1-2. Jehovab ǃoaba-aon ǂguina mâ ǃgomsiga ra hōǃâ tsî nēsa mâ ǀgaugu ǃnâ ǁîna ra tsâǀkhā?

SAO RA ǃnona aiǁgaudi xa ǂâi re: ǂKham ǃgâsab ge ǁîb ǀaeǃkhō-aob xa go mîbahe ǁkhōǁkhōsa ǀaebab ge ūhâ hîna ǁîba ǂkhabu kais ǀguisa nî hî ba di. ǃGarise ra sîsen ǃgâsab hîna ǁîb di 50ǁî kurigu ǃnâ hâb ge ǁîb sîsen-e ge ǂoaǃnâ tsî ǃgariseb ra ǁgūtsâ xawe ǀnî hâ sîsen-e ge hō tama hâ i. ǂGomǂgomsa kaira ǃgâsas ge Jehovab ǃoabas ǃnâ dīs gere khami ǃnāsase dīhō tama hâ.

² Sadu tsîn ga ǀgapise da goro ǃhoaǃgao mâsigu ǃnâ hōsen o, o du ge xūose a tsâ tsoatsoa ǁkhā. Nē mâsigu ge ǂkhîoǃnâse tsâ kai du, ǃgôaǁnâsen tsî nau khoen ǀkha du ūhâ ǀhōsagudi tsîna ǃgâi tama ǀgaugu ǃnâ nî tsâǀkhā.

3. Satanni tsî ǁnān hîna ǁîba ra ǁgaen tsîna mati khoesib ûib xa ra ǂâi?

³ Nē ǃhūbaib ge Satanni ǂâi ǀgaub ûib xa hâba ūhâ. Satanni ge khoena hoaǁae xūose ra hâ-ū. ǁÎb ge ǁgai ǀgaub ǃnâ Evasa ge mîba Elobas ga ra ǁnâuǀnamoǃnâ o, os nî ǃnorasa di, ǂan i ge i xawe nēs ǁîs ǁōba ra ǂâibasensa. Satanni ge hoaǁae nē ǃhūbaib di marisi ǁhōgu, ǂgīǂgōsi ǁaxasigu tsî ǂgomdi tsîna ra ǂgaeǂgui. ǁNā-amagan ge khoen hîna ǂgui mari-e ūhân, ǂgīǂgōsi ǂgaeǂgui-aogu tsî ǂgomdi ǂgaeǂgui-aogu tsîna ûiba ǃgôasi-e ūhâba tama hâ tsî khoen ra tsâ ǀgaub xa ǁae tama.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Xawe Jehovab ge ra ǂgao i da sida xa ǃgâise tsâ  tsî xūose ra tsâ kai da mâsigu ǃnâ da ga hâ o, o ra ǂkhâǃnâ da. (Psa. 136:23; Rom. 12:3) Nē ǁkhāǁkhāǃâs ge Jehovab mati sao ra ǀgaugu ǃnâ ra hui da ǀgausa ra ǃhoaǃgao: (1) ǀAeb mâsigu, (2) mari ǃgomsigu, (3) tsî kairasis ga ra tsâ kai da o Jehovab ǃoabas ǃnâ da ge xū-e a dī ǁoa di. ǂGurose hā re i da kō tae-i ǃaroma da ǂgomǃgâsiba nî ūhâsa Jehovab mâ khoe-i hoa-e ra ǃgôaǃgâ ǃkhaisa.

5. Tae-e ra ǁgau du Jehovab khoesiba ra ǃgôaǃgâ ǃkhaisa?

⁵ ǃHūbaib di tsaraba xu da kuru-e hâ xawe da ge nēs xa kaise a ǀō-aisa. (Gen. 2:7) ǀNî aiǁgaude ǃoa kō re hîna ra ǁgaude Jehovab ra ǃgôaǃgâ da ǃkhaisa. ǁÎb ge khoesiba ǁîb ǀgaugan nî ǁgae ǀgaub ǃnâ ge kuru. (Gen. 1:27) ǁÎb ge khoesiba nau xūn hoan xa ǀgapise ge kuru tsî ǁîna ǃhūbaib tsî xamanin tsîna kōǃgâs ǁgaumâisa ge mā.​—Psa. 8:4-8.

