1-2. Mâ ǀō-aisa ǁaxasiba ge ī Pinkstertsēs ai 33ǁî kuri?

SONTAXTSĒ kham ǁgoagas ge nēsa ge ī Jerusalems ǃnâ. 33ǁÎ kurib ge tsî nēs ge Pinkstertsēsa. 120 ǁKhāǁkhāsaben ge oms ǀgapise hâ kamers ǃnâ ge ǀhao hâ i. (ǃNǃkh. 1:13-15; 2:1) Tsēde ǃkharu hâseb ge Jesuba ǁîna ge mîba în Jerusalems ǃnâ hâ ǀō-aisa ǀkhaeban nî ǃkhōǃoa amaga. (ǃNǃkh. 1:4, 5) Tae-e sao rase ge ī?

² “O i ge ǃnapetamase ǀhomma xu ǀō-e ge hā, ǀgaisase ra ǃgom ǃgoaxa ǂoa-i ase.” Nē ǀō i ge hoa oms ǃnâ a ǁnâu-e ǁkhā. Tsî i ge ‘ǀgoraǃāsa namdi khami i ǀaesa’ ǁkhāǁkhāsaben dani ǂam-ai ge hā tsîn ge hoana ‘ǃanu gagab xa ge ǀoa.’ (ǃNǃkh. 2:2-4) Jehovab ge nē ǀō-aisa ǀgaub ǃnâ ǁîb di ǃanu gagaba nē ǂnubis khoena ge mā. (ǃNǃkh. 1:8) ǁÎn ge ge ǂguro i hîna ge ǃanu gagab ǀkha ǂkhauhe tsî Jesub ǀkha ǀhommi ǃnâ ǂgaeǂguis di ǃâubasensa a hōna. *

3. Tae-i ǃaroman ge Pinkstertsēs ai ge ǃanu gagab ǀkha a ǂkhauhena nēs ǃnâ ǂgomǃgâsiba ūhâ i?

³ Sadu ga ǁnā ǁkhāǁkhāsaben ǃâ hâ o hîna ge oms di ǀgapigab kamers ai ǁnā tsē ǀhao hâ i na o du ge nēs xa ga ǀuru tama hâ. ǀGoraǃāsa namdi ǀaes khami i xū-i ge sadu  danas ai hā go ǂnû tsî du ge ǃkharagagu gowagu ǃnâ go ǃhoa tsoatsoa. (ǃNǃkh. 2:5-12) Nēs ge ǂgomǃgâsiba ra mā du ǃanu gagab ǀkha du amabes ǃnâ ǂkhauhe hâsa. Xawe ǁnān hîna ǃanu gagab ǀkha ǂkhauhe hâna ǁîn di ǂkhausa ǀō-aisa ǀgaub ǃnâ ra hō tsî hoana nēsa ǁîn ûigu ǃnâ ǀgui ǁaeb ai ra hō? Hî-i. Nēsa da mati a ǂan?

4. ǃKharu ge ǁaeb ǃnâ ge ǂkhauhe hâ i ǃgâsana hoana ǀgui ǁaeb ai ge ǂkhauhe? ǁGuiǃā re.

⁴ Nēsi da ge khoe-i mâ ǁae a ǂkhauhe ǁkhāsa nî ǃhoaǃgao. ǁNā ǂnubis 120 Xristeǁîn ǀguin ge ǃanu gagab ǀkha Pinkstertsēs ai 33ǁî kuri ge ǂkhauhe tama hâ i. ǁNā tsēs ain ge 3000 ǀnî hâ ǃgâsan tsîna Jesub ge mîmâi ǃanu gagaba ge ǃkhōǃoa. ǁÎn ge ǁāǁnâhen ge ǁaeb ai ge ǂkhauhe. (ǃNǃkh. 2:37, 38, 41) Xawe kuriga ǃkharu tsî i ge hoa ǂkhauhesa Xristeǁîna ǁîn ǁāǁnâs tawa ge ǂkhauhesa kai tama hâ i. Samariaǁîn ge ǁîn di ǂkhauhesa ǁîn ǁāǁnâs khaoǃgâ ǀgui gere hō. (ǃNǃkh. 8:14-17) Tsî Korneliub tsî ǁîb di omaris tsîn ge noxoban ǁāǁnâhe tama hâ hîna ge ǂkhauhesa kai.​—ǃNǃkh. 10:44-48.

