab ǀapeǂhomis ǂkhanina ôaǃnâ tsî ra ǁgamǁare. ǃGomsibam ge ra ǁnāǂam, sim ge ǁnāǂamgu tama hâ.” ǃGamme hâ khoen ge ǂkhîba a hōǃâ ǁkhā ǁî-i ǃgamme hâ khoe-i xa i a ǀgapi di i ga ǂâi tama io.

7. ǃGâsab ga Jehovab ǀapeǂhomis ǃnâ aiǂhanu-e hō o, ob nēsa mati nî mû?

⁷ ǁKhā da a ǀgau i hoa i ai Jehovaba ǃoabasa da ge kai aiǂhanub ase ra mû. (Psa. 27:4; 84:10) ǃGâsab ga Jehovab ǀapeǂhomis ǃnâ ǃnāsase a hui ǂgao o, ob ge koahesa anu hâ. Elobmîs ǂûs ge ra mî: “Khoe-i ga mûǂāmsis ǃoabasa hō ǂgao-o, ǁnā-i ge ǃgâi sîsenna ra tura.” (1Tim. 3:1) ǁÎb ga ǀhaohâb ǃnâ sîsen-e māhe o, ob ge tā ǁîb xa ǃnāsase nî ǂâi. (Luk. 17:7-10) ǁÎb ge ǁîb ǃgâsana ǃgamǃgamsens ǀkha nî sîsenba.—2Kor. 12:15.

8. Tae-e da Diotrefeb, Usiab tsî Absalommi ge dī xūna xu ra ǁkhāǁkhāsen?

⁸ Elobmîs ge aiǁgaude ūhâ khoen dide hîna ge ǁîn xa ǃnāsase gere ǂâina. Diotrefeb ge ge ǀgapi ǂâixa ī tsî ǀhaohâb “ǃnâ ǂguro” ǃkhaisa gere ôa. (3Jhn. 9) Usiab ge ǀgapiǀgapisen tsî Jehovab xab māhe tama hâ sîsen-e ge dī. (2Kro. 26:16-21) Absalommi ge gao kai ǂgaob ta ǃkhais ǃgao khoenab a ǀnam khama gere dīsen în khoena ǁîb ǀkhāba ǁhûi. (2Sam. 15:2-6) Nē Elobmîsa xu hâ aiǁgaudi ge ra ǁgau Jehovab ǃgâibahe tama hâsa, khoe-i ga koahe i nî ga xū-e dī o. (ǂKhm. 25:27) ǁAeb ra ī khama ī ge khoen hîna a ǀgapiǂâixa tsî nau khoen xa nî koahesa ra ǂhâbana ǃgomsin ǀguina nî hō.—ǂKhm. 16:18.

9. Mâ ǃnôa aiǁgausab ge Jesuba mā da?

⁹ Jesub ge nē ǀgapi ǂâixa khoegu khama ge ī tama hâ ī. Elobmîs ge ra mî Jesub ge “Elob īsib ǃnâb hâ xawe ǁkhâuǁnâbasense Elob ǀkha ǀguiti-īsa ǃgôa tama ge” i. (Fil. 2:6) Jehovab ǀguib Jesub xa a ǀgaisa xaweb ge Jesuba ǀgapiǂâixa tama hâ. ǁÎb ge ǁîb ǁkhāǁkhāsabega ge mîba: “Sago hoago xa ǂkharib, ǁnāb ge a kai.” (Luk. 9:48) Aimâba-aon, ǀhaohâb hui-aogu, ǀhaohâb ǃûi-aogu tsî ǃnarimâra mûǂam-aogu hîna Jesub khama ra ǃgamǃgamsengu ǀkha sîsenǀhaos ge kai ǀkhaeb ase ī. ǃGamǃgamsen da ga ra o, o da ge khoena nî ǀnam tsî Jesub ge ge mî Jehovaba ǂhanuse ra ǃoaba khoen nî ǀnamgu ǃkhaisa.—Jhn. 13:35.

10. Tae-e du nî dī mû du ga ra o, ǀhaohab ǃnân xūna ǃgâise dīhe tama hâsa?

¹⁰ Tae-e du nî dī ǀhaohâb ǃnâ du ga ǃgomsina mû o tsî du ga ǀhaohâb ǃûi-aogu xū-e dī tama khama a tsâ o? Nē xūn  xa ǃhoamâ tama ī tsî da ge ǃgamǃgamsen tsî sida aiǃgû-aoga nî ǂkhâǃnâ. (Heb. 13:17) Nēsa du ga dī ǂgao o dîsen re: ‘Nē ta ra mû ǃgomsina ǁnātikōse a kai? Nēpa a ǃgâi ǁae ǁîna hî-ūnus tiba? Tita nē ǃgomsina hî-ūnusa mā-amhe hâ? Amabes ǃnâ ǀguiǃnaxasiba ta ǀhaohâb ǃnâ ra omkhâi, tamas ka io ta tita a ǂhâǂhâsa ǃkhaisa ra ǁgau ǂgao?’