6. Mâ ǀnîhâ ǃaromas tsîna hâ hîna ra ǁgausa Jehovab ǀoasa kurusa ūhâ tama hâ khoena ra ǃgôaǃgâ di?

⁶ Adammi ge ǁores khaoǃgâs tsînab ge Jehovaba noxoba khoesiba gere ǃgôaǃgâ. ǁÎb ge sida kaise ra ǃgôaǃgâ ǁnā-amagab ge ǁîb di ǀnamǀnamsa ǀgôab Jesuba xoremarib ase sida ǁoren ǃgao ge mā. (1Jhn. 4:9, 10) Xoremarib di ǃgâigu ǃoagu ra sîsenseb ge Jehovaba ǁnān hîna ge Adammi di ǁoreb xa ǃaroma-e hâse a ǁōna khâisa nî mā ‘ǂhanu-ain tsî ǂhanuoǃnân tsîn hoana.’ (ǃNǃkh. 24:15) ǁÎb mîs ge ra ǁgau ǁîb mûǁae da kaise a ǀō-aisa ǃkhaisa ǀaesen, ǀgâsa tamas ka io da ga kaira xawes tsîna.​—ǃNǃkh. 10:34, 35.

7. Mâ ǃaromaden Elob ǃoaba-aona ūhâ ǂgomsa Elob ǁîna ra ǃgôaǃgâ ǃkhaisa?

⁷ Kaise ǂgui ǃaromade da ge ūhâ ǂgomsa Jehovab ra ǃgôaǃgâ da ǃkhaisa. ǁÎb ge ǁîba ǃoa ge ǂgae da tsî ǃgâiǂhôasa da ra ūǃoa ǀgauba ra kō. (Jhn. 6:44) Jehovaba ǃoa da ge ǀgū tsoatsoa khamib ge ǁîb tsîna sida ǃoa ge ǀgū. (Jak. 4:8) Jehovab ge ǁîb ǁaeb tsî ǁkhāsib tsîna ra sîsen-ū sida ǁkhāǁkhās ǃnâ nēs ge ra ǁgau ǁîb ra ǃgôaǃgâ da ǃkhaisa. ǁÎb ge a ǂan tae ǃnôa khoe da a sa nēsi tsî hānîǁaeb ǃnâ da mati a ǃgâiǃgâisen ǁkhāsa. Tsî ǁîb ge ǀnam dab a amaga ra ǁnama da. (ǂKhm. 3:11, 12) Nēs ge ra ǁgau Jehovab ra ǃgôaǃgâ da ǃkhaisa.

8. Psalmdi 18:27-29 ǃnâ hâ mîde mati sida ǃgomsina da ra mû ǀgauba ra tsâǀkhā?

⁸ ǀNîn ge Gao-aob Daviba xūose gere mû xaweb ge ǁîba ge ǂan i Jehovab a ǀnam bi tsî ra ǂkhâǃnâ bi ǃkhaisa. Davib ge nēsa ǂan i amagab ge ǁîb ǃgomsigu ǃnâ gere mâǀgai. (2Sam. 16:5-7) ǃGomsina da ra hōǃâ ǁaeb ǃnâb ge Jehovaba nî hui da nē ǃgomsin xa ǀkhara mûǂuiba ūhâsa tsî nē ǃgomsin ǃnâ mâǀgais ǀkhas tsîna nî hui da. (Khomai re Psalmdi 18:27-29.) Jehovab ǂkhâǃnâsa da ga ūhâ o, o i ge xū-e ǁkhae da tide ǁîba ǂkhîb ǀkha ǃoabasa. (Rom. 8:31) Hā re i da ǃnona mâsiga ǃhoaǃgao hîna da ǂâis ǃnâ nî ūhâ ga Jehovab a ǀnam da tsî ra ǃgôaǃgâ da ǃkhaisa.

9. ǀAeb mâsiga mati sida ra mûsen ǀgauba a tsâǀkhā ǁkhā?

⁹ ǀAeb mâsib ge emosioneel ǁgâiba sida ai a ūhâ ǁkhā tsî xūose a tsâ kai da ǁkhā. ǀNîsi da ge tao ǁkhā khoen ga mû o sida ǀkha i xū-e tsūsa tamas ka io da  ga hoaǁae nau khoen huiba ǂhâ o. Nau khoen ga ǀaesen da hâsa ga ra ǀū i xawe da ge taos tsâsiga a ūhâ ǁkhā dī da geres xa da ǃnāsase a dīhō ǁoa amaga. Jehovab ge ǁnāti ī mâsigu ǃnâ ra ǂkhâǃnâ da. Mâ ǀgaub ǃnâ?