5. 2 Korinteǁîn 1:21, 22 ǃoagu i khoe-i ga ǃanu gagab ǀkha ǂkhauhe o tae-e ra ī?

⁵ Hā re i da kō khoe-i ga ǃanu gagab ǀkha ǂkhauhe ǁaeb ai i tae-e ra īsa. ǁNān hîna ǂkhauhe hân ge nî ǃgombahe ǂgurose Jehovab ge ǁhûi nî ǃkhaisa ūǃoasa. ǁÎn ge ǀnîsi nî ǂâi ‘Eloba tae-i ǃaroma tita ge ǁhûi?’ Xawe ǀnîn ge ǀnîsi nēti tsâ tide. Tae-i ǀgui i ga ī xaweb ge apostel Pauluba tae-i ǂkhauhesan ǀkha ra īsa ge ǁguiǃā: “ǁÎb ǃnâ du ge ǁkhāti ǂgom du ges khaoǃgâ ge ǀgaiǀgaihe ǃanu gagab mîmâis dib ǀkha, ǁîb ge mâiǁkhaeb sada ǀumis diba.” * (Efe. 1:13, 14) Jehovab ge ǁîb di ǃanu gagab ǃnâ-ū ǁnā Xristeǁîn hînab ge ǁhûina ǃgāsasiba ge mā. Nēs ǃnâ-ū i ge ǃanu gagaba mîmâis ase ra māhe hîna ǁîna ra ǁgauba ǀhommi ǃnân hānîǁaeb  ǃnâ sī nî hâsa ǃhūbaib ais ose.​—Khomai re 2 Korinteǁîn 1:21, 22.

6. ǂKhauhesa Xristeǁî-e tae-e nî dī ǁî-i di ǀhommi ǃâubasensa ǃkhōǃoas ǃaroma?

⁶ Xristeǁî-i ga ǂkhauhe o, o i nēsa ra ǂâibasen ǁî-i ge amabes ǃnâ ǀhomma ǃoa nî ī di? Hî-i. ǁÎ-i ge ǂgomǃgâsiba ūhâ ǀhomma ǃoa īs ǃgao i ǁhûi-e hâ ǃkhaisa. Xawe i ge sao ra-e ǂâis ǃnâ nî ūhâ: “ǁNā-amaga, ǃgâsado, ǁnās ǃgâ-ai ôasa, sadu di ǂgaihes tsî ǃkhōǂuibasenhesa du nî ǁapoǁaposa; nēna du ga dīo, o du kom tātsē ǃnôa tideo.” (2Pet. 1:10) ǁNās ǀkha i ge ǂkhauhesa Xristeǁî-e ǀhomma ǃoa īs ǃgao i ga ǁhûihe tamas ka io ǂgaihe xawe ǂgomǂgomsase i ga hâ o ǀgui nē ǃâubasensa nî ǃkhōǃoa.​—Fil. 3:12-14; Heb. 3:1; J.ǂHa. 2:10.

7. ǂKhauhesana mati a ǂan ǀhommi di ǃâubasensan ūhâ ǃkhaisa?

⁷ Xawe khoe-e mati a ǂan ǀhommi di ǃâubasensa i ūhâ ǃkhaisa? Nēsa da ge ǃgāsase Paulub mîdi Romes ǃnâ ge hâ i ǂkhauhesan “ǃanudo” di ge ǂgaihen didi ǃnâ-ū ra mû. ǁÎb ge ge mî: “ǃGāsis di gagasa du ǃkhōǃoa tama hâ xui-ao, ǁkhawa du nî ǃaose; xawe du ge ǀgôasis di Gagaba ge ǃkhōǃoa, ǁîb ǃnâ du Abba, ti Îtse, ti ra ǂgaiba. Nē gagab ǁkhāb ge sada gagas ǀkha ra ǀhûǀguitimî, Elob ôa da a ǃkhaisa.” (Rom. 1:7; 8:15, 16) ǃAnu gagab ǃnā-ūb ge Eloba ǂkhauhesana ra ǃgāsaba kai ǀhommi di ǃâubasensan ūhâ ǃkhaisa.​—1Tes. 2:12.