11. Efeseǁîn 4:2, 3 ǃoagu tae-e nî ī, Jehovaba da ga ǃgamǃgamsen hâse ǃoaba o?

¹¹ Jehovab ge ǃgamǃgamsenxasib tsî ǀguiba sîsensa ǀgapise ra ǃgôa, ǁkhāsib tsî xūna ǃamkuse dīs xa. ǁNā-amaga Jehovaba ǃgamǃgamsen hâse sîsenba re. Nēsa da ga dī o, o da ge ǀguiǃnâxasiba ǀhaohâb ǃnâ nî omkhâi. (Khomai re Efeseǁîn 4:2, 3.) ǁKhā du as kōse aoǁnâ re. Nau khoena du ǃgâi xūna ni dība ǀgauga ôa re. ǃHaokhoena ǃgâise ǃkhōǃoa re ǀhaohâb ǃnân ga ǁgaumâihe tama ī xawes tsîna. (Mat. 6:1-4; Luk. 14:12-14) ǃGamǃgamsen tsî du ga sadu ǃgâsan ǀkha sîsenǀhao o, on ge ǁîna nî mû ǁkhāsiba du ūhâsa. Xawen ge ǁnās ǂam-ai sadu ǃgamǃgamsenxasiba nî mû.

12. Elobmîsa ra ǂkhâǃnâ da ī da ǀhōsana ūhâ? ǁGuiǃā re.

¹² Jehovab ge ra ǂhâba i da sida omaris tsî ǀhōsan ǀkha hâǀhao. (Psa. 133:1) Jesub ge ǃgâi ǀhōsana ge ūhâ ī. (Jhn. 15:15) Elobmîs ge ǃgâi ǀhōsana da ga ūhâ o da ra ǀama ǀgauba ra ǁgau. (ǂKhm. 17:17; 18:24) Tsî da ge ra mîbahe ǀguri hâs ǃgâi tama hâsa. (ǂKhm. 18:1) ǂGui khoen ge ra ǂâi, internets ǃnâ-ūn ga foton tsî  vidiona sî o, on ǂgui ǀhōsana nî hō tsîn ǀguri tsâsen tide ti. Xawe ǂanbasen da ge nî, foton tsî vidion tsîna da ga internets ǃnâ-ū sî tsî xūna ǁnāpa a xoa o.

13. ǀNî khoen hîna internets ǃnâ-ū foton tsî vidiona sî tsî ǁnāpa xūna ra xoana tae-i ǃaroma ǀguri tsâsen tsî ǁgaises tsîna ra tsâba?

¹³ Ôaǃnâ di hîna dīhe hâ di ge ra ǁgau khoen hîna ǂgui ǁaeba nau khoen ta internets ai xoa tsî sî ai-īsiga ra kēn, ǀguri tsâsen tsî ǁgaises tsîna ra tsâsa. Tae-i ǃaroma? Khoen ge kai amse ǁkhoaxa ǁaeban ūhâsa ra ǁgau ai-īsigu ǀguiga ra ǃnao tsîn ge îsa ǃkhaigu ain ǁîn ǀhōn ǀkha hâ ai-īsiga ra ôaǂui. Khoe-i hîna nē ai-īsiga ra mû i ge ǁî-i ûib a ǁkhoao ti nî ǂâi. “Tita omsi ǁkhoaose ǂnôa hînan nau khoena ǁkhoaxa xūna sâǁaeb ǃnâ ra dīsa ta ge mû o, o ta ge kaise ǁgaise ge tsâ tsoatsoa” tis ge 19 kurixa ǃgâsasa ra mî.

14. 1 Petrub 3:8 sa mati nî hui da i da internets ǃnâ-ū da ra sî foton, vidion tsî ǁnāpa da ra xoa xūn tsîna ǃgâise ǁhûi?