10. ǂKhoamîdi 12:25 ǃoagu i tae-e nî hui da ǀaesen da ga ǁaeb ai?

¹⁰ ǀAesen da ga ǁaeb ai i ge ‘ǃgâi mîsa’ a ǂkhâǃnâ da ǁkhā. (Khomai re ǂKhoamîdi 12:25.) Elobmîs ǃnâb ge Jehovaba ǂgui ǃgâi xūna ge mîba da hîna ra ǂâiǂâiǃnâ da na ǁîb ǃoagu da a ǂhâǂhâsa ǃkhaisa ǀaesen da ga xawes tsîna. (Psa. 31:19; 41:3) Elobmîsa da ga khomai tsî khomai da ra xūna ǂâiǃgâ o, ob ge Jehovaba nî hui da i da sida ǀaeb mâsib xa da ūhâ ǂâiǂhansende sîsenǂam.

11. ǀGui ǃgâsaba mati Jehovab huiba ge hōǃâ?

¹¹ Jorge aiǁgaus xa ǂâi re. ǂKhamkhoeb a hînab ge Jorga ǀaeba ge hōǃnâ-e hîna ge ǁgaiǂoas ǀguisa gere hîba tsîb ge xūose nēs xa gere tsâ kai-e. “ǀAeb mâsib gere tsâ kai te ǀgaub tsî khoen ge nēs xa ǃaroma-e hâse gere kō te ǀgaub tsîn ǃgao ta ge ge aiǂhomisen tama hâ i” tib ge Jorga ra mî. “Ti mâsib ra ǁgaiǂoa khami ta ge ti ûib nî dawa ǀgaub xa gere ǂâi. Kaise ta ge ge tsûaǂgao hâ i tsî Jehovaba ge ǀkhoma îb hui te.” Jehovaba mati ge hui bi? “Gaxu ǁaeba ta ge ti ǂâisa xū-i ai ǂnûi ǁoa i amaga ta ge ǀoro xoadi ǀguide Psalmde xu gere khomai hîna ra ǁgaude Jehovab ǁîb ǃoaba-aona ra tsâba ǃkhaisa. ǁNā xoade ta ge mâ tsēs hoasa gere khomaiǃgâ tsî di ge kaise gere ǁkhaeǂgaode. ǁAeb ǀkhan ge khoena ge mû tsoatsoa ǃnāsase ta ra ǀnomsa. ǁÎn ge mîs tsîna ge hî ti ǂkhîxa tanisen ǀgaub ǁîna ra ǂkhâǃnâsa. Nēs ge ge mûǂan kai te  Jehovab ge ti ǀgorede a ǃereamsa. ǁÎb ge ge hui te i ta ti xa ta gere ǂâi ǀgauba dawa. Tita ge ǁîb mîs ǃnâb Jehovaba ra mî ti ǀaeb mâsib ǂamaib ra mû te ǀgaus xa ge ǂâi tsoatsoa.”

12. Sida ǀaeb mâsib ga ǃgâi tama ga ra i o, o da mati Jehovab huiba a hō ǁkhā?

¹² Sida ǀaeb mâsib ga ǃgâi tama ga ra i o, o da ge nî ǂan Jehovab sida ra ǃkharu ǃnâ ǃgomga a ǂansa. ǁÎba ǂgan re îb hui du i du sadu mâsiba ǃgâi ǀgaub ǃnâ mû ǁkhā. Tsî Elobmîs ǃnâ ǁkhaeǂgao du ǁkhā a haisi-amsa ôa re hînab ge Jehovaba ǁnāpa a ǂgāsa sadu ǃgao. Xoadi hîna Jehovab matikōse ǁîb di ǃoaba-aona ra ǃgôaǃgâ ǃkhaisa ra ǁgaude ǃgaoǃgâ re. Nēsa du ra dī khami du ge nî mû Jehovab ǁnān hîna ǁîba ǂgomǂgomsase ra ǃoaban hoan ǃoa-ai a khoexaǃnâ ǃkhaisa.​—Psa. 84:11.