8. 1 Johaneb 2:20, 27 tsîna mati ra ǁgau ǂkhauhesa Xristeǁîn nau khoen xa ǂkhauhen hâ ǃkhaisa mîbahesa ǂhâ tama hâ ǃkhaisa?

⁸ Jehovab ge ǁnān hîna ǀhommi ǃnâ sī ǂgaeǂguis di ǃâubasensa ūhâna ǁîn di ǂâidi tsî ǂgaogu tsîn ǃnâ ǂgomoǃnâsiba mā tama hâ. (Khomai re 1 Johaneb 2:20, 27.) ǂKhauhesa Xristeǁîn ge Jehovab xa nî ǁkhāǁkhāhe ǀhaohâb ǃnâ-ū nau Xristeǁîn khami. Xawen ge khoe-i xa ǂkhauhen hâ ǃkhaisa mîbahesa ǂhâ tama hâ. Jehovab ge ǁîb di ǃanu gagaba ra sîsen-ū ǁîna ǂkhauhen hâ ǃkhaisa ǃgāsaba kaisa.

9. Khoe-i ga ǂkhauhe o, o i tae-i ǀkharaǀkhara-e ra hōǃâ Efeseǁîn 1:18 tawa i ra ǁguiǃāhe khami?

⁹ ǂGui ǃoaba-aon Elob din ge nētsē ǀnîsi a ǃgombahe ǁnâuǃasa tae-i khoe-i ǀkha ra īsa ǂkhauhe i ga o. Nēs ge a ǁnâuǃaxa ǁîn ǂkhauhesa tama amaga. Elob ge khoesiba ǃhūbaib ain ǀamosib kōse nî ûi amaga ge kuru ǀhommi ǃnâs ose. (Gen. 1:28; Psa. 37:29) Xaweb ge ǀnîna ge ǁhûi in ǀhommi ǃnâ sī ûi. ǁNās ǀkhab ge ǁînab ra ǂkhau ǁaeb ai ǁîn di ǃâubasens tsî ǂâiǀgaub tsîna ra dawa în ǀhommi ǃnâ sī ûisa ǃoa mûǂui.​—Khomai re Efeseǁîn 1:18.

10. ‘ǁKhawa ǃnaesa’ tae-e ra ǂâibasen? (ǀGamirosa mû re.)

¹⁰ Xristeǁîn ga ǃanu gagab ǀkha ga ra ǂkhauhe o, on ge ‘ǁkhawa ra ǃnae.’ * Jesub tsîn ge ge ǁguiǃā īǁkhā tama i hâsa khoe-i hîna ǂkhauhe tama hâ-e mati i “ǁkhawa ǃnaes” tamas ka io “gagaba xu ǃnaesa” ra tsâsa ǁguiǃābasa.​—Jhn. 3:3-8.

11. ǁGuiǃā re khoe-i hîna ǂkhauhe hâ i mati ra tsâsa?

¹¹ Xristeǁîn ǂâiǀgauba mati ra ǀkharaǀkharahe ǂkhauhesa kain ga o? Jehovab nē Xristeǁîna nî ǂkhauhesa kai aiǃan ge  ǃhūbaib ai ǀamosib kōse ûis di ǃâubasensa gere ǃgôaǃgâ. ǁÎn ge Jehovab eloxoresasiba nî ūbē tsî nē ǃhūbaiba nî paradais kai ǁaeba ǃoa gere mûǂui. ǀNîsin ge ǁîna ǁîn omaris ǁani-i tamas ka io ǀhōsa-i hîna ge ǁō-e khâisa xu ǁkhoreǁharesa ǃoa gere mûǂui. Xawen ge ǂkhauhesa kain ges khaoǃgâ ǁîn di ǂâiǀgauba ge ǀkharaǀkhara. Tae-i ǃaromasa nēsa? ǁÎn ge ǃhūbaib ai hâs ǃgâi tama hâ di ge ǂâi tsoatsoa tama hâ i. ǁÎn ge ǁîn ǂâiǀgauga ǃgomsinan gere hōǃâ tamas ka ion ge tsûaǂgao hâ i amaga ge ǀkharaǀkhara tama hâ i. ǁÎn ge ǂkhauhesa kain ge o, o ǃhūbaib ai hâs a ǀopeǀopesa di ge ǂâi tama hâ i. Jehovab ge ǃanu gagaba ge sîsen-ū îb ǁîn ǂâiǀgaugu tsî ǁîn ǃâubasens hînan ǃgôaǃgâ hâs tsîna ǀkharaǀkhara.