¹⁴ ǃGâi-i ge a internets ǃnâ-ū da ga foton tsî vidion tsîna sida ǀhōsan tsî omaris ǁanin tsîna a sîba tsî ǁnāpa ǁîna xūna xoaba o. Xawe hōǃâ du ge ǀnî khoen ge internets ǃnâ-ū vidiogu tsî foton tsîna ra sî tsî ǁnāpa ra xoa, nau khoen xa nî koahega. ǁÎn ge khoen xa nî mûhe sa ra ǂhâba. ǀNî khoen ge ǁîn ǃnao hâ tamas ka io nau khoen xa ǃnaohe hâ ai-īsigu ǃnāga ǁgai tsî ǀurixa xūna ra xoa. Xristeǁîn ge ra ǂkhâǃnâhe în ǃgamǃgamsen tsî nau khoena tsâba ǁnā-amagan ge foton tsî vidion tsînan ga sî o ǁnāti tanisen tide.—Khomai re 1 Petrub 3:8.

15. Elobmîsa mati nî hui da i da tā ǂhâǂhâsa da a khami tanisen?

¹⁵ Internetsa du ga sîsen-ū o dîsen re: ‘Nē ta ra ǃnao foton tsî vidion tsî xoa ta ra xūna nau khoena nî ǂâi kai ūsen ta ra ti? Khoena ta suri gagasa nî mā?’ Elobmîs ge ra mî: “ǃHūbaib ai hân hoan, ǁgans di turab kas, mûdi di turab kas, ûib di kaikaisens kas hoas ǁGûba xu hâ tama i tsî ǃhūbaiba xu hâ.” (1Jhn. 2:16) ǀNî Elobmîs ge “ûib di kaikaisens” ti hâ ǃâba, “ǂhâǂhâsase mûsen ǂgaos” ti ǂnûiǃkhuni  hâ. Xristeǁîn ge tsâsen tama hâ tsî nau khoen xan nî koahe ga xūna dī tama hâ. ǁÎn ge Elobmîs ǁnamasa ra ǁnâuǀnam mî rasa: “Î da tā ǁau ǃgôasiba ôa-am, nē-e nau-e ra ǂoeǂoeǃâ, nē-e nau-e ra suriǃâ.” (Gal. 5:26) ǃGamǃgamsens ge nî hui da i da tā nē ǃhūbaib khoen khami tanisen.

16. Tae–i ǃaroma da ǀgapi ǂâixasiba xu nî ǂgōsen?

¹⁶ ǃGamǃgamsensa da ge nî ǁkhāǁkhāsen, ǀgapiǂâixa khoen “ǀgaus ǀkha gā-ai” tama amaga. (Rom. 12:3) ǀGapiǂâixa khoe-i ge a ǃgaridana tsî ǁî-i xa ǀgui ra ǂâi. ǁÎn ra ǂâi ǀgaub tsî dīn ra xūn tsîn ge ǁîn tsî nau khoen tsîna ra tsûtsû. ǁÎn ǂâiǀgauban ga dawa tama i o, os ge ǁîn ǂâisa ǁGâuab xa a ǂgaeǂhabu-e ǁkhā. (2Kor. 4:4; 11:3) ǃGamǃgamsen hâ khoe-i ge ǀnōsa ǂâi ǀgauba ūhâ. ǁÎ-i ge ǀnōsa ǀgaub ǃnâ ra mûsen tsî nau khoen ǂgui ǀgaugu ǃnâ ǁî-i xa a ǀgapi ǃkhaisa ra mûǂan. (Fil. 2:3) Elob “ǃguriǂgaoxana ra mâǃoa, xaweb ra ǃgamǃgamsensana ǀkhomma mā” ǃkhaisa ī ge a ǂan. (1Pet. 5:5) ǀNōsa ǂâi ǀgauba ūhâ khoe-i ge, Jehovab di khākhoe kai ǂgao tama.

17. Tae-e da nî dī, i da ǃgamǃgamsen hâse hâ ǀgara?

¹⁷ ǃGamǃgamsen da ga ra o, o da ge Elobmîs ǃnâ hâ ǁnamas “ǀoro khoeba ǁîb di dīgu ǀkha ǁhûǁnâ, î du ǀasa khoeba ana” ti hâsa nî ǁnâuǀnam. Kai sîsen i ge. Jesub aiǁgaus xa ǁkhāǁkhāsen tsî da ge ǁîba nî ǁgae ǁkhā da as kōse. (Kol. 3:9, 10; 1Pet. 2:21) Ti da ga dī o, o da ge kaise nî ǀama. ǃGamǃgamsensa da ga ǁkhāǁkhāsen o, ob ge sida omaris ûiba, nî ǂkhî. Sida ge ǀhaohab ǃnâ ǀguiǃnâxasiba nî omkhâi tsî da ge internets ai da ra ǃnao vidion, foton tsî xoa da ra xūn tsîna nau khoen xa da ǂhâǂhâsase nî mû-e ga ǃnao tide. Nēn hoan ǂam-ai da ge Jehovab xa nî ǀkhae-e tsî nî ūǃoahe.