13. Omaris danaba mati a tsâ ǁkhā ǁîb sîsen-eb ga ǂoaǃnâ o?

¹³ Mâ omaris danab hoab ge ǁîb omaris ǂhâsiga ra kōǃgâ ǂgao. ǂÂi re ǃgâsab ga ǀnîsi xū-eb dī tama hâ hîna ǁîb sîsen-e ǂoaǃnâ o. ǁÎb ge ǃgarise ra ǁgūtsâ ǀnîhâ sîsen-e hōsa xaweb ge hō tama hâ. Nē ǃgomsinab ra hōǃâ amagab ge xūose a tsâ ǁkhā. Jehovab mîmâidi ai ǂgomaiǂnûisa mati a hui bi ǁkhā?

14. Jehovaba tae-i ǃaroma ǁîb di mîmâide hoaǁae ra dīǀoaǀoa?

¹⁴ Jehovab ge ǁîb di mîmâide hoaǁae ra dīǀoaǀoa. (Jos. 21:45; 23:14) Nēsab ge ǂgui ǃaroma di ǃgao ra dī. ǂGurose nēs ǁîb ǀonsa ra tsâǀkhā amaga. Jehovab ge ge mîmâi ǁîb di ǂgomǂgomsa ǃoaba-aonab nî kōǃgâ ǃkhaisa tsî nē mîmâisab ge ǁgui-ais ase ra mû. (Psa. 31:1-3) Jehovab ge a ǂan  tsûaǂgao da nî ǃkhaisa ǁnān hîna a ǁîb omaris ǁaninab ga kōǃgâ tama io. ǁÎb ge ge mîmâi sidab sorosises tsî gagasises tsîna nî kōǃgâ ǃkhaisa tsî xū-i ge ǁîba ǁkhae tide nē mîmâisa dīǀoaǀoas ǃnâ.​—Mat. 6:30-33; 24:45.

15. (a) ǂGuro ǁaeb Xristeǁîna mâ ǃgomsina gere hōǃâ? (b) Psalmdi 37:18, 19 tsîna mâ ǂgomǃgâsiba ra mā da?

¹⁵ Jehovab tae-i ǃaroma ǁîb mîmâide ra dīǀoaǀoa ǃkhaisa da ga ǂâihō o, o da ge ǂgomǃgâsiba nî ūhâ ǁîb nî hui da ǃkhaisa mari ǃgomsi-e da ga ūhâ o. ǂGuro ǁaeb Xristeǁîn di aiǁgaus xa ǂâi re. Jerusalems ǃnâ hâ ǀhaohâb ge mâǃoahe tsoatsoa o, “on ge hoatsama ge ǀgaruǀgaruhe . . . apostelgu ǀguigu ose.” (ǃNǃkh. 8:1) ǂÂi re nēs ge tae-e gere ǂâibasensa. ǁÎn ge mari ǃgomsiga gere hōǃâ. Xristeǁîn ge ǀnîsî ǁîn omdi tsî ǁamaxū ǃkhaigu tsîna ge ǂoaǃnâ. Xaweb ge Jehovaba ǁîna ge ǁnāxū ǃnâ tama hâ i tsîn ge ǁîn di ǂkhîb tsîna ge ǂoaǃnâ tama hâ i. (ǃNǃkh. 8:4; Heb. 13:5, 6; Jak. 1:2, 3) Jehovab ge ǁnā ǂgomǂgomsa Xristeǁîna gere ǂkhâǃnâ tsîb ge sida tsîna noxoba nî ǂkhâǃnâ.​—Khomai re Psalmdi 37:18, 19.

16. Tae-e a ǂâi kai da ǁkhā Jehovab sida di ǃoabasa ǃgôaǃgâ tama hâ di?

¹⁶ Kai da ra khami da ge a ǂâi ǁkhā Jehovaba da ge ǃnāsa-e a dība ǁoa di. Gao-aob Davib tsîn ge ǁkhā tsâsiga gere hōǃâ kaib ta khami. (Psa. 71:9) Jehovaba mati a hui da ǁkhā?