12. 1 Petrub 1:3, 4 ǃoagun ǂkhauhesa Xristeǁîna ǁîn di ǃâubasens xa mati ra tsâ?

¹² ǂKhauhesa khoe-i ge nē ǀō-aisa aiǂhanuba i anu tama hâ khami a tsâ ǁkhā. ǁÎn ge tātsēs tsîna Jehovab ge ǁhûi nî ǃkhaisa ǂgomoǃnâ tama hâ. Kaisen ge ra ǃgâiaǂgao tsî ǀhommi ǃnâ sī ûis di ǃâubasensa ra ǃgôaǃgâ.​—Khomai re 1 Petrub 1:3, 4.

13. ǂKhauhesana mati ǁîn di ûib ǃhūbaib ain ūhâb xa ra tsâ?

¹³ Nēsa ra ǂâibasen ǂkhauhesan ge ra ǁō ǂgao di. Apostel Paulub ge nē dîsa ra ǃeream. ǁÎb ge ǁîn sorode tents ǀkha ra ǀgopeǀnō tsî ge mî: “Nē sorosi ommi ǃnâ da hâ hîa da ra ǀhâimâinǀom tsî da ǃgomǃgomhe hâ xui-ao; ǂgaeǂuiǀkhāhe tama i tsî ǂgaeǂgāhe ǂgao da ra amaga, ǁōsa-i nî ûib xa harahese.” (2Kor. 5:4) Nē Xristeǁîn ge ǃhūbaib ai ûisa ǀope tama hâ tsî nē ûib ǃhaese nî toas tsîna ǃâubasen tama. Xawen ge ûib ǃnâ ǃgâiǃgâibasensa ūhâ tsî mâ tsēs hoasa ra sîsen-ū Jehovaba ǁîn di omaris ǁanin tsî ǀhōsan tsîn ǀkha ǃoabasa. Tae-i ǀgui-en ga dī xawen ge ǀō-aisa ǃâubasens hînan hānîǁaeb ǃgao ūhâsa ǂâis ǃnâ ra ūhâ.​—1Kor. 15:53; 2Pet. 1:4; 1Jhn. 3:2, 3; J.ǂHa. 20:6.

14. Tae-e ǁgau tama hâ khoe-i ǃanu gagab ǀkha ǂkhauhe hâsa?

¹⁴ ǀNîsi du ge ra ǂhâ ǃanu gagab ǀkha du ǂkhauhe hâ ǃkhaisa. Nēs ga ra io, o sao ra ǂhâǂhâsa dîdi xa ǂâi re: Kaise ǀgaisa turuba du ūhâ Jehovab di ǂâisa dīsa? ǂÂi i du ra ǁkhoaǂgaosiba du ūhâsa aoǁnâ sîsenni ǃnâ? Elobmîsa ǁkhāǁkhāsens xa du ǃgâibahe tsî Elob di “ǃgamsib” xa ǁkhāǁkhāsens tsîna a ǀnam? (1Kor. 2:10) ǂÂi i du ra Jehovab ge ǃgâi sîsenǂuiba aoǁnâ sîsenni ǃnâ a mā du ǃkhaisa? ǂÂi i du ra kai ǃereamsa du ūhâ di Jehovab xa nau khoena ǁkhāǁkhās ǃnâ? Jehovab ge ǂgui ǀgaugu ǃnâ sadu ûib ǃnâ a hui du ǀgausa du ra mû? Nē dîdi hoade du ga î di ǃeream o, o i ra ǁgau ǀhommi di ǃâubasensa du ūhâsa? Hî-î nēs ge di ǂâibasen tama hâ. Tae-i ǃaroma? Elob di ǃoaba-aon hoan ge nē ǀgaub ǃnâ a tsâ ǁkhā ǂkhauhe tamas ka ion ga ǂkhauhesa tama i xawe. ǁÎb di ǃanu gagab ǃnâ-ūb ge Jehovaba ǁîb di ǃoaba-aon hoana ǀgaiba a mā ǁkhā ǀhommi ǃâubasens tamas ka io ǃhūbaib ǃâubasensan ga ra ūhâ i xawe. ǀNîsi du ga aitsama ga ra ǂâi o ǂkhauhe du hâ di, o du ge amabes ǃnâ ǂkhauhesa tama hâ. ǁNān hîna Jehovab xa ra ǁkhauhen ge ǂkhauhe tamas ka ion ǂkhauhe tama hâsa ǂâiǃgâ tama hâ. ǁÎn ge nēsa a ǂan.

15. Mati da a ǂan hoan hîna ge Elob di ǃanu gagaba a ǃkhōǃoan ǀhomma ǃoa īs ǃgao ǁhûihe tama hâsa?

 ¹⁵ Elobmîs ǃnâ da ge ǂgomǂgomsa aogu aiǁgaude ra mû hîna ge ǃanu gagaba a ǃkhōǃoa ga xawe ge ǀhomma ǃoa īs di ǃâubasensa ūhâ tama hâ i ga. Davib ge ǃanu gagab xa gere daoǁgauhe. (1Sam. 16:13) ǃAnu gagab ge ǁîba ge hui îb Jehovab di ǃgamsiba ǁnâuǃā tsî ge daoǁgau bi îb Elobmîs di ǃâ-e xoa. (Mrk. 12:36) Xaweb ge apostel Petruba ge mî “Davib ge ǀhommi ǃoa ǃapa tama hâ.” (ǃNǃkh. 2:34) Johaneb ǁĀǁnâ-aob ge ‘ǃanu gagab ǀkha ge ǀoaǀoahe.’ (Luk. 1:13-16) Jesub ge ge mî Johaneb xa a ǀgapi khoe-i ge ǀkhai di xaweb ge ǁkhawa ge mî Johaneb ge ǀhommi Gaosib di ǃâ tide di. (Mat. 11:10, 11) Jehovab ge ǁîb di ǃanu gagaba ge sîsen-ū nē khoega huisa i gu ǂoaǂamsa xūna dī xaweb ge ǁîb di gagaba ge sîsen-ū tama hâ i ǁîga ǁhûisa i gu ǀhomma ǃoa ī. Nēsa ra ǂâibasen ǁîgu ge ǂgomǂgomsa tama hâ isa ǁnān hîna ge ǀhommi di ǃâubasensa a hōn xa. Hî-î. Nēs ge ra ǂâibasen Jehovab ge ǁîga khâisa nî mā di paradais ǃhūbaib ai ûis ǃgao.​—Jhn. 5:28, 29; ǃNǃkh. 24:15.

16. Elob di ǃoaba-aon ǂguina nētsē tae-i ǃâubasensa ǃoa ra mûǂui?

¹⁶ ǂGui ǃoaba-aon Elob din ge nētsē ǀhommi ǃnâ ûis di ǃâubasensa ūhâ tama hâ. Abrahammi, Saras, Davib, Johaneb ǁĀǁnâ-aob tsî ǂgui aogu tsî taradi Elobmîs ǁaegu din khamin ge ǂguina nētsē ǃhūbaib ai ûisa ǃoa ra mûǂui Elob di Gaosib ǃnāga.​—Heb. 11:10.

17. Mâ dîde da sao ra ǁkhāǁkhāǃâs ǃnâ nî ǃhoaǃgao?

¹⁷ ǀNî ǂkhauhesa ǃgâsan noxoba sida ǁaegu hâ amaga da ge nētsē ǀnî dîde ra dîsen. (J.ǂHa. 12:17) Aiǁgause ǂkhausa khoena mati nî mûsen? Khoe-i ga sadu ǀhaohâb ǃnâ Jesub ǁōb ǂâiǂâisens di pere-e ǂû tsî ǂauxûi-e ā o, o du ǁnā khoe-e mati nî mû? O ǁnān hîna ǂkhauhen ge hâ di ra mîn di ǃgôab ga ra kai os? Nēs xa du nî ǂâiǂhansen? Nē dîde da ge sao ra ǁkhāǁkhāǃâs ǃnâ nî ǃeream.