17. Jheri di ǀon hâ ǃgâsas di aiǁgausa xu da tae-e a ǁkhāǁkhāsen ǁkhā?

¹⁷ Jheri di ǀon hâ ǃgâsas di aiǁgaus xa ǂâi re. ǁÎs ge Gaosib ǀHû-omma kōǃgâs ǃgao ge hâ i ǀhaosa ǃoa ge ǁkhauhe hâ i xawes  ge ge ī ǂgao tama hâ i. ǁÎs ge ge mî: “Tita ge kaira hâ tsî ti aob ge ge ǁō tsî ta ge nē sîsenni ǃgao ǂansa ūhâ tama hâ. Xūo ta ge a.” ǁNā ǀhaos nî hâ ǃuis aiǃâs ge ǁîs ǂgaob hoab ǀkha Jehovaba ǃoa ge ǀgore. Sao ra tsēs ais ge Gaosib ǀHû-ommi tawa a sī o, os ge amabes ǃnâ ta nēba nî hâ di gere ǂâi. ǀHaos ǃnâb ge ǀgui ǃgâsaba gere ǁguiǃā ǂhâǂhâsa ǂans hîna da nî ūhâs ge Jehovab xa māsenxase ǁkhāǁkhāhesa. Jheris ge ra ǂâihō: “Tita ge ge ǂan i nē ǂansa ta ūhâ ǃkhaisa. Ā tsoatsoa ta ge ge mûǂan ta ge o Jehovab ge ti ǀgorede ra ǃeream di. ǁÎb ge ǂgomǃgâsiba gere mā te ǂhâǂhâsa xū-e ta ǁîb di ǃoabas ǃnâ a dīǁkhā ǃkhaisa tsîb ǁîba nî huitesa nē sîsen-e ǁkhāǁkhā tes ǃnâ-ū.” Jheris ge ǂâi-oa tsî ra mî: “ǁNā ǀhaos tawa ta ge ǃaob tsî ǂâiǂhansendi tsîn ǀkha ge ǂgâ. Xawe ta ge ǁnāpaxū ǂgomǃgâsib tsî ǂkhâǃnâhe hâse ra tsâse ge ǂoa.”

18. Elobmîsa mati ra ǁgau Jehovab sida ǃoabasa ra ǃgôaǃgâ ǃkhaisa kaira da ga xawes tsîna?

¹⁸ Kaira da ga xawes tsîna da ge ǂâis ǃnâ nî ūhâ Jehovab noxoba sîsen-e ūba da hâsa ǁîb di ǃoabas ǃnâ. (Psa. 92:12-15) Jesub ge ge ǁkhāǁkhā da dī da ra xū-i ga sida ǃgao ǂkharirose ga ra mûsen xaweb ge Jehovaba mâ xū-i hoa-i hîna da ǁîb ǃoabas ǃnâ ra dī-e ra ǃgôaǃgâ. (Luk. 21:2-4) ǁNā-amaga dīǁkhā du a xūn ai ǂgomaiǂnûi re. Aiǁgause du ge Jehovab xa ǃhoa ǁkhā, sadu ǃgâsana ǀgoreba tsî nauna a ǂkhâǃnâ ǁkhā în ǂgomǂgomsase hâ. Jehovab ge ǁîb di ǀhao-sîsen-aose ra mû da dī ǁkhā da a xūn xas ose xawe ǁîba da māsenxase ra ǁnâuǀnam amaga.—1Kor. 3:5-9.

19. Romeǁîn 8:38, 39 tsîna mâ ǂgomǃgâsiba ra mā da?

¹⁹ Kaise da ge Jehovaba ǃoabasa ra ǃgôaǃgâ ǁîb ǁnān hîna ǁîba ra ǃoabana ǀō-aisase ra mû amaga. ǁÎb ge ǁîb ǂâisa da nî dīǀoaǀoa ǀgaub ǃnâ ge kuru da tsî ama ǃoabas ge ǂkhîba sida ûigu ǃnâ ra mā da. (J.ǂHa. 4:11) ǃHūbaib ga xūose ga ra mû da xaweb ge Jehovaba ǁnā ǀgaub ǃnâ mû da tama hâ. (Heb. 11:16, 38) ǀAeb mâsigu, mari ǃgomsigu tsî kairasis tsîn xa da ga ǂkhabuǂâi o, o da ge ǂâis ǃnâ nî ūhâ xū-i xare i Jehovab ǀnamma xu ǀgora da tide ǃkhaisa.​—Khomai re Romeǁîn 8:38, 39.